ನವದೆಹಲಿ: ಮರುಬಳಕೆ ಮಾಡಬಹುದಾದ ಇಂಧನದ ಉತ್ಪಾದನೆಯಲ್ಲಿ ಭಾರತವು ಹೊಸ ಮೈಲುಗಲ್ಲು ನೆಟ್ಟಿದೆ. ಹೌದು, ಸೌರಶಕ್ತಿ ಹಾಗೂ ವಾಯುಶಕ್ತಿ ಮೂಲಕ ವಿದ್ಯುತ್ ಉತ್ಪಾದನೆ ಮಾಡುವುದರಲ್ಲಿ ಭಾರತವು ಜರ್ಮನಿಯನ್ನೇ ಹಿಂದಿಕ್ಕಿ, ವಿಶ್ವದಲ್ಲೇ ಮೂರನೇ ಸ್ಥಾನ ಪಡೆದಿದೆ. ಈ ಕುರಿತು ಎಂಬರ್ ಎಂಬ ಗ್ಲೋಬಲ್ ಎನರ್ಜಿ ಥಿಂಕ್ ಟ್ಯಾಂಕ್ ಬಿಡುಗಡೆ ಮಾಡಿರುವ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
2024ರಲ್ಲಿ ಜಾಗತಿಕವಾಗಿ ಉತ್ಪಾದನೆಯಾದ ವಿದ್ಯುತ್ ನಲ್ಲಿ ಸೌರಶಕ್ತಿ ಮತ್ತು ವಾಯುಶಕ್ತಿಯ ಪಾಲು ಶೇ. 15ರಷ್ಟಿದೆ. ಇದೇ ವರ್ಷ ವಿಶ್ವಾದ್ಯಂತ ತಯಾರಾದ ಒಟ್ಟು ಸೌರಶಕ್ತಿ ಮತ್ತು ವಾಯುಶಕ್ತಿಯಲ್ಲಿ ಭಾರತದ ಪಾಲು ಶೇ. 10ರಷ್ಟಿರುವುದನ್ನು ಎಂಬರ್ ಸಂಸ್ಥೆಯ ಗ್ಲೋಬಲ್ ಎಲೆಕ್ಟ್ರಿಸಿಟಿ ರಿವ್ಯೂ ವರದಿಯಲ್ಲಿ ತಿಳಿಸಲಾಗಿದೆ.
ಭಾರತದಲ್ಲಿ ಈಗಲೂ ಕೂಡ ಕಲ್ಲಿದ್ದಲು ಆಧಾರಿತ ವಿದ್ಯುತ್ ಉತ್ಪಾದನೆಯೇ ಹೆಚ್ಚಾಗಿದೆ. ಆದರೂ ಇತ್ತೀಚಿನ ವರ್ಷಗಳಲ್ಲಿ ಈ ಪಳೆಯುಳಿಕೆ ಇಂಧನದ ಬಳಕೆ ಕಡಿಮೆ ಆಗುತ್ತಾ ಬರುತ್ತಿದೆ. ಸೌರಶಕ್ತಿ, ವಾಯುಶಕ್ತಿಯಂತಹ ಸ್ವಚ್ಛ ಇಂಧನದ ಉತ್ಪಾದನೆ ಹೆಚ್ಚುತ್ತಿದೆ. ಎಂಬರ್ ವರದಿ ಪ್ರಕಾರ, ಭಾರತದಲ್ಲಿ ಉತ್ಪಾದನೆಯಾಗುವ ಒಟ್ಟು ವಿದ್ಯುತ್ ನಲ್ಲಿ ಶೇ. 22ರಷ್ಟವು ಮರುಬಳಕೆ ಶಕ್ತಿಯ ಮೂಲದ್ದಾಗಿವೆ.
ಭಾರತದಲ್ಲಿ ಉತ್ಪಾದಿಸುವ ಒಟ್ಟು ಮರುಬಳಕೆ ಇಂಧನದಲ್ಲಿ ಜಲವಿದ್ಯುತ್ ಪ್ರಮಾಣವು ಶೇ.8ರಷ್ಟಿದೆ. ಹಾಗೆಯೇ, ಸೌರ ಹಾಗೂ ವಾಯುಶಕ್ತಿ ಮೂಲಕ ಶೇ.10ರಷ್ಟು ಮರುಬಳಕೆ ವಿದ್ಯುತ್ ಅನ್ನು ಉತ್ಪಾದಿಸಲಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ಮರುಬಳಕೆಯ ಇಂಧನದ ಉತ್ಪಾದನೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. ಹಾಗಾಗಿ, ಭಾರತವು ಮೈಲುಗಲ್ಲು ಸ್ಥಾಪಿಸಿದೆ ಎಂದು ತಿಳಿದುಬಂದಿದೆ.
