ಪದ್ಮಶ್ರೀ ಪುರಸ್ಕೃತ ಕಿನ್ನರ ಕಲಾವಿದ ಮೊಗಿಲಯ್ಯ ಕಣ್ಣೀರು: ಸರ್ಕಾರ ನೀಡಿದ ಜಾಗಕ್ಕಾಗಿ ಕೋರ್ಟ್‌ಗೆ ಅಲೆದಾಟ!

ಹೈದರಾಬಾದ್: ದೇಶದ ಕಲೆ ಮತ್ತು ಸಂಸ್ಕೃತಿಗೆ ಅವರು ನೀಡಿದ ಕೊಡುಗೆಯನ್ನು ಗೌರವಿಸಿ ಕೇಂದ್ರ ಸರ್ಕಾರ ಅವರಿಗೆ ದೇಶದ ಅತ್ಯುನ್ನತ ನಾಗರಿಕ ಪ್ರಶಸ್ತಿಗಳಲ್ಲಿ ಒಂದಾದ ‘ಪದ್ಮಶ್ರೀ‘ ನೀಡಿ ಗೌರವಿಸಿತ್ತು. ಆದರೆ, ಇಂದು ಅದೇ ಮಹಾನ್ ಕಲಾವಿದ ತಮಗೆ ಸರ್ಕಾರವೇ ಮಂಜೂರು ಮಾಡಿದ ನಿವೇಶನವನ್ನು ಪಡೆದುಕೊಳ್ಳಲು ಕಚೇರಿ ಹಾಗೂ ನ್ಯಾಯಾಲಯಗಳನ್ನು ಅಲೆಯಬೇಕಾಗಿದೆ. ಖ್ಯಾತ ಕಿನ್ನರ ಜಾನಪದ ಕಲಾವಿದ ದರ್ಶನಂ ಮೊಗಿಲಯ್ಯ ಅವರು ತಮಗೆ ಸರ್ಕಾರ ನೀಡಿದ 600 ಚದರ ಗಜದ ನಿವೇಶನವು ಕಾನೂನು ವಿವಾದದಲ್ಲಿ ಸಿಲುಕಿದ್ದು, ಅದನ್ನು ಪಡೆಯಲು ಸಾಲ ಮಾಡಿ ಬರೋಬ್ಬರಿ 9 ಲಕ್ಷ ರೂ.ಗಳನ್ನು ಕಾನೂನು ವೆಚ್ಚಕ್ಕಾಗಿ ವ್ಯಯಿಸಿರುವುದಾಗಿ ಅಳಲು ತೋಡಿಕೊಂಡಿದ್ದಾರೆ. ಇತ್ತೀಚೆಗೆ ನಡೆದ ಜನರ ಕುಂದುಕೊರತೆ ಕಾರ್ಯಕ್ರಮದಲ್ಲಿ ಅವರು ಜಿಲ್ಲಾಧಿಕಾರಿ ಸಿ. ನಾರಾಯಣ ರೆಡ್ಡಿ ಅವರನ್ನು ಭೇಟಿಯಾಗಿ ಅಧಿಕೃತ ಹಸ್ತಕ್ಷೇಪಕ್ಕೆ ಮನವಿ ಮಾಡಿದ್ದಾರೆ.

ಬಿಆರ್‌ಎಸ್ ಅವಧಿಯ ಮಂಜೂರಾತಿ, ರೇವಂತ್ ರೆಡ್ಡಿ ಹಸ್ತಾಂತರ

ತೆಲಂಗಾಣದ ಅಬ್ದುಲ್ಲಾಪುರಮೇಟ್ ಮಂಡಲದ ಕುಂಟ್ಲೂರು ಗ್ರಾಮದಲ್ಲಿ ಈ ನಿವೇಶನವನ್ನು ಹಿಂದಿನ ಬಿಆರ್‌ಎಸ್ (BRS) ಸರ್ಕಾರದ ಅವಧಿಯಲ್ಲಿ ಮೊಗಿಲಯ್ಯ ಅವರಿಗೆ ಮಂಜೂರು ಮಾಡಲಾಗಿತ್ತು. ತದನಂತರ ಪ್ರಸ್ತುತ ಮುಖ್ಯಮಂತ್ರಿ ಎ. ರೇವಂತ್ ರೆಡ್ಡಿ ಅವರು ಈ ಜಾಗದ ಸರ್ಕಾರಿ ಆದೇಶದ ಪ್ರತಿಯನ್ನು ಅಧಿಕೃತವಾಗಿ ಮೊಗಿಲಯ್ಯ ಅವರಿಗೆ ಹಸ್ತಾಂತರಿಸಿದ್ದರು. ಇದರಿಂದಾಗಿ ತಮ್ಮ ಕುಟುಂಬಕ್ಕೆ ಒಂದು ಕಾಯಂ ಆಸ್ತಿ ಸಿಕ್ಕಿತು ಎಂದು ಸಂಭ್ರಮಿಸಿದ್ದ ಕಲಾವಿದನಿಗೆ ಸದ್ಯ ಆ ಜಾಗವು ಕಾನೂನು ಹೋರಾಟದ ಸುಳಿಗೆ ಸಿಲುಕಿರುವುದು ತೀವ್ರ ಆಘಾತ ಮೂಡಿಸಿದೆ. ಜಾಗದ ವಿವಾದದಿಂದಾಗಿ ಅವರಿಗೆ ಸ್ಪಷ್ಟವಾದ ‘ಪಟ್ಟಾ’ ಪಡೆಯಲು ಅಥವಾ ಜಾಗವನ್ನು ತಮ್ಮ ಸುಪರ್ದಿಗೆ ತೆಗೆದುಕೊಳ್ಳಲು ಸಾಧ್ಯವಾಗುತ್ತಿಲ್ಲ.

ಕಚೇರಿಗಳ ಅಲೆದಾಟ, ಲಕ್ಷಾಂತರ ರೂಪಾಯಿ ಸಾಲ

“ನನ್ನ ಕಲೆಯನ್ನು ಗುರುತಿಸಿ ನನಗೆ ಈ ಭೂಮಿಯನ್ನು ಉಡುಗೊರೆಯಾಗಿ ನೀಡಲಾಗಿತ್ತು. ಆದರೆ ಕಳೆದ ಎರಡು ವರ್ಷಗಳಿಂದ ನಾನು ಅದರ ಲಾಭವನ್ನು ಅನುಭವಿಸುವ ಬದಲಾಗಿ ಸರ್ಕಾರಿ ಕಚೇರಿಗಳು ಮತ್ತು ನ್ಯಾಯಾಲಯಗಳಿಗೆ ಅಲೆಯುತ್ತಿದ್ದೇನೆ” ಎಂದು ಮೊಗಿಲಯ್ಯ ಅಧಿಕಾರಿಗಳ ಮುಂದೆ ಬೇಸರ ವ್ಯಕ್ತಪಡಿಸಿದ್ದಾರೆ. ಈ ಜಾಗವನ್ನು ಕಾನೂನುಬದ್ಧವಾಗಿ ತಮ್ಮದಾಗಿಸಿಕೊಳ್ಳಲು ವಕೀಲರ ಫೀಸು ಮತ್ತು ಕೋರ್ಟ್ ವೆಚ್ಚಗಳಿಗಾಗಿ ಅವರು ಸುಮಾರು 9 ಲಕ್ಷ ರೂಪಾಯಿಗಳನ್ನು ಸಾಲ ಮಾಡಿದ್ದಾರೆ. ಈ ಸಮಸ್ಯೆಯನ್ನು ಶೀಘ್ರ ಬಗೆಹರಿಸಿ, ಜಾಗವನ್ನು ತಮ್ಮ ನಾಲ್ಕು ಜನ ಮಕ್ಕಳಿಗೆ ಹಂಚಬೇಕು ಎನ್ನುವುದು ಅವರ ಆಸೆಯಾಗಿದೆ. ಆದರೆ ಇಬ್ರಾಹಿಂಪಟ್ನಂ ಆರ್‌ಡಿಒ ಮತ್ತು ಅಬ್ದುಲ್ಲಾಪುರಮೇಟ್ ಕಂದಾಯ ಅಧಿಕಾರಿಗಳ ಕಚೇರಿಗೆ ಎಷ್ಟು ಬಾರಿ ಅಲೆದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಅವರು ತಿಳಿಸಿದ್ದಾರೆ.

ಹೋರಾಟದ ಎಚ್ಚರಿಕೆ

ಕಳೆದ ಎರಡು ವರ್ಷಗಳಲ್ಲಿ ಜಿಲ್ಲಾಡಳಿತದಲ್ಲಿ ಹಲವು ಅಧಿಕಾರಿಗಳು ಬದಲಾಗಿದ್ದರೂ ತಮ್ಮ ಸಮಸ್ಯೆಗೆ ಮಾತ್ರ ಯಾವುದೇ ಪರಿಹಾರ ಸಿಕ್ಕಿಲ್ಲ ಎಂದು ಮೊಗಿಲಯ್ಯ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ರಾಷ್ಟ್ರ ಮಟ್ಟದ ಪದ್ಮಶ್ರೀ ಪ್ರಶಸ್ತಿ ಬಂದಿದ್ದರೂ ಅಧಿಕಾರಿಗಳು ತಮ್ಮ ದೂರನ್ನು ಗಂಭೀರವಾಗಿ ಪರಿಗಣಿಸುತ್ತಿಲ್ಲ ಮತ್ತು ತಮ್ಮನ್ನು ನಿರ್ಲಕ್ಷಿಸುತ್ತಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ. ಇತ್ತೀಚೆಗೆ ಅವರು ಬಿಆರ್‌ಎಸ್ ಕಾರ್ಯಾಧ್ಯಕ್ಷ ಕೆ.ಟಿ. ರಾಮರಾವ್ (KTR) ಅವರನ್ನು ಭೇಟಿಯಾಗಿದ್ದಾಗ, ಅವರು ಈ ವಿಷಯವನ್ನು ಜಿಲ್ಲಾಧಿಕಾರಿಗಳ ಗಮನಕ್ಕೆ ತರುವುದಾಗಿ ಭರವಸೆ ನೀಡಿದ್ದರು. ಒಂದು ವೇಳೆ ಈ ಸಮಸ್ಯೆ ಶೀಘ್ರದಲ್ಲೇ ಬಗೆಹರಿಯದಿದ್ದರೆ, ತಾವು ನೇರವಾಗಿ ಮುಖ್ಯಮಂತ್ರಿ ರೇವಂತ್ ರೆಡ್ಡಿ ಅವರನ್ನು ಭೇಟಿಯಾಗಿ ನ್ಯಾಯಕ್ಕಾಗಿ ಒತ್ತಾಯಿಸುವುದಾಗಿ ಮೊಗಿಲಯ್ಯ ಎಚ್ಚರಿಸಿದ್ದಾರೆ.