ಬೆಂಗಳೂರು : ಇದೇನಿದ್ದರೂ EMIಗಳ ಕಾಲ. ಮನೆಗೊಂದು ಫ್ರಿಡ್ಜ್, ಇಷ್ಟದ ಐಫೋನ್ಗಳು ಸೇರಿ ಹತ್ತಾರು ವಸ್ತುಗಳನ್ನು ಈಗ ಇಎಂಐ ಮೂಲಕವೇ ಜನ ಖರೀದಿಸುತ್ತಾರೆ. ಇನ್ನು, ಬೈಕ್, ಕಾರು, ಫ್ಲ್ಯಾಟ್ ಖರೀದಿಗಂತೂ ಇಎಂಐ ಕಡ್ಡಾಯ ಎಂಬಂತಾಗಿದೆ.
ಅದಕ್ಕೆ ತಕ್ಕಂತೆ, ಕ್ರೆಡಿಟ್ ಕಾರ್ಡ್ ಆಫರ್ಗಳು, ಬೈ ನೌ, ಪೇ ಲೇಟರ್ (Buy Now, Pay Later)ನಂತಹ ಸ್ಕೀಮ್ಗಳು ಜನರನ್ನು ಇಎಂಐಗಳತ್ತ ಸೆಳೆಯುತ್ತಿವೆ. ಆದರೆ, ನಮ್ಮ ಸಂಬಳಕ್ಕೆ ತಕ್ಕಂತೆ ಇಎಂಐ ಇದ್ದರೆ ಮಾತ್ರ ಸುರಕ್ಷಿತ. ಇಲ್ಲದಿದ್ದರೆ, ಸಾಲದ ಸುಳಿಗೆ ಸಿಲುಕಬೇಕಾಗುತ್ತದೆ ಎಂಬುದು ತಜ್ಞರ ಅಭಿಪ್ರಾಯವಾಗಿದೆ.
ಹೌದು.. ನಿಮ್ಮ ಸಂಬಳದಲ್ಲಿ ಇಂತಿಷ್ಟು ಪ್ರಮಾಣದ ಮೊತ್ತವನ್ನು ಮಾತ್ರ ಇಎಂಐ ಆಗಿ ಪಾವತಿಸುವಂತಿರಬೇಕು. ಸಂಬಳದ ಬಹುಪಾಲು ಭಾಗವು ಇಎಂಐ ಕಟ್ಟಲು ಹೋದರೆ, ಅದರಿಂದ ಮುಂದೆ ಸಂಕಷ್ಟಕ್ಕೆ ಸಿಲುಕಬೇಕಾಗುತ್ತದೆ. ಹಾಗಾಗಿಯೇ, ಸಂಬಳ ಎಷ್ಟೇ ಇರಲಿ, ಅದರ ಶೇ.40ರಷ್ಟು ಮೊತ್ತವನ್ನು ಮಾತ್ರ ಇಎಂಐ ಆಗಿ ಆಯ್ಕೆ ಮಾಡಿಕೊಳ್ಳಬೇಕು ಎಂದು ತಜ್ಞರು ಸಲಹೆ ನೀಡುತ್ತಲೇ ಇದ್ದಾರೆ.
ಉದಾಹರಣೆಗೆ, ನಿಮ್ಮ ಸಂಬಳ ತಿಂಗಳಿಗೆ 50 ಸಾವಿರ ರೂಪಾಯಿ ಇದೆ ಎಂದು ಇಟ್ಟುಕೊಳ್ಳಿ. ಇದರಲ್ಲಿ ಶೇ.40ರಷ್ಟು ಅಂದರೆ, 20 ಸಾವಿರ ರೂಪಾಯಿ ಮಾತ್ರ ಇಎಂಐ ಇರಬೇಕು. ಇದಕ್ಕಿಂತ ಜಾಸ್ತಿ ಇದ್ದರೆ ನೀವು ಭವಿಷ್ಯದ ದಿನಗಳಲ್ಲಿ ಕಷ್ಟ ಎದುರಿಸಬೇಕಾಗುತ್ತದೆ. ಕುಟುಂಬದಲ್ಲಿ ಹಣಕಾಸು ತುರ್ತು ಪರಿಸ್ಥಿತಿ ಎದುರಾದರೆ ಸಾಲ ಮಾಡಬೇಕಾಗುತ್ತದೆ. ಹಾಗಾಗಿ, ಇಎಂಐ ಮೊತ್ತವು ಶೇ.40ಕ್ಕಿಂತ ಜಾಸ್ತಿ ಇರಬಾರದು ಎಂದು ತಜ್ಞರು ತಿಳಿಸಿದ್ದಾರೆ.
ನೀವು ಮನೆ ಖರೀದಿಸಿ, ಕಾರು ಕೊಂಡುಕೊಳ್ಳಿ, ಯಾವುದೇ ದುಬಾರಿ ವಸ್ತುಗಳನ್ನು ಖರೀದಿಸಿ. ಆದರೆ, ಯಾವಾಗಲೂ ಶೇ.40ರ ಅಲಿಖಿತ ನಿಯಮವನ್ನು ಮಾತ್ರ ಮರೆಯದಿರಿ. ಕುಟುಂಬದ ನಿರ್ವಹಣೆ, ದಿನಸಿ, ಮನೆ ಬಾಡಿಗೆ ಸೇರಿ ತಿಂಗಳಿಗೆ ಹತ್ತಾರು ಖರ್ಚುಗಳು ಬರುತ್ತವೆ. ಇದರ ನಡುವೆ ಉಳಿತಾಯವನ್ನೂ ಮಾಡಬೇಕಾಗುತ್ತದೆ. ಹಾಗಾಗಿ, ಇಎಂಐ ಪ್ರಮಾಣವು ಎಷ್ಟು ಕಡಿಮೆ ಇರುತ್ತದೆಯೋ ಅಷ್ಟು ಒಳ್ಳೆಯದು ಎಂಬುದು ಹಣಕಾಸು ತಜ್ಞರ ಸಲಹೆಯಾಗಿದೆ.
ಇದನ್ನೂ ಓದಿ : ಸೀಲ್ ಮಾಡಿದ್ದ ಲೈಫ್ ಜಾಕೆಟ್ಸ್, ಪ್ರವಾಸಿಗರ ಕಿರುಚಾಟ : ಜಬಲ್ಪುರ್ ಬೋಟ್ ದುರಂತದ ವಿಡಿಯೋ ವೈರಲ್!
