ಬೆಂಗಳೂರು: ಇತ್ತೀಚಿನ ವರ್ಷಗಳಲ್ಲಿ ಚಿನ್ನದ ಬೆಲೆ ಗಗನಕ್ಕೇರಿದ್ದು, ಚಿನ್ನಾಭರಣ ಖರೀದಿದಾರರಿಗೆ ಭರ್ಜರಿ ಲಾಭ ತಂದುಕೊಟ್ಟಿದೆ. ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆಯು ಭಾರಿ ಏರಿಕೆಯಾಗಿರುವುದರಿಂದ ಹಳೆಯ ಚಿನ್ನ ಅಥವಾ ಆಭರಣಗಳನ್ನು ಮಾರಾಟ ಮಾಡಿ ಹಣ ಗಳಿಸಲು ಇದು ಸಕಾಲವಾಗಿದೆ. ಆದರೆ, ನಿಮ್ಮ ಬಳಿಯಿರುವ ಹಳೆಯ ಚಿನ್ನಕ್ಕೆ ಮಾರುಕಟ್ಟೆಯಲ್ಲಿ ಸಿಗುವ ನಿಖರವಾದ ಮೌಲ್ಯ ಎಷ್ಟು ಎಂಬುದು ಹಲವು ಪ್ರಮುಖ ಅಂಶಗಳನ್ನು ಅವಲಂಬಿಸಿದೆ. ಮಾರುಕಟ್ಟೆ ದರ ಒಂದೇ ಆದರೂ, ಜ್ಯುವೆಲ್ಲರ್ಸ್ ನೀಡುವ ಒಟ್ಟು ಮೊತ್ತವು ಕೆಲವು ಪ್ರಮುಖ ಸಂಗತಿಗಳ ಆಧಾರದ ಮೇಲೆ ಬದಲಾಗುತ್ತದೆ. ಹಳೆಯ ಚಿನ್ನವನ್ನು ಮಾರಾಟ ಮಾಡುವ ಮುನ್ನ ತಿಳಿದುಕೊಳ್ಳಬೇಕಾದ ಪ್ರಮುಖ 7 ಅಂಶಗಳು ಇಲ್ಲಿವೆ.
- ಚಿನ್ನದ ಶುದ್ಧತೆ: ಆಭರಣಗಳು 18, 22 ಅಥವಾ 24 ಕ್ಯಾರೆಟ್ ಶುದ್ಧತೆಯನ್ನು ಹೊಂದಿರಬಹುದು. ಶುದ್ಧತೆ ಹೆಚ್ಚಿದ್ದಷ್ಟೂ ಪ್ರತಿ ಗ್ರಾಂಗೆ ಹೆಚ್ಚಿನ ಮೌಲ್ಯ ಸಿಗುತ್ತದೆ.
- ನಿಖರವಾದ ತೂಕ: ಆಭರಣದಲ್ಲಿರುವ ಹರಳುಗಳು, ಮಣಿಗಳ ತೂಕವನ್ನು ಚಿನ್ನದ ಮೌಲ್ಯದಿಂದ ಕಡಿತಗೊಳಿಸಲಾಗುತ್ತದೆ. ಕೇವಲ ಅಚ್ಚ ಚಿನ್ನದ ತೂಕವನ್ನು ಮಾತ್ರ ಪರಿಗಣಿಸಲಾಗುತ್ತದೆ. ಉದಾಹರಣೆಗೆ, ಹರಳು ಇರುವ 20 ಗ್ರಾಂ ಉಂಗುರ ಮಾರಾಟ ಮಾಡಲು ಹೋದಾಗ, ಹರಳು ತೆಗೆದರೆ 18 ಗ್ರಾಂ ಆಗಬಹುದು. ಮಳಿಗೆಯವರು ನಿಮಗೆ 18 ಗ್ರಾಂ ಚಿನ್ನದ ಬೆಲೆ ನೀಡುತ್ತಾರೆ.
- ಚಿನ್ನದ ಖರೀದಿ ದರ: ಮಳಿಗೆಗಳಲ್ಲಿ ಪ್ರದರ್ಶಿಸುವ ಮಾರಾಟ ದರಕ್ಕೂ, ಹಳೆಯ ಚಿನ್ನವನ್ನು ಖರೀದಿಸುವಾಗ ನೀಡುವ ದರಕ್ಕೂ ವ್ಯತ್ಯಾಸವಿರುತ್ತದೆ. ನಿಮ್ಮ ಆಭರಣದ ಶುದ್ಧತೆಗೆ ಯಾವ ದರ ಅನ್ವಯಿಸುತ್ತದೆ ಎಂಬುದನ್ನು ಮೊದಲು ಸ್ಪಷ್ಟಪಡಿಸಿಕೊಳ್ಳಿ.
- ಮೇಕಿಂಗ್ ಚಾರ್ಜಸ್: ನೀವು ಹೊಸ ಆಭರಣ ಖರೀದಿಸುವಾಗ ಪಾವತಿಸಿದ ಮೇಕಿಂಗ್ ಚಾರ್ಜ್ ಅಥವಾ ತಯಾರಿಕಾ ಶುಲ್ಕವನ್ನು, ಹಳೆಯ ಚಿನ್ನ ಮಾರುವಾಗ ಮರುಪಾವತಿಸಲಾಗುವುದಿಲ್ಲ ಎಂಬುದನ್ನು ನೆನಪಿಡಿ.
- ಪರೀಕ್ಷೆ ಮತ್ತು ಕಡಿತಗಳು: ಜ್ಯುವೆಲ್ಲರ್ ಗಳು ಚಿನ್ನದ ಶುದ್ಧತೆಯನ್ನು ಪರೀಕ್ಷಿಸಿ, ತಮ್ಮ ಮೌಲ್ಯಮಾಪನ ನಿಯಮಗಳ ಪ್ರಕಾರ ಸ್ವಲ್ಪ ಪ್ರಮಾಣದ ಕಡಿತ ಮಾಡಿಕೊಳ್ಳುತ್ತಾರೆ. ಒಪ್ಪಿಗೆ ಸೂಚಿಸುವ ಮುಂಚೆ ಸ್ಪಷ್ಟವಾದ ವಿವರಣೆಯನ್ನು ಕೇಳಿ ತಿಳಿದುಕೊಳ್ಳಿ.
- ಹಾಲ್ ಮಾರ್ಕ್ ಪರಿಶೀಲನೆ: ಬಿಐಎಸ್ ಹಾಲ್ಮಾರ್ಕ್ ಹೊಂದಿರುವ ಆಭರಣಗಳು ಅದರ ಶುದ್ಧತೆಯನ್ನು ಖಚಿತಪಡಿಸಲು ಸಹಾಯ ಮಾಡುತ್ತವೆ. ಆದರೂ ಇದು ನಿರ್ದಿಷ್ಟ ಮರುಮಾರಾಟ ಬೆಲೆಯನ್ನು ಖಾತರಿಪಡಿಸುವುದಿಲ್ಲ.
- ಮರುಖರೀದಿ ನೀತಿ: ನೀವು ಹಿಂದೆ ಆಭರಣ ಖರೀದಿಸಿದ ಅಂಗಡಿಯಲ್ಲೇ ಮಾರಾಟ ಮಾಡುತ್ತಿದ್ದರೆ ಅಥವಾ ಬೇರೆ ಕಡೆಗೆ ಹೋಗುತ್ತಿದ್ದರೆ ಅಲ್ಲಿನ ನಿಯಮಗಳು ಮತ್ತು ಮೂಲ ಬಿಲ್ ನ ಅವಶ್ಯಕತೆಯ ಬಗ್ಗೆ ಪರಿಶೀಲಿಸುವುದು ಒಳ್ಳೆಯದು.
