ಹೊರ್ಮುಜ್ ಜಲಸಂಧಿ ಬೆನ್ನಲ್ಲೇ ‘ಮಲಕ್ಕಾ ಜಲಸಂಧಿ’ಯತ್ತ ಟ್ರಂಪ್ ಕಣ್ಣು!

ವಾಷಿಂಗ್ಟನ್ : ಹೊರ್ಮುಜ್ ಜಲಸಂಧಿಯ ಬಳಿಕ ಇದೀಗ ಅಮೆರಿಕ, ಆಗ್ನೇಯ ಏಷ್ಯಾದತ್ತ ತನ್ನ ಗಮನ ಹರಿಸಿದೆ. ಅಮೆರಿಕ ಮತ್ತು ಇಂಡೋನೇಷ್ಯಾ ನಡುವೆ ಇತ್ತೀಚೆಗೆ ಏರ್ಪಟ್ಟಿರುವ ಹೊಸ ರಕ್ಷಣಾ ಒಪ್ಪಂದವು ಜಾಗತಿಕ ವ್ಯಾಪಾರದ ಪ್ರಮುಖ ಮಾರ್ಗವಾದ ‘ಮಲಕ್ಕಾ ಜಲಸಂಧಿ‘ಯ (Strait of Malacca) ಮೇಲೆ ವಾಷಿಂಗ್ಟನ್ ತನ್ನ ಹಿಡಿತ ಸಾಧಿಸಲು ಮುಂದಾಗುತ್ತಿರುವ ಸ್ಪಷ್ಟ ಸುಳಿವು ನೀಡಿದೆ.

ಏನಿದು ಒಪ್ಪಂದ?

ಈ ವಾರದ ಆರಂಭದಲ್ಲಿ ಅಂತಿಮಗೊಂಡ ಒಪ್ಪಂದದ ಪ್ರಕಾರ, ಇಂಡೋನೇಷ್ಯಾದ ವಾಯುಪ್ರದೇಶದಲ್ಲಿ ಅಮೆರಿಕದ ಮಿಲಿಟರಿ ವಿಮಾನಗಳಿಗೆ ಹೆಚ್ಚಿನ ಕಾರ್ಯಾಚರಣೆ ನಡೆಸಲು ಅವಕಾಶ ಕಲ್ಪಿಸಲಾಗಿದೆ. ಇದನ್ನು ಉಭಯ ರಾಷ್ಟ್ರಗಳ ರಕ್ಷಣಾ ಸಹಕಾರದ ಹೆಜ್ಜೆ ಎಂದು ಅಧಿಕೃತವಾಗಿ ಬಿಂಬಿಸಲಾಗಿದ್ದರೂ, ಹಿಂದೂ ಮಹಾಸಾಗರ ಮತ್ತು ಪೂರ್ವ ಏಷ್ಯಾವನ್ನು ಬೆಸೆಯುವ ಮಲಕ್ಕಾ ಜಲಸಂಧಿಯ ಮೇಲೆ ಅಮೆರಿಕದ ಕಣ್ಗಾವಲು ಮತ್ತು ಕಾರ್ಯಾಚರಣೆಯ ವ್ಯಾಪ್ತಿಯನ್ನು ಹೆಚ್ಚಿಸುವ ಕಾರ್ಯತಂತ್ರ ಇದರ ಹಿಂದಿದೆ.

ಇಂಡೋನೇಷ್ಯಾ, ಮಲೇಷ್ಯಾ ಮತ್ತು ಸಿಂಗಾಪುರ ಜಂಟಿಯಾಗಿ ನಿಯಂತ್ರಿಸುವ ಈ ಮಾರ್ಗವು ಜಾಗತಿಕ ವ್ಯಾಪಾರದ ಬಹುದೊಡ್ಡ ಪಾಲನ್ನು ನಿಭಾಯಿಸುತ್ತದೆ. ಹೊರ್ಮುಜ್‌ನ ಆಚೆಗೂ ಇಂಡೋ-ಪೆಸಿಫಿಕ್ ಭದ್ರತಾ ಕಾರ್ಯತಂತ್ರವನ್ನು ಅಮೆರಿಕ ಮರುರೂಪಿಸುತ್ತಿದೆಯೇ ಎಂಬ ಚರ್ಚೆಗೆ ಈ ಬೆಳವಣಿಗೆ ಪುಷ್ಟಿ ನೀಡಿದೆ.

ಜಾಗತಿಕ ವ್ಯಾಪಾರದಲ್ಲಿ ಮಲಕ್ಕಾ ಪಾತ್ರ

ಜಾಗತಿಕ ತೈಲ ಸಾಗಣೆಗೆ ಕೇಂದ್ರವಾಗಿರುವ ಹೊರ್ಮುಜ್ ಜಲಸಂಧಿಗಿಂತ ಭಿನ್ನವಾಗಿ, ಮಲಕ್ಕಾ ಜಲಸಂಧಿಯು ಇಂಧನ ಪೂರೈಕೆ, ಎಲೆಕ್ಟ್ರಾನಿಕ್ಸ್, ಕೈಗಾರಿಕಾ ಘಟಕಗಳು ಹಾಗೂ ಸಿದ್ಧ ವಸ್ತುಗಳ ಸಾಗಣೆಯ ಪ್ರಮುಖ ವಾಣಿಜ್ಯ ಜೀವನಾಡಿಯಾಗಿದೆ. ಪೂರ್ವ ಏಷ್ಯಾದ ಆರ್ಥಿಕತೆಗಳಿಗೆ, ವಿಶೇಷವಾಗಿ ಇಂಧನ ಆಮದಿಗಾಗಿ ಈ ಮಾರ್ಗವನ್ನು ಅತಿಯಾಗಿ ಅವಲಂಬಿಸಿರುವ ಚೀನಾಕ್ಕೆ ಇದು ಅತ್ಯಂತ ನಿರ್ಣಾಯಕ.

ಬೀಜಿಂಗ್‌ನ ಈ ಅವಲಂಬನೆಯನ್ನೇ ಭೌಗೋಳಿಕ-ರಾಜಕೀಯದಲ್ಲಿ “ಮಲಕ್ಕಾ ಡೈಲಮ್ಮಾ” (ಮಲಕ್ಕಾ ಸಂದಿಗ್ಧತೆ) ಎಂದು ಕರೆಯಲಾಗುತ್ತದೆ. ಅಮೆರಿಕವು ನೇರ ಆರ್ಥಿಕ ಅವಲಂಬನೆಯನ್ನು ಹೊಂದಿಲ್ಲದಿದ್ದರೂ, ಭವಿಷ್ಯದ ಯಾವುದೇ ಸಂಘರ್ಷದ ಸನ್ನಿವೇಶದಲ್ಲಿ ಈ ಕಿರಿದಾದ ಜಲಸಂಧಿಯನ್ನು ತನ್ನ ಕಾರ್ಯತಂತ್ರ ಮತ್ತು ಮಿಲಿಟರಿ ಅಸ್ತ್ರವಾಗಿ ಬಳಸಿಕೊಳ್ಳುವ ದೂರದೃಷ್ಟಿ ಹೊಂದಿದೆ.

ಮಲಕ್ಕಾ ಜಲಸಂಧಿಯ ಸುತ್ತ ಬದಲಾಗುತ್ತಿರುವ ಈ ಚಲನಶೀಲತೆಯು ಜಾಗತಿಕ ಮಟ್ಟದಲ್ಲಿ ಭಾರತದ ಪ್ರಾಮುಖ್ಯತೆಯನ್ನೂ ಹೆಚ್ಚಿಸಿದೆ. ಜಲಸಂಧಿಯ ಪಶ್ಚಿಮ ಭಾಗಕ್ಕೆ ಸಮೀಪದಲ್ಲಿರುವ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು ಭಾರತಕ್ಕೆ ನೈಸರ್ಗಿಕವಾಗಿಯೇ ಕಣ್ಗಾವಲಿನ ಅನುಕೂಲವನ್ನು ಒದಗಿಸಿವೆ. ಕ್ಯಾಂಪ್‌ಬೆಲ್ ಕೊಲ್ಲಿಯಲ್ಲಿರುವ ಭಾರತದ ದಕ್ಷಿಣದ ವಾಯುನೆಲೆಯು ಪ್ರಮುಖ ಸಮುದ್ರ ಮಾರ್ಗಗಳನ್ನು ಮೇಲ್ವಿಚಾರಣೆ ಮಾಡಲು ತಕ್ಕ ಅನುವು ಮಾಡಿಕೊಡುತ್ತದೆ. ಮುಂಬರುವ ದಿನಗಳಲ್ಲಿ ಈ ಭಾಗದಲ್ಲಿ ನಡೆಯುವ ಮೂಲಸೌಕರ್ಯಗಳ ಅಭಿವೃದ್ಧಿಯು ಭಾರತದ ಕಡಲ ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸಲಿದೆ. ಚೀನಾದ ಪ್ರಭಾವವನ್ನು ಸಮತೋಲನಗೊಳಿಸುವ ನಿಟ್ಟಿನಲ್ಲಿ ಭಾರತದ ಈ ಭೌಗೋಳಿಕ ಸಾಮೀಪ್ಯವು ಅಮೆರಿಕ-ಭಾರತ ನಡುವಿನ ಭದ್ರತಾ ಸಹಕಾರಕ್ಕೆ ದಿಕ್ಸೂಚಿಯಾಗಬಲ್ಲದು.

ಅಮೆರಿಕದ ಯೋಜನೆಗಳಿಗೆ ಪ್ರಾದೇಶಿಕ ಸವಾಲುಗಳು

ಮಲಕ್ಕಾ ಜಲಸಂಧಿಯಲ್ಲಿ ಅಮೆರಿಕದ ಯಾವುದೇ ವಿಸ್ತೃತ ಪಾತ್ರವು ಪ್ರಾದೇಶಿಕ ಸವಾಲುಗಳನ್ನು ಎದುರಿಸಬೇಕಾಗುತ್ತದೆ. ಈ ಜಲಸಂಧಿಯ ನಿಯಂತ್ರಣವನ್ನು ಹಂಚಿಕೊಂಡಿರುವ ಇಂಡೋನೇಷ್ಯಾ ಮತ್ತು ಮಲೇಷ್ಯಾ ರಾಷ್ಟ್ರಗಳು, ತಮ್ಮ ಸಾರ್ವಭೌಮತ್ವ ಮತ್ತು ಕಡಲ ಗಡಿಗಳ ಬಗ್ಗೆ ದೀರ್ಘಕಾಲದ ಸೂಕ್ಷ್ಮತೆಗಳನ್ನು ಹೊಂದಿವೆ. ಮತ್ತೊಂದೆಡೆ, ಸಿಂಗಾಪುರವು ಸಣ್ಣ ಭಾಗವನ್ನು ನಿಯಂತ್ರಿಸುತ್ತಿದ್ದರೂ, ತನ್ನ ಸುಧಾರಿತ ಬಂದರು ಮೂಲಸೌಕರ್ಯ ಮತ್ತು ಬಂಕರಿಂಗ್ ಕಾರ್ಯಾಚರಣೆಗಳ ಮೂಲಕ ವಾಣಿಜ್ಯ ವ್ಯವಸ್ಥೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ. ಈ ಕಡಲ ವಲಯದ ಆರ್ಥಿಕತೆಯೇ ಸಿಂಗಾಪುರದ ಜೀವಾಳವಾಗಿದೆ. ಇತ್ತೀಚಿನ ಜಾಗತಿಕ ಕಡಲ ನಿರ್ಬಂಧಗಳು ಮತ್ತು ಸುಂಕದ ಮೇಲಿನ ಚರ್ಚೆಗಳು ಆಗ್ನೇಯ ಏಷ್ಯಾದಲ್ಲಿ ಕಳವಳವನ್ನು ಹೆಚ್ಚಿಸಿದ್ದು, ವಾಷಿಂಗ್ಟನ್‌ನ ಪ್ರಸ್ತುತ ನಡೆಯು ಏಕಕಾಲದಲ್ಲಿ ಬಹುಪಾಲು ಆಯಕಟ್ಟಿನ ಕಡಲ ಮಾರ್ಗಗಳನ್ನು ಭದ್ರಪಡಿಸಿಕೊಳ್ಳುವ ಯತ್ನವಾಗಿದೆ.

ಇದನ್ನೂ ಓದಿ : ‘ತಕ್ಕ ಉತ್ತರ ನೀಡುತ್ತೇನೆ’ – ಪಕ್ಷದ ವಿರುದ್ಧ ಗುಡುಗಿದ ಅಬ್ದುಲ್ ಜಬ್ಬಾರ್!