ಕನ್ನಡದ ಕ್ರೇಜಿಸ್ಟಾರ್ ರವಿಚಂದ್ರನ್ಗೆ ಇಂದು ಮೇ(30) ವಿಶೇಷವಾದ ದಿನ. ಯಾಕೆಂದರೆ ನಟ ರವಿಚಂದ್ರನ್ ಅವರ ಹುಟ್ಟು ಹಬ್ಬ. ಸ್ಟಾರ್ ನಟರ ಹುಟ್ಟುಹಬ್ಬ ಅಂದರೆ ಅದು ಅವರ ಅಭಿಮಾನಿಗಳಿಗೆ ಹಬ್ಬದ ದಿನ. ಅಭಿಮಾನಿಗಳ ಜೊತೆಗೆ ತಮ್ಮ ಹುಟ್ಟು ಹಬ್ಬವನ್ನು ಸಂಭ್ರಮದಿಂದ ಆಚರಿಸಿಕೊಳ್ಳುತ್ತಾರೆ. ಆದರೆ ಕೊರೊನಾ ಕಾರಣಕ್ಕೆ ಕಳೆದ ಕೆಲವು ವರ್ಷಗಳಿಂದ ಇದು ಸಾಧ್ಯವಾಗಿಲ್ಲ. ಈಗ ಮತ್ತೆ ಈ ಖುಷಿ ಮರುಕಳಿಸಿದೆ.
ರವಿಚಂದ್ರನ್ ಕೂಡ ಪ್ರತಿ ಬಾರಿ ತಮ್ಮ ಅಭಿಮಾನಿಗಳ ಜೊತೆಗೆ ಹುಟ್ಟು ಹಬ್ಬವನ್ನು ಆಚರಿಸಿಕೊಳ್ಳುತ್ತಿದ್ದರು. ಆದರೆ, ಕೊರೊನಾದಿಂದ ಸಂಭ್ರಮಾಚರಣೆಗೆ ಬ್ರೇಕ್ ಬಿದ್ದಿತ್ತು. ಈಗ ಮತ್ತೆ ರವಿಮಾಮ ತಮ್ಮ ಅಭಿಮಾನಿ ಬಳಗದ ಜೊತೆಗೆ ಬರ್ತ್ ಡೇ ಕೇಕ್ ಕತ್ತರಿಸುತ್ತಿದ್ದಾರೆ. ಇತ್ತೀಚೆಗೆ ಸಿನಿಮಾ ಜೊತೆಗೆ ಕಿರುತೆರೆ ಕಾರ್ಯಕ್ರಮ ಮೂಲಕವೂ ಜನರಿಗೆ ಮತ್ತಷ್ಟು ಹತ್ತಿರವಾಗಿದ್ದಾರೆ ರವಿಚಂದ್ರನ್.
ಕ್ರೇಜಿಸ್ಟಾರ್ 61ನೇ ಹುಟ್ಟುಹಬ್ಬ!
ನಟ ರವಿಚಂದ್ರನ್ ಅವರ 61ನೇ ವರ್ಷದ ಹುಟ್ಟು ಹಬ್ಬ ಇದು. ರವಿಮಾಮ ಕೇವಲ ನಾಯಕ ನಟನಾಗಿ ಮಾತ್ರ ಅಲ್ಲ. ಸಿನಿಮಾರಂಗದಲ್ಲಿ ನಟನೆಯ ಜೊತೆಗೆ ನಿರ್ದೇಶಕನಾಗಿ, ನಿರ್ಮಾಪಕನಾಗಿ ಗುರುತಿಸಿಕೊಂಡಿದ್ದಾರೆ. ಅಷ್ಟೇ ಅಲ್ಲ ರವಿಚಂದ್ರನ್ ನಾಯಕ ನಟನಾಗಿ ಹೇಗೆ ಜನಮನ ಗೆದ್ದಿದ್ದಾರೋ, ಹಾಗೆ ಉತ್ತಮ ನಿರ್ದೇಶಕನಾಗಿಯೂ ಜನರ ಮನಸಲ್ಲಿ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ಇಂದಿಗೂ ಅವರ ನಿರ್ದೇಶನಕ್ಕೆ ಅಷ್ಟೇ ಬೇಡಿಕೆ ಇದೆ. ಅವರ 61ನೇ ಹುಟ್ಟು ಹಬ್ಬಕ್ಕೆ ಶುಭಾಶಯದ ಮಹಾಪೂರವೇ ಹರಿದು ಬರುತ್ತಿದೆ.
ದಾಖಲೆಗಳ ಸರದಾರ ರವಿಮಾಮ!
ಇನ್ನು ನಟ ರವಿಚಂದ್ರನ್ ಸಿನಿಮಾಗಳ ವಿಚಾರದಲ್ಲಿ ಸಾಕಷ್ಟು ಪ್ರಯೋಗಗಳನ್ನು ಮಾಡಿದ್ದಾರೆ. ರವಿಚಂದ್ರನ್ ಸಿನಿಮಾ ಅಂದರೇನೆ ಬೇರೆ. ಅವರು ಸಿನಿಮಾ ಮಾಡುವ ಸ್ಟೈಲೇ ಬೇರೆ. ಹಾಗಾಗಿ ಸಾಕಷ್ಟು ಪ್ರಥಮ ದಾಖಲೆಗಳಿಗೆ ರವಿಚಂದ್ರನ್ ಒಡೆಯ. ‘ಪ್ರೇಮ ಲೋಕ’ದಂತಹ ಮ್ಯೂಸಿಕಲ್ ಲವ್ ಸ್ಟೋರಿಯಿಂದ ಹಿಡಿದು, ‘ಶಾಂತಿ ಕ್ರಾಂತಿ’ಯಂತಹ ಪ್ರಯೋಗ ಕೂಡ ಮಾಡಿದ್ದಾರೆ.
