ಪ್ಯಾಂಗ್ಯಾಂಗ್ : ಉತ್ತರ ಕೊರಿಯಾದಂತಹ ಕಟ್ಟರ್ ಸರ್ವಾಧಿಕಾರಿ ರಾಷ್ಟ್ರದಿಂದ ತಪ್ಪಿಸಿಕೊಳ್ಳುವುದು ಎಂದರೆ ಸಾವಿನ ದವಡೆಯಿಂದ ಪಾರಾದಂತೆಯೇ ಸರಿ. ಪಕ್ಕದ ಊರಿಗೆ ಹೋಗಲೂ ಸರ್ಕಾರದ ಅನುಮತಿ ಬೇಕಿರುವ, ಪ್ರತಿಯೊಂದು ಹೆಜ್ಜೆಗೂ ಕಣ್ಗಾವಲು ಇರುವ ದೇಶದಲ್ಲಿ 9 ಜನರ ಕುಟುಂಬವೊಂದು ಸತತ 10 ವರ್ಷಗಳ ಕಾಲ ರಹಸ್ಯವಾಗಿ ಯೋಜನೆ ರೂಪಿಸಿ, ಕೇವಲ ಎರಡೇ ಗಂಟೆಗಳಲ್ಲಿ ಸಮುದ್ರ ಮಾರ್ಗವಾಗಿ ದಕ್ಷಿಣ ಕೊರಿಯಾಗೆ ಯಶಸ್ವಿಯಾಗಿ ಪರಾರಿಯಾಗಿದೆ. ನಂಬಲು ಅಸಾಧ್ಯವೆನಿಸಿದರೂ, ಇದು ಹಾಲಿವುಡ್ ಸಿನಿಮಾಗಳನ್ನೂ ಮೀರಿಸುವಂತಹ ನೈಜ ಹಾಗೂ ರೋಚಕ ಕಥೆಯಾಗಿದೆ.
ದಶಕಗಳ ತಯಾರಿ
ಉತ್ತರ ಕೊರಿಯಾದಲ್ಲಿ ಯಾವುದೇ ಭವಿಷ್ಯವಿಲ್ಲ ಎಂಬುದನ್ನು ಅರಿತ ತಂದೆಯೊಬ್ಬ, ತನ್ನ ಮಕ್ಕಳಿಗೆ ಹೊರಗಿನ ಸ್ವತಂತ್ರ ಪ್ರಪಂಚವನ್ನು ತೋರಿಸಲು ನಿಶ್ಚಯಿಸಿದ್ದ. ಭೂಮಾರ್ಗ ಅಥವಾ ಚೀನಾ ಗಡಿಯ ಮೂಲಕ ತಪ್ಪಿಸಿಕೊಳ್ಳುವುದು ಅಸಾಧ್ಯ ಹಾಗೂ ಅಪಾಯಕಾರಿ ಎಂದು ತಿಳಿದ ಅವರು ಸಮುದ್ರ ಮಾರ್ಗವನ್ನು ಆಯ್ಕೆ ಮಾಡಿಕೊಂಡರು. ಮೀನುಗಾರಿಕೆಯ ಗಂಧಗಾಳಿಯೇ ಗೊತ್ತಿಲ್ಲದಿದ್ದರೂ, ಕಿರಿಯ ಮಗ ಕಿಮ್ ಯಿ-ಹ್ಯೋಕ್ನನ್ನು ಕರಾವಳಿ ಪ್ರದೇಶಕ್ಕೆ ಕಳುಹಿಸಲಾಯಿತು. ಆತ ಸತತ ಹತ್ತು ವರ್ಷಗಳ ಕಾಲ ಮೀನುಗಾರಿಕೆ, ದೋಣಿ ದುರಸ್ತಿ, ಸಮುದ್ರದ ಅಲೆಗಳು ಹಾಗೂ ಹವಾಮಾನದ ಬಗ್ಗೆ ಅಧ್ಯಯನ ನಡೆಸಿದ.
ಅಷ್ಟೇ ಅಲ್ಲದೆ, ಗಸ್ತು ತಿರುಗುವ ಭದ್ರತಾ ಪಡೆಗಳ ಕಣ್ತಪ್ಪಿಸುವ ಕಲೆ ಕರಗತ ಮಾಡಿಕೊಂಡ. ಭದ್ರತಾ ಸಿಬ್ಬಂದಿಗೆ ಲಂಚ ನೀಡಿ, ಮೀನುಗಾರಿಕೆ ನೆಪದಲ್ಲಿ ನಿರಂತರವಾಗಿ ಸಮುದ್ರದಲ್ಲಿ ಓಡಾಡುತ್ತಾ, ಅಧಿಕಾರಿಗಳ ದೃಷ್ಟಿಯಲ್ಲಿ ತಾನೊಬ್ಬ ಸಾಮಾನ್ಯ ಮೀನುಗಾರ ಎಂಬ ನಂಬಿಕೆ ಹುಟ್ಟಿಸುವಲ್ಲಿ ಆತ ಯಶಸ್ವಿಯಾದ. ಗಸ್ತು ಪಡೆಗಳು ಹಗಲಿನಲ್ಲಿ ಹೆಚ್ಚು ಚುರುಕಾಗಿರುತ್ತಾರೆ ಮತ್ತು ರಾತ್ರಿ ವೇಳೆ ಅವರ ಕಣ್ಗಾವಲು ಕಡಿಮೆ ಇರುತ್ತದೆ ಎಂಬುದನ್ನೂ ಆತ ಅರಿತುಕೊಂಡಿದ್ದ.
ಕಳ್ಳಸಾಗಣೆ ಟಿವಿ ತಂದ ಪ್ರೇರಣೆ, ಪಲಾಯನದ ನಿರ್ಧಾರ
ಇತ್ತ ಕುಟುಂಬದ ಇತರ ಸದಸ್ಯರು ಒಳನಾಡಿನಲ್ಲಿಯೇ ಉಳಿದುಕೊಂಡಿದ್ದರು. ಕಿಮ್ ಕುಟುಂಬವು ಆರ್ಥಿಕವಾಗಿ ಕೊಂಚ ಸುಸ್ಥಿತಿಯಲ್ಲಿತ್ತು. ಸರ್ಕಾರದ ಅಧಿಕೃತ ಟಿವಿಯ ಜೊತೆಗೆ, ಚೀನಾದಿಂದ ಕಳ್ಳಸಾಗಣೆ ಮೂಲಕ ತಂದಿದ್ದ ಸಣ್ಣ ಟಿವಿಯೊಂದು ಅವರ ಮನೆಯಲ್ಲಿತ್ತು. ಆ ಟಿವಿಯಲ್ಲಿ ದಕ್ಷಿಣ ಕೊರಿಯಾದ ಕಾರ್ಯಕ್ರಮಗಳನ್ನು ಕದ್ದುಮುಚ್ಚಿ ನೋಡುತ್ತಿದ್ದ ಕುಟುಂಬಕ್ಕೆ, ಅಲ್ಲಿನ ಸ್ವಾತಂತ್ರ್ಯ, ಸೌಕರ್ಯಗಳು ಮತ್ತು ಉತ್ತಮ ಜೀವನಶೈಲಿ ಮತ್ತಷ್ಟು ಪ್ರೇರಣೆ ನೀಡಿತು. ಮೇ 2023ರ ಸುಮಾರಿಗೆ, ಕಿಮ್ ಇಲ್-ಹ್ಯೋಕ್ ಅವರ ಪತ್ನಿ ಗರ್ಭಿಣಿಯಾಗಿದ್ದಳು. ಹುಟ್ಟುವ ಮಗುವಿಗೂ ಈ ನರಕ ಬೇಡ, ಇನ್ನಷ್ಟು ಕಾಯುವುದು ಸೂಕ್ತವಲ್ಲ ಎಂದು ನಿರ್ಧರಿಸಿದ ಕುಟುಂಬ, ತಕ್ಷಣವೇ ಪಲಾಯನ ಮಾಡುವ ಅಂತಿಮ ನಿರ್ಧಾರಕ್ಕೆ ಬಂದಿತು.
ಕತ್ತಲ ರಾತ್ರಿಯಲ್ಲಿ ಶುರುವಾದ ಆ 2 ಗಂಟೆಗಳ ರೋಚಕ ಪಯಣ
ಭಾರಿ ಮಳೆ ಸುರಿಯುತ್ತಿದ್ದ ಕತ್ತಲ ರಾತ್ರಿಯನ್ನು ಅವರು ತಮ್ಮ ಎಸ್ಕೇಪ್ ಯೋಜನೆಗೆ ಆಯ್ಕೆ ಮಾಡಿಕೊಂಡರು. ಹವಾಮಾನ ವೈಪರೀತ್ಯದಿಂದಾಗಿ ಆ ರಾತ್ರಿ ರೇಡಾರ್ಗಳು ಸಮರ್ಪಕವಾಗಿ ಕಾರ್ಯನಿರ್ವಹಿಸುತ್ತಿರಲಿಲ್ಲ. ಇದೇ ಸಮಯ ಸಾಧಿಸಿ, ಗಾರ್ಡ್ಗಳಿಗೆ ಲಂಚ ನೀಡಿ ಮೀನುಗಾರಿಕೆಯ ನೆಪದಲ್ಲಿ ದೋಣಿ ಏರಿದರು. ಕರಾವಳಿಯ ರಹಸ್ಯ ಸ್ಥಳವೊಂದರಲ್ಲಿ ಮೊದಲೇ ಕಾದುಕುಳಿತಿದ್ದ ಕುಟುಂಬದ ಮಹಿಳೆಯರು, ಗರ್ಭಿಣಿ ಪತ್ನಿ ಕೂಡ ದೋಣಿ ಸೇರಿದರು. ಪ್ರಯಾಣದ ವೇಳೆ ಶಬ್ದ ಮಾಡದಿರಲಿ ಎಂದು 4 ಮತ್ತು 6 ವರ್ಷದ ಇಬ್ಬರು ಪುಟ್ಟ ಮಕ್ಕಳನ್ನು ಗೋಣಿಚೀಲದೊಳಗೆ ಬಚ್ಚಿಡಲಾಗಿತ್ತು.
ಸುಮಾರು ಎರಡು ಗಂಟೆಗಳ ಕಾಲ ಕತ್ತಲಲ್ಲೇ ದೋಣಿ ಚಲಾಯಿಸಿದರು. ಸಿಕ್ಕಿಬಿದ್ದರೆ ಜೈಲು ಅಥವಾ ಸಾವು ನಿಶ್ಚಿತವಾಗಿತ್ತು. ದೋಣಿಯ ಎಂಜಿನ್ ಶಬ್ದಕ್ಕಿಂತಲೂ ಜೋರಾಗಿ ನಮ್ಮ ಹೃದಯ ಬಡಿದುಕೊಳ್ಳುತ್ತಿತ್ತು ಎಂದು ಕಿಮ್ ಇಲ್-ಹ್ಯೋಕ್ ಆ ಕ್ಷಣವನ್ನು ಸ್ಮರಿಸಿದ್ದಾರೆ. ಯಶಸ್ವಿಯಾಗಿ ಉತ್ತರ ಮಿತಿ ರೇಖೆಯನ್ನು (NLL – ಉಭಯ ದೇಶಗಳ ನಡುವಿನ ಕಡಲ ಗಡಿ) ದಾಟಿದ ಅವರು, ಅಂತಿಮವಾಗಿ ದಕ್ಷಿಣ ಕೊರಿಯಾದ ಯೆನ್ಪಿಯಾಂಗ್ ದ್ವೀಪವನ್ನು ತಲುಪಿದರು. ಅಲ್ಲಿ ದಕ್ಷಿಣ ಕೊರಿಯಾದ ನೌಕಾಪಡೆಗೆ ಸಿಗ್ನಲ್ ನೀಡಿ, ತಾವು ಆಶ್ರಯ ಅರಸಿ ಬಂದಿರುವುದಾಗಿ ತಿಳಿಸಿದರು. ಅಧಿಕಾರಿಗಳು ಅವರನ್ನು ರಕ್ಷಿಸುವ ಮೂಲಕ ಅವರ ದಶಕದ ಕನಸು ನನಸಾಯಿತು. ಅಸಾಧ್ಯವಾದ ಕಟ್ಟುಪಾಡುಗಳ ನಡುವೆಯೂ, ಕಣ್ಮರೆಯಾಗುವ ಕಲೆಯನ್ನು ಕರಗತ ಮಾಡಿಕೊಂಡು ಸ್ವಾತಂತ್ರ್ಯದ ಉಸಿರೆಳೆದ ಈ ಕುಟುಂಬದ ಕಥೆ ಇದೀಗ ಜಗತ್ತಿನೆಲ್ಲೆಡೆ ಅಚ್ಚರಿ ಮೂಡಿಸಿದೆ. ಈ ನೈಜ ಕಥೆ ಮುಂದೊಂದು ದಿನ ಸಿನಿಮಾದ ರೂಪ ಪಡೆದರೂ ಅಚ್ಚರಿಯಿಲ್ಲ.
ಇದನ್ನೂ ಓದಿ : ವಿದೇಶಿ ಮಹಿಳೆ ಮೇಲೆ ಲೈಂಗಿಕ ದೌರ್ಜನ್ಯ – ಕೊಡಗಿನ ಖಾಸಗಿ ಹೋಂಸ್ಟೇ ಪರವಾನಗಿ ರದ್ದು!
