ನವದೆಹಲಿ : ವಿಜ್ಞಾನ, ತಂತ್ರಜ್ಞಾನ ಮತ್ತು ಅಂತಾರಾಷ್ಟ್ರೀಯ ಸಹಕಾರದ ಕ್ಷೇತ್ರದಲ್ಲಿ ಭಾರತದ ಹೊಸ ಮೈಲಿಗಲ್ಲು ಸಾಧಿಸಿದೆ. ಜಗತ್ತಿನ ಒಟ್ಟು 108 ದೇಶಗಳ ವಿದ್ಯಾರ್ಥಿನಿಯರು ಒಗ್ಗೂಡಿ ನಿರ್ಮಿಸಿರುವ ಉಪಗ್ರಹವೊಂದು ಭಾರತದಿಂದ ಸಣ್ಣ ಉಪಗ್ರಹ ಉಡಾವಣಾ ನೌಕೆಯ (SSLV) ಮೂಲಕ ಶೀಘ್ರದಲ್ಲೇ ಬಾಹ್ಯಾಕಾಶಕ್ಕೆ ನೆಗೆಯಲಿದ್ದು, ಸಂಪೂರ್ಣ ಮಹಿಳಾ ಆಧಾರಿತ ಯೋಜನೆಯಾಗಿ ವಿಶ್ವದಾಖಲೆ ಬರೆದಿದೆ.
‘ಸ್ಪೇಸ್ ಕಿಡ್ಜ್ ಇಂಡಿಯಾ’ (Space Kidz India) ಸಂಸ್ಥೆಯ ನೇತೃತ್ವದಲ್ಲಿ ನಡೆಯುತ್ತಿರುವ ‘ಮಿಷನ್ ಶಕ್ತಿಸ್ಯಾಟ್’ (Mission ShakthiSAT) ಯೋಜನೆಯ ಎರಡನೇ ಹಂತದ ತರಬೇತಿಯು ಭಾರತದಲ್ಲಿ ಯಶಸ್ವಿಯಾಗಿ ಪೂರ್ಣಗೊಂಡಿದೆ. ಈ ಕಾರ್ಯಕ್ರಮದಲ್ಲಿ ವಿಶ್ವದ ವಿವಿಧ ಮೂಲೆಗಳಿಂದ ಆಗಮಿಸಿದ್ದ ಯುವತಿಯರು ಮತ್ತು ಪ್ರತಿನಿಧಿಗಳು ಬಾಹ್ಯಾಕಾಶ ನೌಕೆ ಎಂಜಿನಿಯರಿಂಗ್ ಮತ್ತು ಉಪಗ್ರಹ ಅಭಿವೃದ್ಧಿ ಕುರಿತು ಪ್ರಾಯೋಗಿಕ ಜ್ಞಾನವನ್ನು ಪಡೆದುಕೊಂಡಿದ್ದಾರೆ.
ಸಿದ್ಧವಾಯಿತು 12ಯು ಕ್ಯೂಬ್ಸ್ಯಾಟ್ ಉಪಗ್ರಹ
ಕೇವಲ ತರಗತಿಯ ಸೈದ್ಧಾಂತಿಕ ಶಿಕ್ಷಣಕ್ಕೆ ಸೀಮಿತವಾಗದೆ, ವಿದ್ಯಾರ್ಥಿನಿಯರು ನೇರವಾಗಿ ಉಪಗ್ರಹದ ಮೆಕ್ಯಾನಿಕಲ್ ಸಂಯೋಜನೆ, ನೌಕೆಯ ರಚನೆ, ಎಲೆಕ್ಟ್ರಿಕಲ್ ಜೋಡಣೆ, ಸೋಲಾರ್ ಪ್ಯಾನಲ್ ಸೋಲ್ಡರಿಂಗ್, ಪವರ್-ಬಸ್ ಸಿದ್ಧತೆ ಮತ್ತು ಉಪಕರಣಗಳ ಸಂಯೋಜನೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಈ ಯೋಜನೆಯ ಪ್ರಮುಖ ಆಕರ್ಷಣೆಯೆಂದರೆ, ವಿದ್ಯಾರ್ಥಿನಿಯರೇ ಸ್ವತಃ ಅಭಿವೃದ್ಧಿಪಡಿಸಿ ಸಿದ್ಧಪಡಿಸಿರುವ ’12ಯು ಕ್ಯೂಬ್ಸ್ಯಾಟ್’ (12U CubeSat) ಎಂಬ ಕಾಂಪ್ಯಾಕ್ಟ್ ಉಪಗ್ರಹ. ಈ ಉಪಗ್ರಹವು ಹಲವು ವೈಜ್ಞಾನಿಕ ಮತ್ತು ತಾಂತ್ರಿಕ ಪ್ರಯೋಗಗಳಿಗೆ ಸಂಬಂಧಿಸಿದ ಉಪಕರಣಗಳನ್ನು ಒಳಗೊಂಡಿದೆ.
ಅಂತಾರಾಷ್ಟ್ರೀಯ ಸಂಸ್ಥೆಗಳ ಸಹಯೋಗ
ಮಿಷನ್ ಶಕ್ತಿಸ್ಯಾಟ್ ಕೇವಲ ತಾಂತ್ರಿಕ ತರಬೇತಿಯಾಗಷ್ಟೇ ಅಲ್ಲದೆ, ಜಾಗತಿಕ ಯುವ ರಾಜತಾಂತ್ರಿಕ ವೇದಿಕೆಯಾಗಿಯೂ ಹೊರಹೊಮ್ಮಿದೆ. ಈ ಯೋಜನೆಯಲ್ಲಿ ಲ್ಯಾಟ್ವಿಯಾ, ಈಜಿಪ್ಟ್, ಅಮೆರಿಕ, ಬ್ರೆಜಿಲ್, ಆಸ್ಟ್ರೇಲಿಯಾ, ಸ್ವಿಜರ್ಲೆಂಡ್, ಫಿಲಿಪೈನ್ಸ್ ಮತ್ತು ಭಾರತ ಸೇರಿದಂತೆ ಹಲವು ದೇಶಗಳ ಸಂಸ್ಥೆಗಳು ಹಾಗೂ ಸಂಶೋಧನಾ ತಂಡಗಳು ಕೈಜೋಡಿಸಿವೆ.
ಈಜಿಪ್ಟಿಯನ್ ಸ್ಪೇಸ್ ಏಜೆನ್ಸಿ, ಸೌತ್ ಅಲಬಾಮಾ ವಿಶ್ವವಿದ್ಯಾಲಯ, ಮೆಕ್ವಾರಿ ವಿಶ್ವವಿದ್ಯಾಲಯದ ಆಸ್ಟ್ರೇಲಿಯನ್ ಆಸ್ಟ್ರೋನಾಮಿಕಲ್ ಆಪ್ಟಿಕ್ಸ್, ಎಸ್ಎಂಡಬ್ಲ್ಯೂ ಎಂಜಿನಿಯರಿಂಗ್ ಮುಂತಾದ ಜಾಗತಿಕ ಸಂಸ್ಥೆಗಳು ಇದರ ಭಾಗವಾಗಿವೆ. ಭಾರತದ ವಿದೇಶಾಂಗ ವ್ಯವಹಾರಗಳ ಸಚಿವಾಲಯವೂ ಈ ಯೋಜನೆಗೆ ಬೆಂಬಲ ನೀಡಿದ್ದು, ಬಾಹ್ಯಾಕಾಶ ಶಿಕ್ಷಣದ ಮೂಲಕ ದೇಶಗಳ ನಡುವಿನ ಸಾಂಸ್ಕೃತಿಕ ಹಾಗೂ ವೈಜ್ಞಾನಿಕ ಸಂಬಂಧಗಳನ್ನು ಗಟ್ಟಿಗೊಳಿಸಲು ಇದು ನೆರವಾಗಿದೆ. ಎರಡನೇ ಹಂತ ಯಶಸ್ವಿಯಾಗಿ ಮುಗಿದಿರುವುದರಿಂದ, ಶೀಘ್ರದಲ್ಲೇ ಈ ಐತಿಹಾಸಿಕ ಉಪಗ್ರಹವು ಭಾರತದ ನೆಲದಿಂದ ಬಾಹ್ಯಾಕಾಶಕ್ಕೆ ಉಡಾವಣೆಯಾಗಲಿದೆ. ಆದರೆ, ದಿನಾಂಕ ಇನ್ನೂ ನಿಗದಿಯಾಗಿಲ್ಲ.
ಇದನ್ನೂ ಓದಿ : 21 ವರ್ಷ ತುಂಬಿದ ಬಳಿಕ ಪ್ರೇಯಸಿಯನ್ನು ಮದುವೆಯಾಗು ಎಂದಿದ್ದಕ್ಕೆ ತಂದೆಯನ್ನೇ ಗುಂಡಿಟ್ಟು ಕೊಂದ ಪುತ್ರ!
