ಬೆಂಗಳೂರು : ಭಾರತದಲ್ಲಿ ಎಲೆಕ್ಟ್ರಿಕ್ ವಾಹನಗಳ ಬಳಕೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಪೆಟ್ರೋಲ್ ಬೆಲೆ ಏರಿಕೆ, ಕಡಿಮೆ ನಿರ್ವಹಣಾ ವೆಚ್ಚ ಹಾಗೂ ಪರಿಸರ ಸ್ನೇಹಿ ತಂತ್ರಜ್ಞಾನದಿಂದಾಗಿ ಅನೇಕರು ಮೊದಲ ಬಾರಿಗೆ ಪೆಟ್ರೋಲ್ ಸ್ಕೂಟರ್ ಬಿಟ್ಟು ಎಲೆಕ್ಟ್ರಿಕ್ ಸ್ಕೂಟರ್ ಖರೀದಿಸಲು ಮುಂದಾಗುತ್ತಿದ್ದಾರೆ.
ಆದರೆ ಮಾರುಕಟ್ಟೆಯಲ್ಲಿ ಹಲವು ಆಯ್ಕೆಗಳಿರುವ ಕಾರಣ ಯಾವ ಮಾದರಿ ಉತ್ತಮ ಎಂಬ ಗೊಂದಲ ಸಾಮಾನ್ಯ. ಇದೇ ಹಿನ್ನೆಲೆ ಮೊದಲ ಬಾರಿಗೆ ಇವಿ ಖರೀದಿಸುವವರಿಗೆ ಸೂಕ್ತವಾಗಿರುವ ಐದು ಎಲೆಕ್ಟ್ರಿಕ್ ಸ್ಕೂಟರ್ಗಳ ಪಟ್ಟಿಯನ್ನು ವಾಹನ ತಜ್ಞರು ಶಿಫಾರಸು ಮಾಡಿದ್ದಾರೆ. ಬಳಸಲು ಸುಲಭ, ಉತ್ತಮ ರೇಂಜ್, ವಿಶ್ವಾಸಾರ್ಹ ಬ್ಯಾಟರಿ, ಆರಾಮದಾಯಕ ಪ್ರಯಾಣ ಹಾಗೂ ಕಡಿಮೆ ನಿರ್ವಹಣಾ ವೆಚ್ಚವನ್ನು ಗಮನದಲ್ಲಿಟ್ಟುಕೊಂಡು ಈ ಪಟ್ಟಿಯನ್ನು ಸಿದ್ಧಪಡಿಸಲಾಗಿದೆ.
ಆಂಪಿಯರ್ ನೆಕ್ಸಸ್ ST: ವಿಶ್ವಾಸಾರ್ಹ ಬ್ಯಾಟರಿ, ಉತ್ತಮ ರೇಂಜ್
ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿರುವ ಆಂಪಿಯರ್ ನೆಕ್ಸಸ್ ST ಸುಮಾರು 136 ಕಿಲೋಮೀಟರ್ಗಳವರೆಗೆ ಒಂದೇ ಚಾರ್ಜ್ನಲ್ಲಿ ಸಂಚರಿಸಬಲ್ಲದು ಎಂದು ಕಂಪನಿ ಹೇಳಿದೆ. LFP ಬ್ಯಾಟರಿ ಹೊಂದಿರುವ ಈ ಸ್ಕೂಟರ್ ಸುಮಾರು 2 ಲಕ್ಷ ಕಿಲೋಮೀಟರ್ಗಳ ಜೀವನಚಕ್ರ ಹೊಂದಿದ್ದು, ದೀರ್ಘಾವಧಿ ಬಳಕೆಗೆ ಸೂಕ್ತವಾಗಿದೆ.
7 ಇಂಚಿನ TFT ಟಚ್ಸ್ಕ್ರೀನ್, ಬ್ಲೂಟೂತ್ ಸಂಪರ್ಕ, ನ್ಯಾವಿಗೇಶನ್ ಮಿರರಿಂಗ್ ಹಾಗೂ ಕರೆಗಳ ಎಚ್ಚರಿಕೆ ಸೇರಿದಂತೆ ಹಲವು ಸ್ಮಾರ್ಟ್ ವೈಶಿಷ್ಟ್ಯಗಳನ್ನು ಯಾವುದೇ ಹೆಚ್ಚುವರಿ ಚಂದಾದಾರಿಕೆ ಇಲ್ಲದೆ ನೀಡಲಾಗುತ್ತದೆ. ಭಾರತೀಯ ರಸ್ತೆ ಪರಿಸ್ಥಿತಿಗೆ ಅನುಗುಣವಾಗಿ ನಿರ್ಮಿಸಿರುವುದರಿಂದ ಹೊಸಬರಿಗೆ ಇದು ಉತ್ತಮ ಆಯ್ಕೆಯಾಗಿದೆ. ಆರಂಭಿಕ ಬೆಲೆ ಸುಮಾರು 1.30 ಲಕ್ಷ ರೂಪಾಯಿ.
ಅಥೆರ್ 450X: ತಂತ್ರಜ್ಞಾನ ಮತ್ತು ಕಾರ್ಯಕ್ಷಮತೆಯ ಸಂಗಮ
ಉತ್ತಮ ಪರ್ಫಾರ್ಮೆನ್ಸ್ ಜೊತೆಗೆ ಆಧುನಿಕ ತಂತ್ರಜ್ಞಾನ ಬೇಕೆಂದರೆ ಅಥೆರ್ 450X ಉತ್ತಮ ಆಯ್ಕೆಯಾಗಿದೆ. 2.9 kWh ಬ್ಯಾಟರಿಯೊಂದಿಗೆ ಬರುವ ಈ ಸ್ಕೂಟರ್ ಸುಮಾರು 126 ಕಿಲೋಮೀಟರ್ IDC ರೇಂಜ್ ನೀಡುತ್ತದೆ. ಟಚ್ಸ್ಕ್ರೀನ್ ಡ್ಯಾಶ್ಬೋರ್ಡ್, ವಿವಿಧ ರೈಡಿಂಗ್ ಮೋಡ್ಗಳು ಹಾಗೂ ವೇಗವಾದ ಪ್ರತಿಕ್ರಿಯೆ ಇದರ ಪ್ರಮುಖ ಆಕರ್ಷಣೆಗಳಾಗಿವೆ. ಬಳಕೆದಾರ ಸ್ನೇಹಿ ಇಂಟರ್ಫೇಸ್ ಇರುವುದರಿಂದ ಮೊದಲ ಬಾರಿಗೆ ಇವಿ ಬಳಸುವವರಿಗೂ ಇದನ್ನು ಸುಲಭವಾಗಿ ಅಳವಡಿಸಿಕೊಳ್ಳಬಹುದು. ಇದರ ಆರಂಭಿಕ ಬೆಲೆ ಸುಮಾರು 1.63 ಲಕ್ಷ ರೂಪಾಯಿ.
ಟಿವಿಎಸ್ ಐಕ್ಯೂಬ್: ಕುಟುಂಬ ಬಳಕೆಗೆ ಸೂಕ್ತ ಆಯ್ಕೆ
ಟಿವಿಎಸ್ ಐಕ್ಯೂಬ್ ತನ್ನ ಸರಳ ವಿನ್ಯಾಸ, ಆರಾಮದಾಯಕ ಸವಾರ ಹಾಗೂ ಸುಲಭ ನಿಯಂತ್ರಣಕ್ಕಾಗಿ ಜನಪ್ರಿಯವಾಗಿದೆ. ಮಾದರಿಯನ್ನು ಅವಲಂಬಿಸಿ ಸುಮಾರು 100 ರಿಂದ 145 ಕಿಲೋಮೀಟರ್ಗಳವರೆಗೆ ಪ್ರಮಾಣೀಕೃತ ರೇಂಜ್ ನೀಡುತ್ತದೆ. ನ್ಯಾವಿಗೇಶನ್ ಸಹಾಯ, ಬ್ಯಾಟರಿ ಮಾಹಿತಿ ಸೇರಿದಂತೆ ಹಲವು ಸಂಪರ್ಕಿತ ವೈಶಿಷ್ಟ್ಯಗಳನ್ನು ಒಳಗೊಂಡಿರುವ ಈ ಸ್ಕೂಟರ್ ಹೊಸಬರಿಗೆ ಸುಲಭವಾಗಿ ಹೊಂದಿಕೊಳ್ಳುವ ರೀತಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ. ಇದರ ಆರಂಭಿಕ ಬೆಲೆ ಸುಮಾರು 1.14 ಲಕ್ಷ ರೂಪಾಯಿ.
ಹೀರೋ ವಿಡಾ V1: ತೆಗೆಯಬಹುದಾದ ಬ್ಯಾಟರಿಯ ವಿಶೇಷತೆ
ಹೀರೋ ವಿಡಾ V1 ಪ್ರೊ ಈ ಪಟ್ಟಿಯಲ್ಲಿರುವ ಅತ್ಯಂತ ಪ್ರಾಯೋಗಿಕ ಆಯ್ಕೆಗಳಲ್ಲಿ ಒಂದಾಗಿದೆ. ಒಂದೇ ಚಾರ್ಜ್ನಲ್ಲಿ ಸುಮಾರು 165 ಕಿಲೋಮೀಟರ್ ಪ್ರಮಾಣೀಕೃತ ರೇಂಜ್ ನೀಡುವ ಈ ಸ್ಕೂಟರ್ನ ಪ್ರಮುಖ ವೈಶಿಷ್ಟ್ಯವೆಂದರೆ ತೆಗೆಯಬಹುದಾದ ಬ್ಯಾಟರಿ ವ್ಯವಸ್ಥೆ. ಮನೆಯಲ್ಲಿ ಅಥವಾ ಕಚೇರಿಯಲ್ಲಿ ಬ್ಯಾಟರಿಯನ್ನು ಬೇರ್ಪಡಿಸಿ ಸುಲಭವಾಗಿ ಚಾರ್ಜ್ ಮಾಡಬಹುದಾಗಿದೆ. ವಿವಿಧ ರೈಡಿಂಗ್ ಮೋಡ್ಗಳು, ಸ್ಮಾರ್ಟ್ ಸಂಪರ್ಕಿತ ತಂತ್ರಜ್ಞಾನ ಹಾಗೂ ಆರಾಮದಾಯಕ ಸವಾರಿಯಿಂದ ಇದು ದೈನಂದಿನ ಬಳಕೆಗೆ ಉತ್ತಮ ಆಯ್ಕೆಯಾಗಿದೆ. ಇದರ ಆರಂಭಿಕ ಬೆಲೆ ಸುಮಾರು 1.50 ಲಕ್ಷ ರೂಪಾಯಿ.
ಜಾಜ್ ಚೇತಕ್ ಎಲೆಕ್ಟ್ರಿಕ್: ಗುಣಮಟ್ಟ ಮತ್ತು ವಿಶ್ವಾಸಕ್ಕೆ ಹೆಸರಾಗಿರುವ ಸ್ಕೂಟರ್
ಕ್ಲಾಸಿಕ್ ವಿನ್ಯಾಸ ಹಾಗೂ ಬಲಿಷ್ಠ ನಿರ್ಮಾಣದಿಂದಲೇ ಬಜಾಜ್ ಚೇತಕ್ ಎಲೆಕ್ಟ್ರಿಕ್ ಹೆಚ್ಚು ಜನಪ್ರಿಯವಾಗಿದೆ. ಮಾದರಿಯನ್ನು ಅವಲಂಬಿಸಿ ಸುಮಾರು 108 ರಿಂದ 137 ಕಿಲೋಮೀಟರ್ಗಳವರೆಗೆ ಪ್ರಮಾಣೀಕೃತ ರೇಂಜ್ ನೀಡುತ್ತದೆ. ಸುಲಭ ನಿಯಂತ್ರಣ, ಆರಾಮದಾಯಕ ಸವಾರ ಹಾಗೂ ದೀರ್ಘಾವಧಿಯ ವಿಶ್ವಾಸಾರ್ಹತೆ ಈ ಸ್ಕೂಟರ್ನ ಪ್ರಮುಖ ಬಲವಾಗಿದೆ. ಮೊದಲ ಬಾರಿಗೆ ಎಲೆಕ್ಟ್ರಿಕ್ ಸ್ಕೂಟರ್ ಖರೀದಿಸುವವರಿಗೆ ಇದು ಸುರಕ್ಷಿತ ಹಾಗೂ ವಿಶ್ವಾಸಾರ್ಹ ಆಯ್ಕೆಯಾಗಿದೆ. ಇದರ ಆರಂಭಿಕ ಬೆಲೆ ಸುಮಾರು 1.11 ಲಕ್ಷ ರೂಪಾಯಿ.
ಇವಿ ಖರೀದಿಸುವ ಮುನ್ನ ಏನು ಗಮನಿಸಬೇಕು?
ತಜ್ಞರ ಪ್ರಕಾರ, ಕೇವಲ ಬೆಲೆ ಅಥವಾ ಕಂಪನಿ ಹೆಸರನ್ನು ನೋಡಿ ಎಲೆಕ್ಟ್ರಿಕ್ ಸ್ಕೂಟರ್ ಆಯ್ಕೆ ಮಾಡಬಾರದು. ನಿಮ್ಮ ದೈನಂದಿನ ಪ್ರಯಾಣದ ದೂರ, ಮನೆಯಲ್ಲೇ ಚಾರ್ಜಿಂಗ್ ಸೌಲಭ್ಯ, ಬ್ಯಾಟರಿ ವಾರಂಟಿ, ಸಮೀಪದಲ್ಲಿರುವ ಸರ್ವಿಸ್ ಸೆಂಟರ್, ಬಿಡಿಭಾಗಗಳ ಲಭ್ಯತೆ ಹಾಗೂ ನೈಜ ಬಳಕೆಯ ರೇಂಜ್ ಇವೆಲ್ಲವನ್ನೂ ಪರಿಶೀಲಿಸಿ ಖರೀದಿ ಮಾಡುವುದು ಸೂಕ್ತ. ಸರಿಯಾದ ಆಯ್ಕೆ ಮಾಡಿದರೆ ಎಲೆಕ್ಟ್ರಿಕ್ ಸ್ಕೂಟರ್ ಕಡಿಮೆ ವೆಚ್ಚದಲ್ಲಿ ಉತ್ತಮ ಪ್ರಯಾಣ ಅನುಭವ ನೀಡಬಲ್ಲದು.
ಇದನ್ನೂ ಓದಿ : ರೋಹಿತ್ಗೆ ಗೇಟ್ಪಾಸ್? ಗಂಭೀರ್ಗೆ ತಿರುಗಿಬೀಳಲಿದ್ದಾರಾ ಹಿಟ್ಮ್ಯಾನ್?
