ಬೆಂಗಳೂರು: ದೇಶದಲ್ಲಿ ಜನ ಚಿನ್ನಾಭರಣಗಳನ್ನು ಶುಭ ಸಮಾರಂಭಗಳು, ಅಲಂಕಾರಕ್ಕಾಗಿ ಖರೀದಿಸುವ ಜತೆಗೆ ಅದನ್ನು ಹೂಡಿಕೆ ಎಂದೂ ಭಾವಿಸುತ್ತಾರೆ. ಕಷ್ಟದ ಸಂದರ್ಭಗಳಲ್ಲಿ ಅಡಮಾನ ಇರಿಸಿಯೋ, ಮಾರಾಟ ಮಾಡಿಯೋ ಪರಿಸ್ಥಿತಿ ಸುಧಾರಿಸಿಕೊಳ್ಳಲು ಚಿನ್ನ ಖರೀದಿಸುತ್ತಾರೆ. ಅಷ್ಟೇ ಅಲ್ಲ, ಇನ್ನುಮುಂದೆ ಬೆಳ್ಳಿಯ ಆಭರಣಗಳು ಹಾಗೂ ಕಾಯಿನ್ ಗಳನ್ನು ಕೂಡ ಅಡಮಾನ ಇರಿಸಿ ಸಾಲ ಪಡೆಯಬಹುದಾಗಿದೆ. ಇಂತಹ ಹೊಸ ನಿಯಮವನ್ನು ಆರ್ ಬಿಐ (RBI) ಜಾರಿಗೆ ತರುತ್ತಿದೆ.
ಹೌದು, 2026ರ ಏಪ್ರಿಲ್ 1ರಿಂದ ಬ್ಯಾಂಕ್ ಗಳು ಹಾಗೂ ಬ್ಯಾಂಕೇತರ ಹಣಕಾಸು ಸಂಸ್ಥೆಗಳಲ್ಲಿ ಬೆಳ್ಳಿಯ ಆಭರಣಗಳು ಹಾಗೂ ನಾಣ್ಯಗಳ ಮೇಲೆಯೂ ಸಾಲ ಪಡೆಯಬಹುದಾಗಿದೆ. ಇತ್ತೀಚೆಗೆ ಬೆಳ್ಳಿಯ ಬೆಲೆಯು ಕೆ.ಜಿಗೆ ಎರಡೂವರೆ ಲಕ್ಷ ರೂಪಾಯಿ ದಾಟಿದ ಬೆನ್ನಲ್ಲೇ, ಆರ್ ಬಿಐ ಹೊಸ ನಿಯಮ ರೂಪಿಸಿದೆ. ಇದರಿಂದಾಗಿ ಬೆಳ್ಳಿ ಖರೀದಿದಾರರಿಗೆ ಅನುಕೂಲವಾಗಲಿದೆ.
ಚಿನ್ನದ ಹಾಗೆ ಬೆಳ್ಳಿಯ ಮೌಲ್ಯವನ್ನು ಆಧರಿಸಿ, ಅದರ ಒಂದಷ್ಟು ಪ್ರಮಾಣವನ್ನು ಸಾಲವನ್ನಾಗಿ ನೀಡಲಾಗುತ್ತದೆ. ಉದಾಹರಣೆಗೆ, ನೀವು ಒಂದು ಕೆ.ಜಿ ಬೆಳ್ಳಿಯನ್ನು ಅಡಮಾನ ಇರಿಸಲು ಮುಂದಾಗಿದ್ದೀರಿ. ಅದರ ಬೆಲೆ 2 ಲಕ್ಷ ರೂಪಾಯಿ ಇದೆ ಎಂದಿಟ್ಟುಕೊಳ್ಳಿ, ಆಗ ನಿಮಗೆ ಬೆಳ್ಳಿ ಮೌಲ್ಯದ ಶೇ.85ರಷ್ಟು ಅಂದರೆ, 1.7 ಲಕ್ಷ ರೂಪಾಯಿ ಸಾಲ ಲಭಿಸುತ್ತದೆ.
ಇದನ್ನೇ ಲೋನ್-ಟು ವ್ಯಾಲ್ಯೂ ರೇಶಿಯೋ ಎಂದು ಕರೆಯುತ್ತಾರೆ. ನೀವು ಎರಡೂವರೆ ಲಕ್ಷ ರೂಪಾಯಿವರೆಗೆ ಸಾಲ ಪಡೆಯುತ್ತಿದ್ದರೆ, ನಿಮ್ಮ ಒಟ್ಟು ಬೆಳ್ಳಿಯ ಮೌಲ್ಯದಲ್ಲಿ ಶೇ.85ರಷ್ಟು ಮೊತ್ತವನ್ನು ಸಾಲವಾಗಿ ನೀಡಲಾಗುತ್ತದೆ. ಅದೇ ರೀತಿ, ನಿಮಗೆ 5 ಲಕ್ಷ ರೂಪಾಯಿವರೆಗೆ ಸಾಲ ಬೇಕಿದ್ದರೆ, ಶೇ.80ರಷ್ಟು ಸಾಲ ನೀಡಲಾಗುತ್ತದೆ. ಇನ್ನು 5 ಲಕ್ಷ ರೂಪಾಯಿಗಿಂತ ಹೆಚ್ಚಿನ ಹಣ ಬೇಕಿದ್ದರೆ, ಶೇ.75ರಷ್ಟು ಲೋನ್-ಟು-ವ್ಯಾಲ್ಯೂ ರೇಶಿಯೋ ಇರಲಿದೆ.
ಇದನ್ನೂ ಓದಿ: ಮದುವೆಗಾಗಿ ನೀವು ಪಿಎಫ್ ಮೊತ್ತದಲ್ಲಿ ಎಷ್ಟು ವಿತ್ ಡ್ರಾ ಮಾಡಬಹುದು? ಇಲ್ಲಿದೆ ಮಾಹಿತಿ
