ಗಡಿ ದಾಟಲು ಬೇಲಿ ಬೇಕಾಗಿಲ್ಲ, ಆಕಾಶದಲ್ಲೇ ಈಗ ಅಪರಾಧ ಸಾಮ್ರಾಜ್ಯ
ಜೈಲಿಗೆ ಮಾದಕವಸ್ತು, ಗಡಿಯಲ್ಲಿ ಶಸ್ತ್ರಾಸ್ತ್ರ, ನಾಯಕರ ಹತ್ಯೆಗೂ ಡ್ರೋನ್ ಬಳಕೆ
ಒಂದು ಕಾಲದಲ್ಲಿ ಆಕಾಶದಲ್ಲಿ ಹಾರಾಡುವ ಡ್ರೋನ್‌ಗಳು ಕೇವಲ ಛಾಯಾಗ್ರಹಣ, ಕೃಷಿ, ಸರಕು ಸಾಗಣೆ ಹಾಗೂ ಸೇನಾ ಕಾರ್ಯಾಚರಣೆಗಳಿಗೆ ಬಳಕೆಯಾಗುತ್ತಿದ್ದವು. ಆದರೆ ಈಗ ಅದೇ ಡ್ರೋನ್‌ಗಳು ಅಪರಾಧಿಗಳು ಮತ್ತು ಭಯೋತ್ಪಾದಕರ ಕೈಯಲ್ಲಿ ಅತ್ಯಂತ ಅಪಾಯಕಾರಿ ಅಸ್ತ್ರಗಳಾಗಿ ಬದಲಾಗುತ್ತಿವೆ!ಜೈಲಿನೊಳಗೆ ಮಾದಕವಸ್ತು ತಲುಪಿಸಲು, ಗಡಿದಾಟಿ ಶಸ್ತ್ರಾಸ್ತ್ರ ಸಾಗಿಸಲು, ಸೇನಾ ನೆಲೆಗಳ ಮೇಲೆ ಕಣ್ಣಿಡಲು, ಪೊಲೀಸರ ಚಲನವಲನ ಗಮನಿಸಲು, ಅಷ್ಟೇ ಏಕೆ, ಗಣ್ಯ ವ್ಯಕ್ತಿಗಳ ಮೇಲೆ ದಾಳಿ ನಡೆಸಲೂ ಡ್ರೋನ್‌ಗಳನ್ನು ಬಳಸಲಾಗುತ್ತಿರುವ ಉದಾಹರಣೆಗಳು ವಿಶ್ವಾದ್ಯಂತ ವರದಿಯಾಗುತ್ತಿವೆ.ಕೇವಲ ಕೆಲವು ಸಾವಿರ ರೂಪಾಯಿಗಳಿಂದ ಆರಂಭವಾಗುವ ಈ ತಂತ್ರಜ್ಞಾನ ಜಗತ್ತಿನ ಭದ್ರತಾ ವ್ಯವಸ್ಥೆಗೆ ಹೊಸ ಸವಾಲು ಎಸೆದಿದೆ. ಹಾಗಾದರೆ ಅಪರಾಧಿಗಳ ಪಾಲಿಗೆ ಡ್ರೋನ್‌ಗಳು ಹೇಗೆ ವರದಾನವಾಗಿವೆ? ಯಾವ ದೇಶಗಳಲ್ಲಿ ಇವುಗಳ ದುರ್ಬಳಕೆ ನಡೆಯುತ್ತಿದೆ? ಭಾರತಕ್ಕೆ ಎದುರಾಗಿರುವ ಅಪಾಯವೇನು? ಎಂಬೆಲ್ಲ ಮಾಹಿತಿ ಇಲ್ಲಿದೆ.
ಏಳು ದೇಶಗಳಲ್ಲಿ ಡ್ರೋನ್‌ಗಳ ಅಕ್ರಮ ಜಾಲ!
ಆಗ್ನೇಯ ಏಷ್ಯಾದ ಏಳು ದೇಶಗಳಲ್ಲಿ ಡ್ರೋನ್‌ಗಳಿಗೆ ಸಂಬಂಧಿಸಿದ ಅಕ್ರಮ ಚಟುವಟಿಕೆಗಳು ಪತ್ತೆಯಾಗಿವೆ. ವರದಿಯಾದ ಪ್ರಕರಣಗಳಲ್ಲಿ ಶೇ.86ರಷ್ಟು ಮಾದಕವಸ್ತು ಕಳ್ಳಸಾಗಣೆಗೆ ಸಂಬಂಧಿಸಿವೆ ಎಂದು ವರದಿಗಳು ಹೇಳುತ್ತಿವೆ.ಥಾಯ್ಲೆಂಡ್‌ನಲ್ಲಿ 4,583 ಡ್ರೋನ್‌ಗಳನ್ನು ವಶಪಡಿಸಿಕೊಂಡಿರುವ ಮಾಹಿತಿ ಹೊರಬಿದ್ದಿದೆ. ಮಲೇಷ್ಯಾ, ಇಂಡೋನೇಷ್ಯಾ, ಫಿಲಿಪ್ಪೀನ್ಸ್ ಹಾಗೂ ಮ್ಯಾನ್ಮಾರ್‌ನಲ್ಲಿಯೂ ಡ್ರೋನ್‌ಗಳ ದುರ್ಬಳಕೆ ದಿನ ಕಳೆದಂತೆ ಹೆಚ್ಚುತ್ತಲೇ ಇವೆ.ವಿಶೇಷವೆಂದರೆ, ಆನ್‌ಲೈನ್‌ನಲ್ಲಿ ಸುಲಭವಾಗಿ ಸಿಗುವ ಡ್ರೋನ್‌ಗಳ ಬಿಡಿಭಾಗಗಳನ್ನು ಖರೀದಿಸಿ, ಅಂತಾರಾಷ್ಟ್ರೀಯ ಸರಕು ಸಾಗಣೆ ವ್ಯವಸ್ಥೆಯ ಮೂಲಕ ಭಯೋತ್ಪಾದಕ ಸಂಘಟನೆಗಳಿಗೆ ತಲುಪಿಸುವ ಜಾಲಗಳೂ ಪತ್ತೆಯಾಗಿರುವುದು ಮತ್ತಷ್ಟು ಆತಂಕಕ್ಕೆ ಕಾರಣವಾಗಿದೆ.
ಪೋಪ್ ಫ್ರಾನ್ಸಿಸ್ ಮೇಲೆ ದಾಳಿ ಬೆದರಿಕೆ; ಶಂಕಿತರ ಬಳಿ ಡ್ರೋನ್!
2024ರ ಸೆಪ್ಟೆಂಬರ್‌ನಲ್ಲಿ ಕ್ರೈಸ್ತರ ಪರಮೋಚ್ಚ ಧರ್ಮಗುರುಗಳಾಗಿದ್ದ ಅಂದಿನ ಪೋಪ್ ಫ್ರಾನ್ಸಿಸ್ ಇಂಡೋನೇಷ್ಯಾಕ್ಕೆ ಭೇಟಿ ನೀಡಿದಾಗ ಅವರ ಭದ್ರತೆಗೆ ಬೆದರಿಕೆ ಒಡ್ಡಿದ ಆರೋಪದಲ್ಲಿ ಏಳು ಮಂದಿಯನ್ನು ಬಂಧಿಸಲಾಗಿತ್ತು. ಈ ಪ್ರಕರಣದ ಶಂಕಿತರೊಬ್ಬರ ಮನೆಯಲ್ಲಿ ನಡೆಸಿದ ಶೋಧದ ವೇಳೆ ಡ್ರೋನ್, ಬಿಲ್ಲುಬಾಣಗಳು ಹಾಗೂ ಐಸಿಸ್ ಸಂಘಟನೆಗೆ ಸಂಬಂಧಿಸಿದ ಕರಪತ್ರಗಳು ಪತ್ತೆಯಾಗಿದ್ದವು ಎಂದು ಮಾಧ್ಯಮಗಳು ವರದಿ ಮಾಡಿದ್ದವು.
ಆದರೆ ಪೋಪ್ ಮೇಲೆ ಡ್ರೋನ್ ಮೂಲಕ ದಾಳಿ ನಡೆಸುವ ನಿರ್ದಿಷ್ಟ ಸಂಚು ಸಾಬೀತಾಗಿದೆ ಎಂಬುದಕ್ಕೆ ಅಧಿಕೃತ ದೃಢೀಕರಣವಿಲ್ಲ. ಇಂಡೋನೇಷ್ಯಾ ಪೊಲೀಸರು ಮುಖ್ಯವಾಗಿ ಆನ್‌ಲೈನ್ ಬೆದರಿಕೆಗಳು ಮತ್ತು ಪ್ರಚೋದನಕಾರಿ ಸಂದೇಶಗಳ ಕುರಿತು ಮಾಹಿತಿ ನೀಡಿದ್ದರು. ಆದರೂ ಈ ಪ್ರಕರಣ ಗಣ್ಯರ ಭದ್ರತೆಯಲ್ಲಿ ಡ್ರೋನ್‌ಗಳಿಂದ ಎದುರಾಗಬಹುದಾದ ಅಪಾಯವನ್ನು ಮುನ್ನೆಲೆಗೆ ತಂದಿತ್ತು.
ಜೈಲಿನ ಗೋಡೆಯನ್ನೇ ದಾಟಿದ ಮಾದಕವಸ್ತು!
ಇನ್ನು, ಮಲೇಷ್ಯಾದ ಜೈಲುಗಳಲ್ಲಿ ಡ್ರೋನ್‌ಗಳ ಮೂಲಕ ಮಾದಕವಸ್ತು ತಲುಪಿಸುತ್ತಿರುವ ಪ್ರಕರಣಗಳು ಆತಂಕ ಮೂಡಿಸಿವೆ. ಮಲೇಷ್ಯಾದಲ್ಲಿ ಜೈಲುಗಳಿಗೆ ಡ್ರೋನ್ ಮೂಲಕ ಮಾದಕವಸ್ತು ತಲುಪಿಸಿದ 55 ಪ್ರಕರಣಗಳು ವರದಿಯಾಗಿವೆ. ತಾಪಾ ಜೈಲಿನಲ್ಲಿ ಇಂತಹ ಕಳ್ಳಸಾಗಣೆ ಪತ್ತೆಯಾಗಿದೆ. ಸುಂಗೈ ಉಡಾಂಗ್ ಜೈಲಿಗೆ ತಂಬಾಕು ತಲುಪಿಸಲು ಯತ್ನಿಸಿದ ಇಬ್ಬರನ್ನೂ ಬಂಧಿಸಲಾಗಿದೆ.ಇಂಡೋನೇಷ್ಯಾದ ಬಾಂಡುಂಗ್ ಜೈಲಿನಲ್ಲಿ ಕೈದಿಗಳು ಸಾಮಾಜಿಕ ಜಾಲತಾಣಗಳ ಮೂಲಕ ಹೊರಗಿನ ವ್ಯಕ್ತಿಗಳಿಂದ ಮಾದಕವಸ್ತು ಖರೀದಿಸಿ, ಡ್ರೋನ್ ಮೂಲಕ ತರಿಸಿಕೊಳ್ಳುತ್ತಿದ್ದ ಪ್ರಕರಣಗಳೂ ಆಗಾಗ ಬೆಳಕಿಗೆ ಬರುತ್ತಲೇ ಇವೆ.ಜೈಲಿನ ಎತ್ತರದ ಗೋಡೆಗಳು, ಕಾವಲುಗಾರರು ಹಾಗೂ ಭದ್ರತಾ ತಪಾಸಣೆಗಳನ್ನು ತಪ್ಪಿಸಿ ನಿಷೇಧಿತ ವಸ್ತುಗಳನ್ನು ತಲುಪಿಸುವ ಹೊಸ ಮಾರ್ಗವಾಗಿ ಡ್ರೋನ್‌ಗಳು ಬಳಕೆಯಾಗುತ್ತಿರುವುದಕ್ಕೆ ಇವು ಉದಾಹರಣೆಗಳು.
ಮ್ಯಾನ್ಮಾರ್‌ನಲ್ಲಿ ಯುದ್ಧದ ದಿಕ್ಕನ್ನೇ ಬದಲಿಸಿದ ಡ್ರೋನ್‌ಗಳು!
ಮ್ಯಾನ್ಮಾರ್‌ನಲ್ಲಿ ಡ್ರೋನ್‌ಗಳು ಯುದ್ಧದ ಕಾರ್ಯತಂತ್ರವನ್ನೇ ಬದಲಿಸಿವೆ. ಸೇನಾಡಳಿತದ ವಿರುದ್ಧ ಹೋರಾಡುತ್ತಿರುವ ಸಶಸ್ತ್ರ ಸಂಘಟನೆಗಳು 600ಕ್ಕೂ ಹೆಚ್ಚು ಸ್ಥಳಗಳಲ್ಲಿ 2,100ಕ್ಕೂ ಅಧಿಕ ಡ್ರೋನ್ ದಾಳಿಗಳನ್ನು ನಡೆಸಿವೆ. ವಾಣಿಜ್ಯ ಉದ್ದೇಶದ ಡ್ರೋನ್‌ಗಳನ್ನು ಮಾರ್ಪಡಿಸಿ ಸೇನಾ ಶಿಬಿರಗಳು, ವಾಹನಗಳು ಹಾಗೂ ತಪಾಸಣಾ ಕೇಂದ್ರಗಳ ಮೇಲೆ ದಾಳಿ ನಡೆಸಲಾಗುತ್ತಿದೆ. ಇದಕ್ಕೆ ಪ್ರತಿಯಾಗಿ ಸೇನಾಡಳಿತವೂ ವೈಮಾನಿಕ ದಾಳಿಗಳನ್ನು ಹೆಚ್ಚಿಸಿದೆ. ಕಡಿಮೆ ಸಂಪನ್ಮೂಲ ಹೊಂದಿರುವ ಸಂಘಟನೆಗಳಿಗೂ ಪ್ರಬಲ ಸೇನೆಯನ್ನು ಎದುರಿಸುವ ಸಾಮರ್ಥ್ಯವನ್ನು ಡ್ರೋನ್‌ಗಳು ಒದಗಿಸುತ್ತಿವೆ.
ಕೃತಕ ಬುದ್ಧಿಮತ್ತೆ ಸೇರಿದರೆ ಮತ್ತಷ್ಟು ಅಪಾಯ!
ಇದೀಗ ಡ್ರೋನ್‌ಗಳಿಗೆ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನ ಸೇರ್ಪಡೆಯಾಗುತ್ತಿರುವುದು ಹೊಸ ಆತಂಕಕ್ಕೆ ಕಾರಣವಾಗಿದೆ. ಅಮೆರಿಕದ ಭದ್ರತಾ ತಜ್ಞ ರಾಬರ್ಟ್ ಬಂಕರ್ ಅವರ ವಿಶ್ಲೇಷಣೆಯ ಪ್ರಕಾರ, ಕೃತಕ ಬುದ್ಧಿಮತ್ತೆಯ ನೆರವಿನಿಂದ ವ್ಯಕ್ತಿಗಳ ಮುಖ ಹಾಗೂ ನಿರ್ದಿಷ್ಟ ವಸ್ತುಗಳನ್ನು ಗುರುತಿಸಿ ಸ್ವಯಂಚಾಲಿತವಾಗಿ ಗುರಿಯತ್ತ ಸಾಗುವ ಡ್ರೋನ್‌ಗಳನ್ನು ಅಭಿವೃದ್ಧಿಪಡಿಸುವುದು ಸಾಧ್ಯವಾಗಿದೆ.ಇಂತಹ ಡ್ರೋನ್‌ಗಳು ಭಯೋತ್ಪಾದಕರ ಕೈಗೆ ಸಿಕ್ಕರೆ ಗಣ್ಯ ವ್ಯಕ್ತಿಗಳು, ವಿದ್ಯುತ್ ಸ್ಥಾವರಗಳು ಹಾಗೂ ಪ್ರಮುಖ ಕಟ್ಟಡಗಳಿಗೆ ಅಪಾಯ ಎದುರಾಗಬಹುದು. ಆದರೆ ಇಂತಹ ಸಂಪೂರ್ಣ ಸ್ವಯಂಚಾಲಿತ ಡ್ರೋನ್‌ಗಳನ್ನು ಬಳಸಿಕೊಂಡು ಉಗ್ರರು ಯಶಸ್ವಿಯಾಗಿ ದಾಳಿ ನಡೆಸಿರುವ ಪ್ರಕರಣ ಇನ್ನೂ ಸಾರ್ವಜನಿಕವಾಗಿ ದೃಢಪಟ್ಟಿಲ್ಲ. ಇದು ಬೆಳೆಯುತ್ತಿರುವ ಭವಿಷ್ಯದ ಅಪಾಯವಾಗಿದೆ.
ಭಾರತದ ಗಡಿಯಲ್ಲೂ ಡ್ರೋನ್ ಕಳ್ಳಸಾಗಣೆ!
ಭಾರತಕ್ಕೂ ಡ್ರೋನ್‌ಗಳ ಅಕ್ರಮ ಬಳಕೆ ಗಂಭೀರ ಸವಾಲಾಗಿದೆ. ಪಾಕಿಸ್ತಾನದ ಗಡಿಯಿಂದ ಪಂಜಾಬ್‌ಗೆ ಮಾದಕವಸ್ತುಗಳು, ಶಸ್ತ್ರಾಸ್ತ್ರಗಳು ಹಾಗೂ ಸ್ಫೋಟಕಗಳನ್ನು ಸಾಗಿಸಲು ಡ್ರೋನ್‌ಗಳನ್ನು ಬಳಸಲಾಗುತ್ತಿದೆ.2024ರಲ್ಲಿ ಪಂಜಾಬ್ ಗಡಿಯಲ್ಲಿ 294 ಡ್ರೋನ್‌ಗಳನ್ನು ವಶಪಡಿಸಿಕೊಳ್ಳಲಾಗಿತ್ತು. 2026ರ ಜನವರಿಯಿಂದ ಸೆಪ್ಟೆಂಬರ್ ಅಂತ್ಯದವರೆಗೆ ಗಡಿಭದ್ರತಾ ಪಡೆ 182 ಡ್ರೋನ್‌ಗಳನ್ನು ವಶಪಡಿಸಿಕೊಂಡಿದೆ. ಇದೇ ಅವಧಿಯಲ್ಲಿ ಪಾಕಿಸ್ತಾನದಿಂದ ಕಳ್ಳಸಾಗಣೆಯಾದ ಸುಮಾರು 850 ಕೆ.ಜಿ. ಹೆರಾಯಿನ್ ಕೂಡ ಪತ್ತೆಯಾಗಿದೆ. ಆದರೆ ಈ ಎಲ್ಲ ಮಾದಕ ದ್ರವ್ಯಗಳೂ ಸಂಪೂರ್ಣವಾಗಿ ಡ್ರೋನ್‌ಗಳ ಮೂಲಕವೇ ಸಾಗಿಸಲಾಗಿಲ್ಲ, ಆದರೆ, ಡ್ರೋನ್ ಬಳಸಿ ಡ್ರಗ್ಸ್ ಸಾಗಣೆ ಪ್ರಕರಣಗಳು ಹೆಚ್ಚಳವಾಗುತ್ತಿರುವುದಂತೂ ನಿಜ.ಇತ್ತೀಚೆಗೆ ರಾಜಸ್ಥಾನದ ಶ್ರೀಗಂಗಾನಗರ ಗಡಿಯಲ್ಲಿಯೂ ಡ್ರೋನ್ ಮೂಲಕ ಬೀಳಿಸಲಾಗಿದೆ ಎನ್ನಲಾದ ವಿದೇಶಿ ಪಿಸ್ತೂಲುಗಳು, ಮದ್ದುಗುಂಡುಗಳು ಹಾಗೂ ಸ್ಫೋಟಕಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಡ್ರೋನ್ ಅಪಾಯಕ್ಕೆ ಸರ್ಕಾರಗಳ ಪ್ರತಿತಂತ್ರವೇನು?
ಈ ಅಪಾಯ ಎದುರಿಸಲು ಸರ್ಕಾರಗಳು ಡ್ರೋನ್ ಪತ್ತೆಹಚ್ಚುವ ರೇಡಾರ್‌ಗಳು, ಸಂಕೇತಗಳನ್ನು ನಿಷ್ಕ್ರಿಯಗೊಳಿಸುವ ತಂತ್ರಜ್ಞಾನ ಹಾಗೂ ಡ್ರೋನ್ ಪ್ರತಿರೋಧ ವ್ಯವಸ್ಥೆಗಳನ್ನು ಬಳಸುತ್ತಿವೆ.ಭಾರತದಲ್ಲಿ ಗಡಿಭದ್ರತಾ ಪಡೆ ವಿಶೇಷ ಡ್ರೋನ್ ಪ್ರತಿರೋಧ ವ್ಯವಸ್ಥೆಗಳನ್ನು ನಿಯೋಜಿಸಿದೆ. ವಶಪಡಿಸಿಕೊಂಡ ಡ್ರೋನ್‌ಗಳ ಹಾರಾಟದ ದಾಖಲೆಗಳನ್ನು ಪರಿಶೀಲಿಸಿ ಕಳ್ಳಸಾಗಣೆ ಜಾಲಗಳನ್ನು ಪತ್ತೆಹಚ್ಚುವ ಪ್ರಯತ್ನವೂ ನಡೆಯುತ್ತಿದೆ. ಆದರೆ ಹೊಸ ತಲೆಮಾರಿನ ಡ್ರೋನ್‌ಗಳು ಸಂಕೇತಗಳ ಅಡಚಣೆಯನ್ನು ಗುರುತಿಸಿ ಹಿಂದಿರುಗುವ ಸಾಮರ್ಥ್ಯ ಹೊಂದಿರುವುದರಿಂದ ಭದ್ರತಾ ಪಡೆಗಳಿಗೆ ಸವಾಲು ಮತ್ತು ತಲೆನೋವು ಹೆಚ್ಚಾಗಿದೆ.
ಒಟ್ಟಿನಲ್ಲಿ, ಮಾನವರ ಬದುಕನ್ನು ಸುಲಭಗೊಳಿಸಲು ಅಭಿವೃದ್ಧಿಪಡಿಸಿದ ತಂತ್ರಜ್ಞಾನವೇ ಈಗ ಅಪರಾಧಿಗಳ ಕೈಯಲ್ಲಿ ಅಪಾಯಕಾರಿ ಅಸ್ತ್ರವಾಗುತ್ತಿದೆ. ಒಂದು ಕಾಲದಲ್ಲಿ ಅಪರಾಧಿಗಳನ್ನು ತಡೆಯಲು ನೆಲದ ಮೇಲೆ ಬೇಲಿ ನಿರ್ಮಿಸಲಾಗುತ್ತಿತ್ತು. ಆದರೆ ಈಗ ಅಪರಾಧಿಗಳು ಆ ಬೇಲಿಯ ಮೇಲೆಯೇ ಹಾರುತ್ತಿದ್ದಾರೆ! ಹೀಗಾಗಿ ಭವಿಷ್ಯದ ಅಪರಾಧಗಳ ವಿರುದ್ಧದ ಹೋರಾಟ ನೆಲದ ಮೇಲೆ ಮಾತ್ರವಲ್ಲ, ಆಕಾಶದಲ್ಲಿಯೂ ನಡೆಯಬೇಕಾಗಿದೆ!
