ಬೆಂಗಳೂರು : ಅಫ್ಘಾನಿಸ್ತಾನ ವಿರುದ್ಧ ನಡೆಯುತ್ತಿರುವ ಏಕೈಕ ಟೆಸ್ಟ್ ಪಂದ್ಯದ ಮೊದಲ ದಿನವೇ ಭಾರತ ತಂಡದ ನಾಯಕ ಶುಭ್ಮನ್ ಗಿಲ್ ಹೊಸ ಇತಿಹಾಸ ಬರೆದಿದ್ದಾರೆ. ಮಹಾರಾಜ ಯಾದವೀಂದ್ರ ಸಿಂಗ್ ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ ಕೇವಲ 68 ಎಸೆತಗಳಲ್ಲಿ ತಮ್ಮ 9ನೇ ಟೆಸ್ಟ್ ಅರ್ಧಶತಕ ಪೂರೈಸಿದ ಗಿಲ್, ನಾಯಕನಾಗಿ 1000 ಟೆಸ್ಟ್ ರನ್ಗಳ ಗಡಿಯನ್ನು ದಾಟಿದ್ದಾರೆ.
ವಿಶೇಷವೆಂದರೆ, ಮೇ 24, 2025ರಂದು ಟೆಸ್ಟ್ ನಾಯಕನಾಗಿ ಅಧಿಕಾರ ವಹಿಸಿಕೊಂಡಿದ್ದ ಅವರು ಕೇವಲ 379 ದಿನಗಳಲ್ಲಿ ಈ ಸಾಧನೆ ಮಾಡುವ ಮೂಲಕ, ಅತಿ ಕಡಿಮೆ ದಿನಗಳಲ್ಲಿ ಸಾವಿರ ರನ್ ಪೂರೈಸಿದ ಮೊದಲ ಭಾರತೀಯ ನಾಯಕ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇನ್ನು ಆಡಿದ ಇನ್ನಿಂಗ್ಸ್ಗಳ ಲೆಕ್ಕಾಚಾರದಲ್ಲಿ ನೋಡುವುದಾದರೆ, ಕೇವಲ 15 ಇನ್ನಿಂಗ್ಸ್ಗಳಲ್ಲಿ ಈ ಮೈಲಿಗಲ್ಲು ತಲುಪಿರುವ ಗಿಲ್, ಲೆಜೆಂಡರಿ ಸುನಿಲ್ ಗವಾಸ್ಕರ್ ನಂತರದ ಎರಡನೇ ಅತಿ ವೇಗದ ಭಾರತೀಯ ನಾಯಕ ಎನಿಸಿಕೊಂಡಿದ್ದಾರೆ.
ಐಪಿಎಲ್ ಫಾರ್ಮ್ ಹಾಗೂ ಟೆಸ್ಟ್ಗೆ ಕಠಿಣ ಹೊಂದಾಣಿಕೆ
ಇತ್ತೀಚೆಗಷ್ಟೇ ಮುಕ್ತಾಯಗೊಂಡ 2026ರ ಐಪಿಎಲ್ ಟೂರ್ನಿಯಲ್ಲಿ ಗುಜರಾತ್ ಟೈಟನ್ಸ್ ತಂಡವನ್ನು ಫೈನಲ್ಗೆ ಕೊಂಡೊಯ್ದಿದ್ದ ಶುಭ್ಮನ್ ಗಿಲ್, ಟಿ20 ಕ್ರಿಕೆಟ್ನ ತಮ್ಮ ಅಮೋಘ ಫಾರ್ಮ್ ಅನ್ನು ಕೆಂಪು ಚೆಂಡಿನ ಕ್ರಿಕೆಟ್ಗೂ ಯಶಸ್ವಿಯಾಗಿ ವಿಸ್ತರಿಸಿದ್ದಾರೆ. ಐಪಿಎಲ್ನಲ್ಲಿ 16 ಇನ್ನಿಂಗ್ಸ್ಗಳಿಂದ ಬರೋಬ್ಬರಿ 732 ರನ್ ಸಿಡಿಸಿ ರನ್-ಮಷಿನ್ ಆಗಿ ಮಿಂಚಿದ್ದ ಅವರು ಅದೇ ಲಯವನ್ನು ಟೆಸ್ಟ್ನಲ್ಲೂ ಮುಂದುವರಿಸಿದ್ದಾರೆ.
ಸತತ ಎರಡು ತಿಂಗಳ ಕಾಲ ಟಿ20 ಕ್ರಿಕೆಟ್ ಆಡಿ ನೇರವಾಗಿ ಟೆಸ್ಟ್ ಪಂದ್ಯವನ್ನಾಡಲು ಹೊಂದಿಕೊಳ್ಳುವುದು ಸುಲಭವಲ್ಲ ಎಂದು ಗಿಲ್ ಟಾಸ್ ವೇಳೆ ಮುಕ್ತವಾಗಿ ಒಪ್ಪಿಕೊಂಡಿದ್ದಾರೆ. ಅದರಲ್ಲೂ ರಾತ್ರಿ ತಡವಾಗಿ ಮಲಗುವ ಐಪಿಎಲ್ ಲೈಫ್ಸ್ಟೈಲ್ನಿಂದ ಬೆಳಿಗ್ಗೆ ಬೇಗನೇ ಏಳುವ ಟೆಸ್ಟ್ ಕ್ರಿಕೆಟ್ ವೇಳಾಪಟ್ಟಿಗೆ ಹೊಂದಿಕೊಳ್ಳುವುದು ಕೊಂಚ ಸವಾಲಿನದ್ದಾಗಿತ್ತು. ಆದರೂ, ಆಟಗಾರರಿಗೆ ಸಾಕಷ್ಟು ವಿಶ್ರಾಂತಿ ಸಿಕ್ಕಿರುವುದರಿಂದ ಎಲ್ಲರೂ ಉತ್ಸಾಹದಿಂದ ಕಣಕ್ಕಿಳಿದಿದ್ದಾರೆ ಎಂದು ತಮ್ಮ ತವರಿನ ಕ್ರೀಡಾಂಗಣದಲ್ಲಿ ತಂಡವನ್ನು ಮುನ್ನಡೆಸುತ್ತಿರುವ ಗಿಲ್ ಹರ್ಷ ವ್ಯಕ್ತಪಡಿಸಿದ್ದಾರೆ.
ಮುಂಬರುವ ಟೆಸ್ಟ್ ಸವಾಲುಗಳಿಗಾಗಿ ಭರ್ಜರಿ ಸಿದ್ಧತೆ
ಭಾರತ ತಂಡಕ್ಕೆ ಮುಂಬರುವ ದಿನಗಳಲ್ಲಿ ಬಿಡುವಿಲ್ಲದ ಟೆಸ್ಟ್ ಸೀಸನ್ ಎದುರಾಗಲಿದ್ದು, ಅದಕ್ಕಾಗಿ ಅತ್ಯುತ್ತಮ ಕಾಂಬಿನೇಷನ್ ಹುಡುಕುವ ನಿಟ್ಟಿನಲ್ಲಿ ನಾಯಕ ಗಿಲ್ ಹಾಗೂ ಮ್ಯಾನೇಜ್ಮೆಂಟ್ ಗಮನಹರಿಸಿದೆ. ಅಫ್ಘಾನಿಸ್ತಾನ ವಿರುದ್ಧದ ಈ ಏಕೈಕ ಟೆಸ್ಟ್ ಪಂದ್ಯವು ಮುಂದಿನ ಸರಣಿಗಳಿಗೆ ಒಂದು ಪ್ರಮುಖ ಪೂರ್ವಸಿದ್ಧತೆಯಾಗಿದೆ. ಈ ಪಂದ್ಯದ ಬಳಿಕ ಭಾರತ ತಂಡವು ಒಟ್ಟು ಒಂಬತ್ತು ಟೆಸ್ಟ್ ಪಂದ್ಯಗಳನ್ನು ಆಡಲಿದ್ದು, ಅದರಲ್ಲಿ ಶ್ರೀಲಂಕಾ ವಿರುದ್ಧ ಎರಡು ಹಾಗೂ ತವರಿನಲ್ಲಿ ಐದು ಪಂದ್ಯಗಳು ಸೇರಿವೆ. ಶ್ರೀಲಂಕಾ ಹಾಗೂ ಭಾರತದ ಪಿಚ್ಗಳ ವಾತಾವರಣ ಬಹುತೇಕ ಒಂದೇ ಆಗಿರುವುದರಿಂದ, ಮುಂಬರುವ ಸರಣಿಗಳಲ್ಲಿ ಬ್ಯಾಟಿಂಗ್ ವಿಭಾಗವಾಗಿ ನಮ್ಮ ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸಿಕೊಳ್ಳಲು ಹಾಗೂ ತಂಡದ ಸರಿಯಾದ ಸಂಯೋಜನೆಯನ್ನು ಕಂಡುಕೊಳ್ಳಲು ಈ ಪಂದ್ಯವನ್ನು ವೇದಿಕೆಯನ್ನಾಗಿ ಬಳಸಿಕೊಳ್ಳುತ್ತಿದ್ದೇವೆ ಎಂದು ಶುಭ್ಮನ್ ಗಿಲ್ ತಮ್ಮ ಭವಿಷ್ಯದ ಯೋಜನೆಗಳ ಬಗ್ಗೆ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ : ಪತ್ನಿ ಕರೆಗೆ ಗವಾಸ್ಕರ್ ತಕ್ಷಣವೇ ಉತ್ತರಿಸಿದ ವಿಡಿಯೋ ವೈರಲ್ : ಇಲ್ಲಿದೆ ಇಂಟರೆಸ್ಟಿಂಗ್ ಅಪ್ಡೇಟ್
