ಬೆಂಗಳೂರು: ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಟೊಯೋಟಾ ಫಾರ್ಚುನರ್ ಎಸ್ಯುವಿ ತನ್ನದೇ ಆದ ಅದ್ವಿತೀಯ ಸ್ಥಾನ ಹಾಗೂ ಜನಪ್ರಿಯತೆಯನ್ನು ಕಾಯ್ದುಕೊಂಡಿದೆ. ಕಳೆದ ಕೆಲವು ವರ್ಷಗಳಲ್ಲಿ ಈ ವಾಹನದ ಬೆಲೆ ಗಣನೀಯವಾಗಿ ಏರಿಕೆಯಾಗಿದ್ದರೂ, ಗ್ರಾಹಕರ ಬೇಡಿಕೆ ಮಾತ್ರ ಕಿಂಚಿತ್ತೂ ಕಡಿಮೆಯಾಗಿಲ್ಲ. ಈ ವಿಭಾಗದಲ್ಲಿ ಹೆಚ್ಚುತ್ತಿರುವ ಗ್ರಾಹಕರ ಆಕರ್ಷಣೆಯನ್ನು ಗಮನಿಸಿದ ಎಂಜಿ ಮೋಟಾರ್ಸ್ನಂತಹ ಹಲವು ವಾಹನ ತಯಾರಕ ಕಂಪನಿಗಳು ಎಂಜಿ ಮೆಜೆಸ್ಟರ್ನಂತಹ ಹೊಸ ಮಾಡೆಲ್ಗಳನ್ನು ಪರಿಚಯಿಸುತ್ತಿವೆ. ಇದೇ ಹಾದಿಯಲ್ಲಿ ಮುಂಬರುವ ದಿನಗಳಲ್ಲಿ ಟೊಯೋಟಾ ಫಾರ್ಚುನರ್ಗೆ ನೇರ ಪೈಪೋಟಿ ನೀಡಲು ಅತ್ಯಾಧುನಿಕ ತಂತ್ರಜ್ಞಾನ ಹಾಗೂ ಬಲಿಷ್ಠ ಎಂಜಿನ್ ಹೊಂದಿರುವ ಐದು ಹೊಸ ಎಸ್ಯುವಿಗಳು ಭಾರತೀಯ ರಸ್ತೆಗಿಳಿಯಲು ಸಜ್ಜಾಗಿವೆ.
ಫೋಕ್ಸ್ವ್ಯಾಗನ್ ಟೈರಾನ್ ಸಾಮಾನ್ಯ ಆವೃತ್ತಿ
ಫೋಕ್ಸ್ವ್ಯಾಗನ್ ಕಂಪನಿಯು 2026ರ ಫೆಬ್ರವರಿಯಲ್ಲಿ ‘ಟೈರಾನ್ ಆರ್-ಲೈನ್’ ಮಾದರಿಯನ್ನು ಭಾರತದಲ್ಲಿ ಬಿಡುಗಡೆ ಮಾಡಿತ್ತು. ಇದೀಗ ಮುಂಬರುವ ತಿಂಗಳುಗಳಲ್ಲಿ ಈ ಎಸ್ಯುವಿಯ ಕೈಗೆಟುಕುವ ಬೆಲೆಯ ಸಾಮಾನ್ಯ ಆವೃತ್ತಿಯನ್ನು (ನಾನ್ ಆರ್-ಲೈನ್) ಪರಿಚಯಿಸಲು ಕಂಪನಿ ಯೋಜನೆ ರೂಪಿಸಿದೆ. ಇದು ಆರ್-ಲೈನ್ ಮಾದರಿಗಿಂತ ಕಡಿಮೆ ಬೆಲೆ ಹೊಂದಿರಲಿದ್ದು, ಕೆಲವು ಕ್ರೀಡಾ ವಿನ್ಯಾಸದ ಅಂಶಗಳು ಹಾಗೂ ವೈಶಿಷ್ಟ್ಯಗಳನ್ನು ಕೈಬಿಡುವ ಸಾಧ್ಯತೆಯಿದೆ. ಇದರ ಒಳಾಂಗಣ ವಿನ್ಯಾಸದಲ್ಲಿ ವಿಭಿನ್ನ ಬಣ್ಣದ ಸಂಯೋಜನೆ ಇರಲಿದ್ದು, 2.0-ಲೀಟರ್ ಟಿಎಸ್ಐ ಟರ್ಬೊ ಪೆಟ್ರೋಲ್ ಎಂಜಿನ್ ಅನ್ನು ಅಳವಡಿಸುವ ನಿರೀಕ್ಷೆಯಿದೆ. ಈ ಎಂಜಿನ್ ಏಳು-ಸ್ಪೀಡ್ ಡಿಎಸ್ಜಿ ಗೇರ್ಬಾಕ್ಸ್ನೊಂದಿಗೆ ಕಾರ್ಯನಿರ್ವಹಿಸಲಿದ್ದು, ಆರ್-ಲೈನ್ ಮಾದರಿಗಿಂತ ತುಸು ಕಡಿಮೆ ಶಕ್ತಿ ಉತ್ಪಾದಿಸಲಿದೆ. ಈ ಸಾಮಾನ್ಯ ಆವೃತ್ತಿಯ ಎಕ್ಸ್-ಶೋರೂಮ್ ಬೆಲೆ ಅಂದಾಜು 42 ರಿಂದ 45 ಲಕ್ಷ ರೂಪಾಯಿಗಳ ಆಸುಪಾಸಿನಲ್ಲಿರಲಿದೆ.
ಸ್ಕೋಡಾ ಕೊಡಿಯಾಕ್ ಆರ್ಎಸ್: ವೇಗದ ಪೈಪೋಟಿ
ಸ್ಕೋಡಾ ಕಂಪನಿಯು ತನ್ನ ಬಹುನಿರೀಕ್ಷಿತ ‘ಕೊಡಿಯಾಕ್ ಆರ್ಎಸ್’ ಎಸ್ಯುವಿಯನ್ನು ಮುಂಬರುವ ವಾರಗಳಲ್ಲಿ ಬಿಡುಗಡೆ ಮಾಡಲು ಅಂತಿಮ ಸಿದ್ಧತೆ ನಡೆಸಿದೆ. ಈಗಾಗಲೇ ಭಾರತದಲ್ಲಿ ಅಧಿಕೃತವಾಗಿ ಅನಾವರಣಗೊಂಡಿರುವ ಈ ವಾಹನದ ಬುಕಿಂಗ್ ಪ್ರಕ್ರಿಯೆಯೂ ಆರಂಭವಾಗಿದೆ. ಇದು ಕೊಡಿಯಾಕ್ ಸರಣಿಯಲ್ಲೇ ಅತಿ ವೇಗದ ವಾಹನವಾಗಿದ್ದು, ಕೇವಲ 6.3 ಸೆಕೆಂಡುಗಳಲ್ಲಿ ಶೂನ್ಯದಿಂದ 100 ಕಿಲೋಮೀಟರ್ ವೇಗವನ್ನು ತಲುಪುವ ಸಾಮರ್ಥ್ಯ ಹೊಂದಿದೆ. ಇದರ 2.0 ಲೀಟರ್ ಟರ್ಬೊಚಾರ್ಜ್ಡ್ ಪೆಟ್ರೋಲ್ ಎಂಜಿನ್ 261 ಎಚ್ಪಿ ಶಕ್ತಿ ಹಾಗೂ 400 ಎನ್ಎಂ ಟಾರ್ಕ್ ಉತ್ಪಾದಿಸುತ್ತದೆ. ಹೊರಭಾಗದಲ್ಲಿ ಆಕರ್ಷಕ ಕಪ್ಪು ಬಣ್ಣದ ಟ್ರಿಮ್ಗಳು, 20-ಇಂಚಿನ ಅಲಾಯ್ ವೀಲ್ಗಳು, ವೆಂಟಿಲೇಟೆಡ್ ಡಿಸ್ಕ್ ಬ್ರೇಕ್ಗಳು ಹಾಗೂ ಡೈನಾಮಿಕ್ ಚಾಸಿಸ್ ಕಂಟ್ರೋಲ್ನಂತಹ ಅತ್ಯಾಧುನಿಕ ತಂತ್ರಜ್ಞಾನವನ್ನು ಇದು ಒಳಗೊಂಡಿದೆ. ಸಿಬಿಯು (CBU) ಆಮದು ಮೂಲಕ ಬರುತ್ತಿರುವ ಈ ಪ್ರೀಮಿಯಂ ವಾಹನದ ಮೊದಲ ಬ್ಯಾಚ್ ಕೇವಲ 50 ಯುನಿಟ್ಗಳಿಗೆ ಮಾತ್ರ ಸೀಮಿತವಾಗಿರಲಿದೆ.
ಸ್ಕೋಡಾ ಕೊಡಿಯಾಕ್ ಡೀಸೆಲ್ ಎಂಜಿನ್ ಅವತಾರ
ಪೆಟ್ರೋಲ್ ಮಾತ್ರವಲ್ಲದೆ, ಸ್ಕೋಡಾ ಕೊಡಿಯಾಕ್ನ ಡೀಸೆಲ್ ಆವೃತ್ತಿಯನ್ನು ಸಹ ಮುಂಬರುವ ವರ್ಷಗಳಲ್ಲಿ ಭಾರತದಲ್ಲಿ ಬಿಡುಗಡೆ ಮಾಡಲು ಕಂಪನಿ ನಿರ್ಧರಿಸಿದೆ. ಇದು ಕೂಡ ಸೀಮಿತ ಸಂಖ್ಯೆಯಲ್ಲಿ ಸಂಪೂರ್ಣವಾಗಿ ನಿರ್ಮಿಸಲಾದ (CBU) ವಾಹನವಾಗಿಯೇ ಮಾರುಕಟ್ಟೆ ಪ್ರವೇಶಿಸಲಿದೆ. ವಿನ್ಯಾಸ ಹಾಗೂ ವೈಶಿಷ್ಟ್ಯಗಳಲ್ಲಿ ಸಾಮಾನ್ಯ ಕೊಡಿಯಾಕ್ ಮಾದರಿಯನ್ನೇ ಹೋಲುವ ಈ ವಾಹನದಲ್ಲಿ, 2.0-ಲೀಟರ್ ಟಿಡಿಐ ಡೀಸೆಲ್ ಎಂಜಿನ್ ಅಳವಡಿಸುವ ಸಾಧ್ಯತೆಯಿದೆ. ಈ ಬಲಿಷ್ಠ ಎಂಜಿನ್ 198 ಎಚ್ಪಿ ಶಕ್ತಿ ಮತ್ತು 400 ಎನ್ಎಂ ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದ್ದು, ಏಳು-ಸ್ಪೀಡ್ ಡಿಎಸ್ಜಿ ಆಟೋಮ್ಯಾಟಿಕ್ ಟ್ರಾನ್ಸ್ಮಿಷನ್ ಹಾಗೂ ಆಲ್-ವೀಲ್ ಡ್ರೈವ್ (AWD) ತಂತ್ರಜ್ಞಾನದೊಂದಿಗೆ ಗ್ರಾಹಕರಿಗೆ ಲಭ್ಯವಾಗಲಿದೆ.
ಜೆಎಸ್ಡಬ್ಲ್ಯೂ ಸಮೂಹದ ಚೊಚ್ಚಲ ವಾಹನ ‘ಜೆಟೂರ್ ಟಿ2’
ಭಾರತೀಯ ವಾಹನ ಮಾರುಕಟ್ಟೆಗೆ ಹೊಸದಾಗಿ ಕಾಲಿಡುತ್ತಿರುವ ಜೆಎಸ್ಡಬ್ಲ್ಯೂ ಗ್ರೂಪ್ನ ಪ್ರಯಾಣಿಕ ವಾಹನ ವಿಭಾಗವಾದ ‘ಜೆಎಸ್ಡಬ್ಲ್ಯೂ ಮೋಟಾರ್ಸ್’, ಮುಂಬರುವ ಹಬ್ಬದ ಸೀಸನ್ನಲ್ಲಿ ತನ್ನ ಚೊಚ್ಚಲ ಉತ್ಪನ್ನವನ್ನು ಬಿಡುಗಡೆ ಮಾಡಲಿದೆ. ಇದು ಜಾಗತಿಕ ಮಾರುಕಟ್ಟೆಯಲ್ಲಿ ಜನಪ್ರಿಯವಾಗಿರುವ ‘ಜೆಟೂರ್ ಟಿ2’ ಎಸ್ಯುವಿಯ ಬ್ಯಾಡ್ಜ್-ಎಂಜಿನಿಯರ್ಡ್ ಆವೃತ್ತಿಯಾಗಿರಲಿದೆ. ಭಾರತದಲ್ಲಿ ಕೇವಲ ಇದರ ಪ್ಲಗ್-ಇನ್ ಹೈಬ್ರಿಡ್ (PHEV) ಮಾದರಿಯನ್ನು ಮಾತ್ರ ಬಿಡುಗಡೆ ಮಾಡಲಾಗುತ್ತಿದ್ದು, ಇದು ಅತ್ಯಂತ ರಫ್ ಅಂಡ್ ಟಫ್ ವಿನ್ಯಾಸ ಹಾಗೂ ತಂತ್ರಜ್ಞಾನ ಆಧಾರಿತ ಒಳಾಂಗಣವನ್ನು ಹೊಂದಿರಲಿದೆ. ಇದರಲ್ಲಿ 1.5-ಲೀಟರ್ ಪೆಟ್ರೋಲ್ ಎಂಜಿನ್ ಜೊತೆಗೆ ಎರಡು ಎಲೆಕ್ಟ್ರಿಕ್ ಮೋಟಾರ್ಗಳು ಹಾಗೂ 26.7 ಕೆಡಬ್ಲ್ಯೂಎಚ್ ಬ್ಯಾಟರಿ ಪ್ಯಾಕ್ ಇರಲಿದೆ. ಈ ಹೈಬ್ರಿಡ್ ವ್ಯವಸ್ಥೆಯು ಒಟ್ಟಾರೆಯಾಗಿ 375 ಎಚ್ಪಿ ಶಕ್ತಿ ಹಾಗೂ 610 ಎನ್ಎಂ ಟಾರ್ಕ್ ಉತ್ಪಾದಿಸಲಿದ್ದು, ಇದು ಫಾರ್ಚುನರ್ ಸಾಮರ್ಥ್ಯಕ್ಕಿಂತಲೂ ಅತ್ಯಂತ ಪ್ರಬಲವಾಗಿರಲಿದೆ ಎಂಬುದು ವಾಹನ ಪ್ರಿಯರ ಕುತೂಹಲಕ್ಕೆ ಕಾರಣವಾಗಿದೆ.
ಕಿಯಾ ಸೊರೆಂಟೊ ಎಂಟ್ರಿ
ಭಾರತದಲ್ಲಿ ಈಗಾಗಲೇ ಭಾರಿ ಯಶಸ್ಸು ಕಂಡಿರುವ ಕಿಯಾ ಮೋಟಾರ್ಸ್, ಫಾರ್ಚುನರ್ ಪ್ರಾಬಲ್ಯದ ವಿಭಾಗಕ್ಕೆ ಲಗ್ಗೆ ಇಡಲು ‘ಕಿಯಾ ಸೊರೆಂಟೊ’ ಎಸ್ಯುವಿಯನ್ನು ಅಣಿಗೊಳಿಸುತ್ತಿದೆ. ಪ್ರಸ್ತುತ ಈ ವಾಹನವು ಭಾರತೀಯ ರಸ್ತೆಗಳಲ್ಲಿ ಕಠಿಣ ಪರೀಕ್ಷಾರ್ಥ ಸಂಚಾರದಲ್ಲಿದೆ. ಮೂರು ಸಾಲುಗಳ ಆಸನ ವ್ಯವಸ್ಥೆ ಹೊಂದಿರುವ ಈ ಎಸ್ಯುವಿ, ಜಾಗತಿಕ ಮಾದರಿಯಂತೆಯೇ ಎತ್ತರದ ನಿಲುವು ಹಾಗೂ ಅತ್ಯಾಕರ್ಷಕ ವಿನ್ಯಾಸವನ್ನು ಹೊಂದಿರಲಿದೆ. ಇದರ ಜೊತೆಗೆ ಸುದೀರ್ಘ ವೈಶಿಷ್ಟ್ಯಗಳ ಪಟ್ಟಿಯೇ ಈ ವಾಹನದಲ್ಲಿರಲಿದೆ. ಕಿಯಾ ಸೊರೆಂಟೊ ವಾಹನವು 1.5 ಲೀಟರ್ ಸ್ಟ್ರಾಂಗ್ ಹೈಬ್ರಿಡ್ ಪೆಟ್ರೋಲ್ ಎಂಜಿನ್ನೊಂದಿಗೆ ಮಾರುಕಟ್ಟೆ ಪ್ರವೇಶಿಸುವ ನಿರೀಕ್ಷೆಯಿದೆ. ಈ ಮೂಲಕ ಪ್ರೀಮಿಯಂ ಎಸ್ಯುವಿ ವಿಭಾಗದಲ್ಲಿ ಕಿಯಾ ಮತ್ತೊಂದು ಹೊಸ ಸಂಚಲನ ಮೂಡಿಸಲು ಸಿದ್ಧವಾಗಿದೆ.
