ನವದೆಹಲಿ : ಪ್ರಕೃತಿಯ ವಿಸ್ಮಯಗಳು ಮನುಷ್ಯನ ಕಲ್ಪನೆಗೂ ಮೀರಿದ್ದು ಎಂಬುದಕ್ಕೆ ಈ ಸುದ್ದಿ ಜೀವಂತ ಉದಾಹರಣೆ. ಕೇವಲ ನಾಲ್ಕು ತಿಂಗಳ ಪ್ರಾಯದ ‘ಬಾರ್-ಟೈಲ್ಡ್ ಗಾಡ್ವಿಟ್‘ (Bar-tailed Godwit) ಎಂಬ ಪುಟ್ಟ ಹಕ್ಕಿಯೊಂದು ಅಲಾಸ್ಕಾದಿಂದ ಆಸ್ಟ್ರೇಲಿಯಾಕ್ಕೆ ಬರೋಬ್ಬರಿ 13,560 ಕಿಲೋಮೀಟರ್ ದೂರವನ್ನು ಯಾವುದೇ ವಿಶ್ರಾಂತಿ ಇಲ್ಲದೆ ಕ್ರಮಿಸಿ ವಿಶ್ವ ದಾಖಲೆ ಬರೆದಿದೆ. ‘ಬಿ6’ ಎಂಬ ಹೆಸರಿನ ಈ ಹಕ್ಕಿ ಸತತ 11 ದಿನಗಳ ಕಾಲ ಹಗಲು-ರಾತ್ರಿ ಎನ್ನದೆ ಹಾರಾಟ ನಡೆಸಿ ಟ್ಯಾಸ್ಮೇನಿಯಾವನ್ನು ತಲುಪಿ ವಿಜ್ಞಾನಿಗಳನ್ನು ದಂಗುಬಡಿಸಿದೆ.
ಇಷ್ಟು ಸುದೀರ್ಘ ಪಯಣಕ್ಕೆ ಈ ಹಕ್ಕಿಗಳು ವಿಶೇಷವಾಗಿ ತಮ್ಮ ದೇಹವನ್ನು ಸಿದ್ಧಪಡಿಸಿಕೊಳ್ಳುತ್ತವೆ. ಹಾರಾಟ ಆರಂಭಿಸುವ ಮೊದಲು ಅಲಾಸ್ಕಾದಲ್ಲಿ ಯಥೇಚ್ಛವಾಗಿ ಆಹಾರ ಸೇವಿಸುವ ಇವು, ತಮ್ಮ ದೇಹದ ಒಟ್ಟು ತೂಕದ ಅರ್ಧದಷ್ಟು ಕೊಬ್ಬನ್ನು ಸಂಗ್ರಹಿಸಿಕೊಳ್ಳುತ್ತವೆ. ಅಚ್ಚರಿಯೆಂದರೆ, ಹಾರಾಟದ ಸಮಯದಲ್ಲಿ ಶಕ್ತಿ ಉಳಿಸಲು ಮತ್ತು ತೂಕ ಇಳಿಸಲು ಇವು ತಮ್ಮ ದೇಹದ ಜೀರ್ಣಾಂಗವ್ಯೂಹದ ಭಾಗಗಳಾದ ಜಠರ ಮತ್ತು ಯಕೃತ್ತಿನ ಗಾತ್ರವನ್ನು ಕುಗ್ಗಿಸಿಕೊಳ್ಳುತ್ತವೆ! ಈ ವಿಶಿಷ್ಟ ತಂತ್ರದ ಮೂಲಕ ಸಂಗ್ರಹವಾದ ಕೊಬ್ಬನ್ನು ಅತ್ಯಂತ ಸಮರ್ಥವಾಗಿ ಬಳಸಿಕೊಂಡು ಹಸಿವು, ನೀರಿಲ್ಲದೆ ಸಾವಿರಾರು ಮೈಲು ಕ್ರಮಿಸುತ್ತವೆ.
ಗಾಳಿಯಲ್ಲೇ ನಿದ್ರೆ, ಕಣ್ಣಿನಲ್ಲೇ ದಿಕ್ಸೂಚಿ
ಸತತ 11 ದಿನಗಳ ಕಾಲ ನೆಲಕ್ಕೆ ಇಳಿಯದೆ ಹಾರುವ ಈ ಹಕ್ಕಿಗಳು ಹಾರಾಟದ ನಡುವೆಯೇ ನಿದ್ರಿಸುವ ಕಲೆಯನ್ನು ಮೈಗೂಡಿಸಿಕೊಂಡಿವೆ. ಇದನ್ನು ‘ಯೂನಿಹೆಮಿಸ್ಪಿರಿಕ್ ಸ್ಲೀಪ್’ ಎಂದು ಕರೆಯಲಾಗುತ್ತದೆ. ಅಂದರೆ, ಹಕ್ಕಿಯ ಮೆದುಳಿನ ಒಂದು ಭಾಗ ನಿದ್ರಿಸುತ್ತಿದ್ದರೆ, ಇನ್ನೊಂದು ಭಾಗ ಹಾರಾಟದತ್ತ ಗಮನ ಹರಿಸುತ್ತದೆ. ಇನ್ನು ದಾರಿ ತಪ್ಪದಂತೆ ಹಾರಲು ಇವುಗಳ ಕಣ್ಣಿನಲ್ಲಿರುವ ‘ಕ್ರಿಪ್ಟೋಕ್ರೋಮ್ಸ್’ ಎಂಬ ವಿಶೇಷ ಪ್ರೋಟೀನ್ ಸಹಾಯ ಮಾಡುತ್ತದೆ. ಇದು ಭೂಮಿಯ ಕಾಂತೀಯ ವಲಯವನ್ನು ಗುರುತಿಸಿ, ಮೋಡಗಳ ನಡುವೆಯೂ ನಿಖರವಾದ ದಿಕ್ಕನ್ನು ತೋರಿಸುವ ‘ಇನ್-ಬಿಲ್ಟ್ ಜಿಪಿಎಸ್’ ರೀತಿ ಕೆಲಸ ಮಾಡುತ್ತದೆ.
ಪರಿಸರ ಸಮತೋಲನದ ಸಂಕೇತ
ಆರ್ಕ್ಟಿಕ್ ಪ್ರದೇಶಗಳಲ್ಲಿ ಸಂತಾನೋತ್ಪತ್ತಿ ಮಾಡುವ ಈ ಬಾರ್-ಟೈಲ್ಡ್ ಗಾಡ್ವಿಟ್ಗಳು ಚಳಿಗಾಲದಲ್ಲಿ ನ್ಯೂಜಿಲೆಂಡ್ ಮತ್ತು ಆಸ್ಟ್ರೇಲಿಯಾದತ್ತ ವಲಸೆ ಹೋಗುತ್ತವೆ. ಇವುಗಳ ಹಾರಾಟದ ವೇಗ ಗಂಟೆಗೆ 55 ಕಿಲೋಮೀಟರ್ಗಿಂತಲೂ ಹೆಚ್ಚಿರುತ್ತದೆ. ಅಮುರ್ ಫಾಲ್ಕನ್ಗಳಂತೆ ಈ ಹಕ್ಕಿಗಳು ಕೂಡ ಜಾಗತಿಕ ವಲಸೆ ಹಾದಿಯ ಪ್ರಮುಖ ಕೊಂಡಿಗಳಾಗಿವೆ. ಆದರೆ ಹವಾಮಾನ ವೈಪರೀತ್ಯ ಮತ್ತು ಪರಿಸರ ನಾಶದಿಂದಾಗಿ ಇಂತಹ ಅದ್ಭುತ ಜೀವಿಗಳ ವಲಸೆ ಹಾದಿಗಳಿಗೆ ಸಂಚಕಾರ ಬರುತ್ತಿದ್ದು, ಇವುಗಳ ಸಂರಕ್ಷಣೆ ಅನಿವಾರ್ಯವಾಗಿದೆ ಎಂದು ಪರಿಸರ ತಜ್ಞರು ಆತಂಕ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ : ಕುಡಿದ ಮತ್ತಲ್ಲಿ ಕಾರಿಗೆ ಗುದ್ದಿದ ಕಂಟೇನರ್ ಚಾಲಕ.. 8 ವರ್ಷದ ಬಾಲಕ ಬಲಿ
