ಬೆಂಗಳೂರು : ಭಾರತೀಯ ಮಾರುಕಟ್ಟೆಯಲ್ಲಿ ಕಾಂಪ್ಯಾಕ್ಟ್ ಎಸ್ಯುವಿಗಳ ಟ್ರೆಂಡ್ ಹುಟ್ಟುಹಾಕಿದ್ದ ರೆನಾಲ್ಟ್ ಡಸ್ಟರ್ ಇದೀಗ ಹೊಚ್ಚಹೊಸ ರೂಪದಲ್ಲಿ ಮತ್ತೆ ಮಾರುಕಟ್ಟೆಗೆ ಲಗ್ಗೆ ಇಟ್ಟಿದೆ. ಕೆಲ ತಿಂಗಳ ಹಿಂದಷ್ಟೇ ಬಿಡುಗಡೆಯಾಗಿ ವಾಹನ ವಿತರಣೆಯೂ ಆರಂಭವಾಗಿರುವ ಈ ಜನಪ್ರಿಯ ಎಸ್ಯುವಿಯ ಕುರಿತಾಗಿ ಹೊಸ ಮಾಹಿತಿಯೊಂದು ಹೊರಬಿದ್ದಿದೆ.
ಈ ಹಿಂದೆ ದೊಡ್ಡ ಎಂಜಿನ್ನ ಮೈಲೇಜ್ ವಿವರಗಳನ್ನು ಹಂಚಿಕೊಂಡಿದ್ದ ರೆನಾಲ್ಟ್ ಕಂಪನಿಯು, ಇದೀಗ 1.0 ಲೀಟರ್ ಟರ್ಬೊ ಪೆಟ್ರೋಲ್ ವೇರಿಯೆಂಟ್ನ ಎಆರ್ಎಐ (ARAI) ಪ್ರಮಾಣೀಕೃತ ಮೈಲೇಜ್ ಅನ್ನು ಅಧಿಕೃತವಾಗಿ ಪ್ರಕಟಿಸಿದೆ. ಈ ನೂತನ 1.0 ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ ಪ್ರತಿ ಲೀಟರ್ಗೆ 19.41 ಕಿಲೋಮೀಟರ್ ಮೈಲೇಜ್ ನೀಡಲಿದೆ ಎಂದು ಕಂಪನಿ ಸ್ಪಷ್ಟಪಡಿಸಿದೆ.
ಉತ್ತಮ ಚಾಲನಾ ಅನುಭವ ನೀಡುವ ತಂತ್ರಜ್ಞಾನ
ಹೊಸ ರೆನಾಲ್ಟ್ ಡಸ್ಟರ್ ಪ್ರಮುಖವಾಗಿ ಎರಡು ಪೆಟ್ರೋಲ್ ಎಂಜಿನ್ ಆಯ್ಕೆಗಳಲ್ಲಿ ಲಭ್ಯವಿದೆ. ಅದರಲ್ಲಿ 1.0 ಲೀಟರ್ನ 3-ಸಿಲಿಂಡರ್ ಟರ್ಬೊ-ಪೆಟ್ರೋಲ್ ಎಂಜಿನ್ 100 ಪಿಎಸ್ ಪವರ್ ಹಾಗೂ 166 ಎನ್ಎಂ ಗರಿಷ್ಠ ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ಕೆಳಹಂತದ ವೇರಿಯೆಂಟ್ಗಳಲ್ಲಿ ಲಭ್ಯವಿರುವ ಈ ಎಂಜಿನ್ ಅನ್ನು 6-ಸ್ಪೀಡ್ ಮ್ಯಾನುವಲ್ ಟ್ರಾನ್ಸ್ಮಿಷನ್ನೊಂದಿಗೆ ಮಾತ್ರ ನೀಡಲಾಗಿದೆ.
ರೆನಾಲ್ಟ್ ಗ್ರೂಪ್ ಇಂಡಿಯಾದ ಇಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥ ಡಾ. ವಿ. ವಿಕ್ರಮನ್ ಅವರ ಪ್ರಕಾರ, ಸುಧಾರಿತ ಟರ್ಬೊ ಚಾರ್ಜಿಂಗ್ ತಂತ್ರಜ್ಞಾನ ಹಾಗೂ ಅದ್ಭುತ ದಹನ ಪ್ರಕ್ರಿಯೆಯಿಂದಾಗಿ ಈ ಎಂಜಿನ್ ಅತ್ಯುತ್ತಮ ಇಂಧನ ದಕ್ಷತೆಯನ್ನು ಒದಗಿಸುತ್ತದೆ. ಕೇವಲ ಮೈಲೇಜ್ ಮಾತ್ರವಲ್ಲದೆ, ಸಮತೋಲಿತ ಮತ್ತು ಅತ್ಯುತ್ತಮ ಚಾಲನಾ ಅನುಭವವನ್ನು ನೀಡುವ ನಿಟ್ಟಿನಲ್ಲಿ ಈ ಪವರ್ಟ್ರೇನ್ ಅನ್ನು ವಿನ್ಯಾಸಗೊಳಿಸಲಾಗಿದೆ.
ಪ್ರತಿಸ್ಪರ್ಧಿ ವಾಹನಗಳೊಂದಿಗಿನ ಹೋಲಿಕೆ
ಈ ವಿಭಾಗದಲ್ಲಿ ರೆನಾಲ್ಟ್ ಡಸ್ಟರ್ ಪ್ರಮುಖವಾಗಿ ಸ್ಕೋಡಾ ಕುಶಾಕ್ ಮತ್ತು ಫೋಕ್ಸ್ವ್ಯಾಗನ್ ಟೈಗುನ್ ವಾಹನಗಳೊಂದಿಗೆ ಪೈಪೋಟಿ ನಡೆಸಲಿದೆ. 1.0 ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ ಹೊಂದಿರುವ ಸ್ಕೋಡಾ ಕುಶಾಕ್ ಮ್ಯಾನುವಲ್ ಆವೃತ್ತಿಯಲ್ಲಿ 19.66 ಕಿ.ಮೀ ಮತ್ತು ಆಟೋಮ್ಯಾಟಿಕ್ ಆವೃತ್ತಿಯಲ್ಲಿ 19.09 ಕಿ.ಮೀ ಮೈಲೇಜ್ ನೀಡುತ್ತದೆ. ಅದೇ ರೀತಿ ಟೈಗುನ್ ಮ್ಯಾನುವಲ್ ಆವೃತ್ತಿ 19.98 ಕಿ.ಮೀ ಹಾಗೂ ಆಟೋಮ್ಯಾಟಿಕ್ ಆವೃತ್ತಿ 19.54 ಕಿ.ಮೀ ಮೈಲೇಜ್ ನೀಡುತ್ತದೆ. ಅಂಕಿಅಂಶಗಳ ಪ್ರಕಾರ ನೋಡಿದರೆ ಡಸ್ಟರ್ ಮೈಲೇಜ್ ಕೊಂಚ ಕಡಿಮೆಯಿರುವಂತೆ ಕಂಡರೂ, ವಾಹನದ ಗಾತ್ರ ಹಾಗೂ ತೂಕ ಹೆಚ್ಚಾಗಿರುವುದೇ ಇದಕ್ಕೆ ಪ್ರಮುಖ ಕಾರಣ ಎಂದು ವಿಶ್ಲೇಷಿಸಲಾಗಿದೆ. ರೆನಾಲ್ಟ್ ಕೈಗರ್ನಲ್ಲಿರುವ ಇದೇ ಎಂಜಿನ್ ಅನ್ನು ಡಸ್ಟರ್ ವಾಹನಕ್ಕೆ ತಕ್ಕಂತೆ ಭಿನ್ನವಾಗಿ ಟ್ಯೂನ್ ಮಾಡಲಾಗಿದೆ ಎಂಬುದು ವಿಶೇಷ.
ಪವರ್ಫುಲ್ 1.3 ಲೀಟರ್ ಎಂಜಿನ್ ಹಾಗೂ ಹೈಬ್ರಿಡ್ ನಿರೀಕ್ಷೆ
1.0 ಲೀಟರ್ ಎಂಜಿನ್ ಜೊತೆಗೆ, ತನ್ನ ವಿಭಾಗದಲ್ಲೇ ಅತ್ಯಂತ ಶಕ್ತಿಶಾಲಿ ಎನಿಸಿಕೊಂಡಿರುವ 1.3-ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ ಆಯ್ಕೆಯನ್ನೂ ಡಸ್ಟರ್ ಹೊಂದಿದೆ. ಈ ಎಂಜಿನ್ ಡಿಟಿಸಿ (DCT) ಗೇರ್ಬಾಕ್ಸ್ನೊಂದಿಗೆ 18.45 ಕಿ.ಮೀ ಮತ್ತು ಮ್ಯಾನುವಲ್ ಗೇರ್ಬಾಕ್ಸ್ನೊಂದಿಗೆ 17.75 ಕಿ.ಮೀ ಮೈಲೇಜ್ ನೀಡುತ್ತದೆ. ಇಷ್ಟೇ ಅಲ್ಲದೆ, ಮುಂಬರುವ ಹಬ್ಬದ ಸೀಸನ್ ವೇಳೆಗೆ 1.8-ಲೀಟರ್ ಪೆಟ್ರೋಲ್ ಎಂಜಿನ್ ಮತ್ತು 1.8 ಕಿಲೋವ್ಯಾಟ್ ಬ್ಯಾಟರಿ ಪ್ಯಾಕ್ ಒಳಗೊಂಡ ಸ್ಟ್ರಾಂಗ್-ಹೈಬ್ರಿಡ್ ವೇರಿಯೆಂಟ್ ಅನ್ನು ಮಾರುಕಟ್ಟೆಗೆ ಪರಿಚಯಿಸಲು ರೆನಾಲ್ಟ್ ಸಿದ್ಧತೆ ನಡೆಸಿದೆ. ಈ ಹೈಬ್ರಿಡ್ ವಾಹನವು ನಗರ ಪ್ರದೇಶಗಳಲ್ಲಿ ಶೇಕಡಾ 80ರಷ್ಟು ಇವಿ (EV) ಮೋಡ್ನಲ್ಲಿಯೇ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಹೊಂದಿರಲಿದ್ದು, ಆಟೋಮೊಬೈಲ್ ಮಾರುಕಟ್ಟೆಯಲ್ಲಿ ಭಾರಿ ನಿರೀಕ್ಷೆ ಹುಟ್ಟುಹಾಕಿದೆ.
ಆಧುನಿಕ ವೈಶಿಷ್ಟ್ಯಗಳೊಂದಿಗೆ ಡಸ್ಟರ್ನ ಹೊಸ ಅಧ್ಯಾಯ
ಭಾರತೀಯ ಗ್ರಾಹಕರೊಂದಿಗೆ ಭಾವನಾತ್ಮಕ ನಂಟು ಹೊಂದಿರುವ ಡಸ್ಟರ್, ಕಾಂಪ್ಯಾಕ್ಟ್ ಎಸ್ಯುವಿ ವಿಭಾಗದಲ್ಲಿ ದೊಡ್ಡ ಕ್ರಾಂತಿ ಹುಟ್ಟುಹಾಕಿದ್ದ ವಾಹನವಾಗಿದೆ. ಹಳೆಯ ತಲೆಮಾರಿನ ಡಸ್ಟರ್ನ ಯಶಸ್ಸನ್ನು ಮರುಕಳಿಸುವ ಉದ್ದೇಶದಿಂದ ಹೊಚ್ಚಹೊಸ ರಣತಂತ್ರದೊಂದಿಗೆ ಈ ಕಾರನ್ನು ಪರಿಚಯಿಸಲಾಗಿದೆ. ಹೊರನೋಟಕ್ಕೆ ಹಳೆಯ ಡಸ್ಟರ್ನ ಒರಟು ಮತ್ತು ಗಟ್ಟಿಮುಟ್ಟಾದ ವಿನ್ಯಾಸವನ್ನು ಉಳಿಸಿಕೊಳ್ಳಲಾಗಿದ್ದರೂ, ಒಳಾಂಗಣವನ್ನು ಸಂಪೂರ್ಣವಾಗಿ ಆಧುನೀಕರಿಸಲಾಗಿದೆ. ಪನೋರಮಿಕ್ ಸನ್ರೂಫ್, ವಿದ್ಯುತ್ ನಿಯಂತ್ರಿತ ಮುಂಭಾಗದ ಸೀಟುಗಳು, ಲೆದರ್ ಅಪ್ಹೋಲ್ಸ್ಟರಿ, ದೊಡ್ಡ ತೇಲುವ ಟಚ್ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್, ಸಂಪೂರ್ಣ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಹಾಗೂ ಆಟೋಮ್ಯಾಟಿಕ್ ಕ್ಲೈಮೇಟ್ ಕಂಟ್ರೋಲ್ನಂತಹ ಅತ್ಯಾಧುನಿಕ ಫೀಚರ್ಗಳನ್ನು ಅಳವಡಿಸುವ ಮೂಲಕ ನೂತನ ಡಸ್ಟರ್ ವಾಹನ ಪ್ರಿಯರನ್ನು ಸೆಳೆಯಲು ಸಜ್ಜಾಗಿದೆ.
ಇದನ್ನೂ ಓದಿ : ಅತಿ ವೇಗವಾಗಿ 1000 ಟೆಸ್ಟ್ ರನ್ ಸಿಡಿಸಿ ದಿಗ್ಗಜರ ಸಾಲಿಗೆ ಸೇರಿದ ಶುಭ್ಮನ್ ಗಿಲ್
