ಬೆಂಗಳೂರು: ಹೀರೋ ಮೋಟೋಕಾರ್ಪ್ನ ಜನಪ್ರಿಯ ಎಲೆಕ್ಟ್ರಿಕ್ ಮೊಬಿಲಿಟಿ ಬ್ರ್ಯಾಂಡ್ ‘ವಿಡಾ’ ತನ್ನ ಎಲೆಕ್ಟ್ರಿಕ್ ಸ್ಕೂಟರ್ ಶ್ರೇಣಿಯನ್ನು ಮತ್ತಷ್ಟು ವಿಸ್ತರಿಸಿದೆ. ಮಾರುಕಟ್ಟೆಯಲ್ಲಿ ತನ್ನ ಪ್ರಾಬಲ್ಯ ಸಾಧಿಸುವ ನಿಟ್ಟಿನಲ್ಲಿ ವಿಡಾ ಹೊಸ ವಿಎಕ್ಸ್2 ಗೋ ಎಫ್ಬಿ (Vida VX2 Go FB) ವೇರಿಯೆಂಟ್ವನ್ನು ಬಿಡುಗಡೆ ಮಾಡಿದೆ. ರಿಮೂವಬಲ್ (ತೆಗೆಯಬಹುದಾದ) ಬ್ಯಾಟರಿ ಆಯ್ಕೆಗಳ ಜೊತೆಗೆ ಇದೀಗ 3.1kWh ಸಾಮರ್ಥ್ಯದ ಫಿಕ್ಸೆಡ್ ಬ್ಯಾಟರಿಯ ಸ್ಕೂಟರ್ ಅನ್ನು ಪರಿಚಯಿಸುವ ಮೂಲಕ ಗ್ರಾಹಕರಿಗೆ ವಿಡಾ ಮತ್ತೊಂದು ಹೊಸ ಆಯ್ಕೆಯನ್ನು ಒದಗಿಸಿದೆ. ದೆಹಲಿಯ ಎಕ್ಸ್-ಶೋರೂಂ ಬೆಲೆಯ ಪ್ರಕಾರ ಈ ಹೊಸ ಸ್ಕೂಟರ್ 1.13 ಲಕ್ಷ ರೂಪಾಯಿಗಳಿಗೆ ಲಭ್ಯವಿದೆ.
ಪುನರ್ವಿದ್ಯುದ್ದೀಕರಣದ (ಚಾರ್ಜಿಂಗ್) ಹೊಸ ಆಯ್ಕೆ
ಈ ಹಿಂದೆ ರಿಮೂವಬಲ್ ಬ್ಯಾಟರಿ ವ್ಯವಸ್ಥೆಗೆ ಮಾತ್ರ ಸೀಮಿತವಾಗಿದ್ದ ವಿಎಕ್ಸ್2 ಮಾದರಿಗೆ ಇದೀಗ ಡೈರೆಕ್ಟ್-ಪ್ಲಗ್ ಚಾರ್ಜಿಂಗ್ ಸೌಲಭ್ಯದ ಫಿಕ್ಸೆಡ್ ಬ್ಯಾಟರಿಯನ್ನು ಅಳವಡಿಸಲಾಗಿದೆ. ವಾಹನ ಸವಾರರ ದೈನಂದಿನ ಬಳಕೆ ಮತ್ತು ಅವರ ಮನೆಯ ಚಾರ್ಜಿಂಗ್ ವ್ಯವಸ್ಥೆಗೆ ಅನುಗುಣವಾಗಿ ಫಿಕ್ಸೆಡ್ ಮತ್ತು ರಿಮೂವಬಲ್ ಬ್ಯಾಟರಿ ನಡುವೆ ತಮಗೆ ಸೂಕ್ತವಾದದ್ದನ್ನು ಆಯ್ಕೆ ಮಾಡಿಕೊಳ್ಳುವ ಅವಕಾಶವನ್ನು ಗ್ರಾಹಕರಿಗೆ ಒದಗಿಸುವುದೇ ಈ ಹೊಸ ಸೇರ್ಪಡೆಯ ಮುಖ್ಯ ಉದ್ದೇಶವಾಗಿದೆ.
ಬ್ಯಾಟರಿ ಸಾಮರ್ಥ್ಯ ಮತ್ತು ಮೈಲೇಜ್
ಹೊಸ ವಿಡಾ ವಿಎಕ್ಸ್2 ಗೋ ಎಫ್ಬಿ ಸ್ಕೂಟರ್ 3.1kWh ಸಾಮರ್ಥ್ಯದ ಫಿಕ್ಸೆಡ್ ಬ್ಯಾಟರಿ ಪ್ಯಾಕ್ ಹೊಂದಿದ್ದು, ಒಂದು ಬಾರಿ ಪೂರ್ಣ ಚಾರ್ಜ್ ಮಾಡಿದರೆ 128 ಕಿ.ಮೀ (ಐಡಿಸಿ ಪ್ರಮಾಣೀಕರಣ) ಚಲಿಸುವ ಸಾಮರ್ಥ್ಯವನ್ನು ಹೊಂದಿದೆ. 6kW ಪೀಕ್ ಔಟ್ಪುಟ್ ಒದಗಿಸುವ ಸ್ವಿಂಗ್ಆರ್ಮ್-ಮೌಂಟೆಡ್ ಎಲೆಕ್ಟ್ರಿಕ್ ಮೋಟಾರ್ ಅನ್ನು ಇದು ಹೊಂದಿದೆ. ಈ ಮೋಟಾರ್ ಮೂಲಕ ಸ್ಕೂಟರ್ ಗಂಟೆಗೆ ಗರಿಷ್ಠ 70 ಕಿ.ಮೀ ವೇಗದಲ್ಲಿ ಚಲಿಸಬಲ್ಲದು ಎಂದು ಕಂಪನಿ ಹೇಳಿಕೊಂಡಿದೆ. ಡಿಬಿಸಿ ಫಾಸ್ಟ್ ಚಾರ್ಜಿಂಗ್ ಸೌಲಭ್ಯವನ್ನು ಇದು ಬೆಂಬಲಲಿಸಲಿದ್ದು, ಶೇಕಡಾ 0 ರಿಂದ 80 ರಷ್ಟು ಚಾರ್ಜ್ ಆಗಲು ಕೇವಲ 65 ನಿಮಿಷಗಳ ಸಮಯಾವಕಾಶ ಸಾಕಾಗುತ್ತದೆ ಎಂದು ಹೀರೋ ಮೋಟೋಕಾರ್ಪ್ ತಿಳಿಸಿದೆ.
ಆಕರ್ಷಕ ವೈಶಿಷ್ಟ್ಯಗಳು ಹಾಗೂ ಒಳವಿನ್ಯಾಸ
ತಾಂತ್ರಿಕವಾಗಿ ಹಲವು ವಿಶೇಷತೆಗಳನ್ನು ಹೊಂದಿರುವ ಈ ಎಲೆಕ್ಟ್ರಿಕ್ ಸ್ಕೂಟರ್ 4.3 ಇಂಚಿನ ಎಲ್ಸಿಡಿ ಇನ್ಸ್ಟ್ರುಮೆಂಟ್ ಕ್ಲಸ್ಟರ್ ಒಳಗೊಂಡಿದೆ. ಇದು ಸ್ಮಾರ್ಟ್ಫೋನ್ ಕನೆಕ್ಟಿವಿಟಿ ಹಾಗೂ ಟರ್ನ್-ಬೈ-ಟರ್ನ್ ನ್ಯಾವಿಗೇಷನ್ನಂತಹ ಆಧುನಿಕ ಸೌಲಭ್ಯಗಳನ್ನು ಬೆಂಬಲಿಸುತ್ತದೆ. ಇದರ ಜೊತೆಗೆ 27.2 ಲೀಟರ್ ಸಾಮರ್ಥ್ಯದ ಅಂಡರ್-ಸೀಟ್ ಸ್ಟೋರೇಜ್ ಮತ್ತು ಆರಾಮದಾಯಕ ಪ್ರಯಾಣಕ್ಕಾಗಿ ಉದ್ದವಾದ ಸಿಂಗಲ್-ಪೀಸ್ ಸೀಟ್ ಅಳವಡಿಸಲಾಗಿದೆ.
ಒಟ್ಟು 5 ವೇರಿಯೆಂಟ್ಗಳಲ್ಲಿ ಲಭ್ಯ
ಈ ಫಿಕ್ಸೆಡ್-ಬ್ಯಾಟರಿ ಮಾದರಿಯ ಪರಿಚಯದೊಂದಿಗೆ, ವಿಡಾ ವಿಎಕ್ಸ್2 ಸರಣಿಯಲ್ಲಿ ಈಗ 4 ವಿಭಿನ್ನ ಬ್ಯಾಟರಿ ಆಯ್ಕೆಗಳೊಂದಿಗೆ ಒಟ್ಟು 5 ವೇರಿಯೆಂಟ್ಗಳು ಲಭ್ಯವಿವೆ. ಇವುಗಳಲ್ಲಿ ಅತಿ ಚಿಕ್ಕದಾದ 2.2kWh ಬ್ಯಾಟರಿಯ ಮಾದರಿಯು 93 ಕಿ.ಮೀ ಮೈಲೇಜ್ ನೀಡಿದರೆ, ಅತಿ ದೊಡ್ಡದಾದ 4.4kWh ಬ್ಯಾಟರಿಯ ಮಾದರಿಯು 187 ಕಿ.ಮೀ ವರೆಗಿನ ಮೈಲೇಜ್ ನೀಡುವ ಸಾಮರ್ಥ್ಯವನ್ನು ಹೊಂದಿದೆ. ಗ್ರಾಹಕರು ತಮ್ಮ ಬಜೆಟ್ ಹಾಗೂ ಅಗತ್ಯಕ್ಕೆ ತಕ್ಕಂತೆ ಸೂಕ್ತವಾದ ಮಾದರಿಯನ್ನು ಆಯ್ಕೆ ಮಾಡಿಕೊಳ್ಳಲು ವಿಡಾ ಅವಕಾಶ ಕಲ್ಪಿಸಿದೆ.
ಇದನ್ನೂ ಓದಿ : ರಾಯಲ್ ಎನ್ಫೀಲ್ಡ್ ಶಾಟ್ಗನ್ 650 ಎಕ್ಸ್ ರಫ್ ಕ್ರಾಫ್ಟ್ಸ್ ಎಡಿಷನ್ : ಬಿಡುಗಡೆಯಾದ ಕೇವಲ 3 ನಿಮಿಷದಲ್ಲಿಯೇ ಸೋಲ್ಡ್ ಔಟ್!
