ಮಂಚಿರ್ಯಾಲ: ಸಣ್ಣ ಸಣ್ಣ ಉಳಿತಾಯವೂ ದೊಡ್ಡ ಕನಸುಗಳನ್ನು ನನಸು ಮಾಡಬಲ್ಲದು ಎಂಬುದಕ್ಕೆ ತೆಲಂಗಾಣದ ವ್ಯಕ್ತಿಯೊಬ್ಬರು ಅತ್ಯುತ್ತಮ ಉದಾಹರಣೆಯಾಗಿ ಹೊರಹೊಮ್ಮಿದ್ದಾರೆ. ಮಂಚಿರ್ಯಾಲ ಜಿಲ್ಲೆಯ ಲಕ್ಸೆಟ್ಟಿಪೇಟೆಯ ನಿವಾಸಿ ಬಿ. ರವಿ ಜೋಸೆಫ್ (51) ಎಂಬವರು ಕಳೆದ ಮೂರು ವರ್ಷಗಳಿಂದ ತಾವು ಕೂಡಿಟ್ಟ 10 ರೂಪಾಯಿ ನಾಣ್ಯಗಳನ್ನು ನೀಡಿ, ಬರೋಬ್ಬರಿ 1.23 ಲಕ್ಷ ರೂಪಾಯಿ ಮೌಲ್ಯದ ಹೊಸ ‘ಹೋಂಡಾ ಆಕ್ಟಿವಾ’ ದ್ವಿಚಕ್ರ ವಾಹನವನ್ನು ಖರೀದಿಸಿದ್ದಾರೆ.ಚರ್ಚ್‌ ಪಾಸ್ಟರ್ ಆಗಿ ಸೇವೆ ಸಲ್ಲಿಸುತ್ತಿರುವ ಜೋಸೆಫ್ ಅವರು, 2023ರ ಅಕ್ಟೋಬರ್ 10ರಿಂದ ಈ ವಿಶಿಷ್ಟ ಉಳಿತಾಯದ ಹಾದಿ ತುಳಿದರು. ದೈನಂದಿನ ಕಿರಾಣಿ ಹಾಗೂ ದಿನಸಿ ವಸ್ತುಗಳನ್ನು ಖರೀದಿಸುವಾಗ ಉಳಿಯುತ್ತಿದ್ದ ಪ್ರತಿಯೊಂದು 10 ರೂಪಾಯಿಯ ನಾಣ್ಯವನ್ನು ಪ್ರತ್ಯೇಕವಾಗಿ ಎತ್ತಿಡಲು ಪ್ರಾರಂಭಿಸಿದರು. ಹೀಗೆ ಸಣ್ಣ ಪ್ರಮಾಣದಲ್ಲಿ ಆರಂಭವಾದ ಈ ಅಭ್ಯಾಸ, ಮೂರು ವರ್ಷಗಳ ಅವಧಿಯಲ್ಲಿ ಬೃಹತ್ ಪ್ರಮಾಣದ ಮೊತ್ತವಾಗಿ ಮಾರ್ಪಟ್ಟಿತು.
ಈ ಉಳಿತಾಯದ ಪಯಣ ಅಷ್ಟು ಸುಲಭವಾಗಿರಲಿಲ್ಲ. 10 ರೂಪಾಯಿ ನಾಣ್ಯಗಳ ಚಲಾವಣೆ ಬಂದ್ ಆಗಲಿದೆ ಎಂಬ ವದಂತಿಗಳು ಹರಡಿದಾಗ, ಕುಟುಂಬಸ್ಥರು ಈ ರೀತಿ ನಾಣ್ಯ ಸಂಗ್ರಹಿಸದಂತೆ ಅವರಿಗೆ ಸಲಹೆ ನೀಡಿದ್ದರು. ಆದರೆ ಧೃತಿಗೆಡದ ಜೋಸೆಫ್, ತಮ್ಮ ನಿರ್ಧಾರದಿಂದ ಹಿಂದೆ ಸರಿಯದೆ ನಾಣ್ಯಗಳನ್ನು ಕೂಡಿಡುವುದನ್ನು ಮುಂದುವರಿಸಿದರು. ಪ್ರಾರಂಭದಲ್ಲಿ ಗೃಹಬಳಕೆಯ ವಸ್ತುಗಳನ್ನು ಖರೀದಿಸಲು ಯೋಚಿಸಿದ್ದರೂ, ನಂತರ ಸ್ವಂತ ದ್ವಿಚಕ್ರ ವಾಹನ ಹೊಂದುವ ಕನಸಿನತ್ತ ಮನಸ್ಸು ಮಾಡಿದರು.
ಎರಡು ಗಂಟೆಗಳ ಕಾಲ ನಾಣ್ಯ ಎಣಿಸಿದ ಶೋರೂಂ ಸಿಬ್ಬಂದಿ
ಲಕ್ಸೆಟ್ಟಿಪೇಟೆಯ ‘ಜಗದಂಬಾ ಹೋಂಡಾ ಮೋಟಾರ್ಸ್’ ಶೋರೂಂಗೆ ಜೋಸೆಫ್ ನಾಣ್ಯಗಳ ಚೀಲದೊಂದಿಗೆ ಆಗಮಿಸಿದಾಗ ಅಲ್ಲಿದ್ದ ಸಿಬ್ಬಂದಿ ಹಾಗೂ ಸಾರ್ವಜನಿಕರು ಆಶ್ಚರ್ಯಚಕಿತರಾದರು. ಶೋರೂಂನ ಸಿಬ್ಬಂದಿ ಸತತ ಎರಡು ಗಂಟೆಗಳ ಕಾಲ ಶ್ರಮಿಸಿ, ಒಟ್ಟು 1.23 ಲಕ್ಷ ರೂಪಾಯಿ ಮೌಲ್ಯದ ನಾಣ್ಯಗಳನ್ನು ಎಣಿಸಿ ಖಚಿತಪಡಿಸಿಕೊಂಡರು. ಬಳಿಕ ಜೋಸೆಫ್ ಅವರು ತಮ್ಮ ಕುಟುಂಬಸ್ಥರ ಸಮ್ಮುಖದಲ್ಲಿ ಹೊಸ ವಾಹನದ ಕೀಲಿಕೈಯನ್ನು ಪಡೆದುಕೊಂಡರು.ವಾಸ್ತವವಾಗಿ ರಾಯಲ್ ಎನ್‌ಫೀಲ್ಡ್ ಬುಲೆಟ್ ಖರೀದಿಸುವ ಆಸೆಯಿತ್ತಾದರೂ, ಆರ್ಥಿಕ ಮಿತಿಯಿಂದಾಗಿ ಹೋಂಡಾ ಆಕ್ಟಿವಾಗೆ ತೃಪ್ತಿಪಟ್ಟುಕೊಂಡಿರುವುದಾಗಿ ಜೋಸೆಫ್ ತಿಳಿಸಿದ್ದಾರೆ. ಚಿಲ್ಲರೆ ನಾಣ್ಯಗಳನ್ನೇ ಬಂಡವಾಳವಾಗಿಸಿಕೊಂಡು ಸ್ವಂತ ವಾಹನ ಖರೀದಿಸಿದ ಇವರ ವಿಶಿಷ್ಟ ಸಾಧನೆಗೆ ಈಗ ಸ್ಥಳೀಯರಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಇದನ್ನೂ ಓದಿ:ರಣಜಿ ಟ್ರೋಫಿ : ಪಂಜಾಬ್ ಪರ ಪದಾರ್ಪಣೆ ಪಂದ್ಯದಲ್ಲೇ 5 ವಿಕೆಟ್ ಕಬಳಿಸಿ ಮಿಂಚಿದ ಉಮೇಶ್ ಯಾದವ್
