ಬೆಂಗಳೂರು : ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಐಪಿಎಲ್ 2026ರ ಹೈ-ಸ್ಕೋರಿಂಗ್ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ವಿರುದ್ಧ ಗುಜರಾತ್ ಟೈಟಾನ್ಸ್ (GT) 5 ವಿಕೆಟ್ಗಳ ಸೋಲನುಭವಿಸಿದೆ. ಗುಜರಾತ್ ನೀಡಿದ್ದ 206 ರನ್ಗಳ ಬೃಹತ್ ಗುರಿಯನ್ನು ಆರ್ಸಿಬಿ ಇನ್ನು ಕೆಲವು ಎಸೆತಗಳು ಬಾಕಿ ಇರುವಾಗಲೇ ಸುಲಭವಾಗಿ ಬೆನ್ನಟ್ಟಿ ಜಯ ಸಾಧಿಸಿತು.
ಈ ಸೋಲಿನ ಬೆನ್ನಲ್ಲೇ ಗುಜರಾತ್ ಟೈಟಾನ್ಸ್ ನಾಯಕ ಶುಭ್ಮನ್ ಗಿಲ್ ಅವರ ನಾಯಕತ್ವ ಮತ್ತು ತಂತ್ರಗಾರಿಕೆಯ ಬಗ್ಗೆ ತೀವ್ರ ಟೀಕೆಗಳು ವ್ಯಕ್ತವಾಗುತ್ತಿವೆ. ಅಹಮದಾಬಾದ್ನಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧದ ಹೀನಾಯ ಸೋಲಿನ ನಂತರ ಇದೀಗ ಆರ್ಸಿಬಿ ವಿರುದ್ಧವೂ ಎಡವಿರುವುದು ಗುಜರಾತ್ ತಂಡದ ಸತತ ಹಿನ್ನಡೆಗೆ ಸಾಕ್ಷಿಯಾಗಿದೆ. ವಿಶೇಷವಾಗಿ, ಡೆತ್ ಓವರ್ಗಳಲ್ಲಿ ಗಿಲ್ ತೆಗೆದುಕೊಂಡ ಬೌಲಿಂಗ್ ನಿರ್ಧಾರಗಳು ಇದೀಗ ಕ್ರಿಕೆಟ್ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿವೆ.
ಬೌಲಿಂಗ್ ಲೆಕ್ಕಾಚಾರದಲ್ಲಿ ನಾಯಕನ ಎಡವಟ್ಟು
ಭಾರತದ ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್ ಅವರು ಶುಭ್ಮನ್ ಗಿಲ್ ಅವರ ನಾಯಕತ್ವದ ಬಗ್ಗೆ ನೇರ ಅಸಮಾಧಾನ ಹೊರಹಾಕಿದ್ದಾರೆ. ಕ್ರಿಕ್ಬಜ್ನಲ್ಲಿ ಮಾತನಾಡಿದ ಅವರು, ಅಂತಿಮ ಓವರ್ಗಳಲ್ಲಿ ಬೌಲರ್ಗಳನ್ನು ಬಳಸಿಕೊಂಡ ರೀತಿಯ ಬಗ್ಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
ಕೊನೆಯ ಮೂರು ಓವರ್ಗಳಲ್ಲಿ 22-25 ರನ್ಗಳ ಅಗತ್ಯವಿದ್ದಾಗ ಮೊಹಮ್ಮದ್ ಸಿರಾಜ್ ಅವರಂತಹ ಅನುಭವಿ ಬೌಲರ್ನನ್ನು ದಾಳಿಗಿಳಿಸಬೇಕಿತ್ತು. ಒಂದು ವೇಳೆ ಸಿರಾಜ್ ಆ ಹಂತದಲ್ಲಿ ಒಂದು ವಿಕೆಟ್ ಪಡೆದಿದ್ದರೆ ಪಂದ್ಯದ ಚಿತ್ರಣವೇ ಬದಲಾಗುತ್ತಿತ್ತು ಮತ್ತು ಪಂದ್ಯ ಕೊನೆಯ ಓವರ್ವರೆಗೂ ಸಾಗುವ ಸಾಧ್ಯತೆಯಿತ್ತು ಎಂದು ಸೆಹ್ವಾಗ್ ಅಭಿಪ್ರಾಯಪಟ್ಟಿದ್ದಾರೆ. ಆರಂಭಿಕ ಸ್ಪೆಲ್ನಲ್ಲಿ ಉತ್ತಮವಾಗಿ ಬೌಲಿಂಗ್ ಮಾಡಿದ್ದ ಸಿರಾಜ್ಗೆ ಪೂರ್ಣ ಓವರ್ಗಳ ಕೋಟಾವನ್ನು ನೀಡದೆ, ಮಾನವ್ ಸುತಾರ್ಗೆ ಓವರ್ ನೀಡಿ 15 ರನ್ ಬಿಟ್ಟುಕೊಟ್ಟಿದ್ದು ಆರ್ಸಿಬಿ ತಂಡವು ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಲು ಕಾರಣವಾಯಿತು ಎಂಬುದು ಅವರ ವಾದ.
ಧೈರ್ಯ ಕಳೆದುಕೊಂಡರೇ ಶುಭ್ಮನ್ ಗಿಲ್?
ಬೌಲರ್ಗಳು ರನ್ ಬಿಟ್ಟುಕೊಡುತ್ತಿದ್ದಾರೆ ಎಂಬ ಕಾರಣಕ್ಕೆ ಅವರನ್ನು ಮತ್ತೆ ದಾಳಿಗಿಳಿಸದಿರುವುದು ನಾಯಕನ ಕಳಪೆ ತಂತ್ರಗಾರಿಕೆಯನ್ನು ತೋರಿಸುತ್ತದೆ ಎಂದು ಸೆಹ್ವಾಗ್ ಕಟುವಾಗಿ ಟೀಕಿಸಿದ್ದಾರೆ. ಪ್ರಸಿದ್ಧ್ ಕೃಷ್ಣ ಮತ್ತು ರಶೀದ್ ಖಾನ್ ಅವರು ರನ್ ಚಚ್ಚಿಸಿಕೊಂಡರೂ, ಅವರನ್ನು ಮರಳಿ ದಾಳಿಗಿಳಿಸಿ ವಿಕೆಟ್ ಕಬಳಿಸುವ ವಿಶ್ವಾಸವನ್ನು ನಾಯಕನೇ ಮೂಡಿಸಬೇಕು. ಆದರೆ, ಓರ್ವ ಬೌಲರ್ ಎರಡು ಓವರ್ಗಳಲ್ಲಿ 31 ರನ್ ನೀಡಿದ್ದಾನೆಂದು ಆತನಿಗೆ ಮುಂದಿನ ಓವರ್ ನೀಡದಿರುವುದು ನಾಯಕನಾಗಿ ಧೈರ್ಯ ಕಳೆದುಕೊಂಡಿರುವುದನ್ನು ಸ್ಪಷ್ಟಪಡಿಸುತ್ತದೆ. ಇದು ಶರಣಾಗತಿಯ ಲಕ್ಷಣ ಎಂದು ಸೆಹ್ವಾಗ್ ಖಾರವಾಗಿ ಪ್ರತಿಕ್ರಿಯಿಸಿದ್ದಾರೆ. ವಿಕೆಟ್ ಕಬಳಿಸುವ ಬೌಲರ್ಗಳು ಇದ್ದರೂ ಅವರನ್ನು ಸರಿಯಾದ ಸಮಯದಲ್ಲಿ ಬಳಸಿಕೊಳ್ಳುವಲ್ಲಿ ವಿಫಲವಾಗಿರುವುದು ಈ ಋತುವಿನಲ್ಲಿ ಗುಜರಾತ್ ತಂಡದ ದೊಡ್ಡ ಸಮಸ್ಯೆಯಾಗಿ ಪರಿಣಮಿಸಿದೆ.
ಮುಂದಿನ ಪಂದ್ಯಗಳ ಸವಾಲು
ಒತ್ತಡದ ಪರಿಸ್ಥಿತಿಯಲ್ಲಿ ತಂತ್ರಗಾರಿಕೆ ರೂಪಿಸುವಲ್ಲಿ ಗುಜರಾತ್ ತಂಡ ಎಡವುತ್ತಿರುವುದು ಇದೇ ಮೊದಲೇನಲ್ಲ. ಮುಂಬೈ ಇಂಡಿಯನ್ಸ್ ವಿರುದ್ಧದ 99 ರನ್ಗಳ ಸೋಲಿನ ಪಂದ್ಯದಲ್ಲೂ ಕೊನೆಯ ಓವರ್ಗಳಲ್ಲಿ 73 ರನ್ ಚಚ್ಚಿಸಿಕೊಂಡಿತ್ತು. ರಾಜಸ್ಥಾನ ರಾಯಲ್ಸ್ ವಿರುದ್ಧ ಡೆತ್ ಓವರ್ಗಳಲ್ಲಿ ನಿಯಂತ್ರಣ ಸಾಧಿಸಿದರೂ, ಆರಂಭಿಕ ಮತ್ತು ಮಧ್ಯಮ ಓವರ್ಗಳಲ್ಲಿ ಸಾಕಷ್ಟು ರನ್ ಬಿಟ್ಟುಕೊಟ್ಟಿತ್ತು. ಹೀಗೆ ಬೌಲಿಂಗ್ ವಿಭಾಗದಲ್ಲಿನ ಅಸಮತೋಲನ ಮತ್ತು ನಾಯಕತ್ವದ ನಿರ್ಧಾರಗಳು ಗುಜರಾತ್ ತಂಡಕ್ಕೆ ಮುಳುವಾಗುತ್ತಿವೆ. ಈ ಎಲ್ಲಾ ತಪ್ಪುಗಳನ್ನು ತಿದ್ದಿಕೊಂಡು ಏಪ್ರಿಲ್ 26ರಂದು ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಪಂದ್ಯಕ್ಕೆ ಗುಜರಾತ್ ತಂಡ ಸಜ್ಜಾಗಬೇಕಿದೆ. ಮತ್ತೊಂದೆಡೆ, ಗೆಲುವಿನ ಹುಮ್ಮಸ್ಸಿನಲ್ಲಿರುವ ಆರ್ಸಿಬಿ ಏಪ್ರಿಲ್ 27ರಂದು ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಎದುರಿಸಲಿದೆ.
ಇದನ್ನೂ ಓದಿ : ಡೆಲ್ಲಿ ಕ್ಯಾಪಿಟಲ್ಸ್ ಪಾಳಯಕ್ಕೆ ಮಿಚೆಲ್ ಸ್ಟಾರ್ಕ್ ಎಂಟ್ರಿ!
