ವಾಷಿಂಗ್ಟನ್ : ಅಮೆರಿಕದಲ್ಲಿ ಮನೆ ನಿರ್ಮಾಣ ಸಾಮಗ್ರಿಗಳ ಬೆಲೆ ವಿಪರೀತವಾಗಿ ಏರಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ, ಅಲ್ಲಿನ ನಾಗರಿಕರು ಇದೀಗ ಹೊಸದೊಂದು ಅಗ್ಗದ ಮಾರ್ಗವನ್ನು ಕಂಡುಕೊಂಡಿದ್ದಾರೆ. ಹೋಮ್ ಡಿಪೋನಂತಹ ಸಾಂಪ್ರದಾಯಿಕ ಸ್ಥಳೀಯ ರಿಟೇಲರ್ಗಳು ಹಾಗೂ ಗುತ್ತಿಗೆದಾರರನ್ನು ಕೈಬಿಟ್ಟು, ಚೀನಾದ ಕಾರ್ಖಾನೆಗಳಿಂದಲೇ ನೇರವಾಗಿ ಮನೆ ನಿರ್ಮಾಣ ಸಾಮಗ್ರಿಗಳನ್ನು ಆಮದು ಮಾಡಿಕೊಳ್ಳಲು ಆರಂಭಿಸಿದ್ದಾರೆ. ಹಣ ಉಳಿಸುವ ಉದ್ದೇಶದಿಂದ ಈ ಟ್ರೆಂಡ್ ಇದೀಗ ಅಮೆರಿಕದಲ್ಲಿ ಭಾರಿ ಜನಪ್ರಿಯತೆ ಪಡೆದುಕೊಳ್ಳುತ್ತಿದೆ.
ಬಾಲ್ಟಿಮೋರ್ನ ಇಂಜಿನಿಯರ್ ಗೆನ್ನಡಿ ಟ್ಸಿಗಾನ್ ಎಂಬವರು ತಮ್ಮ ಹೊಸ ಮನೆ ನಿರ್ಮಾಣಕ್ಕಾಗಿ 2024ರಲ್ಲಿ ಚೀನಾಕ್ಕೆ ತೆರಳಿ, ಅಲ್ಲಿನ ಕಾರ್ಖಾನೆಗಳಿಂದಲೇ ನೇರವಾಗಿ ಸಾಮಗ್ರಿಗಳನ್ನು ಖರೀದಿಸಿದ್ದಾರೆ. ನೆಲದಿಂದ ಛಾವಣಿಯವರೆಗಿನ ಬೃಹತ್ ಕಿಟಕಿಗಳು, ಮ್ಯಾಗ್ನೆಟಿಕ್-ಲಾಕಿಂಗ್ ವ್ಯವಸ್ಥೆಯ ಬಾಗಿಲುಗಳು ಮತ್ತು ಯುರೋಪಿಯನ್ ಶೈಲಿಯ ಫಿಟ್ಟಿಂಗ್ಗಳನ್ನು ಅವರು ತರಿಸಿಕೊಂಡಿದ್ದಾರೆ. ಅಚ್ಚರಿಯೆಂದರೆ, ಈ ಪ್ರಕ್ರಿಯೆಯಿಂದ ಅವರು ಬರೋಬ್ಬರಿ 100,000 ಡಾಲರ್ (ಸುಮಾರು 95 ಲಕ್ಷ ರೂ.) ಉಳಿತಾಯ ಮಾಡಿದ್ದಾರೆ! ಕಸ್ಟಮ್ ಮನೆ ನಿರ್ಮಾಣದಲ್ಲಿ ಒಟ್ಟು ವೆಚ್ಚದ ಮೂರನೇ ಎರಡರಷ್ಟು ಭಾಗ (2/3) ಕೇವಲ ಸಾಮಗ್ರಿಗಳಿಗೇ ತಗುಲುತ್ತದೆ ಎಂದು ಟ್ಸಿಗಾನ್ ಅವರ ಬಿಲ್ಡರ್ ವಿಲ್ ಮುಲ್ಲರ್ ವಿವರಿಸಿದ್ದಾರೆ. ಇದೇ ಕಾರಣಕ್ಕೆ ನೇರ ಆಮದು ಲಾಭದಾಯಕವಾಗಿ ಪರಿಣಮಿಸುತ್ತಿದೆ.
ಅಮೆರಿಕದಲ್ಲಿ ದುಬಾರಿ, ಅಮೆಜಾನ್ನಲ್ಲಿ ಭಾರಿ ಸುಲಿಗೆ
ನ್ಯಾಷನಲ್ ಅಸೋಸಿಯೇಷನ್ ಆಫ್ ಹೋಮ್ ಬಿಲ್ಡರ್ಸ್ ವರದಿ ಪ್ರಕಾರ, ಕಳೆದ ಒಂದು ವರ್ಷದಲ್ಲಿ ಅಮೆರಿಕದಲ್ಲಿ ಮನೆ ನಿರ್ಮಾಣ ಸಾಮಗ್ರಿಗಳ ಒಟ್ಟಾರೆ ಬೆಲೆ ಶೇ. 3ರಷ್ಟು ಏರಿಕೆಯಾಗಿದೆ. ಇದರಲ್ಲಿ ಮೆಟಲ್ ಮೌಲ್ಡಿಂಗ್ ಹಾಗೂ ಟ್ರಿಮ್ ಬೆಲೆ ಶೇ. 45ರಷ್ಟು ಏರಿಕೆಯಾಗಿದ್ದರೆ, ಮರದ ಬೆಲೆ ಶೇ.8ರಷ್ಟು ದುಬಾರಿಯಾಗಿದೆ. ಈ ಬಗ್ಗೆ ತಮ್ಮ ಅನುಭವ ಹಂಚಿಕೊಂಡಿರುವ ಟ್ಸಿಗಾನ್, “ನನ್ನ ಮನೆಗೆ ಬಳಸಲಾದ ಬ್ರೌನ್ ಸೈಡಿಂಗ್ (ಗೋಡೆಗೆ ಅಳವಡಿಸುವ ವಸ್ತು) ಅಮೆಜಾನ್ನಲ್ಲಿ ಶೇ. 150ರಷ್ಟು ಹೆಚ್ಚಿನ ಬೆಲೆಗೆ ಮಾರಾಟವಾಗುತ್ತಿತ್ತು. ಅಚ್ಚರಿ ಎಂದರೆ, ಆ ವಸ್ತು ಕೂಡ ಚೀನಾದಿಂದಲೇ ಆಮದಾದದ್ದಾಗಿತ್ತು. ಸ್ಥಳೀಯವಾಗಿ ದೊಡ್ಡ ಕಿಟಕಿಗಳನ್ನು ಖರೀದಿಸುವುದು ಅಸಾಧ್ಯವಾಗಿತ್ತು. ಅಲ್ಲದೆ, ಧ್ವನಿ-ನಿರೋಧಕ, ಮ್ಯಾಗ್ನೆಟಿಕ್-ಲಾಕ್ ಇರುವ ಬಾಗಿಲುಗಳ ಬೆಲೆ ಅಮೆರಿಕದ ವೆಬ್ಸೈಟ್ಗಳಲ್ಲಿ ಚೀನಾಕ್ಕಿಂತ ನಾಲ್ಕು ಪಟ್ಟು ಹೆಚ್ಚಾಗಿತ್ತು,” ಎಂದಿದ್ದಾರೆ.
ಅಪಾಯಗಳೇನು?
ಚೀನಾದಿಂದ ಸಾಮಗ್ರಿಗಳನ್ನು ತರಿಸಿಕೊಳ್ಳುವ ಈ ಟ್ರೆಂಡ್ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿಯೂ ವ್ಯಾಪಕವಾಗಿ ಹರಿದಾಡುತ್ತಿದೆ. ಚೀನಾದ ಏಜೆಂಟ್ಗಳು ಮತ್ತು ತಯಾರಕರು ಅಮೆರಿಕದ ಗ್ರಾಹಕರಿಗೆ ನೇರವಾಗಿ ಜಾಹೀರಾತು ನೀಡುತ್ತಿದ್ದು, ಸ್ಥಳೀಯ ಮಾರುಕಟ್ಟೆಗಿಂತ ಅತ್ಯಂತ ಕಡಿಮೆ ಬೆಲೆಗೆ ಕ್ಯಾಬಿನೆಟ್ಗಳು, ಟೈಲ್ಸ್ಗಳನ್ನು ಮನೆ ಬಾಗಿಲಿಗೆ ತಲುಪಿಸುವ ಭರವಸೆ ನೀಡುತ್ತಿದ್ದಾರೆ. ಏಜೆಂಟ್ ಒಬ್ಬರು ಹೇಳಿಕೊಳ್ಳುವಂತೆ, ಹೊಸ ಮನೆಗೆ ಬೇಕಾದ ಎಲ್ಲಾ ಸಾಮಗ್ರಿಗಳನ್ನು ಕೇವಲ 10,000 ಡಾಲರ್ಗಿಂತ ಕಡಿಮೆ ಬೆಲೆಗೆ ಖರೀದಿಸಬಹುದಾಗಿದೆ.
ಆದರೆ, ಈ ಪ್ರಕ್ರಿಯೆಯು ಮೇಲ್ನೋಟಕ್ಕೆ ಕಾಣುವಷ್ಟು ಸುಲಭವಲ್ಲ, ಜೊತೆಗೆ ಅಪಾಯಕಾರಿಯೂ ಹೌದು. ಚೀನಾ ವಸ್ತುಗಳ ಮೇಲಿನ ಆಮದು ಸುಂಕವು (Tariffs) ಬಹಳ ಅನಿಶ್ಚಿತವಾಗಿದ್ದು, ಕೆಲವೊಮ್ಮೆ ಅದು ಶೇ. 145ರಷ್ಟಕ್ಕೆ ತಲುಪುವ ಸಾಧ್ಯತೆಯೂ ಇರುತ್ತದೆ. ವಸ್ತುಗಳ ಪೂರೈಕೆಯಲ್ಲಿ ವಿಳಂಬ, ಭಾಷಾ ಸಮಸ್ಯೆಗಳು ಹಾಗೂ ಚೀನಿ ಭಾಷೆಯ ಸೂಚನೆಗಳನ್ನು ಅರ್ಥಮಾಡಿಕೊಂಡು ಅಳತೆಗಳನ್ನು ಹೊಂದಿಸಲು ಪರಿಣಿತ ಕಾರ್ಮಿಕರ ಕೊರತೆ ಎದುರಾಗುವ ದಟ್ಟ ಸಾಧ್ಯತೆಗಳಿವೆ. ಈ ಕುರಿತು ಎಚ್ಚರಿಸಿರುವ ಟ್ಸಿಗಾನ್, “ಇದೊಂದು ಜೀವನದಲ್ಲಿ ಒಮ್ಮೆ ಸಿಗುವ ಅದ್ಭುತ ಅವಕಾಶವಾಗಿರಬಹುದು. ಆದರೆ, ಈ ಪ್ರಕ್ರಿಯೆ ಅತ್ಯಂತ ಸಂಕೀರ್ಣ ಮತ್ತು ಅಪಾಯಗಳಿಂದ ಕೂಡಿದೆ,” ಎಂದಿದ್ದಾರೆ.
ಇದನ್ನೂ ಓದಿ : ಶ್ವೇತಭವನದ ಔತಣಕೂಟದಲ್ಲಿ ಗುಂಡಿನ ದಾಳಿ : ಟ್ರಂಪ್ ಸೇಫ್, ಶೂಟರ್ ಸೆರೆ!
