ಇಸ್ಲಾಮಾಬಾದ್‌ನಲ್ಲಿ ಅಮೆರಿಕ-ಇರಾನ್ ಶಾಂತಿ ಮಾತುಕತೆ ಕೊನೇ ಕ್ಷಣದಲ್ಲಿ ಮುರಿದುಬಿದ್ದಿದ್ದೇಕೆ?

ಇಸ್ಲಾಮಾಬಾದ್‌ : ಪಾಕಿಸ್ತಾನದ ಇಸ್ಲಾಮಾಬಾದ್‌ನಲ್ಲಿ ನಡೆದ ಅಮೆರಿಕ ಹಾಗೂ ಇರಾನ್ ನಡುವಿನ ಶಾಂತಿ ಮಾತುಕತೆ ಕೊನೆಯ ಕ್ಷಣದಲ್ಲಿ ವಿಫಲವಾಗಿರುವುದಕ್ಕೆ ಕಾರಣವೇನು ಎಂಬುದನ್ನು ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಗ್ಚಿ ಬಿಚ್ಚಿಟ್ಟಿದ್ದಾರೆ.

ಟೆಹ್ರಾನ್ ಮತ್ತು ವಾಷಿಂಗ್ಟನ್ ನಡುವಿನ ಶಾಂತಿ ಒಪ್ಪಂದವು ಕೇವಲ ‘ಕೆಲವೇ ಇಂಚುಗಳ’ ಅಂತರದಲ್ಲಿ ಕೈತಪ್ಪಿಹೋಯಿತು ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಕಳೆದ 47 ವರ್ಷಗಳಲ್ಲೇ ಮೊದಲ ಬಾರಿಗೆ ನಡೆದ ಈ ಉನ್ನತ ಮಟ್ಟದ ಮಾತುಕತೆಯಲ್ಲಿ, ಯುದ್ಧವನ್ನು ಅಂತ್ಯಗೊಳಿಸುವ ಸದುದ್ದೇಶದಿಂದ ಇರಾನ್ ನಿಯೋಗವು ಅಮೆರಿಕದೊಂದಿಗೆ ಪಾಲ್ಗೊಂಡಿತ್ತು.

ಆದರೆ, ‘ಇಸ್ಲಾಮಾಬಾದ್ ಒಪ್ಪಂದ’ ಅಂತಿಮಗೊಳ್ಳಲು ಕೆಲವೇ ಕ್ಷಣಗಳಿರುವಾಗ ಅಮೆರಿಕದ ಕಡೆಯಿಂದ ಅತಿಯಾದ ಬೇಡಿಕೆಗಳು, ಪದೇ ಪದೇ ನಿಲುವು ಬದಲಿಸುವ ತಂತ್ರ ಹಾಗೂ ದಿಗ್ಬಂಧನದಂತಹ ಅಡೆತಡೆಗಳು ಎದುರಾದವು ಎಂದು ಅವರು ಆರೋಪಿಸಿದ್ದಾರೆ. ತಮ್ಮ ಹಿಂದಿನ ನಿಲುವನ್ನೇ ಪುನರುಚ್ಚರಿಸಿದ ಅರಗ್ಚಿ, “ಸದ್ಭಾವನೆಗೆ ಸದ್ಭಾವನೆ ಸಿಗುತ್ತದೆ, ಶತ್ರುತ್ವಕ್ಕೆ ಶತ್ರುತ್ವವೇ ಉತ್ತರ” ಎಂದು ಕಠಿಣ ಸಂದೇಶ ರವಾನಿಸಿದ್ದಾರೆ.

ಸರ್ವಾಧಿಕಾರಿ ಧೋರಣೆ ಬಿಟ್ಟರೆ ಒಪ್ಪಂದ ಸಾಧ್ಯ: ಇರಾನ್ ಅಧ್ಯಕ್ಷ

ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್ ಅವರು ಕೂಡ ಅರಗ್ಚಿ ಅವರ ಹೇಳಿಕೆಯನ್ನು ಬೆಂಬಲಿಸಿದ್ದಾರೆ. ಅಮೆರಿಕ ತನ್ನ ‘ಸರ್ವಾಧಿಕಾರಿ’ ಧೋರಣೆಯನ್ನು ಕೈಬಿಟ್ಟು, ಇರಾನ್ ಹಕ್ಕುಗಳನ್ನು ಗೌರವಿಸಿದರೆ, ವಾಷಿಂಗ್ಟನ್‌ನೊಂದಿಗೆ ರಾಜತಾಂತ್ರಿಕ ಒಪ್ಪಂದ ಮಾಡಿಕೊಳ್ಳಲು ಇನ್ನೂ ಅವಕಾಶವಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಅಂತಹ ವಾತಾವರಣ ನಿರ್ಮಾಣವಾದರೆ ಒಪ್ಪಂದವನ್ನು ತಲುಪುವ ಮಾರ್ಗಗಳು ಖಂಡಿತವಾಗಿಯೂ ಗೋಚರಿಸಲಿವೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಇದೇ ವೇಳೆ, ಇಸ್ಲಾಮಾಬಾದ್ ಮಾತುಕತೆಯಲ್ಲಿ ಶ್ರಮಿಸಿದ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಾಘರ್ ಘಾಲಿಬಾಫ್ ಸೇರಿದಂತೆ ಇರಾನ್‌ನ ಸಮಾಲೋಚನಾ ತಂಡದ ಪ್ರಯತ್ನಗಳನ್ನು ಅವರು ಶ್ಲಾಘಿಸಿದ್ದಾರೆ.

ಟ್ರಂಪ್ ದಿಗ್ಬಂಧನ ಬೆದರಿಕೆ

ಇಸ್ಲಾಮಾಬಾದ್‌ನಲ್ಲಿ ಶಾಂತಿ ಮಾತುಕತೆಗಳು ಮುರಿದು ಬೀಳುತ್ತಿದ್ದಂತೆಯೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಹೊರ್ಮುಜ್ ಜಲಸಂಧಿಗೆ ಪ್ರವೇಶಿಸುವ ಅಥವಾ ನಿರ್ಗಮಿಸುವ ಹಡಗುಗಳಿಗೆ ಅಮೆರಿಕನ್ ನೌಕಾಪಡೆಯು ಶೀಘ್ರವೇ ದಿಗ್ಬಂಧನ ವಿಧಿಸಲಿದೆ ಎಂದು ಎಚ್ಚರಿಕೆ ನೀಡಿದ್ದರು. ಇದರ ಬೆನ್ನಲ್ಲೇ, ಸೋಮವಾರದಿಂದಲೇ ಇರಾನ್‌ನ ಎಲ್ಲಾ ಬಂದರುಗಳನ್ನು ನಿರ್ಬಂಧಿಸುವುದಾಗಿ ಅಮೆರಿಕದ ಸೆಂಟ್ರಲ್ ಕಮಾಂಡ್ (CENTCOM) ಘೋಷಿಸಿದೆ. ಈ ನಿರ್ಬಂಧವನ್ನು ಯಾವುದೇ ತಾರತಮ್ಯವಿಲ್ಲದೆ ಎಲ್ಲಾ ರಾಷ್ಟ್ರಗಳ ಹಡಗುಗಳಿಗೂ ಅನ್ವಯಿಸಲಾಗುವುದು ಎಂದು ಸ್ಪಷ್ಟಪಡಿಸಿದೆ. ಆದರೆ, ಇರಾನ್‌ಯೇತರ ಬಂದರುಗಳ ನಡುವೆ ಸಂಚರಿಸುವ ಹಡಗುಗಳಿಗೆ ಹೊರ್ಮುಜ್ ಜಲಸಂಧಿಯಲ್ಲಿ ಸಾಗಲು ಅವಕಾಶ ನೀಡಲಾಗುವುದು ಎಂದು ತಿಳಿಸಿದೆ.

ಬೆದರಿಕೆಗಳಿಗೆ ಬಗ್ಗುವುದಿಲ್ಲ ಎಂದ ಇರಾನ್

ಟ್ರಂಪ್ ಅವರ ಬೆದರಿಕೆಗಳಿಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಇರಾನ್ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಾಘರ್ ಘಾಲಿಬಾಫ್, ಅಮೆರಿಕದ ಈ ದಿಗ್ಬಂಧನವು ಇರಾನ್ ಮೇಲೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ತಿರುಗೇಟು ನೀಡಿದ್ದಾರೆ. ವಾಷಿಂಗ್ಟನ್‌ನೊಂದಿಗಿನ ಮಾತುಕತೆಯ ಸಂದರ್ಭದಲ್ಲಿ ಟೆಹ್ರಾನ್ ಉತ್ತಮ ಉಪಕ್ರಮಗಳನ್ನು ಮಂಡಿಸಿತ್ತು, ಇದು ಮಾತುಕತೆಯನ್ನು ಮುಂದಕ್ಕೆ ಕೊಂಡೊಯ್ಯಲು ಸಹಾಯ ಮಾಡಿತ್ತು ಎಂದು ಅವರು ವಿವರಿಸಿದ್ದಾರೆ.

“ಟ್ರಂಪ್ ಅವರ ಇತ್ತೀಚಿನ ಬೆದರಿಕೆಗಳು ಇರಾನ್ ಮೇಲೆ ಯಾವುದೇ ಪ್ರಭಾವ ಬೀರಲಾರವು. ನೀವು ಯುದ್ಧಕ್ಕೆ ಬಂದರೆ, ನಾವೂ ಯುದ್ಧ ಮಾಡುತ್ತೇವೆ; ನೀವು ತರ್ಕಬದ್ಧವಾಗಿ ಬಂದರೆ, ನಾವೂ ತರ್ಕಬದ್ಧವಾಗಿಯೇ ವ್ಯವಹರಿಸುತ್ತೇವೆ” ಎಂದು ಅವರು ಅಮೆರಿಕ ಅಧ್ಯಕ್ಷರಿಗೆ ನೇರ ಎಚ್ಚರಿಕೆ ನೀಡಿದ್ದಾರೆ. “ನಾವು ಯಾವುದೇ ಬೆದರಿಕೆಗಳಿಗೆ ಬಗ್ಗುವವರಲ್ಲ. ಅವರು ಮತ್ತೊಮ್ಮೆ ನಮ್ಮ ಇಚ್ಛಾಶಕ್ತಿಯನ್ನು ಪರೀಕ್ಷಿಸಲಿ, ಆಗ ನಾವು ಅವರಿಗೆ ಇನ್ನಷ್ಟು ದೊಡ್ಡ ಪಾಠ ಕಲಿಸುತ್ತೇವೆ” ಎಂದು ಘಾಲಿಬಾಫ್ ಗುಡುಗಿದ್ದಾರೆ.

ಇದನ್ನೂ ಓದಿ : ರಾಷ್ಟ್ರೀಯ ತನಿಖಾ ಸಂಸ್ಥೆಯಲ್ಲಿ 29 ಅಸಿಸ್ಟಂಟ್ ಹುದ್ದೆಗಳ ನೇಮಕಾತಿ.. ಪಿಯುಸಿ, ಡಿಗ್ರಿ ಪಾಸಾಗಿದ್ದರೆ ಸಾಕು!