ಬೆಂಗಳೂರು: ಡಿಜಿಟಲ್ ಯುಗದಲ್ಲಿ ಹಣವನ್ನು ಹೂಡಿಕೆ ಮಾಡಲು ಕೂಡ ಹತ್ತಾರು ಡಿಜಿಟಲ್ ಪ್ಲಾಟ್ ಫಾರ್ಮ್ ಗಳಿವೆ. ಹಾಗಾಗಿ, ಪ್ರತಿ ತಿಂಗಳು ಅಥವಾ ಒಮ್ಮೆಯೇ ದೊಡ್ಡ ಮೊತ್ತವನ್ನು ಡಿಜಿಟಲ್ ವೇದಿಕೆಗಳ ಮೂಲಕ ಹೆಚ್ಚಿನ ಜನ ಹೂಡಿಕೆ ಮಾಡುತ್ತಾರೆ. ಅದರಲ್ಲೂ, ಮ್ಯೂಚುವಲ್ ಫಂಡ್ ಗಳಲ್ಲಿ ಹೆಚ್ಚಿನವರು ಹೂಡಿಕೆ ಮಾಡುತ್ತಾರೆ. ಹೀಗೆ ಹೂಡಿಕೆ ಮಾಡಿದ ಹಣವನ್ನು ಸುರಕ್ಷಿತಗೊಳಿಸಲು, ಹೆಚ್ಚಿನ ಭದ್ರತೆ ನೀಡಲು ಸೆಬಿ ಈಗ ಹೊಸ ನಿಯಮ ಜಾರಿಗೆ ತಂದಿದೆ.
ಹೌದು, ಮ್ಯೂಚುವಲ್ ಫಂಡ್ ನಲ್ಲಿ ಹೂಡಿಕೆ ಮಾಡಿದ ಹಣವನ್ನು ಅಥವಾ ನಿಮ್ಮ ಪೋರ್ಟ್ ಫೋಲಿಯೋವನ್ನು ಲಾಕ್ ಮಾಡುವ ಹೊಸ ವ್ಯವಸ್ಥೆಯನ್ನು ಸೆಬಿ ಜಾರಿಗೆ ತಂದಿದೆ. ಹೌದು, ನೀವು ಎಂಎಫ್ ಸೆಂಟ್ರಲ್ ಎಂಬ ಡಿಜಿಟಲ್ ಪ್ಲಾಟ್ ಫಾರ್ಮ್ ನಲ್ಲಿ ನಿಮ್ಮ ಮ್ಯೂಚುವಲ್ ಫಂಡ್ ಹೂಡಿಕೆಯಲ್ಲಿರುವ ಹಣವನ್ನು ಫ್ರೀಜ್ ಮಾಡಬಹುದಾಗಿದೆ. ಅಂದರೆ, ಬೇರೆಯವರು ನಿಮ್ಮ ಖಾತೆಯಿಂದ ಹಣ ಹಿಂಪಡೆಯುವುದು ಸೇರಿ ಯಾವುದೇ ಚಟುವಟಿಕೆ ಕೈಗೊಳ್ಳುವುದರಿಂದ ಇದು ತಡೆಯುತ್ತದೆ.
ಏನಿದು ಎಂಎಫ್ ಸೆಂಟ್ರಲ್?
ಎಂಎಫ್ ಸೆಂಟ್ರಲ್ (MF Central) ಎಂಬುದು ಭಾರತದ ಪ್ರಮುಖ ರಿಜಿಸ್ಟ್ರಾರ್ ಗಳಾದ CAMS ಮತ್ತು KFintech ಜಂಟಿಯಾಗಿ ಅಭಿವೃದ್ಧಿಪಡಿಸಿದ ಅಧಿಕೃತ ಪ್ಲಾಟ್ ಫಾರ್ಮ್ ಆಗಿದೆ. ಇದರಲ್ಲಿರುವ ‘CAS Lock’ (Consolidated Account Statement Lock) ಒಂದು ಅತ್ಯಾಧುನಿಕ ಭದ್ರತಾ ವೈಶಿಷ್ಟ್ಯವಾಗಿದೆ. ನಿಮ್ಮ ಅನುಮತಿಯಿಲ್ಲದೆ ನಿಮ್ಮ ಮ್ಯೂಚುವಲ್ ಫಂಡ್ ಯುನಿಟ್ ಗಳನ್ನು ಯಾರೂ ಮಾರಾಟ ಮಾಡಲು ಅಥವಾ ವರ್ಗಾಯಿಸಲು ಸಾಧ್ಯವಾಗದಂತೆ ಇದು ತಡೆಯುತ್ತದೆ.
ಆನ್ ಲೈನ್ ಹ್ಯಾಕಿಂಗ್ ಅಥವಾ ಅನಧಿಕೃತ ವ್ಯಕ್ತಿಗಳು ನಿಮ್ಮ ಪೋರ್ಟ್ ಫೋಲಿಯೋಗೆ ಪ್ರವೇಶ ಪಡೆಯದಂತೆ ತಡೆಯಲು ಈ ‘ಲಾಕ್’ ಸೌಲಭ್ಯವನ್ನು ಬಳಸಬಹುದು. ನೀವು ಹೂಡಿಕೆ ಮಾಡಿದ ಹಣವನ್ನು ತುರ್ತಾಗಿ ಹಿಂಪಡೆಯುವ ಅವಶ್ಯಕತೆ ಇಲ್ಲದಿದ್ದಾಗ, ಅದನ್ನು ಸುರಕ್ಷಿತವಾಗಿಡಲು ಈ ಲಾಕ್ ಅನ್ನು ಆನ್ ಲಾಕ್ ಮಾಡಬಹುದು. ನೀವು ಹಣ ಹಿಂಪಡೆಯಲು ಬಯಸಿದಾಗ, ಎಂಎಫ್ ಸೆಂಟ್ರಲ್ ಆ್ಯಪ್ ಅಥವಾ ವೆಬ್ ಸೈಟ್ ಮೂಲಕ ಸುಲಭವಾಗಿ ‘ಅನ್ ಲಾಕ್’ ಮಾಡಬಹುದು. ಹೊಸ ಸುರಕ್ಷತಾ ವ್ಯವಸ್ಥೆಯು ಏಪ್ರಿಲ್ 30ರಿಂದ ಜಾರಿಗೆ ಬಂದಿದೆ.
ಇದನ್ನೂ ಓದಿ : ಭಾರತದ ಆಟೋಮೊಬೈಲ್ ಮಾರುಕಟ್ಟೆಯಲ್ಲಿ ಹೊಸ ಸಂಚಲನಕ್ಕೆ ರೆನಾಲ್ಟ್ ಸಜ್ಜು : ಬಹುನಿರೀಕ್ಷಿತ ಕಾರುಗಳ ಬಿಡುಗಡೆಗೆ ಬೃಹತ್ ಯೋಜನೆ!
