ಬೆಂಗಳೂರು : ಬ್ಯಾಂಕ್ ಖಾತೆ ತೆರೆಯಲು, ಸರ್ಕಾರದ ಯೋಜನೆಗಳ ಲಾಭ ಪಡೆಯಲು, ಹೊಸ ಸಿಮ್ ಕಾರ್ಡ್ ಖರೀದಿ ಸೇರಿ ಹತ್ತಾರು ಸಂದರ್ಭಗಳಲ್ಲಿ ಆಧಾರ್ ಕಾರ್ಡ್ ಪ್ರಮುಖ ಗುರುತಿನ ಚೀಟಿಯಾಗಿರುತ್ತದೆ. ಆದರೆ, ಇಂತಹ ಆಧಾರ್ ಕಾರ್ಡ್ ನಲ್ಲಿ ಹೆಸರು, ವಿಳಾಸ ಬದಲಾವಣೆ ಸೇರಿ ಯಾವುದೇ ಅಪ್ಡೇಟ್ ಮಾಡಬೇಕಾದರೆ ಇದುವರೆಗೆ ಹಲವು ದಾಖಲೆ ನೀಡಬೇಕಿತ್ತು. ಆದರೆ, ಈಗ ದಾಖಲೆಗಳಿಲ್ಲದೆ ಆಧಾರ್ ಕಾರ್ಡ್ ಅಪ್ಡೇಟ್ ಮಾಡಬಹುದಾಗಿದೆ.
ಹೌದು, ವೋಟರ್ ಐಡಿ, ವಿಳಾಸ ಇರುವ ದಾಖಲೆ, ಮನೆ ಬಾಡಿಗೆ ಕರಾರು ಪತ್ರ ಸೇರಿ ಯಾವುದೇ ದಾಖಲೆಗಳಿಲ್ಲದೆ ಈಗ ಆಧಾರ್ ಅಪ್ಡೇಟ್ ಮಾಡಬಹುದಾಗಿದೆ. ನಿಮ್ಮ ಬಳಿ ಸ್ವಂತ ದಾಖಲೆಗಳಿಲ್ಲದಿದ್ದರೆ, ನಿಮ್ಮ ಕುಟುಂಬದ ಮುಖ್ಯಸ್ಥರ (ಉದಾಹರಣೆಗೆ ತಂದೆ ಅಥವಾ ಪತಿ) ದಾಖಲೆ ಮತ್ತು ಅವರ ಒಪ್ಪಿಗೆ ಪತ್ರದೊಂದಿಗೆ ವಿಳಾಸ ಬದಲಿಸಬಹುದಾಗಿದೆ.
ಹೊಸ ನಿಯಮವು ಉದ್ಯೋಗದ ಕಾರಣ ಅಥವಾ ಮದುವೆಯಾಗಿ ಹೊಸ ಸ್ಥಳಕ್ಕೆ ಬಂದವರಿಗೆ, ತಮ್ಮ ಹೆಸರಿನಲ್ಲಿ ಯಾವುದೇ ವಿಳಾಸದ ಪುರಾವೆಗಳಿಲ್ಲದ ಮಕ್ಕಳಿಗೆ ಮತ್ತು ವಿದ್ಯಾರ್ಥಿಗಳಿಗೆ ಹೊಸ ನಿಯಮದಿಂದ ಅನುಕೂಲವಾಗಲಿದೆ. ಅಡ್ರೆಸ್ ಪ್ರೂಫ್ ಗಾಗಿ ಕಚೇರಿಗಳಿಗೆ ಅಲೆಯುವ ಕಿರಿಕಿರಿ ಇರುವುದಿಲ್ಲ.
ಅಪ್ಡೇಟ್ ಮಾಡಿಸುವುದು ಹೇಗೆ?
ಆಧಾರ್ ಕೇಂದ್ರಕ್ಕೆ ಭೇಟಿ ನೀಡಿ: ಫೋಟೋ ಅಥವಾ ಫೋನ್ ನಂಬರ್ ಬದಲಾಯಿಸಲು ನೀವು ಹತ್ತಿರದ ಆಧಾರ್ ಸೇವಾ ಕೇಂದ್ರಕ್ಕೆ ಹೋಗಬೇಕು. ಇದಕ್ಕೆ ನಿಗದಿತ ಶುಲ್ಕ (50 ರಿಂದ 100 ರೂ.) ಇರುತ್ತದೆ. ಆನ್ ಲೈನ್ ಮೂಲಕವೂ ಸುಲಭವಾಗಿ ಅಪ್ಡೇಟ್ ಮಾಡಬಹುದಾಗಿದೆ. ನಿಮ್ಮ ಆಧಾರ್ ಕಾರ್ಡ್ ಮಾಡಿಸಿ 10 ವರ್ಷಗಳಾಗಿದ್ದರೆ, ಗುರುತು ಮತ್ತು ವಿಳಾಸದ ಪುರಾವೆಯನ್ನು ಆನ್ ಲೈನ್ ನಲ್ಲಿ (myAadhaar portal-https://myaadhaar.uidai.gov.in/portal) ಅಪ್ಡೇಟ್ ಮಾಡಲು ಸರ್ಕಾರ ಆಗಾಗ ಅವಕಾಶ ನೀಡುತ್ತದೆ. ಇದು ಉಚಿತ ಪ್ರಕ್ರಿಯೆಯಾಗಿದೆ.
ಇದನ್ನೂ ಓದಿ : ಎಣ್ಣೆ ಏಟಲ್ಲಿ ಸ್ನೇಹಿತನ ಮೊಬೈಲ್ ಬಚ್ಚಿಟ್ಟ.. ಪ್ರಶ್ನೆ ಮಾಡಿದ್ದಕ್ಕೆ ಕೊಂದೇ ಬಿಟ್ಟ!
