ವಾಷಿಂಗ್ಟನ್ : ಇರಾನ್ ವಿರುದ್ಧ ಅಮೆರಿಕ ಮತ್ತೊಂದು ಸುತ್ತಿನ ಸೇನಾ ಕಾರ್ಯಾಚರಣೆಗೆ ಸಿದ್ಧತೆ ನಡೆಸುತ್ತಿದೆಯೇ ಎಂಬ ಅನುಮಾನಗಳು ದಟ್ಟವಾಗಿವೆ. ಈ ಊಹಾಪೋಹಗಳಿಗೆ ಪುಷ್ಟಿ ನೀಡುವಂತೆ, ಕೇವಲ 24 ಗಂಟೆಗಳಲ್ಲಿ ಅಮೆರಿಕದಿಂದ 6,500 ಟನ್ಗಳಷ್ಟು ಶಸ್ತ್ರಾಸ್ತ್ರಗಳು ಮತ್ತು ಸೇನಾ ಉಪಕರಣಗಳು ಇಸ್ರೇಲ್ಗೆ ರವಾನೆಯಾಗಿವೆ. ಮತ್ತೊಂದೆಡೆ, ಅಮೆರಿಕದ ಸೆಂಟ್ರಲ್ ಕಮಾಂಡ್ (CENTCOM) ಇರಾನ್ ಮೇಲಿನ ಸಂಭಾವ್ಯ ಮಿಲಿಟರಿ ಕಾರ್ಯಾಚರಣೆಯ ಯೋಜನೆಗಳ ಕುರಿತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ವಿವರವಾದ ಮಾಹಿತಿ ನೀಡಿದ್ದು, ಕದನ ವಿರಾಮದ ಬದಲು ಕಾಳಗ ತೀವ್ರಗೊಳ್ಳುವ ಮುನ್ಸೂಚನೆ ಸಿಕ್ಕಿದೆ.
ಇಸ್ರೇಲ್ಗೆ ಹರಿದುಬರುತ್ತಿದೆ ಶಸ್ತ್ರಾಸ್ತ್ರಗಳ ಮಹಾಪೂರ
ಇಸ್ರೇಲ್ ರಕ್ಷಣಾ ಸಚಿವಾಲಯದ ಮೂಲಗಳನ್ನು ಉಲ್ಲೇಖಿಸಿ ಮಾಧ್ಯಮಗಳು ವರದಿ ಮಾಡಿರುವಂತೆ, ಅಮೆರಿಕದಿಂದ ಎರಡು ಸರಕು ಹಡಗುಗಳು ಹಾಗೂ ಹಲವು ವಿಮಾನಗಳ ಮೂಲಕ ಬರೋಬ್ಬರಿ 6,500 ಟನ್ (65 ಲಕ್ಷ ಕೆ.ಜಿ) ವಾಯು ಮತ್ತು ಭೂಸೇನಾ ಶಸ್ತ್ರಾಸ್ತ್ರಗಳು, ಮಿಲಿಟರಿ ಟ್ರಕ್ಗಳು ಮತ್ತು ಜಂಟಿ ಲಘು ಯುದ್ಧ ವಾಹನಗಳು (JLTV) ಈ ವಾರ ಇಸ್ರೇಲ್ ತಲುಪಿವೆ. ಇಸ್ರೇಲ್ನ ರಕ್ಷಣಾ ಖರೀದಿ ನಿರ್ದೇಶನಾಲಯವು ಅಮೆರಿಕದ ಈ ಕಾರ್ಯಾಚರಣೆಯನ್ನು ಸಮನ್ವಯಗೊಳಿಸಿದೆ. ‘ಆಪರೇಷನ್ ರೋರಿಂಗ್ ಲಯನ್’ (Operation Roaring Lion) ಕಾರ್ಯಾಚರಣೆ ಆರಂಭವಾದಾಗಿನಿಂದ ಇಲ್ಲಿಯವರೆಗೆ ಇಸ್ರೇಲ್, ಅಮೆರಿಕದಿಂದ ಬರೋಬ್ಬರಿ 1,15,600 ಟನ್ಗಳಷ್ಟು ಸೇನಾ ಸಾಮಗ್ರಿಗಳನ್ನು 403 ಏರ್ಲಿಫ್ಟ್ ಮತ್ತು 10 ಸಮುದ್ರ ಮಾರ್ಗದ ಮೂಲಕ ಸ್ವೀಕರಿಸಿದೆ.
ಟ್ರಂಪ್ ಮುಂದಿವೆ 3 ಆಯ್ಕೆಗಳು
ಇರಾನ್ ಬಂದರುಗಳ ಮೇಲೆ ನೌಕಾ ದಿಗ್ಬಂಧನ ಹೇರಿರುವ ಅಮೆರಿಕದ ಸೆಂಟ್ಕಾಮ್ ಅಧಿಕಾರಿಗಳು, ಜಾಯಿಂಟ್ ಚೀಫ್ಸ್ ಆಫ್ ಸ್ಟಾಫ್ ಅಧ್ಯಕ್ಷ ಜನರಲ್ ಡ್ಯಾನ್ ಕೇನ್ ಅವರ ಸಮ್ಮುಖದಲ್ಲಿ ಅಧ್ಯಕ್ಷ ಟ್ರಂಪ್ ಅವರಿಗೆ 45 ನಿಮಿಷಗಳ ಕಾಲ ಮೂರು ಪ್ರಮುಖ ಸೇನಾ ಆಯ್ಕೆಗಳ ಕುರಿತು ವಿವರಿಸಿದ್ದಾರೆ. ಮೊದಲನೆಯದಾಗಿ, ಇರಾನ್ನ ಮೂಲಸೌಕರ್ಯಗಳ ಮೇಲೆ ಅಲ್ಪಾವಧಿಯ ಆದರೆ ಪ್ರಬಲವಾದ ದಾಳಿ ನಡೆಸಿ, ಟೆಹ್ರಾನ್ ಆಡಳಿತವನ್ನು ಮಾತುಕತೆಗೆ ಬರುವಂತೆ ಮಾಡುವುದು. ಅಮೆರಿಕದ ಬಾಂಬ್ ದಾಳಿಯ ಭೀತಿಯಿಂದ ಇರಾನ್ ಪರಮಾಣು ವಿಚಾರದಲ್ಲಿ ಮೃದು ಧೋರಣೆ ತಾಳಬಹುದು ಎಂಬುದು ಲೆಕ್ಕಾಚಾರವಾಗಿದೆ.
ಎರಡನೆಯ ಯೋಜನೆಯು ವಾಣಿಜ್ಯ ಹಡಗುಗಳ ಸಂಚಾರಕ್ಕಾಗಿ ಹೊರ್ಮುಜ್ ಜಲಸಂಧಿಯ ಒಂದು ಭಾಗವನ್ನು ವಶಪಡಿಸಿಕೊಳ್ಳುವುದಾಗಿದೆ. ಈ ಕಾರ್ಯಾಚರಣೆಗಾಗಿ ಭೂಸೇನೆಯನ್ನು ಬಳಸುವ ಸಾಧ್ಯತೆಯೂ ಇದೆ. ಮೂರನೆಯ ಆಯ್ಕೆಯಾಗಿ, ಇರಾನ್ನ ಪರಮಾಣು ಬೆದರಿಕೆಯನ್ನು ಹತ್ತಿಕ್ಕಲು, ಅಲ್ಲಿನ ಹೆಚ್ಚು ಪುಷ್ಟೀಕರಿಸಿದ ಯುರೇನಿಯಂ ಸಂಗ್ರಹವನ್ನು ವಶಪಡಿಸಿಕೊಳ್ಳಲು ವಿಶೇಷ ಪಡೆಗಳ ಕಾರ್ಯಾಚರಣೆ ನಡೆಸುವ ಬಗ್ಗೆಯೂ ಚರ್ಚಿಸಲಾಗಿದೆ. ಕಳೆದ 60 ದಿನಗಳಿಂದ ನಡೆಯುತ್ತಿರುವ ಈ ಯುದ್ಧಕ್ಕೆ ಇರಾನ್ನ ಪರಮಾಣು ಕಾರ್ಯಕ್ರಮವೇ ಪ್ರಮುಖ ಕಾರಣ ಎಂದು ಟ್ರಂಪ್ ಈ ಹಿಂದೆಯೇ ಸಮರ್ಥಿಸಿಕೊಂಡಿದ್ದರು.
ಅಮೆರಿಕದ ಮೇಲೆ ನಂಬಿಕೆ ಕಳೆದುಕೊಂಡ ಇರಾನ್
ಈ ಎಲ್ಲಾ ಯುದ್ಧೋನ್ಮಾದದ ಬೆಳವಣಿಗೆಗಳ ನಡುವೆ ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯನ್ ಅವರು ಅಮೆರಿಕದ ಕುತಂತ್ರದ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಬೆಲಾರಸ್ ಅಧ್ಯಕ್ಷ ಅಲೆಕ್ಸಾಂಡರ್ ಲುಕಾಶ್ಶೆಂಕೊ ಅವರೊಂದಿಗೆ ದೂರವಾಣಿಯಲ್ಲಿ ಮಾತನಾಡಿದ ಅವರು ವಾಷಿಂಗ್ಟನ್ ಮೇಲಿನ ಭರವಸೆ ಸಂಪೂರ್ಣ ನಾಶವಾಗಿದೆ ಎಂದಿದ್ದಾರೆ. ಮಾತುಕತೆ ಮತ್ತು ರಾಜತಾಂತ್ರಿಕತೆಯ ಮೂಲಕ ಭಿನ್ನಾಭಿಪ್ರಾಯಗಳನ್ನು ಬಗೆಹರಿಸಿಕೊಳ್ಳಲು ಇರಾನ್ ಸದಾ ಸಿದ್ಧವಿದೆ. ಆದರೆ, ಶಾಂತಿ ಮಾತುಕತೆಗಳು ನಡೆಯುತ್ತಿರುವಾಗಲೇ ಅಮೆರಿಕ ಮತ್ತು ಇಸ್ರೇಲ್ ಎರಡು ಬಾರಿ ಇರಾನ್ ಮೇಲೆ ದಾಳಿ ನಡೆಸಿವೆ. ಭವಿಷ್ಯದಲ್ಲಿಯೂ ಇಂತಹ ಬೆನ್ನಿಗೆ ಚೂರಿ ಹಾಕುವ ಕೆಲಸಗಳು ಮರುಕಳಿಸುವ ಸಾಧ್ಯತೆಗಳಿರುವುದರಿಂದ ಅಮೆರಿಕವನ್ನು ನಂಬಲು ಸಾಧ್ಯವೇ ಇಲ್ಲ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ : ಬೆಂಗಳೂರಿನಲ್ಲಿ ಜ್ಯುವೆಲ್ಲರಿ ಶಾಪ್ಗೆ ಕನ್ನ.. ಗೋಡೆ ಕೊರೆದು 70 ಕೆಜಿ ಬೆಳ್ಳಿ ಕದ್ದೊಯ್ದ ಖದೀಮರು!
