ರಾಮೇಶ್ವರಂ : ಐಟಿ ನಗರಿ ಬೆಂಗಳೂರಿನ ದಂಪತಿ ಸಮುದ್ರದಲ್ಲಿ ಸತತ 11 ಗಂಟೆಗಳ ಕಾಲ ಈಜುವ ಮೂಲಕ ಶ್ರೀಲಂಕಾದಿಂದ ಭಾರತವನ್ನು ತಲುಪಿ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಡ್ಯಾನಿಶ್ ಅಬ್ದಿ ಹಾಗೂ ವೃಷಾಲಿ ಪ್ರಸಾದೆ ಎಂಬವರೇ ಈ ಅಪರೂಪದ ದಾಖಲೆ ಬರೆದ ಸಾಹಸಿಗರಾಗಿದ್ದು, ಐತಿಹಾಸಿಕ ರಾಮಸೇತು ಮಾರ್ಗದಲ್ಲಿ ಅಕ್ಕಪಕ್ಕದಲ್ಲಿಯೇ ಈಜಿ ಈ ಗುರಿ ತಲುಪಿದ ಮೊದಲ ದಂಪತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
32 ಕಿ.ಮೀ.ಗಳ ಕಠಿಣ ಸಾಗರ ಯಾನ
ಮೇ 7ರಂದು ಮುಂಜಾನೆ ಕಗ್ಗತ್ತಲಿನಲ್ಲಿ, ಅಂದರೆ ಸುಮಾರು 4:30ರ ಸುಮಾರಿಗೆ ಶ್ರೀಲಂಕಾದ ತಲೈಮನ್ನಾರ್ನಿಂದ ತಮ್ಮ ಈಜುವಿಕೆಯನ್ನು ಆರಂಭಿಸಿದ ಈ ಜೋಡಿ, ಪಾಕ್ ಜಲಸಂಧಿಯನ್ನು ಸೀಳಿಕೊಂಡು ಮಧ್ಯಾಹ್ನ 3:15ರ ಸುಮಾರಿಗೆ ತಮಿಳುನಾಡಿನ ಧನುಷ್ಕೋಡಿಯನ್ನು ತಲುಪುವಲ್ಲಿ ಯಶಸ್ವಿಯಾಗಿದೆ. ಬರೋಬ್ಬರಿ 32 ಕಿಲೋಮೀಟರ್ ದೂರದ ಈ ಕಠಿಣ ಜಲಮಾರ್ಗವನ್ನು ಕ್ರಮಿಸಲು ಇವರು 10 ಗಂಟೆ 45 ನಿಮಿಷಗಳ ಕಾಲ ಸತತವಾಗಿ ಈಜಿದ್ದಾರೆ. ಇದು ಭಾರತೀಯ ಓಪನ್-ವಾಟರ್ ಸ್ವಿಮ್ಮಿಂಗ್ ಇತಿಹಾಸದಲ್ಲಿ ಒಂದು ಮೈಲಿಗಲ್ಲಾಗಿ ಗುರುತಿಸಿಕೊಂಡಿದೆ.
ಸವಾಲುಗಳ ಸರಮಾಲೆ
ಈ ಸಾಹಸಮಯ ಯಾನ ಅಷ್ಟು ಸುಲಭದ್ದಾಗಿರಲಿಲ್ಲ. ಕಡಲ ಭಾರೀ ಅಲೆಗಳ ಅಬ್ಬರ, ಕ್ಷಣಕ್ಷಣಕ್ಕೂ ದಿಕ್ಕು ಬದಲಿಸುತ್ತಿದ್ದ ಬಿರುಗಾಳಿ ಹಾಗೂ ಸಮುದ್ರದ ಪ್ರಬಲ ಪ್ರವಾಹಗಳು ಇವರನ್ನು ಪದೇ ಪದೇ ತಮ್ಮ ಪಥದಿಂದ ವಿಚಲಿತಗೊಳಿಸುತ್ತಿದ್ದವು. ಸೂರ್ಯೋದಯಕ್ಕೂ ಮುನ್ನ ನೀರಿಗೆ ಧುಮುಕಲು ಸಿದ್ಧರಾಗುತ್ತಿರುವ ಮತ್ತು ಪ್ರಕ್ಷುಬ್ಧ ಸಮುದ್ರದಲ್ಲಿ ಸವಾಲುಗಳನ್ನು ಮೆಟ್ಟಿ ನಿಂತು ಭಾರತದ ಕರಾವಳಿಯತ್ತ ಮುನ್ನುಗ್ಗುತ್ತಿರುವ ಸಾಹಸದ ವಿಡಿಯೋಗಳನ್ನು ದಂಪತಿ ಹಂಚಿಕೊಂಡಿದ್ದಾರೆ. ಇವರ ಈ ಸಂಪೂರ್ಣ ಕಡಲ ಯಾನವು ಕಟ್ಟುನಿಟ್ಟಿನ ಸುರಕ್ಷತಾ ಮೇಲ್ವಿಚಾರಣೆಯಲ್ಲಿ ನಡೆದಿದ್ದು, ತುರ್ತು ವೈದ್ಯಕೀಯ ಸಿಬ್ಬಂದಿ, ಬೆಂಬಲ ದೋಣಿಗಳು ಮತ್ತು ಭಾರತೀಯ ಕೋಸ್ಟ್ ಗಾರ್ಡ್ ಸಿಬ್ಬಂದಿ ದಾರಿಯುದ್ದಕ್ಕೂ ರಕ್ಷಾಕವಚವಾಗಿ ಇವರ ಜೊತೆಯಲ್ಲಿದ್ದರು.
ಕೇವಲ 4 ವರ್ಷಗಳ ತರಬೇತಿ
ವೃತ್ತಿಯಲ್ಲಿ ಸಾಫ್ಟ್ವೇರ್ ಉದ್ಯೋಗಿಗಳಾಗಿರುವ ಡ್ಯಾನಿಶ್ ಮತ್ತು ವೃಷಾಲಿ, ಕೇವಲ ನಾಲ್ಕು ವರ್ಷಗಳ ಹಿಂದೆಯಷ್ಟೇ ಈಜು ತರಬೇತಿಯನ್ನು ಗಂಭೀರವಾಗಿ ಪರಿಗಣಿಸಿದ್ದರು ಎಂಬುದು ಮತ್ತೊಂದು ವಿಶೇಷ. “ಶ್ರೀಲಂಕಾದಿಂದ ಭಾರತಕ್ಕೆ ಈಜಿ ಇತಿಹಾಸ ನಿರ್ಮಿಸುವ ಈ ದಿನಕ್ಕಾಗಿ ನಾವು ಮಾಡಿದ ಕಠಿಣ ತರಬೇತಿ ಮತ್ತು ಸಿದ್ಧತೆಗಳೆಲ್ಲವೂ ಇಲ್ಲಿ ಪರೀಕ್ಷೆಗೊಳಗಾಗಿವೆ. ಅದಕ್ಕಾಗಿ ನಾವು ಸರ್ವಸನ್ನದ್ಧರಾಗಿದ್ದೆವು” ಎಂದು ದಂಪತಿ ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ. ಕ್ರೀಡಾಪಟುಗಳು ಮತ್ತು ಸಾಹಸಪ್ರಿಯರಿಗೆ ಸ್ಫೂರ್ತಿಯಾಗಲೆಂದು ತಮ್ಮ ಈ ಸಂಪೂರ್ಣ ಪಯಣವನ್ನು ಅವರು ಸಾಮಾಜಿಕ ಜಾಲತಾಣಗಳಲ್ಲಿ ದಾಖಲಿಸಿದ್ದು, ದಂಪತಿಯ ತಾಳ್ಮೆ, ಶಿಸ್ತು ಮತ್ತು ತಂಡದ ಸಮನ್ವಯತೆಯನ್ನು ನೆಟ್ಟಿಗರು ಮುಕ್ತಕಂಠದಿಂದ ಶ್ಲಾಘಿಸುತ್ತಿದ್ದಾರೆ.
ಇದನ್ನೂ ಓದಿ : ‘ಮದ್ಯಮುಕ್ತ’ ತಮಿಳುನಾಡಿನತ್ತ ಸಿಎಂ ವಿಜಯ್ ಹೆಜ್ಜೆ : ಶಾಲೆ-ದೇಗುಲಗಳ ಬಳಿಯ 717 ಮದ್ಯದಂಗಡಿಗಳಿಗೆ ಬೀಗ!
