ಕೊಹ್ಲಿ ಲೈಕ್ ವಿವಾದ : ಮೌನ ಮುರಿದ ಜರ್ಮನ್ ಇನ್‌ಫ್ಲುಯೆನ್ಸರ್ – ವೈರಲ್ ಪೋಸ್ಟ್ ಬಗ್ಗೆ ಹೇಳಿದ್ದೇನು?

ನವದೆಹಲಿ : ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ ಅವರು ಜರ್ಮನ್ ಮೂಲದ ಮಾಡೆಲ್ ಮತ್ತು ಇನ್‌ಫ್ಲುಯೆನ್ಸರ್ ಲಿಜ್‌ಲಾಜ್ (LizLaz) ಅವರ ಇನ್‌ಸ್ಟಾಗ್ರಾಮ್ ಪೋಸ್ಟ್‌ಗೆ ಲೈಕ್ ಮಾಡಿದ್ದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನ ಸೃಷ್ಟಿಸಿತ್ತು. 2026ರ ಜನವರಿ 30ರಂದು ಲಿಜ್‌ಲಾಜ್ ಪೋಸ್ಟ್ ಮಾಡಿದ್ದ ಹಳೆಯ ಫೋಟೋವೊಂದಕ್ಕೆ ಕೊಹ್ಲಿ ಲೈಕ್ ಮಾಡಿದ್ದರು. ಆನಂತರ ಅವರು ಅದನ್ನು ಅನ್‌ಲೈಕ್ (Unlike) ಮಾಡಿದ್ದರಾದರೂ, ಅಷ್ಟರಲ್ಲಾಗಲೇ ಸ್ಕ್ರೀನ್‌ಶಾಟ್‌ಗಳು ವೈರಲ್ ಆಗಿದ್ದವು. ಇದೀಗ ಈ ಇಡೀ ಪ್ರಹಸನದ ಬಗ್ಗೆ ಸ್ವತಃ ಲಿಜ್‌ಲಾಜ್ ಮೌನ ಮುರಿದು ಮಾತನಾಡಿದ್ದಾರೆ.

“ನನಗೆ ಕೊಹ್ಲಿ ಬಗ್ಗೆ ಬೇಸರವಿದೆ”

ಈ ಘಟನೆಯ ಕುರಿತು ಹಿಂದೂಸ್ತಾನ್ ಟೈಮ್ಸ್ ಜೊತೆ ಮಾತನಾಡಿರುವ ಲಿಜ್‌ಲಾಜ್, “ಬೆಳಗ್ಗೆ ಎದ್ದು ನೋಡುವಷ್ಟರಲ್ಲಿ ನಾನು ಎಲ್ಲಾ ಸುದ್ದಿವಾಹಿನಿಗಳಲ್ಲೂ ಇದ್ದೆ. ಇದೊಂದು ಹುಚ್ಚು ಅನುಭವವಾಗಿತ್ತು” ಎಂದು ಹೇಳಿದ್ದಾರೆ. ಕೊಹ್ಲಿ ತಮ್ಮ ಫೋಟೋವನ್ನು ಲೈಕ್ ಮಾಡಿ, ಬಳಿಕ ಅನ್‌ಲೈಕ್ ಮಾಡಿರುವ ಬಗ್ಗೆ ಪ್ರತಿಕ್ರಿಯಿಸಿದ ಅವರು, “ಇದರಿಂದ ನನ್ನ ಅಭಿಮಾನವೇನೂ ಕಡಿಮೆಯಾಗಿಲ್ಲ. ಬದಲಾಗಿ, ನನಗೆ ಕೊಹ್ಲಿ ಅವರ ಬಗ್ಗೆಯೇ ಸ್ವಲ್ಪ ಬೇಸರವಿದೆ. ಅವರು ನನ್ನ ಫೋಟೋ ಲೈಕ್ ಮಾಡಿದ್ದು ನೋಡಿ ನನಗೆ ತುಂಬ ಖುಷಿಯಾಗಿತ್ತು. ಆದರೆ ಅವರು ಅದನ್ನು ವಾಪಸ್ ತೆಗೆದುಕೊಂಡಾಗ ಅವರ ಬಗ್ಗೆ ಬೇಸರವಾಯಿತು. ಏಕೆಂದರೆ, ಇದಿಷ್ಟೊಂದು ದೊಡ್ಡ ಸುದ್ದಿಯಾಗಿದ್ದು ಹೇಗೆ ಎಂಬುದೇ ನನಗೆ ಗೊತ್ತಿಲ್ಲ. ಜನರು ಇದನ್ನು ಹೇಗೆ ಗಮನಿಸಿದರು? ಇದನ್ನು ಸುದ್ದಿಯನ್ನಾಗಿ ಮಾಡಿದ್ದೇಕೆ? ಖಂಡಿತವಾಗಿಯೂ ಕೊಹ್ಲಿಯವರ ಉದ್ದೇಶ ಅದಾಗಿರಲಿಲ್ಲ. ಆದರೂ ಅವರ ಬೆಂಬಲಕ್ಕೆ ನಾನು ಕೃತಜ್ಞಳಾಗಿದ್ದೇನೆ” ಎಂದು ಲಿಜ್‌ಲಾಜ್ ಹೇಳಿದ್ದಾರೆ.

ನಾನು ಆರ್‌ಸಿಬಿ ಹಾಗೂ ಕೊಹ್ಲಿ ಅಭಿಮಾನಿ!

ಇದೇ ವೇಳೆ ತಮ್ಮ ಹಳೆಯ ಸಂದರ್ಶನವೊಂದನ್ನು ನೆನಪಿಸಿಕೊಂಡಿರುವ ಲಿಜ್‌ಲಾಜ್, ತಾನೊಬ್ಬ ವಿರಾಟ್ ಕೊಹ್ಲಿ ಅಭಿಮಾನಿ ಎಂಬುದನ್ನು ಬಾಯಿಬಿಟ್ಟಿದ್ದಾರೆ. “ನನ್ನ ಆಪ್ತ ಸ್ನೇಹಿತೆಯೊಬ್ಬಳು ಬೆಂಗಳೂರಿನವಳು. ಕೇವಲ ಎರಡು ವಾರಗಳ ಮಟ್ಟಿಗೆ ಅವಳನ್ನು ಭೇಟಿಯಾಗಲು ನಾನು ಭಾರತಕ್ಕೆ ಬಂದಿದ್ದೆ. ಆದರೆ ಇಲ್ಲಿನ ವಾತಾವರಣ ನನಗೆ ತುಂಬ ಇಷ್ಟವಾಗಿ, ಅನೇಕ ತಿಂಗಳುಗಳ ಕಾಲ ಇಲ್ಲೇ ಉಳಿದುಕೊಂಡೆ” ಎಂದು ಅವರು ವಿವರಿಸಿದ್ದಾರೆ.

“ಕಳೆದ ವರ್ಷ ಐಪಿಎಲ್ ನಡೆಯುತ್ತಿದ್ದಾಗ ನಾನು ನನ್ನ ಬೆಂಗಳೂರು ಸ್ನೇಹಿತರ ಜೊತೆ ಪಂದ್ಯಗಳನ್ನು ನೋಡಲು ಆರಂಭಿಸಿದೆ. ಆ ಕ್ರೇಜ್ ನನಗೂ ಅಂಟಿಕೊಂಡಿತು. ನಾನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡದ ಅಭಿಮಾನಿಯಾದೆ. ಆರ್‌ಸಿಬಿಯನ್ನು ಬೆಂಬಲಿಸುತ್ತಿದ್ದೀರಿ ಎಂದರೆ, ಸಹಜವಾಗಿಯೇ ಅಲ್ಲಿ ನೋಡಲು ಸಿಗುವ ಅತ್ಯಂತ ರೋಮಾಂಚಕಾರಿ ಆಟಗಾರ ವಿರಾಟ್ ಕೊಹ್ಲಿ. ಅವರು ಅದ್ಭುತವಾಗಿ ಆಡುತ್ತಾರೆ. ಹೀಗಾಗಿ ಅವರು ನನ್ನ ಫೋಟೋಗೆ ಲೈಕ್ ಮಾಡಿದ್ದು ನನಗೆ ಖುಷಿ ಕೊಟ್ಟಿತ್ತು” ಎಂದು ಲಿಜ್‌ಲಾಜ್ ತಮ್ಮ ಐಪಿಎಲ್ ನಂಟನ್ನು ಬಿಚ್ಚಿಟ್ಟಿದ್ದಾರೆ.

ಮತ್ತೆ ನೆನಪಾದ ‘ಅಲ್ಗಾರಿದಮ್’ ಜೋಕ್

ಕೊಹ್ಲಿ ಅವರು ಲಿಜ್‌ಲಾಜ್ ಪೋಸ್ಟ್‌ಗೆ ಲೈಕ್ ಮಾಡಿದ ವಿಚಾರ ಬಹಿರಂಗವಾಗುತ್ತಿದ್ದಂತೆ, ನೆಟ್ಟಿಗರು 2025ರ ಘಟನೆಯನ್ನು ನೆನಪಿಸಿಕೊಂಡು ಮೀಮ್ಸ್ ಹರಿಬಿಡುತ್ತಿದ್ದಾರೆ. ಕಳೆದ ವರ್ಷ ನಟಿ ಅವನೀತ್ ಕೌರ್ ಅವರ ಫೋಟೋಗೆ ಲೈಕ್ ಮಾಡಿದ್ದ ಕೊಹ್ಲಿ, “ನನ್ನ ಇನ್‌ಸ್ಟಾಗ್ರಾಮ್ ಫೀಡ್ ಕ್ಲಿಯರ್ ಮಾಡುವಾಗ ಅಲ್ಗಾರಿದಮ್ (Algorithm) ತಪ್ಪಾಗಿ ಲೈಕ್ ರಿಜಿಸ್ಟರ್ ಮಾಡಿರಬಹುದು” ಎಂದು ಇನ್‌ಸ್ಟಾಗ್ರಾಮ್ ಸ್ಟೋರಿ ಮೂಲಕ ಸ್ಪಷ್ಟನೆ ನೀಡಿದ್ದರು. ಇದೀಗ ಮತ್ತೆ ಅದೇ ರೀತಿ ಆಗಿರುವುದರಿಂದ “ಈ ಅಲ್ಗಾರಿದಮ್‌ಗೆ ಏನಾದರೂ ಮಾಡಲೇಬೇಕು” ಎಂದು ಅಭಿಮಾನಿಗಳು ಕಾಲೆಳೆಯುತ್ತಿದ್ದಾರೆ.

ಇದನ್ನೂ ಓದಿ : ಆಫ್ರಿಕಾ ವಿರುದ್ಧದ ಟಿ20 ಸರಣಿಯ ಆರಂಭಿಕ ಪಂದ್ಯದಲ್ಲಿ ಭಾರತಕ್ಕೆ ಸೋಲು ; ವಿಶ್ವಕಪ್ ಸಿದ್ಧತೆಗೆ ಆರಂಭದಲ್ಲೇ ಹಿನ್ನಡೆ!