ಬೆಂಗಳೂರು : ಡಿಜಿಟಲ್ ಯುಗದಲ್ಲಿ ಯುಪಿಐ ಮೂಲಕ ಹಣ ವರ್ಗಾವಣೆ, ಪಾವತಿ ತುಂಬ ಸುಲಭವಾಗಿದೆ. ಆದರೆ, ಕೆಲವೊಮ್ಮೆ ತಾಂತ್ರಿಕ ದೋಷ ಅಥವಾ ನೆಟ್ ವರ್ಕ್ ಸಮಸ್ಯೆಯಿಂದಾಗಿ ಹಣ ಪಾವತಿ ವಿಫಲವಾಗುತ್ತದೆ. ಆದರೆ ನಿಮ್ಮ ಬ್ಯಾಂಕ್ ಖಾತೆಯಿಂದ ಹಣ ಕಡಿತಗೊಳ್ಳುತ್ತದೆ. ಇಂತಹ ಸಂದರ್ಭದಲ್ಲಿ ಆತಂಕಪಡುವ ಅಗತ್ಯವಿಲ್ಲ. ಆರ್ ಬಿಐ ಮತ್ತು ಎನ್ ಪಿಸಿಐ ನಿಯಮಗಳ ಪ್ರಕಾರ, ಕಡಿತಗೊಂಡ ಹಣವು ಸ್ವಯಂಚಾಲಿತವಾಗಿ ನಿಮ್ಮ ಖಾತೆಗೆ ಜಮಾ ಆಗುತ್ತದೆ. ಆದರೆ, ಜಮೆಯಾಗದಿದ್ದಾಗ ಏನು ಮಾಡಬೇಕು ಎಂಬುದರ ಮಾಹಿತಿ ಇಲ್ಲಿದೆ.
ತಕ್ಷಣವೇ ಮತ್ತೆ ಹಣ ಪಾವತಿಸಬೇಡಿ
ಪಾವತಿ ವಿಫಲವಾದ ತಕ್ಷಣ ಮತ್ತೆ ಅದೇ ವ್ಯಕ್ತಿ ಅಥವಾ ಮರ್ಚೆಂಟ್ ಗೆ ಹಣ ಕಳುಹಿಸಲು ಪ್ರಯತ್ನಿಸಬೇಡಿ. ಕೆಲವೊಮ್ಮೆ ಸರ್ವರ್ ದೋಷದಿಂದಾಗಿ ಹಣ ಖಾತೆಯಿಂದ ಕಡಿತಗೊಂಡರೂ, ಕೆಲವು ನಿಮಿಷಗಳ ನಂತರ ವ್ಯವಹಾರ ಪೂರ್ಣಗೊಳ್ಳಬಹುದು. ಕನಿಷ್ಠ 1 ಗಂಟೆ ಕಾಯುವುದು ಉತ್ತಮ.
ಆಟೋ-ರಿಫಂಡ್ ಗಾಗಿ ಕಾಯಿರಿ
ನಿಯಮಗಳ ಪ್ರಕಾರ, ವಿಫಲವಾದ ವ್ಯವಹಾರಗಳಿಗೆ ಹಣವು ಸ್ವಯಂಚಾಲಿತವಾಗಿ ಮರುಪಾವತಿಯಾಗುತ್ತದೆ. ವ್ಯಕ್ತಿಯಿಂದ ವ್ಯಕ್ತಿಗೆ ಆದ ವಹಿವಾಟಿನ ವೇಳೆ 1 ದಿನದಲ್ಲಿ ರಿಫಂಡ್ ಆಗುತ್ತದೆ. ಯಾವುದಾದರೂ ಮಳಿಗೆ ಅಥವಾ ಅಂಗಡಿಯಲ್ಲಿ ಆದರೆ 5 ದಿನ ಬೇಕಾಗುತ್ತದೆ.
ಆ್ಯಪ್ ಮೂಲಕ ದೂರು ದಾಖಲಿಸಿ (UDIR)
ನಿಗದಿತ ಸಮಯದೊಳಗೆ ಹಣ ಮರಳಿ ಬಾರದಿದ್ದರೆ, ನೀವು ಬಳಸಿದ ಯುಪಿಐ ಆ್ಯಪ್ ಮೂಲಕವೇ ದೂರು ನೀಡಬಹುದು. ಆ್ಯಪ್ ನಲ್ಲಿ ‘Transaction History’ಗೆ ಹೋಗಿ. ವಿಫಲವಾದ ವ್ಯವಹಾರವನ್ನು ಆಯ್ಕೆ ಮಾಡಿ. ‘Help’, ‘Raise Dispute’ ಅಥವಾ ‘Report Issue’ ಆಯ್ಕೆಯ ಮೇಲೆ ಕ್ಲಿಕ್ ಮಾಡಿ ದೂರು ಸಲ್ಲಿಸಿ.
ನಿಮ್ಮ ಬ್ಯಾಂಕ್ ಅನ್ನು ಸಂಪರ್ಕಿಸಿ
ಆ್ಯಪ್ ನಲ್ಲಿಯೂ ಪರಿಹಾರ ಸಿಗದಿದ್ದರೆ, ಹಣ ಕಡಿತಗೊಂಡ ನಿಮ್ಮ ಬ್ಯಾಂಕಿನ ಗ್ರಾಹಕ ಸೇವಾ ಕೇಂದ್ರವನ್ನು ಸಂಪರ್ಕಿಸಿ. ಅಲ್ಲಿ ‘Transaction ID’ ಅಥವಾ ‘RRN’ (Reference Retrieval Number) ಸಂಖ್ಯೆಯನ್ನು ನೀಡಿ ವಿಚಾರಿಸಿ. ಇದರ ಜತೆಗೆ ಎನ್ ಪಿಸಿಐ ಹೆಲ್ಪ್ ಲೈನ್ 1800 102 5624 ಅಥವಾ 1800 120 1740 ಗೆ ಕರೆ ಮಾಡಬಹುದು. ಹಾಗೆಯೇ, upihelp@npci.org.in ಗೆ ಮೇಲ್ ಮಾಡಿಯೂ ಪರಿಹಾರ ಕಂಡುಕೊಳ್ಳಬಹುದು.
ಇದನ್ನೂ ಓದಿ : ಮಂಗಳೂರಲ್ಲಿ ಕಡಲಬ್ಬರಕ್ಕೆ ಸಿಲುಕಿ ಬೋಟ್ ಮುಳುಗಡೆ : 6 ಮೀನುಗಾರರ ರಕ್ಷಣೆ
