ಲಂಡನ್ : ಜೂನ್ ತಿಂಗಳಿನಿಂದ ಇಂಗ್ಲೆಂಡ್ ಮತ್ತು ವೇಲ್ಸ್ ಆತಿಥ್ಯದಲ್ಲಿ ನಡೆಯಲಿರುವ 2026ರ ಐಸಿಸಿ ಮಹಿಳಾ ಟಿ20 ವಿಶ್ವಕಪ್ಗೆ ಕ್ಷಣಗಣನೆ ಆರಂಭವಾಗಿದೆ. ಪಂದ್ಯಾವಳಿ ಆರಂಭಕ್ಕೆ ಇನ್ನು ಕೇವಲ 60 ದಿನಗಳು ಬಾಕಿ ಇರುವಂತೆಯೇ, ಅಂತರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ಮಹಿಳಾ ಕ್ರಿಕೆಟ್ ಇತಿಹಾಸದಲ್ಲೇ ಅತಿ ದೊಡ್ಡ ಮೊತ್ತದ ಬಹುಮಾನ ನಿಧಿಯನ್ನು ಘೋಷಿಸುವ ಮೂಲಕ ಕ್ರೀಡಾಲೋಕದ ಗಮನ ಸೆಳೆದಿದೆ. ಮಹಿಳಾ ಕ್ರಿಕೆಟ್ ಅನ್ನು ಪುರುಷರ ಕ್ರಿಕೆಟ್ಗೆ ಸಮಾನವಾಗಿ ಬೆಳೆಸುವ ನಿಟ್ಟಿನಲ್ಲಿ ಇದೊಂದು ಐತಿಹಾಸಿಕ ಹೆಜ್ಜೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಈ ಬಾರಿ ಐಸಿಸಿ ಒಟ್ಟು 8,764,615 ಯುಎಸ್ ಡಾಲರ್ (ಸುಮಾರು 73.5 ಕೋಟಿ ರೂಪಾಯಿ) ಬಹುಮಾನದ ನಿಧಿಯನ್ನು ಮೀಸಲಿಟ್ಟಿದೆ. ಇದು 2024ರ ಆವೃತ್ತಿಗೆ ಹೋಲಿಸಿದರೆ ಶೇ. 10 ರಷ್ಟು ಹೆಚ್ಚಳವಾಗಿದೆ. ಕಳೆದ ಬಾರಿ 10 ತಂಡಗಳ ನಡುವೆ ಸುಮಾರು 7.9 ಮಿಲಿಯನ್ ಡಾಲರ್ ಹಂಚಿಕೆಯಾಗಿತ್ತು. ಆದರೆ ಈ ಬಾರಿ ಮೊದಲ ಬಾರಿಗೆ ಪಂದ್ಯಾವಳಿಯನ್ನು 12 ತಂಡಗಳಿಗೆ ವಿಸ್ತರಿಸಲಾಗಿದ್ದು, ಅದಕ್ಕೆ ತಕ್ಕಂತೆ ಬಹುಮಾನದ ಮೊತ್ತವನ್ನೂ ಹೆಚ್ಚಿಸಲಾಗಿದೆ. ಮಹಿಳಾ ಕ್ರೀಡಾಪಟುಗಳ ಮೇಲಿನ ಹೂಡಿಕೆ ಮತ್ತು ಅವರ ಪ್ರಭಾವ ಜಾಗತಿಕವಾಗಿ ಹೆಚ್ಚುತ್ತಿರುವುದಕ್ಕೆ ಇದು ಸಾಕ್ಷಿಯಾಗಿದೆ.
ಚಾಂಪಿಯನ್ಸ್ ಮತ್ತು ರನ್ನರ್ಸ್-ಅಪ್ಗಳಿಗೆ ಬಂಪರ್ ಲಾಭ
ಪಂದ್ಯಾವಳಿಯಲ್ಲಿ ವಿಜೇತರಾಗುವ ತಂಡಕ್ಕೆ ಬರೋಬ್ಬರಿ 2,340,000 ಯುಎಸ್ ಡಾಲರ್ (ಸುಮಾರು 19.6 ಕೋಟಿ ರೂಪಾಯಿ) ನಗದು ಬಹುಮಾನ ಸಿಗಲಿದೆ. ಇನ್ನು ಎರಡನೇ ಸ್ಥಾನ ಪಡೆಯುವ ಅಂದರೆ ರನ್ನರ್ಸ್-ಅಪ್ ತಂಡವು 1,170,000 ಯುಎಸ್ ಡಾಲರ್ (ಸುಮಾರು 9.8 ಕೋಟಿ ರೂಪಾಯಿ) ಪಡೆಯಲಿದೆ. ಸೆಮಿಫೈನಲ್ ಹಂತದಲ್ಲಿ ಸೋಲುವ ಎರಡೂ ತಂಡಗಳಿಗೆ ತಲಾ 675,000 ಯುಎಸ್ ಡಾಲರ್ ಮೊತ್ತವನ್ನು ನೀಡಲಾಗುವುದು. ಈ ಬಾರಿಯ ಬಹುಮಾನದ ಹಂಚಿಕೆಯು ಪ್ರತಿಯೊಂದು ಹಂತದಲ್ಲೂ ತಂಡಗಳನ್ನು ಪ್ರೋತ್ಸಾಹಿಸುವ ರೀತಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ.
ಪ್ರತಿ ಗೆಲುವಿಗೂ ಇದೆ ವಿಶೇಷ ಮೌಲ್ಯ
ಗುಂಪು ಹಂತದ ಪಂದ್ಯಗಳಲ್ಲಿ ಜಯ ಸಾಧಿಸುವ ತಂಡಗಳಿಗೆ ಐಸಿಸಿ ವಿಶೇಷ ಗೌರವಧನ ನೀಡಲಿದೆ. ಪ್ರತಿ ಗೆಲುವಿಗೆ 31,154 ಯುಎಸ್ ಡಾಲರ್ ಸಿಗಲಿದೆ. ಪಂದ್ಯಾವಳಿಯಲ್ಲಿ ಪಾಲ್ಗೊಳ್ಳುವ ಎಲ್ಲಾ 12 ತಂಡಗಳಿಗೂ ಕನಿಷ್ಠ 247,500 ಯುಎಸ್ ಡಾಲರ್ ಮೊತ್ತ ಸಿಗುವುದು ಖಚಿತವಾಗಿದೆ. ಇದು ಸಣ್ಣ ಮತ್ತು ಉದಯೋನ್ಮುಖ ತಂಡಗಳ ಆರ್ಥಿಕ ಸಬಲೀಕರಣಕ್ಕೆ ಸಹಕಾರಿಯಾಗಲಿದೆ. ಐಸಿಸಿ ಸಿಇಒ ಸಂಜೋಗ್ ಗುಪ್ತಾ ಈ ಬಗ್ಗೆ ಪ್ರತಿಕ್ರಿಯಿಸಿ, “ಮಹಿಳಾ ಕ್ರಿಕೆಟ್ನ ವೇಗ ಮತ್ತು ಬೆಳವಣಿಗೆಯನ್ನು ಗಮನದಲ್ಲಿಟ್ಟುಕೊಂಡು ನಾವು ಈ ನಿರ್ಧಾರ ಕೈಗೊಂಡಿದ್ದೇವೆ. ಇದು ಕೇವಲ ಹಣದ ವಿಷಯವಲ್ಲ, ಮಹಿಳಾ ಕ್ರೀಡೆಯ ಮೇಲಿನ ನಮ್ಮ ಬದ್ಧತೆಯಾಗಿದೆ,” ಎಂದಿದ್ದಾರೆ.
ವೈಭವದ ಟ್ರೋಫಿ ಪ್ರವಾಸ ಮತ್ತು ಉದ್ಘಾಟನೆ
ಬಹುಮಾನ ನಿಧಿಯ ಘೋಷಣೆಯ ಜೊತೆಗೆ, ಐಸಿಸಿ ಈ ಬಾರಿ ಡಿಪಿ ವರ್ಲ್ಡ್ ಸಹಯೋಗದೊಂದಿಗೆ ಭವ್ಯವಾದ ಟ್ರೋಫಿ ಪ್ರವಾಸಕ್ಕೂ ಚಾಲನೆ ನೀಡಿದೆ. ಲಂಡನ್ನ ಪ್ರತಿಷ್ಠಿತ ಲಾರ್ಡ್ಸ್ ಮೈದಾನದಲ್ಲಿ ಟ್ರೋಫಿಯನ್ನು ಪ್ರದರ್ಶಿಸುವ ಮೂಲಕ ಈ ಯಾತ್ರೆ ಆರಂಭಗೊಂಡಿದೆ. ನೆದರ್ಲೆಂಡ್ಸ್, ಐರ್ಲೆಂಡ್ ಮತ್ತು ಸ್ಕಾಟ್ಲೆಂಡ್ ಸೇರಿದಂತೆ ಹಲವು ಐರೋಪ್ಯ ದೇಶಗಳಲ್ಲಿ ಸಂಚರಿಸಲಿರುವ ಟ್ರೋಫಿಯು, ನಂತರ ಇಂಗ್ಲೆಂಡ್ನ ವಿವಿಧ ನಗರಗಳಲ್ಲಿ ಅಭಿಮಾನಿಗಳಿಗೆ ದರ್ಶನ ನೀಡಲಿದೆ. ಜೂನ್ 12 ರಂದು ಎಡ್ಜ್ಬಾಸ್ಟನ್ ಕ್ರೀಡಾಂಗಣದಲ್ಲಿ ನಡೆಯಲಿರುವ ಉದ್ಘಾಟನಾ ಪಂದ್ಯದಲ್ಲಿ ಆತಿಥೇಯ ಇಂಗ್ಲೆಂಡ್ ತಂಡವು ಶ್ರೀಲಂಕಾವನ್ನು ಎದುರಿಸುವ ಮೂಲಕ ಈ ಕ್ರಿಕೆಟ್ ಹಬ್ಬಕ್ಕೆ ಅದ್ಧೂರಿ ಚಾಲನೆ ಸಿಗಲಿದೆ.
ಇದನ್ನೂ ಓದಿ : ಬೆಳಗಾವಿಯ ಬೀಮ್ಸ್ನಲ್ಲಿ ಮತ್ತೊಂದು ಎಡವಟ್ಟು? ವೈದ್ಯರ ನಿರ್ಲಕ್ಷ್ಯದಿಂದ ಯುವಕ ಸಾವು ಆರೋಪ
