ಜೈಪುರ: ಇತ್ತೀಚೆಗೆ ರಾಜಸ್ಥಾನದ ಜೈಪುರದಲ್ಲಿ ಬಂಧಿತಳಾಗಿರುವ ಜೈಶ್-ಎ-ಮೊಹಮ್ಮದ್ (JeM) ಉಗ್ರಗಾಮಿ ಸಂಘಟನೆಯ ಸ್ಲೀಪರ್ ಸೆಲ್ ಏಜೆಂಟ್ ಬಬಿತಾ ಧಾಕಡ್ ಅಲಿಯಾಸ್ ಖದೀಜಾಳ ತನಿಖೆಯ ವೇಳೆ ಆಘಾತಕಾರಿ ಮಾಹಿತಿಗಳು ಬಯಲಾಗಿವೆ. ರಾಜಸ್ಥಾನದ ಭಯೋತ್ಪಾದನಾ ನಿಗ್ರಹ ದಳ (ಎಟಿಎಸ್) ನಡೆಸಿದ ಏಳು ದಿನಗಳ ಸುದೀರ್ಘ ವಿಚಾರಣೆಯ ವೇಳೆ, ಆಕೆ ಕೇವಲ ಇಂಟರ್ನೆಟ್ ಮೂಲಕ ಪ್ರಭಾವಿತಳಾಗಿರದೆ, ಭಾರತೀಯ ರಕ್ಷಣಾ ಸಿಬ್ಬಂದಿಯನ್ನು ಗುರಿಯಾಗಿಸಿಕೊಂಡು ‘ಹನಿಟ್ರ್ಯಾಪ್’ ಮಾಡಲು ಹಾಗೂ ಯುವತಿಯರನ್ನು ಉಗ್ರ ಜಾಲಕ್ಕೆ ಸೆಳೆಯಲು ಸಂಚು ರೂಪಿಸಿದ್ದ ಆಘಾತಕಾರಿ ಅಂಶಗಳು ಬೆಳಕಿಗೆ ಬಂದಿವೆ.
ಪಾಕಿಸ್ತಾನಿ ಹ್ಯಾಂಡ್ಲರ್ಗಳೊಂದಿಗೆ ನಿಕಟ ಸಂಪರ್ಕ
ತನಿಖಾ ಸಂಸ್ಥೆಗಳ ಮೂಲಗಳ ಪ್ರಕಾರ, ಜೈಪುರದಲ್ಲಿ ಸಿಕ್ಕಿಬಿದ್ದಿರುವ ಬಬಿತಾ ಕಳೆದ ಎರಡು ವರ್ಷಗಳಿಂದ ಪಾಕಿಸ್ತಾನ ಮೂಲದ ಜೈಶ್ ಉಗ್ರ ಸಂಘಟನೆಯ ಹ್ಯಾಂಡ್ಲರ್ಗಳೊಂದಿಗೆ ನಿರಂತರ ಸಂಪರ್ಕದಲ್ಲಿದ್ದಳು. ವಾಟ್ಸ್ ಆ್ಯಪ್ ಹಾಗೂ ಇತರೆ ಎನ್ಕ್ರಿಪ್ಟೆಡ್ (ರಹಸ್ಯ) ಸಾಮಾಜಿಕ ಮಾಧ್ಯಮಗಳ ಮೂಲಕ ಆಕೆ ಪಾಕಿಸ್ತಾನಿ ಉಗ್ರರೊಂದಿಗೆ ನಿರಂತರ ಸಂಭಾಷಣೆ ನಡೆಸುತ್ತಿದ್ದಳು. ಈ ಭಯೋತ್ಪಾದಕ ಜಾಲದಲ್ಲಿ ಆಕೆಗೆ ದೊಡ್ಡ ಜವಾಬ್ದಾರಿಯನ್ನು ನೀಡಲು ಪಾಕಿಸ್ತಾನದಿಂದಲೇ ಆನ್ಲೈನ್ ಮೂಲಕ ತರಬೇತಿ ಮತ್ತು ಮತಾಂತರದ ಬ್ರೈನ್ ವಾಶ್ ಮಾಡಲಾಗಿತ್ತು ಎಂದು ಏಜೆನ್ಸಿಗಳು ಶಂಕಿಸಿವೆ. ಅಲ್ಲದೆ ಆಕೆಯ ಇಂಟರ್ನೆಟ್ ಹಿಸ್ಟರಿಯನ್ನು ಪರಿಶೀಲಿಸಿದಾಗ, ಆಕೆ ‘ಆತ್ಮಹತ್ಯಾ ದಾಳಿ’ (Suicide Attack) ಹಾಗೂ ತೀವ್ರಗಾಮಿ ವಿಚಾರಗಳಿಗೆ ಸಂಬಂಧಿಸಿದ ವಿಷಯಗಳನ್ನು ಸತತವಾಗಿ ಹುಡುಕಿರುವುದು ಪತ್ತೆಯಾಗಿದೆ.
ಸೇನಾ ಸಿಬ್ಬಂದಿಗೆ ‘ಹನಿಟ್ರ್ಯಾಪ್’ ಬಲೆ
ಪ್ರಾಥಮಿಕ ತನಿಖೆಯಲ್ಲಿ ಬಹಿರಂಗವಾಗಿರುವ ಮತ್ತೊಂದು ಗಂಭೀರ ಅಂಶವೆಂದರೆ, ಬಬಿತಾಳಿಗೆ ಭಾರತೀಯ ಸೇನಾ ಸಿಬ್ಬಂದಿಯನ್ನು ಸಾಮಾಜಿಕ ಜಾಲತಾಣಗಳ ಮೂಲಕ ಸಂಪರ್ಕಿಸಿ, ಅವರನ್ನು ಪ್ರೇಮದ ಜಾಲಕ್ಕೆ (ಹನಿ-ಟ್ರ್ಯಾಪ್) ಬೀಳಿಸುವ ವಿಶೇಷ ತರಬೇತಿಯನ್ನು ನೀಡಲಾಗಿತ್ತು. ಈ ಮೂಲಕ ಭಾರತೀಯ ರಕ್ಷಣಾ ವಲಯದ ರಹಸ್ಯ ಮಾಹಿತಿಗಳನ್ನು ಪಡೆದುಕೊಳ್ಳಲು ಸಂಚು ಹೂಡಲಾಗಿತ್ತು. ಆಕೆ ಯಾರನ್ನೆಲ್ಲಾ ಸಂಪರ್ಕಿಸಲು ಯತ್ನಿಸಿದ್ದಳು ಮತ್ತು ಈ ಸಂಚು ಯಾವ ಹಂತದವರೆಗೆ ತಲುಪಿತ್ತು ಎಂಬುದನ್ನು ಪತ್ತೆಹಚ್ಚಲು ಆಕೆಯ ಸಾಮಾಜಿಕ ಮಾಧ್ಯಮ ಖಾತೆಗಳನ್ನು ಪೊಲೀಸರು ಜಾಲಾಡುತ್ತಿದ್ದಾರೆ.
ಯುವತಿಯರ ನೇಮಕಾತಿ, ಕ್ರಿಪ್ಟೋಕರೆನ್ಸಿ ಫಂಡಿಂಗ್
ಕೇವಲ ರಾಜಸ್ಥಾನ ಮಾತ್ರವಲ್ಲದೆ ದೇಶದ ವಿವಿಧ ರಾಜ್ಯಗಳ ಯುವತಿಯರನ್ನು ಸಂಪರ್ಕಿಸಿ, ಅವರನ್ನು ತೀವ್ರಗಾಮಿ ಇಸ್ಲಾಮಿಕ್ ಚಿಂತನೆಗಳ ಕಡೆಗೆ ಸೆಳೆಯಲು ಬಬಿತಾ ಯತ್ನಿಸುತ್ತಿದ್ದಳು. ಸೋಷಿಯಲ್ ಮೀಡಿಯಾ ಮೂಲಕ ಉಗ್ರಗಾಮಿ ಪ್ರಚಾರ ನಡೆಸಿ ಹೊಸ ನೇಮಕಾತಿ ಮಾಡಲು ಈಕೆಯನ್ನು ಬಳಸಿಕೊಳ್ಳಲಾಗುತ್ತಿತ್ತು. ಇದರೊಂದಿಗೆ, ಈ ರಹಸ್ಯ ಕಾರ್ಯಾಚರಣೆಗಳಿಗೆ ಹಣಕಾಸಿನ ನೆರವು ನೀಡಲು ಕ್ರಿಪ್ಟೋಕರೆನ್ಸಿ (Cryptocurrency) ಚಾನೆಲ್ಗಳನ್ನು ಬಳಸಲು ಯೋಜನೆ ರೂಪಿಸಲಾಗಿತ್ತು ಎಂಬ ಸಂಶಯವೂ ಮೂಡಿದೆ.
ಸಾಕ್ಷ್ಯ ನಾಶಕ್ಕೆ ಯತ್ನ; ಡಿಲೀಟ್ ಆದ ಡೇಟಾ ರಿಕವರಿ
ತನ್ನ ದೇಶವಿರೋಧಿ ಕೃತ್ಯಗಳು ಯಾರಿಗೂ ತಿಳಿಯಬಾರದು ಎಂಬ ಕಾರಣಕ್ಕೆ ಬಬಿತಾ ಬಹುಸಂಖ್ಯೆಯ ಮೊಬೈಲ್ ಸಿಮ್ ಕಾರ್ಡ್ಗಳನ್ನು ಬಳಸುತ್ತಿದ್ದಳು. ಅಲ್ಲದೆ ಪಾಕಿಸ್ತಾನಿ ಹ್ಯಾಂಡ್ಲರ್ಗಳ ಜೊತೆಗಿನ ಚಾಟ್ಗಳು, ಫೋಟೋಗಳು ಮತ್ತು ವಿಡಿಯೋಗಳನ್ನು ನಿಯಮಿತವಾಗಿ ಡಿಲೀಟ್ ಮಾಡುತ್ತಿದ್ದಳು. ಸದ್ಯ ಆಕೆಯ ಮೊಬೈಲ್ ಫೋನ್ಗಳು ಹಾಗೂ ಡಿಜಿಟಲ್ ಸಾಧನಗಳನ್ನು ವಶಪಡಿಸಿಕೊಂಡಿರುವ ಎಟಿಎಸ್, ಅವುಗಳನ್ನು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ (FSL) ಕಳುಹಿಸಿದೆ. ಅಳಿಸಿ ಹಾಕಲಾದ ರಹಸ್ಯ ಸಂದೇಶಗಳನ್ನು ಮರುಪಡೆಯುವ ಯತ್ನ ನಡೆದಿದ್ದು, ಡೇಟಾ ರಿಕವರಿಯಾದ ನಂತರ ಈ ಅಂತಾರಾಷ್ಟ್ರೀಯ ಉಗ್ರ ಜಾಲದ ಸಂಪೂರ್ಣ ಜಾತಕ ಹೊರಬೀಳಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
