ಮಾಲೆ : ಮಾಲ್ಡೀವ್ಸ್ನ ಆಳ ಸಮುದ್ರದಲ್ಲಿ ಸಾಹಸ ಕ್ರೀಡೆಗೆಂದು ತೆರಳಿದ್ದ ಇಟಲಿಯ ಐವರು ಅನುಭವಿ ಡೈವರ್ಗಳು (ಈಜುಗಾರರು) ಕಡಲಾಳದ ಕತ್ತಲೆಯ ಗುಹೆಯೊಂದರಲ್ಲಿ ಸಿಲುಕಿ ದುರಂತ ಸಾವನ್ನಪ್ಪಿದ ಘಟನೆ ಇತ್ತೀಚೆಗೆ ನಡೆದಿತ್ತು. ಇದೀಗ ಇವರ ಸಾವಿಗೆ ಕಾರಣವೇನಿರಬಹುದು ಎಂಬ ಮಾಹಿತಿ ಬಹಿರಂಗವಾಗಿದೆ. ಗುಹೆಯ ಒಳಗಿನ ಸಂಕೀರ್ಣ ಜಾಲದಲ್ಲಿ ತಪ್ಪು ತಿರುವು ಪಡೆದುಕೊಂಡು, ಹೊರಹೋಗಲು ದಾರಿಯಿಲ್ಲದ ಕೊನೆಯ ಕೋಣೆಯೊಳಗೆ ಸಿಲುಕಿಕೊಂಡಿದ್ದೇ ಈ ಭೀಕರ ದುರಂತಕ್ಕೆ ಕಾರಣ ಎಂದು ರಕ್ಷಣಾ ಸಿಬ್ಬಂದಿ ಬಹಿರಂಗಪಡಿಸಿದ್ದಾರೆ. ಹಲವು ದಿನಗಳ ಸತತ ಕಾರ್ಯಾಚರಣೆಯ ನಂತರ ಸುಮಾರು 50 ಮೀಟರ್ ಆಳದಲ್ಲಿ ಇವರ ಮೃತದೇಹಗಳು ಪತ್ತೆಯಾಗಿವೆ.
ಸಾವಿನ ಕೋಣೆಯಾದ ಮೂರನೇ ಚೇಂಬರ್
ಮೃತರನ್ನು ಇಟಲಿಯ ಪರಿಸರ ವಿಜ್ಞಾನದ ಪ್ರೊಫೆಸರ್ ಮೋನಿಕಾ ಮೊಂಟೆಫಾಲ್ಕೋನ್ (52), ಅವರ ಮಗಳು ಜಾರ್ಜಿಯಾ ಸೊಮ್ಮಾಕಲ್ (20), ಮುರಿಯಲ್ ಒಡ್ಡೆನಿನೊ (31), ಫೆಡೆರಿಕೊ ಗುವಾಲ್ಟೇರಿ (31) ಮತ್ತು ಅವರ ಡೈವಿಂಗ್ ತರಬೇತುದಾರ ಜಿಯಾನ್ಲುಕಾ ಬೆನೆಡೆಟ್ಟಿ (44) ಎಂದು ಗುರುತಿಸಲಾಗಿದೆ. ಇವರು ಸಂಶೋಧನೆ ಮತ್ತು ಪ್ರವಾಸಕ್ಕಾಗಿ ಮಾಲ್ಡೀವ್ಸ್ನ ‘ವಾವು ಅಟಾಲ್’ ಎಂಬಲ್ಲಿ ಕಡಲಾಳದ ಗುಹೆಯೊಳಗೆ ಇಳಿದಿದ್ದರು. ಈ ಗುಹೆಯು ಕಿರಿದಾದ ಕಡಲ ಹಾದಿಗಳಿಂದ ಸಂಪರ್ಕ ಹೊಂದಿದ ಮೂರು ದೊಡ್ಡ ಕೋಣೆಗಳನ್ನು (ಚೇಂಬರ್ಸ್) ಹೊಂದಿದೆ. ಎರಡನೇ ಕೋಣೆಯಿಂದ ಮುಂದೆ ಹೋಗುವಾಗ ಮರಳಿನ ರಾಶಿಯಿಂದಾಗಿ ದಾರಿ ಮಸುಕಾಗಿ, ಇವರು ನೇರವಾಗಿ ಯಾವುದೇ ಎಕ್ಸಿಟ್ ಇಲ್ಲದ ಮೂರನೇ ಕೋಣೆಯೊಳಗೆ ಪ್ರವೇಶಿಸಿ ಸಿಲುಕಿಕೊಂಡಿದ್ದಾರೆ.
ಭಯದ ಜೊತೆ ಆಮ್ಲಜನಕದ ಕೊರತೆ
ಡೈವಿಂಗ್ ನೆರವು ಸಂಸ್ಥೆಯಾದ ‘ಡ್ಯಾನ್ ಯುರೋಪ್’ ಪ್ರಕಾರ, ಈಜುಗಾರರು ಕೇವಲ 12 ಲೀಟರ್ ಸಾಮರ್ಥ್ಯದ ಸಾಮಾನ್ಯ ಆಕ್ಸಿಜನ್ ಸಿಲಿಂಡರ್ಗಳನ್ನು ಬಳಸುತ್ತಿದ್ದರು. ಇದು 30 ಮೀಟರ್ಗಿಂತ ಹೆಚ್ಚಿನ ಆಳದ ಡೈವಿಂಗ್ಗೆ ಸೂಕ್ತವಲ್ಲ. ಆದರೆ ಇವರು 50 ಮೀಟರ್ ಆಳಕ್ಕೆ ಇಳಿದಿದ್ದರಿಂದ ಆಕ್ಸಿಜನ್ ವೇಗವಾಗಿ ಖಾಲಿಯಾಗುತ್ತಿತ್ತು. ತಾವು ದಾರಿ ತಪ್ಪಿದ್ದೇವೆ ಎಂದು ಅರಿವಾಗುವಷ್ಟರಲ್ಲಿ ಅವರ ಬಳಿ ಕೇವಲ 10 ನಿಮಿಷ ಅಥವಾ ಅದಕ್ಕಿಂತ ಕಡಿಮೆ ಸಮಯವಿತ್ತು. ತಕ್ಷಣವೇ ಆವರಿಸಿದ ತೀವ್ರ ಭಯ ಮತ್ತು ಆತಂಕದಿಂದಾಗಿ ಅವರು ಜೋರಾಗಿ ಉಸಿರಾಡಲು ಆರಂಭಿಸಿದ್ದು, ಸಿಲಿಂಡರ್ನಲ್ಲಿದ್ದ ಆಕ್ಸಿಜನ್ ಮತ್ತಷ್ಟು ಬೇಗನೆ ಖಾಲಿಯಾಗಿ ಉಸಿರುಗಟ್ಟಿ ಸಾವನ್ನಪ್ಪಿದ್ದಾರೆ. ಇವರಲ್ಲಿ ನಾಲ್ವರ ಶವಗಳು ಕೋಣೆಯ ಒಳಗೆ ಸಿಕ್ಕರೆ, ತರಬೇತುದಾರ ಬೆನೆಡೆಟ್ಟಿ ಅವರ ಶವ ಮಾತ್ರ ಗುಹೆಯ ದಾರಿಯ ಬಳಿ ಸಿಕ್ಕಿದ್ದು, ಅವರು ತಂಡವನ್ನು ಉಳಿಸಲು ಕೊನೆಯ ಕ್ಷಣದವರೆಗೆ ಹೋರಾಡಿರುವುದು ಕಂಡುಬಂದಿದೆ.
ರಕ್ಷಣಾ ಸಿಬ್ಬಂದಿಯೂ ಬಲಿ: ತನಿಖೆಗೆ ಆದೇಶ
ಈ ಕಡಲಾಳದ ದುರಂತದ ತೀವ್ರತೆ ಎಷ್ಟಿತ್ತೆಂದರೆ, ಇವರ ಶವಗಳನ್ನು ಹೊರತೆಗೆಯುವ ಅಪಾಯಕಾರಿ ಕಾರ್ಯಾಚರಣೆಯಲ್ಲಿದ್ದ ಮಾಲ್ಡೀವ್ಸ್ ರಾಷ್ಟ್ರೀಯ ರಕ್ಷಣಾ ಪಡೆಯ ಸಾರ್ಜೆಂಟ್ ಮೇಜರ್ ಮೊಹಮ್ಮದ್ ಮಹೂದಿ ಎಂಬವರು ಕೂಡ ‘ಡಿಕಂಪ್ರೆಷನ್ ಸಿಕ್ನೆಸ್’ (ಕಡಲಾಳದ ಒತ್ತಡದ ಕಾಯಿಲೆ) ಕಾರಣದಿಂದ ಮೃತಪಟ್ಟಿದ್ದಾರೆ. ಇನ್ನು ಈಜುಗಾರರು ಇಂತಹ ಕಠಿಣ ಮತ್ತು ತಾಂತ್ರಿಕ ಸವಾಲುಗಳಿರುವ ಗುಹೆಯೊಳಗೆ ಯಾವುದೇ ವಿಶೇಷ ರಕ್ಷಣಾ ಸಾಧನಗಳಿಲ್ಲದೆ ಏಕೆ ಇಳಿದರು ಎಂಬ ಬಗ್ಗೆ ತನಿಖೆ ಆರಂಭವಾಗಿದೆ. ಸ್ಥಳದಲ್ಲಿ ಪತ್ತೆಯಾದ ಅವರ ‘ಗೋಪ್ರೊ’ ಕ್ಯಾಮೆರಾಗಳನ್ನು ವಶಪಡಿಸಿಕೊಳ್ಳಲಾಗಿದ್ದು, ಕೊನೆಯ ಕ್ಷಣದ ದೃಶ್ಯಗಳನ್ನು ಪರಿಶೀಲಿಸಲಾಗುತ್ತಿದೆ.
ಪ್ರಸ್ತುತ ಮಾಲ್ಡೀವ್ಸ್ ಸರ್ಕಾರವು ಈ ಪ್ರವಾಸಕ್ಕೆ ಬಳಸಲಾಗಿದ್ದ ಬೋಟ್ನ ಲೈಸೆನ್ಸ್ ಅನ್ನು ರದ್ದುಗೊಳಿಸಿದೆ. ಸಾಮಾನ್ಯವಾಗಿ ಕಡಲಾಳದ ಗುಹೆಗಳೊಳಗೆ ಡೈವಿಂಗ್ ಮಾಡುವುದು ಅತ್ಯಂತ ಅಪಾಯಕಾರಿ ಎಂದು ಪರಿಗಣಿಸಲಾಗುತ್ತದೆ. ಏಕೆಂದರೆ ತುರ್ತು ಸಂದರ್ಭಗಳಲ್ಲಿ ನೇರವಾಗಿ ಸಮುದ್ರದ ಮೇಲ್ಮೈಗೆ ಬರಲು ಇಲ್ಲಿ ಸಾಧ್ಯವಿರುವುದಿಲ್ಲ. ಸಣ್ಣ ತಪ್ಪು ಕೂಡ ಇಡೀ ಜೀವವನ್ನೇ ಬಲಿಪಡೆಯುತ್ತದೆ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ.
ಇದನ್ನೂ ಓದಿ ; ಏರ್ಪೋರ್ಟ್ನಲ್ಲಿ ಬಾಲಿವುಡ್ ಶೈಲಿಯ ದರೋಡೆ : ಏರ್ಲೈನ್ಸ್ ಸಿಬ್ಬಂದಿಯಿಂದಲೇ 2.5 ಕೋಟಿ ರೂ. ಮೌಲ್ಯದ ಚಿನ್ನ ಲೂಟಿ!
