ಬೆಂಗಳೂರು : 2027ರ ಏಪ್ರಿಲ್ 1 ರಿಂದ ಜಾರಿಗೆ ಬರುವಂತೆ ಹೊಸ ಕೆಫೆ-3 (ಕಾರ್ಪೊರೇಟ್ ಆವರೇಜ್ ಫ್ಯೂಯೆಲ್ ಎಕಾನಮಿ) ಕರಡು ನಿಯಮವನ್ನು ಕೇಂದ್ರ ಸರ್ಕಾರ ಪ್ರಕಟಿಸಿದೆ. ಈ ನಿಯಮವು ಕಾರು ತಯಾರಕ ಕಂಪನಿಗಳಿಗೆ ತಮ್ಮ ವಾಹನಗಳ ಫ್ಲೀಟ್ ಇಂಧನ ಬಳಕೆ ಲೆಕ್ಕಾಚಾರವನ್ನು ತಗ್ಗಿಸಲು ಹೊಸ ಅವಕಾಶವನ್ನು ನೀಡುತ್ತದೆ.
ಎಂ1 (M1) ಅಂದರೆ ಪ್ರಯಾಣಿಕರ ವಾಹನಗಳಿಗೆ ಅನ್ವಯವಾಗುವ ಈ ನಿಯಮವು 2032ರ ಆರ್ಥಿಕ ವರ್ಷದವರೆಗೆ ಚಾಲ್ತಿಯಲ್ಲಿರಲಿದೆ. ಅನುಮೋದಿತ ಇಂಧನ ಉಳಿತಾಯ ತಂತ್ರಜ್ಞಾನಗಳನ್ನು ಕಾರುಗಳಲ್ಲಿ ಅಳವಡಿಸುವ ಮೂಲಕ ಕಂಪನಿಗಳು ಅನುಸರಣೆ ಲಾಭಗಳನ್ನು (compliance benefits) ಅಂದರೆ ರಿವಾರ್ಡ್ ಪಾಯಿಂಟ್‌ಗಳನ್ನು ಪಡೆಯಬಹುದಾಗಿದೆ.
ಇಂಧನ ಉಳಿಸುವ 12 ತಂತ್ರಜ್ಞಾನಗಳ ಪಟ್ಟಿ ಬಿಡುಗಡೆ
ಈ ಹೊಸ ಕರಡು ನಿಯಮಾವಳಿಯಲ್ಲಿ ಒಟ್ಟು 12 ಇಂಧನ-ಉಳಿತಾಯ ತಂತ್ರಜ್ಞಾನಗಳನ್ನು ಅಧಿಕೃತವಾಗಿ ಗುರುತಿಸಲಾಗಿದೆ. ಆಟೋಮ್ಯಾಟಿಕ್ ಸ್ಟಾರ್ಟ್-ಸ್ಟಾಪ್ ಸಿಸ್ಟಮ್, ಟೈರ್ ಪ್ರೆಶರ್ ಮಾನಿಟರಿಂಗ್ ಸಿಸ್ಟಮ್ (TPMS), ರೀಜನರೇಟಿವ್ ಬ್ರೇಕಿಂಗ್, 6-ಸ್ಪೀಡ್ ಅಥವಾ ಅದಕ್ಕಿಂತ ಹೆಚ್ಚಿನ ಟ್ರಾನ್ಸ್ಮಿಷನ್, ಸಮರ್ಥ 12 ವೋಲ್ಟ್ ಅಥವಾ 48 ವೋಲ್ಟ್ ಆಲ್ಟರ್ನೇಟರ್ ಮತ್ತು ಮೈಕ್ರೋ-ಹೈಬ್ರಿಡ್ ಸಿಸ್ಟಮ್‌ಗಾಗಿ 12 ವೋಲ್ಟ್ ಅಥವಾ 48 ವೋಲ್ಟ್ ಮೋಟಾರ್-ಜನರೇಟರ್ ವ್ಯವಸ್ಥೆಗಳನ್ನು ಈ ಪಟ್ಟಿಯಲ್ಲಿ ಸೇರಿಸಲಾಗಿದೆ. ಇವುಗಳ ಜೊತೆಗೆ, ಎಕ್ಸ್‌ಟೀರಿಯರ್ ಎಲ್ಇಡಿ ಲೈಟಿಂಗ್, ನವೀನ ಮಾದರಿಯ ಗ್ಲಾಸ್ ಅಥವಾ ಗ್ಲೇಸಿಂಗ್, ಎಲೆಕ್ಟ್ರಿಕ್ ವಾಟರ್ ಪಂಪ್, ಹೈ-ಎಫಿಶಿಯೆನ್ಸಿ ಏರ್ ಕಂಡೀಷನಿಂಗ್, ಸೌರ-ಪ್ರತಿಫಲಿತ ಪೇಂಟ್ (solar-reflective paint) ಹಾಗೂ ಪಲ್ಸ್-ವಿಡ್ತ್-ಮಾಡ್ಯುಲೇಟೆಡ್ ರೇಡಿಯೇಟರ್ ಫ್ಯಾನ್ ಅಳವಡಿಕೆಯನ್ನು ಕೂಡ ಪರಿಣಾಮಕಾರಿ ತಂತ್ರಜ್ಞಾನಗಳು ಎಂದು ಗುರುತಿಸಲಾಗಿದೆ.
ನಿಯಮಾವಳಿಗಳು ಹಾಗೂ ಲಾಭ ಪಡೆಯುವ ವಿಧಾನ
ಈ ಪಟ್ಟಿಯಲ್ಲಿನ ಯಾವುದೇ ಒಂದು ತಂತ್ರಜ್ಞಾನವನ್ನು ಕಾರುಗಳಲ್ಲಿ ಅಳವಡಿಸಿಕೊಂಡರೆ, ತಯಾರಕರು ಪ್ರತಿ ಕಿಲೋಮೀಟರ್‌ಗೆ 1 ಗ್ರಾಂ ಇಂಗಾಲದ ಡೈಆಕ್ಸೈಡ್ (CO2) ಕಡಿತಕ್ಕೆ ಸಮನಾದ ಲಾಭವನ್ನು ಪಡೆಯಬಹುದು. ಕಂಪನಿಗಳು ಹಲವಾರು ತಂತ್ರಜ್ಞಾನಗಳನ್ನು ಒಟ್ಟಿಗೆ ಬಳಸುವ ಮೂಲಕ ಈ ಪಾಯಿಂಟ್‌ಗಳನ್ನು ಕ್ರೋಢೀಕರಿಸಬಹುದು. ಆದರೆ ಈ ಒಟ್ಟು ಕಡಿತದ ಲಾಭವನ್ನು ಪ್ರತಿ ಕಿಲೋಮೀಟರ್‌ಗೆ ಗರಿಷ್ಠ 9 ಗ್ರಾಂ CO2 ಗೆ ಸೀಮಿತಗೊಳಿಸಲಾಗಿದೆ.
ಇದು ಪರಿಷ್ಕೃತ ಭಾರತೀಯ ಡ್ರೈವಿಂಗ್ ಸೈಕಲ್ (MIDC) ಅಡಿಯಲ್ಲಿ ಪ್ರತಿ 100 ಕಿಲೋಮೀಟರ್‌ಗಳಿಗೆ 0.3795 ಲೀಟರ್ ಇಂಧನ ಉಳಿತಾಯಕ್ಕೆ ಸಮಾನವಾಗಿರುತ್ತದೆ. ಆದಾಗ್ಯೂ, ಈ ಲಾಭ ಪಡೆಯಲು ನಿರ್ದಿಷ್ಟ ಷರತ್ತುಗಳನ್ನು ಪೂರೈಸುವುದು ಕಡ್ಡಾಯ. ಉದಾಹರಣೆಗೆ, ಸ್ಟಾರ್ಟ್-ಸ್ಟಾಪ್ ಸಿಸ್ಟಮ್ ಅಳವಡಿಸಿದರೆ ಅದು ವಾಹನ ನಿಂತ 2 ಸೆಕೆಂಡುಗಳ ಒಳಗೆ ಎಂಜಿನ್ ಅನ್ನು ಸ್ಥಗಿತಗೊಳಿಸುವ ಸಾಮರ್ಥ್ಯ ಹೊಂದಿರಬೇಕು. ಎಲ್ಇಡಿ ಲೈಟ್ ಸೌಲಭ್ಯದ ಲಾಭ ಪಡೆಯಬೇಕಾದರೆ ಕಾರಿನ ಎಲ್ಲಾ ಹೊರಗಿನ ದೀಪಗಳು ಎಲ್ಇಡಿ ಆಗಿರಬೇಕು. ಕೇವಲ ಹೆಡ್‌ಲ್ಯಾಂಪ್‌ಗಳಲ್ಲಿ ಎಲ್ಇಡಿ ನೀಡಿ, ಇಂಡಿಕೇಟರ್‌ಗಳಿಗೆ ಹ್ಯಾಲೊಜೆನ್ ನೀಡಿದರೆ ಈ ಲಾಭ ಸಿಗುವುದಿಲ್ಲ.
ಗ್ರಾಹಕರಿಗೆ ಲಭ್ಯವಾಗುವ ಹೊಸ ವೈಶಿಷ್ಟ್ಯಗಳು
ಸರ್ಕಾರದ ಈ ನಡೆಯು ವಾಹನ ತಯಾರಕರು ಕಾರುಗಳ ಬೇರೆ ಬೇರೆ ವೇರಿಯೆಂಟ್‌ಗಳಲ್ಲಿ ನವೀನ ವೈಶಿಷ್ಟ್ಯಗಳನ್ನು ಹೇಗೆ ನೀಡುತ್ತಾರೆ ಎಂಬುದರ ಮೇಲೆ ನೇರ ಪ್ರಭಾವ ಬೀರಲಿದೆ. ಪ್ರಸ್ತುತ ಟಿಪಿಎಂಎಸ್, ಸ್ಟಾರ್ಟ್-ಸ್ಟಾಪ್ ಹಾಗೂ 6-ಸ್ಪೀಡ್ ಟ್ರಾನ್ಸ್ಮಿಷನ್ ಮುಂತಾದ ಸೌಲಭ್ಯಗಳು ಕೇವಲ ಟಾಪ್-ಎಂಡ್ ಅಥವಾ ದುಬಾರಿ ವೇರಿಯೆಂಟ್‌ಗಳಲ್ಲಿ ಮಾತ್ರ ಲಭ್ಯವಿವೆ. ಆದರೆ ಕೆಫೆ ನಿಯಮಾವಳಿಗಳ ಅನುಸರಣೆಗಾಗಿ ವಾಹನ ತಯಾರಕರು ಈ ಸುಧಾರಿತ ತಂತ್ರಜ್ಞಾನಗಳನ್ನು ಮೂಲ ಮಾದರಿಗಳಲ್ಲಿ (ಬೇಸ್ ವೇರಿಯೆಂಟ್) ಅಳವಡಿಸುವ ಸಾಧ್ಯತೆಗಳು ದಟ್ಟವಾಗಿವೆ. ಆದರೂ, ಎಲ್ಲಾ ಕಡೆ ಎಲ್ಇಡಿ ದೀಪಗಳನ್ನು ಅಳವಡಿಸುವುದು ಅಥವಾ ನವೀನ ಗಾಜುಗಳ ಬಳಕೆ ಮಾಡುವುದು ಕಂಪನಿಗಳಿಗೆ ಉತ್ಪಾದನಾ ವೆಚ್ಚವನ್ನು ಹೆಚ್ಚಿಸುವ ಸಾಧ್ಯತೆಗಳೂ ಇವೆ. ಏನೇ ಆದರೂ ತಯಾರಕರು ಕೇವಲ ಬ್ರೋಷರ್‌ಗಳಲ್ಲಿ ಈ ವೈಶಿಷ್ಟ್ಯಗಳನ್ನು ನಮೂದಿಸುವಂತಿಲ್ಲ, ಬದಲಿಗೆ ನಿಗದಿತ ತಾಂತ್ರಿಕ ಪರೀಕ್ಷೆಗಳನ್ನು ಪೂರೈಸಿ ಮಾನ್ಯತೆ ಪಡೆಯುವುದು ಸಂಪೂರ್ಣ ಕಡ್ಡಾಯವಾಗಿದೆ.
ಎಲೆಕ್ಟ್ರಿಕ್ ಹಾಗೂ ಹೈಬ್ರಿಡ್ ವಾಹನಗಳಿಗೆ ಹೆಚ್ಚಿನ ಆದ್ಯತೆ
ಈ 12 ತಂತ್ರಜ್ಞಾನಗಳಿಂದ ಕಾರು ತಯಾರಕರಿಗೆ ಸ್ವಲ್ಪಮಟ್ಟಿನ ರಿಲೀಫ್ ಸಿಕ್ಕಿದರೂ, ಕೆಫೆ-3 ನಿಯಮಾವಳಿಯಲ್ಲಿ ಪರಿಸರ ಸ್ನೇಹಿ ಪವರ್‌ಟ್ರೇನ್‌ಗಳಿಗೆ ಅಂದರೆ ಎಲೆಕ್ಟ್ರಿಕ್ ಹಾಗೂ ಹೈಬ್ರಿಡ್ ವಾಹನಗಳಿಗೆ ಅತಿ ಹೆಚ್ಚಿನ ಆದ್ಯತೆ ನೀಡಲಾಗಿದೆ. ಬ್ಯಾಟರಿ ಆಧಾರಿತ ಎಲೆಕ್ಟ್ರಿಕ್ ವಾಹನಗಳಿಗೆ 3.0 ವಾಲ್ಯೂಮ್ ಮಲ್ಟಿಪ್ಲೈಯರ್ ನೀಡಲಾಗಿದೆ. ಅದೇ ರೀತಿ ಪ್ಲಗ್-ಇನ್ ಹೈಬ್ರಿಡ್ ಹಾಗೂ ಫ್ಲೆಕ್ಸ್-ಫ್ಯುಯೆಲ್ ಸ್ಟ್ರಾಂಗ್ ಹೈಬ್ರಿಡ್ ವಾಹನಗಳಿಗೆ 2.5, ಸಾಮಾನ್ಯ ಸ್ಟ್ರಾಂಗ್ ಹೈಬ್ರಿಡ್‌ಗಳಿಗೆ 1.6 ಹಾಗೂ ಫ್ಲೆಕ್ಸ್-ಫ್ಯುಯೆಲ್ ಎಥೆನಾಲ್ ವಾಹನಗಳಿಗೆ 1.1 ರಷ್ಟು ಮಲ್ಟಿಪ್ಲೈಯರ್ ಲಾಭ ಸಿಗಲಿದೆ. ಸಾಂಪ್ರದಾಯಿಕ ಎಂಜಿನ್ ಕಾರುಗಳಿಗೆ ಹೊಸ ತಂತ್ರಜ್ಞಾನಗಳ ಅಳವಡಿಕೆಯು ಕೇವಲ ಒಂದು ಬೆಂಬಲ ಮಾತ್ರವೇ ಆಗಿದ್ದು, ಸಂಪೂರ್ಣವಾಗಿ ಶೂನ್ಯ-ಹೊರಸೂಸುವಿಕೆ ಗುರಿಯನ್ನು ತಲುಪಲು ಎಲೆಕ್ಟ್ರಿಕ್ ಹಾಗೂ ಹೈಬ್ರಿಡ್ ವಾಹನಗಳ ನಿರ್ಮಾಣವೇ ಅಂತಿಮ ಅಸ್ತ್ರವಾಗಿದೆ.
ಇದನ್ನೂ ಓದಿ : ಆಟಗಾರರ ಗಾಯದ ಸಮಸ್ಯೆ ಬಗ್ಗೆ ಬೇಸರ ವ್ಯಕ್ತಪಡಿಸಿದ ಶುಭ್‌ಮನ್ ಗಿಲ್!
