ಇಸ್ಲಾಮಾಬಾದ್ : ಬಲೂಚ್ ಬಂಡುಕೋರರು ಪಾಕಿಸ್ತಾನದ ಭದ್ರತಾ ಪಡೆಗಳ ವಿರುದ್ಧ ನಡೆಸುತ್ತಿರುವ ಸಂಘರ್ಷ ತಾರಕಕ್ಕೇರಿದ್ದು, ಇತಿಹಾಸದಲ್ಲೇ ಮೊದಲ ಬಾರಿಗೆ ಮಹಿಳಾ ‘ಫಿದಾಯೀನ್’ (ಆತ್ಮಾಹುತಿ ಬಾಂಬರ್) ದಾಳಿಗಳು ಇಸ್ಲಾಮಾಬಾದ್ ಅನ್ನು ನಡುಗಿಸಿವೆ. ಬಲೂಚ್ ಲಿಬರೇಶನ್ ಆರ್ಮಿ (BLA) ಹಮ್ಮಿಕೊಂಡಿರುವ ‘ಆಪರೇಷನ್ ಹೆರಾಫ್ ಹಂತ-2’ ಕಾರ್ಯಾಚರಣೆಯಲ್ಲಿ ಮಹಿಳಾ ಬಂಡುಕೋರರು ಪ್ರಮುಖ ಪಾತ್ರ ವಹಿಸುತ್ತಿದ್ದು, ಕಳೆದ 40 ಗಂಟೆಗಳಲ್ಲಿ 200ಕ್ಕೂ ಹೆಚ್ಚು ಪಾಕಿಸ್ತಾನಿ ಸೈನಿಕರನ್ನು ಕೊಂದು ಹಾಕಿರುವುದಾಗಿ ಸಂಘಟನೆ ಪ್ರತಿಪಾದಿಸಿದೆ.
ಐಎಸ್ಐ ಕಚೇರಿ ಗುರಿಯಾಗಿಸಿ ಮಹಿಳಾ ಉಗ್ರರ ದಾಳಿ
ಈ ರಣರೋಚಕ ದಾಳಿಯ ನೇತೃತ್ವವನ್ನು ಬಿಎಲ್ಎನ ಮಹಿಳಾ ಪಡೆಯಾದ ‘ಮಜೀದ್ ಬ್ರಿಗೇಡ್’ ವಹಿಸಿಕೊಂಡಿದೆ. ಆಸಿಫಾ ಮೆಂಗಲ್ ಎಂಬ ಮಹಿಳಾ ಫಿದಾಯೀನ್, ಸ್ಫೋಟಕಗಳನ್ನು ಹೊತ್ತ ವಾಹನದೊಂದಿಗೆ ನೋಶ್ಕಿಯಲ್ಲಿರುವ ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ‘ಐಎಸ್ಐ’ (ISI) ಪ್ರಧಾನ ಕಚೇರಿಗೆ ನುಗ್ಗಿ ತನ್ನನ್ನು ತಾನು ಸ್ಫೋಟಿಸಿಕೊಂಡಿದ್ದಾಳೆ. ಈ ದಾಳಿಯಲ್ಲಿ ಪಾಕ್ ಸೇನೆಗೆ ಸಂಬಂಧಿಸಿ ಭಾರಿ ಸಾವು-ನೋವು ಸಂಭವಿಸಿದೆ ಎಂದು ವರದಿಯಾಗಿದೆ. ಮತ್ತೊಂದೆಡೆ, ಗ್ವಾದರ್ ಮುಂಚೂಣಿಯಲ್ಲಿ ಹವಾ ಬಲೂಚ್ ಎಂಬ ಮಹಿಳಾ ಆತ್ಮಾಹುತಿ ದಾಳಿಕೋರೆ ಸೈನಿಕರ ವಿರುದ್ಧ ಗುಂಡಿನ ಕಾಳಗ ನಡೆಸಿ ಮೃತಪಟ್ಟಿದ್ದಾರೆ. ಸಾವು ಸಂಭವಿಸುವ ಕೇವಲ 12 ಗಂಟೆಗಳ ಮೊದಲು ಹವಾ ಬಲೂಚ್ ಕಳುಹಿಸಿದ್ದ ವೀಡಿಯೊ ಸಂದೇಶ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಂಚಲನ ಮೂಡಿಸಿದೆ.
ಪಾಕಿಸ್ತಾನ ಸರ್ಕಾರದ ಒಪ್ಪಿಗೆ
ಮಹಿಳಾ ಬಂಡುಕೋರರ ಈ ಆತ್ಮಾಹುತಿ ದಾಳಿಯನ್ನು ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಆಸಿಫ್ ಕೂಡ ಖಚಿತಪಡಿಸಿದ್ದಾರೆ. “ಕನಿಷ್ಠ ಎರಡು ದಾಳಿಗಳಲ್ಲಿ ಮಹಿಳೆಯರೇ ಭಾಗಿಯಾಗಿರುವುದು ಆತಂಕಕಾರಿ ಸಂಗತಿ” ಎಂದು ಅವರು ಹೇಳಿದ್ದಾರೆ. ಬಲೂಚಿಸ್ತಾನದ ಸ್ವಾತಂತ್ರ್ಯಕ್ಕಾಗಿ ಹೋರಾಡುತ್ತಿರುವ ಬಿಎಲ್ಎ, ಈ ಬಾರಿ ತನ್ನ ಅತ್ಯಂತ ಸುಧಾರಿತ ಮತ್ತು ಭೀಕರ ತಂತ್ರಗಳನ್ನು ಬಳಸುತ್ತಿರುವುದು ಪಾಕ್ ಸೇನೆಯ ನಿದ್ದೆಗೆಡಿಸಿದೆ.
ರಣಾಂಗಣವಾದ ಬಲೂಚಿಸ್ತಾನ: ಬಿಎಲ್ಎ ಪ್ರತಿಪಾದನೆ ಏನು?
ಬಿಎಲ್ಎ ವಕ್ತಾರ ಜೀಯಾಂಡ್ ಬಲೂಚ್ ನೀಡಿರುವ ಹೇಳಿಕೆಯ ಪ್ರಕಾರ, ಖಾರನ್, ಮಸ್ತುಂಗ್, ತುಂಪ್ ಮತ್ತು ಪಸ್ನಿ ಜಿಲ್ಲೆಗಳು ಈಗ ಬಂಡುಕೋರರ ಸಂಪೂರ್ಣ ನಿಯಂತ್ರಣದಲ್ಲಿವೆ. ಕ್ವೆಟ್ಟಾ ಮತ್ತು ನೋಶ್ಕಿಯ ಹಲವು ಭಾಗಗಳಿಂದ ಪಾಕಿಸ್ತಾನಿ ಸೇನೆಯನ್ನು ಹಿಮ್ಮೆಟ್ಟಿಸಲಾಗಿದೆ ಎಂದು ತಿಳಿಸಿದ್ದಾರೆ. ದಾಳಿಯ ವೇಳೆ 17 ಪಾಕಿಸ್ತಾನಿ ಸಿಬ್ಬಂದಿಯನ್ನು ಸೆರೆಹಿಡಿಯಲಾಗಿದ್ದು, ಸೈನಿಕರ ಸಾವಿನ ಸಂಖ್ಯೆ ತಾವು ಅಂದಾಜಿಸಿರುವುದಕ್ಕಿಂತಲೂ ಹೆಚ್ಚಿರಬಹುದು ಎಂದು ಬಿಎಲ್ಎ ಹೇಳಿಕೊಂಡಿದೆ.
ಸಾವು ನೋವಿನ ಬಗ್ಗೆ ಮೌನಕ್ಕೆ ಶರಣಾದ ಸೇನೆ
ಒಂದೆಡೆ ಬಿಎಲ್ಎ 200ಕ್ಕೂ ಹೆಚ್ಚು ಸೈನಿಕರ ಹತ್ಯೆಯಾಗಿದೆ ಎನ್ನುತ್ತಿದ್ದರೆ, ಮತ್ತೊಂದೆಡೆ ಪಾಕಿಸ್ತಾನಿ ಸೇನೆಯು 130ಕ್ಕೂ ಹೆಚ್ಚು ಉಗ್ರರನ್ನು ಹತ್ಯೆ ಮಾಡಿರುವುದಾಗಿ ಹೇಳುತ್ತಿದೆ. ಆದರೆ, ಸೇನೆಯ ಸಾವು-ನೋವುಗಳ ಬಗ್ಗೆ ಪಾಕಿಸ್ತಾನ ಸರ್ಕಾರ ನಿಖರ ಮಾಹಿತಿ ನೀಡದೆ ಮೌನಕ್ಕೆ ಶರಣಾಗಿದೆ. ಬಲೂಚಿಸ್ತಾನದ ಮುಖ್ಯಮಂತ್ರಿ ಸರ್ಫರಾಜ್ ಬುಗ್ತಿ ಅವರು ಸದ್ಯಕ್ಕೆ 17 ಭದ್ರತಾ ಸಿಬ್ಬಂದಿ ಮತ್ತು 31 ನಾಗರಿಕರ ಸಾವನ್ನು ಮಾತ್ರ ಅಧಿಕೃತಗೊಳಿಸಿದ್ದಾರೆ. ದಶಕಗಳಿಂದ ನಡೆಯುತ್ತಿರುವ ಬಲೂಚ್ ದಮನ ನೀತಿಯ ವಿರುದ್ಧ ಈಗ ಮಹಿಳೆಯರೂ ಶಸ್ತ್ರ ಕೈಗೆತ್ತಿಕೊಂಡಿರುವುದು ಪಾಕಿಸ್ತಾನದ ಆಂತರಿಕ ಭದ್ರತೆಗೆ ಎದುರಾಗಿರುವ ಅತಿದೊಡ್ಡ ಸವಾಲು ಎಂದು ವಿಶ್ಲೇಷಿಸಲಾಗುತ್ತಿದೆ.
ಇದನ್ನೂ ಓದಿ : 18 ಕೋಟಿ ದರೋಡೆ ಕೇಸ್ | ದೇಶದ ಮಹಾನಗರಗಳನ್ನೇ ಟಾರ್ಗೆಟ್ ಮಾಡ್ತಿದ್ದ ಖತರ್ನಾಕ್ ಜೋಡಿ.. ಬಯಲಾಯ್ತು ಸ್ಫೋಟಕ ಅಂಶ!
