ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ ಬಿಐ) ಇತ್ತೀಚೆಗೆ ರೆಪೋ ದರವನ್ನು ಹೆಚ್ಚಿಸಿದ್ದರೂ, ದೇಶದ ಪ್ರಮುಖ ಬ್ಯಾಂಕುಗಳು ಸದ್ಯಕ್ಕೆ ಸ್ಥಿರ ಠೇವಣಿ (Fixed Deposit – FD) ಬಡ್ಡಿದರಗಳನ್ನು ತಕ್ಷಣವೇ ಏರಿಕೆ ಮಾಡದೆ ಕಾಯ್ದುಕೊಳ್ಳುವ ಸಾಧ್ಯತೆಯಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಇದು ಬ್ಯಾಂಕಿಂಗ್ ಗ್ರಾಹಕರು ಮತ್ತು ಹೂಡಿಕೆದಾರರ ಮೇಲೆ ಪ್ರಮುಖ ಪರಿಣಾಮ ಬೀರಲಿದೆ. ಆದಾಗ್ಯೂ, ಬ್ಯಾಂಕುಗಳು ಎಫ್.ಡಿ ಮೇಲಿನ ಬಡ್ಡಿದರವನ್ನು ಏರಿಕೆ ಮಾಡಿದರೆ, ಹೂಡಿಕೆದಾರರಿಗೆ ಭಾರಿ ಅನುಕೂಲವಾಗಲಿದೆ.
ಸಾಮಾನ್ಯವಾಗಿ ಆರ್ಬಿಐ ರೆಪೋ ದರವನ್ನು ಹೆಚ್ಚಿಸಿದಾಗ, ಬ್ಯಾಂಕುಗಳು ಸಾಲದ ಬಡ್ಡಿದರಗಳನ್ನು (Home Loan / Car Loan) ತಕ್ಷಣವೇ ಹೆಚ್ಚಿಸುತ್ತವೆ. ಆದರೆ, ಠೇವಣಿ ಮೇಲಿನ ಬಡ್ಡಿದರಗಳನ್ನು ಹೆಚ್ಚಿಸಲು ಬ್ಯಾಂಕುಗಳು ತಕ್ಷಣ ಮುಂದಾಗುವುದಿಲ್ಲ. ಬ್ಯಾಂಕುಗಳಲ್ಲಿ ಈಗಾಗಲೇ ಸಾಕಷ್ಟು ಹಣದ ಹರಿವು (Liquidity) ಇರುವುದರಿಂದ ಮತ್ತು ಹಿಂದಿನ ದರ ಏರಿಕೆಗಳ ಲಾಭವನ್ನು ಗ್ರಾಹಕರಿಗೆ ತಲುಪಿಸಿರುವುದರಿಂದ, ಪ್ರಸ್ತುತ ಎಫ್.ಡಿ ದರಗಳನ್ನು ಯಥಾಸ್ಥಿತಿಯಲ್ಲಿಡುವ ಸಾಧ್ಯತೆಯಿದೆ.
ಹೂಡಿಕೆದಾರರು ಏನು ಮಾಡಬೇಕು?
ಪ್ರಸ್ತುತ ಬ್ಯಾಂಕುಗಳು ನೀಡುತ್ತಿರುವ ಶೇ.7.ರಿಂದ ಶೇ.7.75ರವರೆಗಿನ ಬಡ್ಡಿದರಗಳಲ್ಲೇ ಹೂಡಿಕೆ ಮಾಡಲು ಇದು ಉತ್ತಮ ಸಮಯ. ದರಗಳು ಮತ್ತಷ್ಟು ಹೆಚ್ಚಾಗುವವರೆಗೆ ಕಾಯುವ ಬದಲು ಮಧ್ಯಮ ಅವಧಿಯ ಎಫ್.ಡಿಗಳನ್ನು ಆಯ್ಕೆ ಮಾಡಬಹುದು. ಆದಾಗ್ಯೂ, ಸ್ವಲ್ಪ ಸಮಯದ ಬಳಿಕವಾದರೂ ಬ್ಯಾಂಕುಗಳು ಎಫ್.ಡಿ ಬಡ್ಡಿದರವನ್ನು ಏರಿಕೆ ಮಾಡುವ ಸಾಧ್ಯತೆಗಳು ಜಾಸ್ತಿ ಇರುತ್ತವೆ. ಇದರಿಂದಾಗಿ ಮುಂಬರುವ ದಿನಗಳಲ್ಲಿ ಎಫ್.ಡಿಗೆ ಒಳ್ಳೆಯ ರಿಟರ್ನ್ಸ್ ದೊರೆಯಲಿದೆ ಎಂದು ಹೇಳಲಾಗುತ್ತಿದೆ.
ಹಳೆಯ ಕಡಿಮೆ ಬಡ್ಡಿದರದ ಎಫ್.ಡಿಗಳನ್ನು ಹೊಂದಿರುವವರು, ತಕ್ಷಣವೇ ಅದನ್ನು ನವೀಕರಿಸುವ ಮುನ್ನ ಬ್ಯಾಂಕುಗಳು ನೀಡುವ ಅತ್ಯುತ್ತಮ ಆಫರ್ ಗಳನ್ನು ಗಮನಿಸಬೇಕು. ರಿಸರ್ವ್ ಬ್ಯಾಂಕ್ ನಿರ್ಧಾರದ ನಂತರ ಸಾಲಗಾರರ ಕಂತುಗಳು ತಕ್ಷಣ ಹೆಚ್ಚಾಗಲಿದೆಯಾದರೂ, ಎಫ್.ಡಿ ಹೂಡಿಕೆದಾರರಿಗೆ ಹೆಚ್ಚಿನ ಬಡ್ಡಿ ಸಿಗಲು ಇನ್ನೂ ಕೆಲ ದಿನಗಳು ಕಾಯಬೇಕಾಗಬಹುದು. ತಜ್ಞರ ಪ್ರಕಾರ, ಮುಂಬರುವ ದಿನಗಳಲ್ಲಿ ಬ್ಯಾಂಕುಗಳ ನಡುವಿನ ಠೇವಣಿ ಸಂಗ್ರಹಣೆಯ ಸ್ಪರ್ಧೆಯನ್ನು ಆಧರಿಸಿ ಎಫ್.ಡಿ ದರಗಳಲ್ಲಿ ಸಣ್ಣ ಮಟ್ಟದ ಬದಲಾವಣೆಗಳನ್ನು ನಿರೀಕ್ಷಿಸಬಹುದು.
ಇದನ್ನೂ ಓದಿ :ಜನಿಸಿದ 28 ದಿನಗಳಲ್ಲೇ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿದ ಮಗು: ಹೇಗೆ ಅಂತೀರಾ?
