ವಾಷಿಂಗ್ಟನ್: ಐಷಾರಾಮಿ ವೇಶ್ಯಾಗೃಹ ಹಗರಣಕ್ಕೆ(Luxury Brothel Scandal) ಸಂಬಂಧಿಸಿ ಗ್ರೇಡಿಯಂಟ್(Gradiant) ಎಂಬ ಸ್ವಚ್ಛ ನೀರಿಗೆ ಸಂಬಂಧಿಸಿದ ಸ್ಟಾರ್ಟ್ಅಪ್ನ ಭಾರತೀಯ ಮೂಲದ ಸಿಇಒ ಅನುರಾಗ್ ಬಾಜಪೇಯಿ ಅವರನ್ನು ಅಮೆರಿಕದಲ್ಲಿ ಬಂಧಿಸಲಾಗಿದೆ.
ಹೈ ಎಂಡ್ ವೇಶ್ಯಾಗೃಹಗಳಲ್ಲಿನ ಸೇವೆಗಳನ್ನು ಬಳಸಿಕೊಂಡು, ಭಾರೀ ಹಣ ಪಾವತಿಸಿದ ಆರೋಪ ಇವರ ಮೇಲಿದೆ. ಲೈಂಗಿಕ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳಲು ಗಂಟೆಗೆ ನೂರಾರು ಡಾಲರ್ ಗಳನ್ನು ಇವರು ನೀಡುತ್ತಿದ್ದರು ಎಂಬ ಆರೋಪ ಕೇಳಿಬಂದಿದೆ.
ಲೈಂಗಿಕ ಕ್ರಿಯೆಗಾಗಿ ಗಂಟೆಗೆ ಇಂತಿಷ್ಟು ಎಂಬಂತೆ ಭಾರೀ ಮೊತ್ತ ಪಾವತಿಸುತ್ತಿದ್ದ ಪ್ರಕರಣದಲ್ಲಿ ನ್ಯಾಯಾಲಯದ ದಾಖಲೆಗಳಲ್ಲಿ ಹೆಸರಿಸಲಾದ ಡಜನ್ ಗಟ್ಟಲೆ ವ್ಯಕ್ತಿಗಳಲ್ಲಿ ಅನುರಾಗ್ ಬಾಜಪೇಯಿ ಕೂಡ ಒಬ್ಬರು ಎಂದು ನ್ಯೂಯಾರ್ಕ್ ಪೋಸ್ಟ್ ವರದಿ ಮಾಡಿದೆ.
ಈ “ಗಣ್ಯ ಆರೋಪಿ”ಗಳ ಪಟ್ಟಿಯಲ್ಲಿ ವೈದ್ಯರು, ವಕೀಲರು, ಸರ್ಕಾರಿ ಅಧಿಕಾರಿಗಳು ಮತ್ತು ಸರ್ಕಾರಿ ಗುತ್ತಿಗೆದಾರರೂ ಸೇರಿದ್ದಾರೆ ಎಂದು ವರದಿ ತಿಳಿಸಿದೆ. ಏಷ್ಯಾದ ಮಹಿಳೆಯರೊಂದಿಗೆ ಲೈಂಗಿಕ ಕ್ರಿಯೆ ನಡೆಸಲು ಈ ಪುರುಷರು ಗಂಟೆಗೆ 600 ಡಾಲರ್ (ಅಂದರೆ 50,000 ರೂಪಾಯಿ) ವರೆಗೆ ಪಾವತಿಸಿದ್ದಾರೆ ಎಂದು ತನಿಖೆಯಿಂದ ತಿಳಿದುಬಂದಿದೆ. ಅಚ್ಚರಿಯ ಸಂಗತಿಯೆಂದರೆ, ಈ ವೇಶ್ಯಾಗೃಹದಲ್ಲಿನ ಬಹುತೇಕ ಏಷ್ಯಾ ಮಹಿಳೆಯರು ಲೈಂಗಿಕ ಕಳ್ಳಸಾಗಣೆಯ ಸಂತ್ರಸ್ತರು ಎಂಬ ಮಾಹಿತಿಯಿದೆ.
ಅನುರಾಗ್ ಬಾಜಪೇಯಿ ಅವರು ಗ್ರೇಡಿಯಂಟ್ ಎಂಬ ನವೋದ್ಯಮದ ಸಿಇಒ ಆಗಿದ್ದಾರೆ. ಅವರು ಎಂಐಟಿಯಿಂದ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ನಲ್ಲಿ ಪಿಎಚ್ಡಿ ಪಡೆದಿದ್ದಾರೆ. ಎಂಐಟಿ ಮತ್ತು ಮಿಸ್ಸೌರಿ ವಿಶ್ವವಿದ್ಯಾಲಯದಲ್ಲಿ ಸಂಶೋಧನಾ ಕಾರ್ಯಗಳೊಂದಿಗೆ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದ್ದರು. ಅವರ ಬಂಧನವಾಗುತ್ತಲೇ, ಅನುರಾಗ್ ಬಾಜಪೇಯಿ ಅವರಿಂದ ರಾಜೀನಾಮೆ ಪಡೆಯಬೇಕು ಎಂದು ಗ್ರೇಡಿಯಂಟ್ ಕಂಪನಿಯೊಳಗಿಂದಲೇ ಆಗ್ರಹಗಳು ಕೇಳಿಬರತೊಡಗಿವೆ.
ಇನ್ನೊಂದೆಡೆ ಕಂಪನಿಯು ತನ್ನ ಸಿಇಒ ಬಾಜಪೇಯಿಯವರನ್ನು ಸಮರ್ಥಿಸಿಕೊಂಡು ಹೇಳಿಕೆ ಬಿಡುಗಡೆ ಮಾಡಿದ್ದು, “ನಾವು ನ್ಯಾಯ ವ್ಯವಸ್ಥೆಯಲ್ಲಿ ನಂಬಿಕೆ ಇಟ್ಟಿದ್ದೇವೆ. ಮುಂದಿನ ದಿನಗಳಲ್ಲಿ ನ್ಯಾಯ ದೊರೆಯಲಿದೆ ಎಂಬ ವಿಶ್ವಾಸವಿದೆ. ಗ್ರೇಡಿಯಂಟ್ ಕಂಪನಿಯು ತನ್ನ ತಾಂತ್ರಿಕ ನಾವೀನ್ಯತೆಯಲ್ಲಿ ಉತ್ಕೃಷ್ಟತೆಯನ್ನು ಮುಂದುವರಿಸುತ್ತದೆ. ಸಮಾಜಕ್ಕೆ ಶುದ್ಧ ನೀರನ್ನು ಖಚಿತಪಡಿಸಿಕೊಳ್ಳುವ ನಮ್ಮ ಧ್ಯೇಯವನ್ನು ಪೂರೈಸುವಲ್ಲಿ ಶ್ರಮಿಸುತ್ತೇವೆ” ಎಂದು ಹೇಳಿದೆ.
