ಬೆಂಗಳೂರು: ಮ್ಯೂಚುವಲ್ ಫಂಡ್, ಎಸ್ಐಪಿ ಹೂಡಿಕೆ ಎಂದ ತಕ್ಷಣ ಹೂಡಿಕೆ ತಜ್ಞರು ಸುದೀರ್ಘ ಅವಧಿಯ ಹೂಡಿಕೆ ಮಾಡಬೇಕು ಎಂದು ಸಲಹೆ ನೀಡುತ್ತಾರೆ. 10-20 ವರ್ಷಗಳ ಕಾಲ ಹೂಡಿಕೆ ಮಾಡಿದರೆ ಮಾತ್ರ ಹೆಚ್ಚಿನ ರಿಟರ್ನ್ಸ್ ಎನ್ನುತ್ತಾರೆ. ಇದು ನಿಜವೂ ಆಗಿದೆ. ಆದರೆ, ಅಲ್ಪಾವಧಿಗೂ ಹೂಡಿಕೆ ಮಾಡುವ ಮೂಲಕ ಹೆಚ್ಚಿನ ರಿಟರ್ನ್ಸ್ ಪಡೆಯಬಹುದಾಗಿದೆ. ಲಿಕ್ವಿಡ್ ಮ್ಯೂಚುವಲ್ ಫಂಡ್ ಗಳಲ್ಲಿ ಹೂಡಿಕೆ ಮಾಡಿ, ಅಲ್ಪಾವಧಿ ಹೂಡಿಕೆಯ ಗುರಿಗಳನ್ನು ಸಾಧಿಸಬಹುದಾಗಿದೆ.
ಅಲ್ಪಾವಧಿಗೆ ಹೂಡಿಕೆ ಮಾಡುವ ಅವಕಾಶ ಕಲ್ಪಿಸುವ ಮ್ಯೂಚುವಲ್ ಫಂಡ್ ಗಳನ್ನು ಲಿಕ್ವಿಡ್ ಮ್ಯೂಚುವಲ್ ಫಂಡ್ ಎಂದು ಕರೆಯಬಹುದು. ಡೆಟ್ ಫಂಡ್ ಮಾದರಿಯಲ್ಲಿರುವ ವಿವಿಧ ಮ್ಯೂಚುವಲ್ ಫಂಡ್ಗಳ ಪೈಕಿ ಲಿಕ್ವಿಡ್ ಮ್ಯೂಚುಯಲ್ ಫಂಡ್ ಪ್ರಮುಖವಾಗಿದೆ. ಹೆಸರೇ ಹೇಳುವಂತೆ ಲಿಕ್ವಿಡ್ ಮ್ಯೂಚುವಲ್ ಫಂಡ್ಗಳಲ್ಲಿ ಅಗತ್ಯ ಎನಿಸಿದಾಗ ಹೂಡಿಕೆ ಹಣವನ್ನು ವಾಪಸ್ ಪಡೆದುಕೊಳ್ಳುವುದು ಸುಲಭ. ದುಡ್ಡಿನ ಅಗತ್ಯ ಬಿದ್ದಾಗ ಲಿಕ್ವಿಡ್ ಫಂಡ್ಗಳಲ್ಲಿ ಹೂಡಿಕೆ ಮೊತ್ತವನ್ನು 24 ಗಂಟೆಯೊಳಗೆ ನಗದೀಕರಣ ಮಾಡಲು ಸಾಧ್ಯವಿದೆ.
ಭಾರತೀಯ ಷೇರುಪೇಟೆ ನಿಯಂತ್ರಕವಾದ ಸೆಬಿ ನಿಯಮದ ಪ್ರಕಾರ, ಲಿಕ್ವಿಡ್ ಫಂಡ್ ಗಳು ಹೂಡಿಕೆದಾರರ ಹಣವನ್ನು ನಿಶ್ಚಿತ ಆದಾಯ ತಂದುಕೊಡುವ, 91 ದಿನಗಳಲ್ಲಿ ಮೆಚ್ಯೂರಿಟಿ ಹೊಂದುವಂತಹ ಸರ್ಕಾರಿ ಬಾಂಡ್ಗಳು, ಟ್ರೆಷರಿ ಬಿಲ್ಗಳು, ಕಮರ್ಷಿಯಲ್ ಪೇಪರ್ಗಳಲ್ಲಿ ತೊಡಗಿಸುತ್ತವೆ. ಸಾಮಾನ್ಯವಾಗಿ 7 ದಿನಗಳಿಂದ 1 ವರ್ಷದ ಒಳಗಿನ ಹೂಡಿಕೆಗಳಿಗೆ ಈ ಫಂಡ್ ಗಳು ಸರಿಹೊಂದುತ್ತವೆ. ಬ್ಯಾಂಕ್ ಉಳಿತಾಯ ಖಾತೆ ಮತ್ತು ಅಲ್ಪಾವಧಿ ನಿಶ್ಚಿತ ಠೇವಣಿಗಿಂತ ಕೊಂಚ ಹೆಚ್ಚು ಲಾಭಾಂಶ ಕೊಡುವ ಸಾಮರ್ಥ್ಯ ಲಿಕ್ವಿಡ್ ಫಂಡ್ಗಳಿಗೆ ಇದೆ.
ಸ್ಥಿರ ಠೇವಣಿಯಲ್ಲಿ ನಿರ್ದಿಷ್ಟ ಸಂದರ್ಭದಲ್ಲಿ ನಿಗದಿಯಾಗಿರುವ ಬಡ್ಡಿ ಗಳಿಕೆ ಹೂಡಿಕೆದಾರನಿಗೆ ಸಿಗುತ್ತದೆ. ಆದರೆ, ಲಿಕ್ವಿಡ್ ಮ್ಯೂಚುವಲ್ ಫಂಡ್ ಗಳು ಸರ್ಕಾರಿ ಬಾಂಡ್ ಗಳು, ಟ್ರೆಷರಿ ಬಿಲ್ ಗಳು, ಕಮರ್ಷಿಯಲ್ ಪೇಪರ್ಗಳಲ್ಲಿ ಹೂಡಿಕೆ ಮಾಡುವುದರಿಂದ ಗಳಿಕೆಯ ಸಾಧ್ಯತೆಯು ಕೊಂಚ ಹೆಚ್ಚಿರುತ್ತದೆ. ಆದರೆ, ನಿಮಗೆ ಗೊತ್ತಿರಲಿ ಲಿಕ್ವಿಡ್ ಮ್ಯೂಚುವಲ್ ಫಂಡ್ ಗಳಲ್ಲಿ ಈಕ್ವಿಟಿ ಮ್ಯೂಚುವಲ್ ಫಂಡ್ಗಳಲ್ಲಿ ಇರುವಷ್ಟು ಮಾರ್ಕೆಟ್ ರಿಸ್ಕ್ ಇಲ್ಲದಿದ್ದರೂ ಒಂದಷ್ಟು ರಿಸ್ಕ್ ಇದ್ದೇ ಇರುತ್ತದೆ.
ಗಮನಿಸಿ: ಲಿಕ್ವಿಡ್ ಫಂಡ್ ಸೇರಿ ಯಾವುದೇ ಮಾದರಿಯ ಮ್ಯೂಚುವಲ್ ಫಂಡ್ ಹೂಡಿಕೆಯಲ್ಲಿ ರಿಸ್ಕ್ ಇರುತ್ತದೆ. ಷೇರು ಮಾರುಕಟ್ಟೆ ಆಧಾರಿತವಾಗಿ ಲಾಭ-ನಷ್ಟ ಉಂಟಾಗುತ್ತದೆ. ನಾವು ಮಾಹಿತಿ ದೃಷ್ಟಿಯಿಂದ ಮಾತ್ರ ಲೇಖನ ಪ್ರಕಟಿಸಿದ್ದೇವೆ. ಯಾವುದೇ ಮಾದರಿಯ ಹೂಡಿಕೆ ಮಾಡುವ ಮುನ್ನ ತಜ್ಞರ ಸಲಹೆ ಪಡೆಯುವುದನ್ನು ಮರೆಯದಿರಿ.
