ನೆತನ್ಯಾಹು ಸುದೀರ್ಘ ಅಧಿಕಾರಕ್ಕೆ ಕಂಟಕ : ಇಸ್ರೇಲ್‌ನ ಮುಂದಿನ ಪ್ರಧಾನಿಯಾಗಿ ಗಾಡಿ ಐಸೆನ್‌ಕೋಟ್?

ಟೆಲ್ ಅವೀವ್: ಹಲವು ವರ್ಷಗಳಿಂದ ಇಸ್ರೇಲ್ ರಾಜಕೀಯದಲ್ಲಿ ಆಧಿಪತ್ಯ ಸಾಧಿಸಿದ್ದ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ರಾಜಕೀಯ ಅಧಿಕಾರಕ್ಕೆ ಕೊನೆಗೂ ಕಂಟಕ ಎದುರಾದಂತೆ ಕಾಣುತ್ತಿದೆ. ಇತ್ತೀಚೆಗೆ ನಡೆದ ಇಸ್ರೇಲ್ ಸಾರ್ವತ್ರಿಕ ಚುನಾವಣೆಯ ಬಳಿಕ ಸರ್ಕಾರ ರಚನೆಯ ಗೊಂದಲ ತೀವ್ರಗೊಂಡಿದ್ದು, ದೇಶದ ಮುಂದಿನ ಪ್ರಧಾನಿಯಾಗಿ ಮಾಜಿ ಸೇನಾ ಮುಖ್ಯಸ್ಥ ಹಾಗೂ ವಿರೋಧ ಪಕ್ಷದ ನಾಯಕ ಗಾಡಿ ಐಸೆನ್‌ಕೋಟ್ ಅಧಿಕಾರ ಹಿಡಿಯುವ ಸಾಧ್ಯತೆಗಳು ದಟ್ಟವಾಗಿವೆ.

ಹೊಸ ಸರ್ಕಾರ ರಚನೆಯ ಕಸರತ್ತು

ಚುನಾವಣೆಯ ಫಲಿತಾಂಶದ ಬಳಿಕ ಅಧ್ಯಕ್ಷ ಐಸಾಕ್ ಹೆರ್ಜೋಗ್ ಅವರು ವಿವಿಧ ರಾಜಕೀಯ ಪಕ್ಷಗಳ ನಾಯಕರೊಂದಿಗೆ ಸತತ ಸಮಾಲೋಚನೆ ನಡೆಸುತ್ತಿದ್ದಾರೆ. ಭಾನುವಾರ ಯಾರಿಗೆ ಸರ್ಕಾರ ರಚಿಸಲು ಆಹ್ವಾನ ನೀಡಲಾಗುವುದು ಎಂಬುದನ್ನು ಅಧ್ಯಕ್ಷರು ಅಧಿಕೃತವಾಗಿ ಪ್ರಕಟಿಸಲಿದ್ದಾರೆ. ನಿಯಮಗಳ ಪ್ರಕಾರ, ಹೆಚ್ಚಿನ ಸಂಸದರ (ನೆಸೆಟ್) ಬೆಂಬಲ ಹೊಂದಿರುವ ನಾಯಕರಿಗೆ ಮೊದಲ ಅವಕಾಶ ನೀಡಲಾಗುತ್ತದೆ. ಪ್ರಸ್ತುತ ಗಾಡಿ ಐಸೆನ್‌ಕೋಟ್ ಅವರಿಗೆ 67 ಸಂಸದರ ಬೆಂಬಲ ವ್ಯಕ್ತವಾಗಿದ್ದರೆ, ನೆತನ್ಯಾಹು ಅವರಿಗೆ ಕೇವಲ 46 ಸಂಸದರು ಮಾತ್ರ ಬೆಂಬಲ ಸೂಚಿಸಿದ್ದಾರೆ. ಏಳು ಸಂಸದರು ತಟಸ್ಥವಾಗಿ ಉಳಿದಿದ್ದಾರೆ. ಆದಾಗ್ಯೂ, ಮೈತ್ರಿಕೂಟಗಳ ನಡುವಿನ ಆಂತರಿಕ ಭಿನ್ನಾಭಿಪ್ರಾಯ ಹಾಗೂ ವಿಟೋ ಅಧಿಕಾರಗಳ ಸವಾಲು ಇರುವುದರಿಂದ ಯಾರು ಸರ್ಕಾರ ರಚಿಸಲಿದ್ದಾರೆ ಎಂಬುದನ್ನು ಅಧ್ಯಕ್ಷರು ಎಚ್ಚರಿಕೆಯಿಂದ ಪರಿಶೀಲಿಸುತ್ತಿದ್ದಾರೆ.

ಐಸೆನ್‌ಕೋಟ್ ಬೆಂಬಲಕ್ಕೆ ನಿಂತ ಅರಬ್ ಪಕ್ಷಗಳು: ಹೊಸ ಮೈತ್ರಿ ಸವಾಲು

ಈ ಬಾರಿಯ ಚುನಾವಣೆಯಲ್ಲಿ ಅರಬ್- ಮೈತ್ರಿಕೂಟವು ಅಭೂತಪೂರ್ವ 19 ಸ್ಥಾನಗಳನ್ನು ಗೆದ್ದು ಪ್ರಮುಖ ನಿರ್ಣಾಯಕ ಶಕ್ತಿಯಾಗಿ ಹೊರಹೊಮ್ಮಿದೆ. ಈ ಮೈತ್ರಿಕೂಟ ಗಾಡಿ ಐಸೆನ್‌ಕೋಟ್ ಅವರಿಗೆ ತಮ್ಮ ಬೆಂಬಲವನ್ನು ಘೋಷಿಸಿವೆ. ಆದರೆ, ಐಸೆನ್‌ಕೋಟ್ ಅವರ ವಿರೋಧ ಪಕ್ಷಗಳ ಮೈತ್ರಿಕೂಟದಲ್ಲಿರುವ ಬಲಪಂಥೀಯ ‘ಇಸ್ರೇಲ್ ಬೈತೇನು’ ಪಕ್ಷವು ಅರಬ್ ಪಕ್ಷಗಳ ಬೆಂಬಲದೊಂದಿಗೆ ಸರ್ಕಾರ ರಚಿಸಲು ತೀವ್ರ ವಿರೋಧ ವ್ಯಕ್ತಪಡಿಸಿದೆ. ಹಮಾಸ್ ಸಂಘಟನೆಯನ್ನು ಭಯೋತ್ಪಾದಕ ಗುಂಪು ಎಂದು ಅರಬ್ ಪಕ್ಷಗಳು ಬಹಿರಂಗವಾಗಿ ಘೋಷಿಸಿಲ್ಲ ಎಂಬ ಕಾರಣ ನೀಡಿ ನಾಯಕ ಅವಿಗ್ಡೋರ್ ಲಿಬರ್‌ಮನ್ ಅವರು ಈ ಮೈತ್ರಿಗೆ ನಿರಾಕರಿಸಿದ್ದಾರೆ.

ನೆತನ್ಯಾಹುಗೆ ಸಾಂಪ್ರದಾಯಿಕ ಮಿತ್ರರ ಆಘಾತ

ಮತ್ತೊಂದೆಡೆ, ಕಳೆದ ಐದು ಚುನಾವಣೆಗಳಿಂದ ಬೆಂಜಮಿನ್ ನೆತನ್ಯಾಹು ಅವರಿಗೆ ನಿರಂತರ ಬೆಂಬಲ ನೀಡುತ್ತಾ ಬಂದಿದ್ದ ಅಲ್ಟ್ರಾ-ಆರ್ಥೊಡಾಕ್ಸ್ ‘ಯುನೈಟೆಡ್ ತೋರಾ ಜುಡಾಯಿಸಂ’ ಪಕ್ಷವು ಈ ಬಾರಿ ನೆತನ್ಯಾಹು ಅವರಿಗೆ ಬೆಂಬಲ ನೀಡದೆ ತಟಸ್ಥ ನಿಲುವು ತಳೆದಿರುವುದು ದೊಡ್ಡ ಆಘಾತ ತಂದಿದೆ. ಧಾರ್ಮಿಕ ವಿದ್ಯಾರ್ಥಿಗಳಿಗೆ ಸೇನಾ ಸೇವೆಯಿಂದ ವಿನಾಯಿತಿ ನೀಡುವ ವಿಚಾರದಲ್ಲಿ ಎದ್ದಿರುವ ಜಟಾಪಟಿ ಮತ್ತು ನೆತನ್ಯಾಹು ಅವರ ನಿಲುವಿನ ವಿರುದ್ಧ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ವಿಶ್ಲೇಷಿಸಲಾಗಿದೆ.

ರಾಜಕೀಯ ಭವಿಷ್ಯದ ಮುಂದಿನ ಹೆಜ್ಜೆ

ಇಸ್ರೇಲ್ ಜನತೆ ಬದಲಾವಣೆಯನ್ನು ಬಯಸಿದ್ದು, ನೆತನ್ಯಾಹು ಸರ್ಕಾರದ ಮೇಲೆ ಕನಿಷ್ಠ ನಂಬಿಕೆಯನ್ನೂ ಉಳಿಸಿಕೊಂಡಿಲ್ಲ ಎಂದು ಐಸೆನ್‌ಕೋಟ್ ಅವರ ‘ಯಶಾರ್’ ಪಕ್ಷ ಪ್ರತಿಪಾದಿಸಿದೆ. ಅಧ್ಯಕ್ಷರು ಸರ್ಕಾರ ರಚನೆಗೆ ಆಹ್ವಾನ ನೀಡಿದ ಬಳಿಕ, ಸಂಸದರಿಗೆ ಸರ್ಕಾರ ರಚಿಸಲು 28 ದಿನಗಳ ಕಾಲಾವಕಾಶ ಸಿಗಲಿದೆ. ಆಡಳಿತಾವಧಿಯ ಉದ್ದಕ್ಕೂ ಯುದ್ಧಗಳು ಹಾಗೂ ಹಲವು ವಿವಾದಗಳನ್ನು ಮೈಮೇಲೆ ಎಳೆದುಕೊಂಡಿರುವ ನೆತನ್ಯಾಹು ಅವರಿಗೆ ಅಧಿಕಾರ ಉಳಿಸಿಕೊಳ್ಳುವುದು ಈಗ ಬಹುತೇಕ ಅಸಾಧ್ಯವೆನಿಸಿದ್ದು, ಇಸ್ರೇಲ್ ರಾಜಕೀಯದಲ್ಲಿ ನೆತನ್ಯಾಹು ಯುಗ ಅಂತ್ಯಗೊಂಡು ನೂತನ ನಾಯಕತ್ವದ ಶಕೆಯೊಂದು ಆರಂಭವಾಗುವ ಮುನ್ಸೂಚನೆ ಸಿಗುತ್ತಿದೆ.