‘ದೋಸ್ತ್, ದೋಸ್ತ್ ನಾ ರಹಾ’: ಟ್ರಂಪ್ ಸುಂಕ ಬೆದರಿಕೆ ಬೆನ್ನಲ್ಲೇ ಮೋದಿ-ಟ್ರಂಪ್ ‘ವಿಶೇಷ ಬಾಂಧವ್ಯ’ವನ್ನು ಅಣಕಿಸಿದ ಕಾಂಗ್ರೆಸ್

ನವದೆಹಲಿ: ರಷ್ಯಾದಿಂದ ತೈಲ ಖರೀದಿಸುವ ವಿಷಯದಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಭಾರತಕ್ಕೆ ಎಚ್ಚರಿಕೆ ನೀಡಿದ ಬೆನ್ನಲ್ಲೇ, ಕಾಂಗ್ರೆಸ್ ನಾಯಕ ಜೈರಾಮ್ ರಮೇಶ್ ಅವರು ಮಂಗಳವಾರ ಬಿಜೆಪಿ ಸರ್ಕಾರದ ವಿದೇಶಾಂಗ ನೀತಿಯನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಡೊನಾಲ್ಡ್ ಟ್ರಂಪ್ ನಡುವಿನ “ವಿಶೇಷ ಬಾಂಧವ್ಯ”ವನ್ನು ಪ್ರಶ್ನಿಸಿರುವ ಅವರು, ಈ ಸ್ನೇಹದಿಂದ ಭಾರತಕ್ಕೆ ನಷ್ಟವಾಗಿದೆ ಎಂದು ಆರೋಪಿಸಿದ್ದಾರೆ.

ಭಾರತವು ರಷ್ಯಾದಿಂದ ತೈಲ ಖರೀದಿಸುವುದನ್ನು ಮುಂದುವರಿಸಿದರೆ ಸುಂಕವನ್ನು ಮತ್ತಷ್ಟು ಹೆಚ್ಚಿಸುವುದಾಗಿ ಟ್ರಂಪ್ ಎಚ್ಚರಿಕೆ ನೀಡಿದ ನಂತರ ಉಭಯ ದೇಶಗಳ ನಡುವಿನ ರಾಜತಾಂತ್ರಿಕ ಸಂಬಂಧದಲ್ಲಿ ಹೊಸ ಬಿಕ್ಕಟ್ಟು ಸೃಷ್ಟಿಯಾಗಿದೆ. ಈ ಹಿನ್ನೆಲೆಯಲ್ಲಿ ಜೈರಾಮ್ ರಮೇಶ್ ತಮ್ಮ ವಾದವನ್ನು ಸಮರ್ಥಿಸಲು ಜನಪ್ರಿಯ ಹಿಂದಿ ಹಾಡು “ದೋಸ್ತ್, ದೋಸ್ತ್ ನಾ ರಹಾ” (ಗೆಳೆಯ ಈಗ ಗೆಳೆಯನಾಗಿ ಉಳಿದಿಲ್ಲ) ಎಂಬ ಸಾಲನ್ನು ಉಲ್ಲೇಖಿಸಿ, “ಪ್ರಧಾನಿಯವರಿಗೂ ಈ ಹಾಡು ತಿಳಿದಿರಬೇಕು.

ದೋಸ್ತ್, ದೋಸ್ತ್ ನಾ ರಹಾ, ಟ್ರಂಪ್ ಯಾರ್ ಹಮೇ ತೇರಾ ಐತ್ಬಾರ್ ನಾ ರಹಾ (ಗೆಳೆಯ ಈಗ ಗೆಳೆಯನಾಗಿ ಉಳಿದಿಲ್ಲ, ಟ್ರಂಪ್, ನನ್ನ ಗೆಳೆಯ, ನಮಗೆ ನಿನ್ನ ಮೇಲೆ ನಂಬಿಕೆ ಉಳಿದಿಲ್ಲ)” ಎಂದು ವ್ಯಂಗ್ಯವಾಡಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, “ಪ್ರಧಾನಿ ಮೋದಿ ಮತ್ತು ಅಧ್ಯಕ್ಷ ಟ್ರಂಪ್ ನಡುವೆ ವಿಶೇಷ ಬಾಂಧವ್ಯವಿದೆ, ಅವರಿಬ್ಬರೂ ಹಳೆಯ ಸ್ನೇಹಿತರು ಎಂದು ಹೇಳಲಾಗುತ್ತಿತ್ತು. ಆದರೆ ಈಗ ಆಗಿರುವುದೇನು? ಇಂದು ನಮ್ಮ ದೇಶಕ್ಕೆ ಟ್ರಂಪ್ ಸುಂಕ ಹೆಚ್ಚಳದ ಬೆದರಿಕೆಗಳನ್ನು ಹಾಕುತ್ತಿದ್ದಾರೆ. ಈ ಸ್ನೇಹ ಬಹಳ ದುಬಾರಿಯಾಗಿ ಪರಿಣಮಿಸಿದೆ. ಇದಕ್ಕೆ ಪ್ರಧಾನಿಯವರೇ ಉತ್ತರಿಸಬೇಕು” ಎಂದು ಆಗ್ರಹಿಸಿದ್ದಾರೆ.

ಹಿಂದೆ ನಡೆದ “ಹೌಡಿ ಮೋದಿ” ಮತ್ತು “ನಮಸ್ತೆ ಟ್ರಂಪ್” ನಂತಹ ಅದ್ಧೂರಿ ಕಾರ್ಯಕ್ರಮಗಳನ್ನು ಹಾಗೂ “ಅಬ್ಕಿ ಬಾರ್ ಟ್ರಂಪ್ ಸರ್ಕಾರ್” ಎಂಬ ಘೋಷಣೆಯನ್ನು ಉಲ್ಲೇಖಿಸಿದ ಜೈರಾಂರಮೇಶ್, ಇವೆಲ್ಲವೂ ಕೇವಲ “ಫೋಟೋಗಾಗಿ ನಡೆದಿದ್ದಾ” (ಪ್ರಚಾರದ ಗಿಮಿಕ್) ಎಂದು ಪ್ರಶ್ನಿಸಿದ್ದಾರೆ.

ಇತ್ತೀಚೆಗೆ, ಟ್ರಂಪ್ ಅವರು ಭಾರತೀಯ ಸರಕುಗಳ ಮೇಲೆ ಶೇ.25 ಸುಂಕವನ್ನು ವಿಧಿಸಿದ್ದು, ಭಾರತವು ರಷ್ಯಾದಿಂದ ತೈಲ ಖರೀದಿಸುವುದನ್ನು ಮುಂದುವರಿಸಿದರೆ ಮತ್ತಷ್ಟು ದಂಡ ವಿಧಿಸುವುದಾಗಿ ಸೋಮವಾರ ಮತ್ತೆ ಬೆದರಿಕೆ ಹಾಕಿದ್ದಾರೆ. ಅಷ್ಟೇ ಅಲ್ಲದೆ, ಭಾರತದ ಆರ್ಥಿಕತೆಯನ್ನು “ಸತ್ತಿದೆ” ಎಂದು ಬಣ್ಣಿಸಿ, ಭಾರತವು ತನ್ನ ತೈಲ ಆಮದಿನ ಮೂಲಕ ರಷ್ಯಾದ ಯುದ್ಧಕ್ಕೆ ಪರೋಕ್ಷವಾಗಿ ಹಣ ನೀಡುತ್ತಿದೆ ಎಂದು ಆರೋಪಿಸಿದ್ದರು. ಇದಕ್ಕೆ ಸೋಮವಾರ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿದ್ದ ಭಾರತ, ಅಮೆರಿಕದ ನಿಲುವು “ಅನ್ಯಾಯ ಮತ್ತು ಬೂಟಾಟಿಕೆ”ಯಿಂದ ಕೂಡಿದೆ ಎಂದು ತಿರಸ್ಕರಿಸಿತ್ತು.