ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದ | ಬೇಳೆಕಾಳುಗಳ ಮೇಲಿನ ಸುಂಕ ಕಡಿತದ ಹೇಳಿಕೆಯಿಂದ ಹಿಂದೆ ಸರಿದ ಅಮೆರಿಕ!

ನವದೆಹಲಿ : ಭಾರತ-ಅಮೆರಿಕ ಐತಿಹಾಸಿಕ ವ್ಯಾಪಾರ ಒಪ್ಪಂದಕ್ಕೆ ಸಂಬಂಧಿಸಿ ಅಮೆರಿಕದ ಶ್ವೇತಭವನ ಬಿಡುಗಡೆ ಮಾಡಿರುವ ಅಧಿಕೃತ ಮಾಹಿತಿ ಪತ್ರ(Factsheet)ದಲ್ಲಿರುವ ವಿವರಗಳಿಗೂ, ಭಾರತ ಸರ್ಕಾರ ಈ ಹಿಂದೆ ಹೇಳಿರುವ ವಿಚಾರಗಳಿಗೂ ವ್ಯತ್ಯಾಸ ಕಂಡುಬಂದ ಬೆನ್ನಲ್ಲೇ, ಟ್ರಂಪ್ ಸರ್ಕಾರವು ಯೂಟರ್ನ್ ಹೊಡೆದಿದೆ.

ಹೊಸ ಮಾಹಿತಿಪತ್ರದಲ್ಲಿ ಸೇರಿಸಲಾಗಿದ್ದ ಬೇಳೆಕಾಳು ಆಮದು ಮೇಲಿನ ಸುಂಕ ವಿನಾಯ್ತಿ ಭಾರತದ ಕೃಷಿ ಕ್ಷೇತ್ರದ ಮೇಲೆ ಭಾರೀ ಹೊಡೆತ ನೀಡಲಿದೆ ಎಂದು ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರು ಹೇಳಿಕೆ ನೀಡಿದ ಮಾರನೇ ದಿನವೇ ಈ ಬೆಳವಣಿಗೆ ನಡೆದಿದೆ. ಈ ಹಿಂದೆ ಭಾರತವು ಅಮೆರಿಕದ ಬೇಳೆಕಾಳುಗಳ ಮೇಲಿನ ಆಮದು ಸುಂಕವನ್ನು ಕಡಿಮೆ ಮಾಡಲಿದೆ ಎಂದು ಹೇಳಿದ್ದ ಅಮೆರಿಕ, ಈಗ ಆ ಸಾಲನ್ನೇ ಕೈಬಿಟ್ಟಿದೆ.

ಬೇಳೆಕಾಳುಗಳ ಮೇಲಿನ ಸುಂಕಕ್ಕೆ ಬ್ರೇಕ್

ಆರಂಭದಲ್ಲಿ ಶ್ವೇತಭವನ ಬಿಡುಗಡೆ ಮಾಡಿದ್ದ ಪಟ್ಟಿಯಲ್ಲಿ, ಭಾರತವು ಒಣಗಿದ ಧಾನ್ಯಗಳು, ಕೆಂಪು ಜೋಳ ಮತ್ತು ಬಾದಾಮಿಯ ಜೊತೆಗೆ ‘ಕೆಲವು ಬೇಳೆಕಾಳುಗಳ’ ಮೇಲಿನ ಸುಂಕವನ್ನು ಕಡಿಮೆ ಮಾಡಲಿದೆ ಅಥವಾ ರದ್ದುಗೊಳಿಸಲಿದೆ ಎಂದು ಉಲ್ಲೇಖಿಸಲಾಗಿತ್ತು. ಆದರೆ, ಪರಿಷ್ಕೃತ ಪಟ್ಟಿಯಲ್ಲಿ ‘ಬೇಳೆಕಾಳುಗಳ’ ಉಲ್ಲೇಖವನ್ನು ಸಂಪೂರ್ಣವಾಗಿ ತೆಗೆದುಹಾಕಲಾಗಿದೆ. ವಿಶ್ವದ ಅತಿದೊಡ್ಡ ಬೇಳೆಕಾಳು ಉತ್ಪಾದಕ ಮತ್ತು ಬಳಕೆದಾರ ದೇಶವಾಗಿರುವ ಭಾರತ, ತನ್ನ ರೈತರ ಹಿತರಕ್ಷಣೆಗಾಗಿ ಅಮೆರಿಕದ ಬೇಳೆಕಾಳುಗಳ ಮೇಲೆ ಹೆಚ್ಚಿನ ಸುಂಕವನ್ನು ವಿಧಿಸಿದೆ. ಈ ವಿಷಯದಲ್ಲಿ ಭಾರತವು ಅಮೆರಿಕದ ಮೇಲೆ ಯಶಸ್ವಿ ಒತ್ತಡ ಹೇರಿದೆ ಎಂಬುದು ಇದರಿಂದ ಸ್ಪಷ್ಟವಾಗುತ್ತಿದೆ.

‘ಬದ್ಧತೆ’ಯ ಬದಲಿಗೆ ‘ಇಚ್ಛೆ’: ಪದ ಬಳಕೆಯಲ್ಲಿ ಬದಲಾವಣೆ

ಅಮೆರಿಕದ ಸರಕುಗಳನ್ನು ಖರೀದಿಸುವ ವಿಚಾರದಲ್ಲೂ ಟ್ರಂಪ್ ಆಡಳಿತವು ತನ್ನ ಭಾಷೆಯನ್ನು ಮೃದುಗೊಳಿಸಿದೆ. ಸುಮಾರು 500 ಬಿಲಿಯನ್ ಡಾಲರ್ ಮೊತ್ತದ ಅಮೆರಿಕನ್ ಉತ್ಪನ್ನಗಳನ್ನು ಖರೀದಿಸಲು ಭಾರತ “ಬದ್ಧವಾಗಿದೆ” (Committed) ಎಂದು ಮೊದಲು ಹೇಳಲಾಗಿತ್ತು. ಆದರೆ, ವಿರೋಧ ಪಕ್ಷಗಳ ಟೀಕೆ ಮತ್ತು ತಾಂತ್ರಿಕ ಕಾರಣಗಳಿಂದಾಗಿ ಈಗ ಆ ಪದವನ್ನು ಬದಲಿಸಿ, ಭಾರತವು ಇಷ್ಟು ಮೊತ್ತದ ಉತ್ಪನ್ನಗಳನ್ನು ಖರೀದಿಸುವ “ಇಚ್ಛೆ ಹೊಂದಿದೆ” (Intends) ಎಂದು ತಿದ್ದಲಾಗಿದೆ. ಅಲ್ಲದೆ, ಖರೀದಿಸಲಿರುವ ಉತ್ಪನ್ನಗಳ ಪಟ್ಟಿಯಿಂದ ಕೃಷಿ ಉತ್ಪನ್ನಗಳ ಹೆಸರನ್ನು ಕೈಬಿಡಲಾಗಿದೆ.

ರಷ್ಯಾ ತೈಲದ ವಿವಾದ

ಕೇವಲ ಕೃಷಿ ಮಾತ್ರವಲ್ಲದೆ, ಡಿಜಿಟಲ್ ಸೇವಾ ತೆರಿಗೆಯನ್ನು ಭಾರತ ರದ್ದುಗೊಳಿಸಲಿದೆ ಎಂಬ ಹೇಳಿಕೆಯನ್ನೂ ಅಮೆರಿಕ ಬದಲಿಸಿದೆ. ಈಗ ಕೇವಲ ‘ದ್ವಿಪಕ್ಷೀಯ ಡಿಜಿಟಲ್ ವ್ಯಾಪಾರ ನಿಯಮಗಳ ಬಗ್ಗೆ ಮಾತುಕತೆ ನಡೆಸಲು ಭಾರತ ಒಪ್ಪಿದೆ’ ಎಂದು ಮಾತ್ರ ಹೇಳಲಾಗಿದೆ. ಇದಲ್ಲದೆ, ರಷ್ಯಾದಿಂದ ತೈಲ ಆಮದು ಮಾಡಿಕೊಳ್ಳುವುದನ್ನು ನಿಲ್ಲಿಸುವ ಅಮೆರಿಕದ ಷರತ್ತಿನ ಬಗ್ಗೆ ಭಾರತದಲ್ಲಿ ತೀವ್ರ ರಾಜಕೀಯ ಚರ್ಚೆಗಳು ನಡೆಯುತ್ತಿವೆ. ಭಾರತದ ಸಾರ್ವಭೌಮತ್ವವನ್ನು ಅಡವಿಟ್ಟು ಈ ಒಪ್ಪಂದ ಮಾಡಿಕೊಳ್ಳಲಾಗಿದೆ ಎಂದು ಕಾಂಗ್ರೆಸ್ ನಾಯಕ ಮಲ್ಲಿಕಾರ್ಜುನ ಖರ್ಗೆ ಟೀಕಿಸಿದ ಬೆನ್ನಲ್ಲೇ ಈ ಬದಲಾವಣೆಗಳು ಕಂಡುಬಂದಿವೆ.

ಈ ನಡುವೆ, ಕೇಂದ್ರ ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ ಅವರು ಭಾರತದ ರೈತರಿಗೆ ಮತ್ತು ಕೃಷಿ ವಲಯಕ್ಕೆ ಯಾವುದೇ ತೊಂದರೆಯಾಗದಂತೆ ಒಪ್ಪಂದ ಮಾಡಿಕೊಳ್ಳಲಾಗಿದೆ ಎಂದು ಭರವಸೆ ನೀಡಿದ್ದಾರೆ. ಭಾರತವು ಸ್ವಾವಲಂಬಿಯಾಗಿರುವ ಕ್ಷೇತ್ರಗಳನ್ನು ಈ ಒಪ್ಪಂದದಿಂದ ಹೊರಗಿಡಲಾಗಿದೆ ಮತ್ತು ದೇಶದ ಕುಶಲಕರ್ಮಿಗಳು ಹಾಗೂ ರೈತರ ಹಿತಾಸಕ್ತಿಯನ್ನು ಸಂಪೂರ್ಣವಾಗಿ ಕಾಪಾಡಲಾಗಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಇದನ್ನೂ ಓದಿ : ಇನ್ನು ರಾಷ್ಟ್ರಗೀತೆಗೂ ಮುನ್ನ ‘ವಂದೇ ಮಾತರಂ’ ಕಡ್ಡಾಯ.. 6 ಚರಣಗಳನ್ನೂ ಹಾಡಲೇಬೇಕು | ಕೇಂದ್ರದಿಂದ ಹೊಸ ಮಾರ್ಗಸೂಚಿ