ಬೆಂಗಳೂರು : ಕೇಂದ್ರ ಸರ್ಕಾರ ಪರಿಸರಸ್ನೇಹಿ ಹಾಗೂ ಇಂಧನ ಆಮದು ವೆಚ್ಚ ತಗ್ಗಿಸುವ ಉದ್ದೇಶದಿಂದ ಜಾರಿಗೊಳಿಸಿರುವ ಇಪ್ಪತ್ತು ಪ್ರತಿಶತ ಎಥೆನಾಲ್ ಮಿಶ್ರಿತ ‘E20 ಪೆಟ್ರೋಲ್’ ವಾಹನ ಸವಾರರ ಪಾಲಿಗೆ ನುಂಗಲಾರದ ತುತ್ತಾಗಿ ಪರಿಣಮಿಸುತ್ತಿದೆಯೇ ಎಂಬ ಅನುಮಾನಗಳು ದಿನದಿಂದ ದಿನಕ್ಕೆ ಬಲವಾಗುತ್ತಿವೆ.
ಸರ್ಕಾರ ಮತ್ತು ವಾಹನ ತಯಾರಕ ಕಂಪನಿಗಳು E20 ಇಂಧನದಿಂದ ವಾಹನಗಳಿಗೆ ಯಾವುದೇ ರೀತಿ ಹಾನಿಯಿಲ್ಲ ಎಂದು ಪದೇ ಪದೇ ಭರವಸೆ ನೀಡುತ್ತಿದ್ದರೂ, ವಾಸ್ತವದಲ್ಲಿ ವಾಹನಗಳ ಮಾಲೀಕರಿಗೆ ಹಾಗೂ ಸ್ವತಂತ್ರ ಮೆಕ್ಯಾನಿಕ್ಗಳ ಅನುಭವ ಸಂಪೂರ್ಣ ಭಿನ್ನವಾಗಿದೆ. ಇದೀಗ ದುಬಾರಿ ಕಾರುಗಳ ದುರಸ್ತಿಯಲ್ಲಿ ಪರಿಣತಿ ಹೊಂದಿರುವ ಮೆಕ್ಯಾನಿಕ್ ಒಬ್ಬರು E20 ಪೆಟ್ರೋಲ್ನಿಂದಾಗಿ ಮರ್ಸಿಡಿಸ್ ಬೆಂಜ್, ಬಿಎಂಡಬ್ಲ್ಯೂ ಹಾಗೂ ಲ್ಯಾಂಡ್ ರೋವರ್ ಡಿಫೆಂಡರ್ನಂತಹ ಐಷಾರಾಮಿ ಕಾರುಗಳ ಫ್ಯೂಯಲ್ ಪಂಪ್ಗಳು ಬಹುಬೇಗನೆ ಹಾಳಾಗುತ್ತಿವೆ ಎಂಬ ಆತಂಕಕಾರಿ ವಿಚಾರವನ್ನು ಬಹಿರಂಗಪಡಿಸಿದ್ದಾರೆ.
ನೂರಕ್ಕೂ ಹೆಚ್ಚು ಐಷಾರಾಮಿ ಕಾರುಗಳ ಫ್ಯೂಯಲ್ ಪಂಪ್ ವೈಫಲ್ಯ
‘ದ ರೆಡ್ಮೈಕ್’ ಎಂಬ ಯೂಟ್ಯೂಬ್ ಚಾನೆಲ್ನಲ್ಲಿ ಹಂಚಿಕೊಳ್ಳಲಾದ ವೀಡಿಯೋವೊಂದರಲ್ಲಿ ಪ್ರೀಮಿಯಂ ಕಾರುಗಳ ಮೆಕ್ಯಾನಿಕ್ ವಾಸ್ತವದ ಸಂಗತಿಯನ್ನು ಬಿಚ್ಚಿಟ್ಟಿದ್ದಾರೆ. ಕಳೆದ ಎರಡು-ಮೂರು ತಿಂಗಳ ಅವಧಿಯಲ್ಲಿಯೇ ನೂರಕ್ಕೂ ಹೆಚ್ಚು ಬಿಎಂಡಬ್ಲ್ಯೂ ಹಾಗೂ ಡಿಫೆಂಡರ್ ಕಾರುಗಳ ಫ್ಯೂಯಲ್ ಪಂಪ್ ಬದಲಾಯಿಸಿರುವುದಾಗಿ ಅವರು ಹೇಳಿಕೊಂಡಿದ್ದಾರೆ. ಈ ಸಮಸ್ಯೆಯು ಕೇವಲ ಸಾಮಾನ್ಯ ಕಾರುಗಳಿಗೆ ಮಾತ್ರ ಸೀಮಿತವಾಗಿಲ್ಲ, ಬದಲಿಗೆ ಕೋಟ್ಯಂತರ ರೂಪಾಯಿ ಬೆಲೆಬಾಳುವ ಕಾರುಗಳಿಗೂ ಇದರ ಬಿಸಿ ತಟ್ಟಿದೆ.
ಅಧಿಕೃತ ಸರ್ವಿಸ್ ಸೆಂಟರ್ಗಳಲ್ಲೂ ಬಿಡಿಭಾಗಗಳ ಬದಲಾವಣೆಗಾಗಿ ಬಂದಿರುವ ಇಂತಹ ಹಾಳಾದ ವಾಹನಗಳ ಫ್ಯೂಯಲ್ ಪಂಪ್ಗಳು ಗುಡ್ಡೆ ಬಿದ್ದಿವೆ ಎಂದು ಅವರು ವಿವರಿಸಿದ್ದಾರೆ. ವಾಹನದ ಇಂಧನದ ಟ್ಯಾಂಕ್ನೊಳಗೆ ಅಳವಡಿಸಲಾಗುವ ಈ ಫ್ಯೂಯಲ್ ಪಂಪ್ಗಳು, ಟ್ಯಾಂಕ್ನಿಂದ ಇಂಜಿನ್ಗೆ ಇಂಧನವನ್ನು ಸರಬರಾಜು ಮಾಡುವ ಪ್ರಮುಖ ಕಾರ್ಯ ನಿರ್ವಹಿಸುತ್ತವೆ. ಇದು ಹಾಳಾದರೆ ಇಡೀ ವಾಹನದ ಚಲನೆಯೇ ಸಂಪೂರ್ಣವಾಗಿ ಸ್ತಬ್ಧಗೊಳ್ಳುತ್ತದೆ.
ಗ್ರಾಹಕರ ಜೇಬಿಗೆ ಕತ್ತರಿ ಮತ್ತು ತಾಂತ್ರಿಕ ದೋಷದ ಅಸಲಿಯತ್ತು
ವೀಡಿಯೋದಲ್ಲಿ ಮರ್ಸಿಡಿಸ್ ಬೆಂಜ್ ಸಿ-ಕ್ಲಾಸ್ ಕಾರಿನ ಹಾಳಾದ ಫ್ಯೂಯಲ್ ಪಂಪ್ ಹಾಗೂ ಇಂಜೆಕ್ಟರ್ಗಳನ್ನು ತೋರಿಸಿರುವ ಮೆಕ್ಯಾನಿಕ್, ಬಿಡಿಭಾಗಗಳ ವೈಫಲ್ಯದ ಹಿಂದಿನ ತಾಂತ್ರಿಕ ಕಾರಣಗಳನ್ನು ಎಳೆಎಳೆಯಾಗಿ ವಿವರಿಸಿದ್ದಾರೆ. E20 ಪೆಟ್ರೋಲ್ ಬಳಕೆಯಿಂದಾಗಿ ಫ್ಯೂಯಲ್ ಪಂಪ್ನೊಳಗಿರುವ ಸ್ಟ್ರೈನರ್ (ಜರಡಿ) ಬೇಗನೆ ಬ್ಲಾಕ್ ಆಗುತ್ತದೆ. ಇದರಿಂದಾಗಿ ಪಂಪ್ನೊಳಗಿನ ಎಲೆಕ್ಟ್ರಿಕ್ ಮೋಟಾರ್ ಹೆಚ್ಚು ಒತ್ತಡಕ್ಕೆ ಸಿಲುಕಿ ವೈಫಲ್ಯ ಕಾಣುತ್ತದೆ. ಇದೇ ಕಾರಣದಿಂದ ಫ್ಯೂಯಲ್ ಪಂಪ್ ಕಳಪೆಯಾಗುತ್ತದೆ.
ಮರ್ಸಿಡಿಸ್ ಬೆಂಜ್ ಸಿ-ಕ್ಲಾಸ್ ಕಾರಿನ ಮಾಲೀಕರಿಗೆ ಇದೇ ಸಮಸ್ಯೆಯಿಂದಾಗಿ ಅಧಿಕೃತ ಸರ್ವಿಸ್ ಸೆಂಟರ್ ಸುಮಾರು ಎರಡುವರೆ ಲಕ್ಷ ರೂಪಾಯಿ ದುರಸ್ತಿಯ ಬಿಲ್ ನೀಡಿತ್ತಂತೆ. ಆದರೆ, ತಮ್ಮ ಸ್ವತಂತ್ರ ಗ್ಯಾರೇಜ್ನಲ್ಲಿ ಹಳೆಯ (ಸೆಕೆಂಡ್-ಹ್ಯಾಂಡ್) ಭಾಗಗಳನ್ನು ಬಳಸಿ ಕೇವಲ ಒಂದು ಲಕ್ಷ ರೂಪಾಯಿಗೆ ಇದನ್ನು ಸರಿಪಡಿಸಿಕೊಟ್ಟಿರುವುದಾಗಿ ಅವರು ಹೇಳಿದ್ದಾರೆ. ಇದೇ ವಿಚಾರವಾಗಿ ಬಿಎಂಡಬ್ಲ್ಯೂ ಕಂಪನಿಯು ಕೂಡ ಈ ಹಿಂದೆ ಸಂಶೋಧನೆ ನಡೆಸಿದ್ದು, ಸ್ಟ್ರೈನರ್ ಬ್ಲಾಕ್ ಆಗುವುದೇ ಫ್ಯೂಯಲ್ ಪಂಪ್ ವೈಫಲ್ಯಕ್ಕೆ ಮುಖ್ಯ ಕಾರಣ ಎಂಬುದನ್ನು ಕಂಡುಕೊಂಡಿದೆ ಎಂದೂ ಮೆಕ್ಯಾನಿಕ್ ಪ್ರತಿಪಾದಿಸಿದ್ದಾರೆ.
ಟೊಯೋಟಾ ಕ್ಯಾಮ್ರಿಗೂ ತಟ್ಟಿದ ಬಿಸಿ, ನಟರ ಆಕ್ರೋಶ
E20 ಇಂಧನದಿಂದ ಕೇವಲ ಜರ್ಮನ್ ಕಾರುಗಳು ಮಾತ್ರವಲ್ಲ, ಜಪಾನ್ ಮೂಲದ ವಿಶ್ವಾಸಾರ್ಹ ವಾಹನಗಳಿಗೂ ಸಂಕಷ್ಟ ತಪ್ಪಿಲ್ಲ ಎಂಬುದಕ್ಕೆ ಇತ್ತೀಚಿನ ಇನ್ನೊಂದು ಘಟನೆ ಸಾಕ್ಷಿಯಾಗಿದೆ. ಟಾಲಿವುಡ್ ನಟ ಹಾಗೂ ಮಾಜಿ ಬಿಜೆಪಿ ನಾಯಕ ನರೇಶ್ ವಿಜಯ ಕೃಷ್ಣ ಅವರು ಸಾಮಾಜಿಕ ಜಾಲತಾಣವಾದ ಎಕ್ಸ್ (X) ನಲ್ಲಿ ಈ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದರು. ತಮ್ಮ ಆಪ್ತಸ್ನೇಹಿತರೊಬ್ಬರ ಅತ್ಯಂತ ದುಬಾರಿ ಟೊಯೋಟಾ ಕ್ಯಾಮ್ರಿ ಕಾರು E20 ಪೆಟ್ರೋಲ್ನಿಂದಾಗಿ ತೀವ್ರ ದುರಸ್ತಿಗೆ ಬಂದಿದ್ದು, ಇದನ್ನು ಸರಿಪಡಿಸಲು ಬರೋಬ್ಬರಿ ೩.೫ ಲಕ್ಷ ರೂಪಾಯಿ ಖರ್ಚಾಗಿದೆ ಎಂದು ನಟ ಹೇಳಿಕೊಂಡಿದ್ದಾರೆ. ಸರ್ಕಾರದ ಎಥೆನಾಲ್ ಮಿಶ್ರಣ ನೀತಿಯನ್ನು ಯಾವುದೇ ಮುನ್ನೆಚ್ಚರಿಕೆ ಇಲ್ಲದೆ ಅವಸರದಲ್ಲಿ ಜಾರಿಗೊಳಿಸಲಾಗಿದೆ ಎಂದು ಅವರು ಟೀಕಿಸಿದ್ದಾರೆ. ಸರ್ಕಾರ ಈ ಕೂಡಲೇ ಎಚ್ಚೆತ್ತುಕೊಂಡು ತನ್ನ ನೀತಿಯನ್ನು ಪರಿಷ್ಕರಿಸಿಕೊಳ್ಳದಿದ್ದರೆ ಮುಂಬರುವ ಚುನಾವಣೆಗಳಲ್ಲಿ ರಾಜಕೀಯವಾಗಿ ಭಾರಿ ಬೆಲೆ ತೆರಬೇಕಾಗುತ್ತದೆ ಎಂದು ಅವರು ಎಚ್ಚರಿಕೆ ನೀಡಿದ್ದಾರೆ.
ಮುಂದುವರೆದ ಆತಂಕ, ವಾಹನ ಸವಾರರಿಗೆ ಆರ್ಥಿಕ ಹೊರೆ
ಮೆಕ್ಯಾನಿಕ್ ತಿಳಿಸಿರುವ ಈ ಮಾಹಿತಿಯು ಅವರ ವೈಯಕ್ತಿಕ ಅನುಭವಗಳನ್ನು ಮಾತ್ರ ಆಧರಿಸಿದ್ದರೂ, ವಾಹನ ಸವಾರರು ಎದುರಿಸುತ್ತಿರುವ ದೈನಂದಿನ ಸಂಕಷ್ಟಗಳ ನೈಜ ಚಿತ್ರಣವನ್ನು ಇದು ತೆರೆದಿಡುತ್ತಿದೆ. ಹೊಸ ಕಾರುಗಳನ್ನು ಖರೀದಿಸಿದ ಗ್ರಾಹಕರು ಇಂತಹ ಅನಿರೀಕ್ಷಿತ ದುರಸ್ತಿ ವೆಚ್ಚಗಳ ಭೀತಿಯಲ್ಲಿ ವಾಹನ ಬೀದಿಗಿಳಿಸುವಂತಾಗಿದೆ.
ಕೆಲವು ಗ್ರಾಹಕರು ತಮ್ಮ ವಾಹನಗಳು ವಾರಂಟಿ ಅಡಿಯಲ್ಲಿ ಇರುವುದರಿಂದ ಫ್ಯೂಯಲ್ ಪಂಪ್ಗಳನ್ನು ಉಚಿತವಾಗಿ ಬದಲಾಯಿಸಿಕೊಳ್ಳುತ್ತಿದ್ದಾರೆ. ಆದರೆ, ವಾರಂಟಿ ಮುಗಿದ ವಾಹನಗಳ ಮಾಲೀಕರಿಗೆ ಇದು ಭಾರಿ ದೊಡ್ಡ ಆರ್ಥಿಕ ಹೊರೆಯಾಗಿ ಪರಿಣಮಿಸಿದೆ. E20 ಇಂಧನದ ಅಡ್ಡಪರಿಣಾಮಗಳ ಬಗ್ಗೆ ವಾಹನ ತಯಾರಕರು ಹಾಗೂ ಸರ್ಕಾರ ಸೂಕ್ತ ವೈಜ್ಞಾನಿಕ ಪರಿಹಾರ ಮತ್ತು ಸ್ಪಷ್ಟನೆಯನ್ನು ಜನಸಾಮಾನ್ಯರಿಗೆ ಒದಗಿಸದೆ ಹೋದರೆ, ಮುಂಬರುವ ದಿನಗಳಲ್ಲಿ ಇಂತಹ ಘಟನೆಗಳು ಮತ್ತಷ್ಟು ಹೆಚ್ಚುವ ಹಾಗೂ ವಾಹನ ಪ್ರಿಯರ ಆಕ್ರೋಶ ಭುಗಿಲೇಳುವ ಸಾಧ್ಯತೆಗಳು ದಟ್ಟವಾಗಿವೆ.
ಇದನ್ನೂ ಓದಿ : ಹೂಡಿಕೆ ಮೇಲಿನ ಲಾಭಕ್ಕೆ ತೆರಿಗೆಯೇ ಇರುವುದಿಲ್ಲವೇ? ಕೇಂದ್ರದಿಂದ ಮಹತ್ವದ ಸ್ಪಷ್ಟನೆ!
