ಕಠ್ಮಂಡು : ಇತ್ತೀಚೆಗೆ ನೆರೆರಾಷ್ಟ್ರ ನೇಪಾಳದ ರಾಜಕೀಯದಲ್ಲಿ ಹೊಸ ಸಂಚಲನ ಮೂಡಿಸಿರುವ ಮಾಜಿ ರ್ಯಾಪರ್ ಹಾಗೂ ರಾಜಕಾರಣಿ ‘ಬಾಲೆನ್‘ ಎಂದೇ ಖ್ಯಾತರಾಗಿರುವ ಬಾಲೆಂದ್ರ ಶಾ ಅವರು ಇಂದು (ಶುಕ್ರವಾರ) ನೇಪಾಳದ ಅತಿ ಕಿರಿಯ ಪ್ರಧಾನಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ.
ಗುರುವಾರವಷ್ಟೇ 35 ವರ್ಷದ ಬಾಲೆನ್ ಅವರನ್ನು ರಾಷ್ಟ್ರೀಯ ಸ್ವತಂತ್ರ ಪಾರ್ಟಿ (ಆರ್ಎಸ್ಪಿ)ಯ ಸಂಸದೀಯ ನಾಯಕರನ್ನಾಗಿ ಅವಿರೋಧವಾಗಿ ಆಯ್ಕೆ ಮಾಡಲಾಗಿತ್ತು. ಈ ಮೂಲಕ ಅವರು ದೇಶದ ಅತ್ಯುನ್ನತ ಕಾರ್ಯಾಂಗ ಹುದ್ದೆಗೇರಲು ಅಧಿಕೃತವಾಗಿ ಅರ್ಹತೆ ಪಡೆದರು ಎಂದು ಆರ್ಎಸ್ಪಿ ಕೇಂದ್ರ ಸಂಘಟನಾ ಸಮಿತಿಯ ಕಾರ್ಯದರ್ಶಿ ಶಂಕರ್ ಶ್ರೇಷ್ಠ ಮಾಹಿತಿ ನೀಡಿದ್ದಾರೆ.
ನೂತನ ಸಚಿವ ಸಂಪುಟ ರಚಿಸುವ ಸಂಪೂರ್ಣ ಅಧಿಕಾರವನ್ನು ಪಕ್ಷದ ಕೇಂದ್ರ ಸಮಿತಿಯು ಬಾಲೆನ್ ಅವರಿಗೆ ನೀಡಿದ್ದು, ಸುಮಾರು 15 ರಿಂದ 18 ಸದಸ್ಯರನ್ನೊಳಗೊಂಡ ಸಂಪುಟವನ್ನು ಅವರು ರಚಿಸುವ ನಿರೀಕ್ಷೆಯಿದೆ.
ಕಳೆದ ವರ್ಷ ನಡೆದ ಜೆನ್ ಜೀ(ಯುವಜನತೆ) ಪ್ರತಿಭಟನೆಯ ಬಳಿಕ ಇತ್ತೀಚೆಗೆ ನಡೆದ ಮೊದಲ ಸಾರ್ವತ್ರಿಕ ಚುನಾವಣೆಯಲ್ಲಿ ಬಾಲೆನ್ ನೇತೃತ್ವದ ಆರ್ಎಸ್ಪಿ ಅಭೂತಪೂರ್ವ ಜಯ ಸಾಧಿಸಿತ್ತು. ಸಂಸತ್ತಿನ ಕೆಳಮನೆಯಾದ ‘ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್’ನ ಒಟ್ಟು 275 ಸ್ಥಾನಗಳ ಪೈಕಿ 182 ಸ್ಥಾನಗಳನ್ನು ಗೆದ್ದುಕೊಳ್ಳುವ ಮೂಲಕ ಆರ್ಎಸ್ಪಿ ಬಹುಮತ ಸಾಬೀತುಪಡಿಸಿದೆ.
ಇದರೊಂದಿಗೆ ದಶಕಗಳಿಂದ ಆಡಳಿತ ನಡೆಸುತ್ತಿದ್ದ ಸಾಂಪ್ರದಾಯಿಕ ಪಕ್ಷಗಳು ಧೂಳೀಪಟವಾಗಿವೆ. ನೇಪಾಳಿ ಕಾಂಗ್ರೆಸ್ ಕೇವಲ 38 ಸ್ಥಾನಗಳಿಗೆ ಕುಸಿದಿದ್ದರೆ, ಕಮ್ಯುನಿಸ್ಟ್ ಪಾರ್ಟಿ ಆಫ್ ನೇಪಾಳ್-ಯುನಿಫೈಡ್ ಮಾರ್ಕ್ಸಿಸ್ಟ್-ಲೆನಿನಿಸ್ಟ್ 25 ಹಾಗೂ ನೇಪಾಳಿ ಕಮ್ಯುನಿಸ್ಟ್ ಪಾರ್ಟಿ ಕೇವಲ 17 ಸ್ಥಾನಗಳಿಗೆ ತೃಪ್ತಿಪಟ್ಟುಕೊಂಡಿವೆ. ಕೆಳಮನೆಯ ಒಟ್ಟು 275 ಸದಸ್ಯರ ಪೈಕಿ 165 ಮಂದಿ ನೇರ ಮತದಾನದ ಮೂಲಕ ಮತ್ತು 110 ಮಂದಿ ಪ್ರಮಾಣಾನುಗುಣ ಮತದಾನದ ಮೂಲಕ ಆಯ್ಕೆಯಾಗಿದ್ದಾರೆ.
ಚುನಾವಣಾ ಪ್ರಕ್ರಿಯೆ ಮುಕ್ತಾಯಗೊಂಡ ಮೂರು ವಾರಗಳ ಬಳಿಕ ಸಿಂಹ ದರ್ಬಾರ್ನಲ್ಲಿರುವ ಫೆಡರಲ್ ಸಂಸತ್ ಭವನದಲ್ಲಿ ನೂತನ ಸಂಸದರ ಪ್ರಮಾಣ ವಚನ ಸ್ವೀಕಾರ ಸಮಾರಂಭ ನಡೆಯಿತು. ಸದನದ ಅತ್ಯಂತ ಹಿರಿಯ ಸದಸ್ಯರಾದ 78 ವರ್ಷದ ಅರ್ಜುನ್ ನರಸಿಂಗ್ ಕೆಸಿ ಅವರು ನೂತನ ಸಂಸದರಿಗೆ ಅಧಿಕಾರ ಮತ್ತು ಗೌಪ್ಯತೆಯ ಪ್ರಮಾಣ ವಚನ ಬೋಧಿಸಿದರು. ಈ ಪ್ರಕ್ರಿಯೆ ಮುಗಿದ ತಕ್ಷಣವೇ ರಾಷ್ಟ್ರಪತಿ ಭವನವಾದ ‘ಶೀತಲ್ ನಿವಾಸ್’ನಲ್ಲಿ ಬಾಲೆನ್ ಶಾ ಅವರು ನೂತನ ಪ್ರಧಾನಮಂತ್ರಿಯಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ.
ಇದನ್ನೂ ಓದಿ : ಕನ್ನಡ ಚಿತ್ರರಂಗವನ್ನು ಕಡೆಗಣಿಸಿದ ಫಿಲ್ಮ್ಫೇರ್ – ಭುಗಿಲೆದ್ದ ಕನ್ನಡಿಗರ ಆಕ್ರೋಶ!
