ಬೆಂಗಳೂರು: ದೇಶದಲ್ಲಿ ಚಿನ್ನದ ಬೆಲೆ ಜಾಸ್ತಿಯಾಗುತ್ತಲೇ ಇದೆ. ಕಳೆದ ದಸರಾ, ದೀಪಾವಳಿ ಬಳಿಕ ಅಲ್ಪ ಇಳಿಕೆ ಕಂಡಿದ್ದ ಚಿನ್ನದ ಬೆಲೆಯೀಗ ದಿನೇದಿನೆ ಜಾಸ್ತಿಯಾಗುತ್ತಿದೆ. 10 ಗ್ರಾಂ ತೂಕದ 24 ಕ್ಯಾರಟ್ ನ ಚಿನ್ನದ ಬೆಲೆಯು 1.4 ಲಕ್ಷ ರೂಪಾಯಿ ದಾಟಿದೆ. 10 ಗ್ರಾಂ ತೂಕದ 22 ಕ್ಯಾರಟ್ ಚಿನ್ನದ ಬೆಲೆಯೂ 1.3 ಲಕ್ಷ ರೂಪಾಯಿ ಸಮೀಪವಿದೆ. ಇದೇ ರೀತಿ ಜಾಸ್ತಿಯಾದರೆ 2026ರಲ್ಲಿ ಚಿನ್ನದ ಬೆಲೆಯು ಒಂದೂವರೆ ಲಕ್ಷ ರೂಪಾಯಿ ದಾಟುವುದು ಖಚಿತ ಎಂದೇ ಹೇಳಲಾಗುತ್ತಿದೆ. 2 ಲಕ್ಷ ರೂಪಾಯಿ ಆದರೂ ಅಚ್ಚರಿ ಇಲ್ಲ ಎಂದು ಹೇಳಲಾಗುತ್ತಿದೆ.
ಹೌದು, ಗೋಲ್ಡ್ ಮನ್ ಸಚ್ಸ್, ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ಹಾಗೂ ಕೋಟಕ್ ಸೆಕ್ಯುರಿಟೀಸ್ ವರದಿ ಪ್ರಕಾರ, 2026ರಲ್ಲಿ ಚಿನ್ನದ ಬೆಲೆಯಲ್ಲಿ ಶೇ.20-30ರಷ್ಟು ಜಾಸ್ತಿಯಾಗಲಿದೆ ಎಂದು ತಿಳಿದು ಬಂದಿದೆ. ಅಂದರೆ, 10 ಗ್ರಾಂ ಚಿನ್ನದ ಬೆಲೆಯು 2026ರಲ್ಲಿ ಒಂದೂವರೆ ಲಕ್ಷ ರೂಪಾಯಿಯಿಂದ 1.75 ಲಕ್ಷ ರೂಪಾಯಿವರೆಗೆ ಜಾಸ್ತಿಯಾಗಲಿದೆ ಎಂದು ವರದಿಗಳು ತಿಳಿಸಿವೆ. ಹಾಗಾಗಿ, ಚಿನ್ನ ಖರೀದಿಸುವವರಿಗೆ ಇದೇ ಸೂಕ್ತ ಸಮಯ ಎಂದು ಹೇಳಲಾಗುತ್ತಿದೆ.
ಅಮೆರಿಕದ ಡಾಲರ್ ಮೌಲ್ಯ ಕಳೆದ ಕೆಲವು ವರ್ಷಗಳಿಂದ ಕುಸಿಯುತ್ತಿರುವುದು ಚಿನ್ನದ ಬೆಲೆ ಏರಿಕೆಯಾಗಲು ಪ್ರಮುಖ ಕಾರಣ ಎಂದು ಹೇಳಲಾಗುತ್ತಿದೆ. ಡಾಲರ್ ವೀಕ್ ಆದರೆ ಸಾಕು, ಪ್ರಪಂಚದಾದ್ಯಂತ ಚಿನ್ನದ ಜಾಸ್ತಿಯಾಗುತ್ತದೆ. ರಿಸ್ಕ್ ಬೇಡ ಅಂತ ಬೇರೆ ದೇಶಗಳ ಸೆಂಟ್ರಲ್ ಬ್ಯಾಂಕ್ಗಳು ಕೂಡ ಡಾಲರ್ ಮೇಲಿನ ಅವಲಂಬನೆ ಬಿಟ್ಟು ಟನ್ ಗಟ್ಟಲೆ ಚಿನ್ನವನ್ನು ಖರೀದಿಸುತ್ತಿವೆ. ಇದು ಕೂಡ ಹಳದಿ ಲೋಹದ ಬೆಲೆಯನ್ನು ಜಾಸ್ತಿ ಮಾಡುತ್ತಿವೆ ಎಂದು ವರದಿಗಲು ತಿಳಿಸಿವೆ.
ಇದರ ಜತೆಗೆ ಬೆಳ್ಳಿಯ ಬೆಲೆಯೂ ಗಗನಕ್ಕೇರುತ್ತಿದೆ. ಒಂದು ಕೆ.ಜಿ ಬೆಳ್ಳಿ ಬೆಲೆಯು 2 ಲಕ್ಷ ರೂಪಾಯಿ ದಾಟಿದ್ದು, 2026ರಲ್ಲಿ ಇದು 3 ಲಕ್ಷ ರೂಪಾಯಿ ದಾಟಬಹುದು ಎಂದು ನಿರೀಕ್ಷಿಸಲಾಗಿದೆ. ಅದರಲ್ಲೂ, ಭಾರತದಲ್ಲೀಗ ಮದುವೆ ಸೀಸನ್ ಆರಂಭವಾಗಿರುವ ಕಾರಣ ಚಿನ್ನದ ಬೆಲೆ ಜಾಸ್ತಿಯಾಗುವ ಎಲ್ಲ ಸಾಧ್ಯತೆಗಳಿವೆ.
ಇದನ್ನೂ ಓದಿ:ಚಿನ್ನವನ್ನೂ ಮೀರಿಸಿದ ಬೆಳ್ಳಿ ಓಟ: ಸಾರ್ವಕಾಲಿಕ ದಾಖಲೆ ಬರೆದ ಬೆಳ್ಳಿ ದರ ; ಹೂಡಿಕೆಗೆ ಇದು ಸಕಾಲವೇ?
