ಬೆಂಗಳೂರು : ಇತ್ತೀಚಿನ ದಿನಗಳಲ್ಲಿ ಟೆಸ್ಟ್ ಕ್ರಿಕೆಟ್ ಪಂದ್ಯಗಳು ಕೇವಲ ಮೂರೇ ದಿನಗಳಲ್ಲಿ ಮುಕ್ತಾಯಗೊಳ್ಳುತ್ತಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಇಂಗ್ಲೆಂಡ್-ಪಾಕಿಸ್ತಾನ ಹಾಗೂ ಆಸ್ಟ್ರೇಲಿಯಾ-ಬಾಂಗ್ಲಾದೇಶ ನಡುವಿನ ಇತ್ತೀಚಿನ ಟೆಸ್ಟ್ ಪಂದ್ಯಗಳು ಮೂರು ದಿನದೊಳಗೆ ಅಂತ್ಯಕಂಡ ಬೆನ್ನಲ್ಲೇ, ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಹಾಗೂ ಖ್ಯಾತ ವೀಕ್ಷಕ ವಿವರಣೆಗಾರ ಮೈಕಲ್ ಅಥರ್ಟನ್ ಈ ಬದಲಾವಣೆಯ ಹಿಂದಿನ ಪ್ರಮುಖ ಕಾರಣಗಳನ್ನು ವಿಶ್ಲೇಷಿಸಿದ್ದಾರೆ.
ತಮ್ಮ ಕಾಲದ ಕ್ರಿಕೆಟ್ಗೂ ಇಂದಿನ ಕ್ರಿಕೆಟ್ಗೂ ಇರುವ ವ್ಯತ್ಯಾಸವನ್ನು ಅಂಕಿ-ಅಂಶಗಳ ಸಮೇತ ವಿವರಿಸಿದ ಅಥರ್ಟನ್, 1990ರ ದಶಕದಲ್ಲಿ ಕೇವಲ ಶೇ. 7ರಷ್ಟು ಟೆಸ್ಟ್ ಪಂದ್ಯಗಳು ಮಾತ್ರ ಮೂರು ಅಥವಾ ಅದಕ್ಕಿಂತ ಕಡಿಮೆ ದಿನಗಳಲ್ಲಿ ಮುಕ್ತಾಯಗೊಳ್ಳುತ್ತಿದ್ದವು ಎಂದು ನೆನಪಿಸಿಕೊಂಡಿದ್ದಾರೆ. ಆದರೆ ಇಂದು ಆ ಪ್ರಮಾಣ ಶೇ. 20ಕ್ಕೆ ಏರಿಕೆಯಾಗಿದೆ. 1946ರಿಂದ 2000ದ ನಡುವೆ ಎರಡು ದಿನಗಳಲ್ಲಿ ಮುಕ್ತಾಯಗೊಂಡ ಒಂದೇ ಒಂದು ಟೆಸ್ಟ್ ಪಂದ್ಯ ಇರಲಿಲ್ಲ. ಆದರೆ ಕಳೆದ ಒಂದು ದಶಕದಲ್ಲಿ ಬರೋಬ್ಬರಿ ಒಂಬತ್ತು ಟೆಸ್ಟ್ ಪಂದ್ಯಗಳು ಕೇವಲ ಎರಡೇ ದಿನಕ್ಕೆ ಫಲಿತಾಂಶ ಕಂಡಿವೆ ಎಂಬ ಆಘಾತಕಾರಿ ಮಾಹಿತಿಯನ್ನು ಅವರು ಸ್ಕೈ ಸ್ಪೋರ್ಟ್ಸ್ ಜೊತೆಗಿನ ಚರ್ಚೆಯಲ್ಲಿ ಹಂಚಿಕೊಂಡಿದ್ದಾರೆ.
ಟಿ20 ಕ್ರಿಕೆಟ್ ಪ್ರಭಾವ ಮತ್ತು ಬ್ಯಾಟರ್ಗಳ ರಿಸ್ಕ್
ಟೆಸ್ಟ್ ಪಂದ್ಯಗಳು ಬೇಗನೆ ಮುಕ್ತಾಯಗೊಳ್ಳಲು ಪ್ರಮುಖ ಕಾರಣವಾಗಿ ಟಿ20 ಕ್ರಿಕೆಟ್ ಅನ್ನು ಅಥರ್ಟನ್ ಹೆಸರಿಸಿದ್ದಾರೆ. ಟಿ20 ಮಾದರಿಯು ಬ್ಯಾಟರ್ಗಳ ಮನಸ್ಥಿತಿಯನ್ನು ಬದಲಾಯಿಸಿದ್ದು, ಅವರು ಹೆಚ್ಚು ರಿಸ್ಕ್ ತೆಗೆದುಕೊಂಡು ಆಡಲು ಮುಂದಾಗುತ್ತಿದ್ದಾರೆ. ವೇಗವಾಗಿ ರನ್ ಗಳಿಸುವ ಭರದಲ್ಲಿ ಹೆಚ್ಚು ರಿಸ್ಕ್ ತೆಗೆದುಕೊಂಡಷ್ಟೂ, ವಿಕೆಟ್ ಒಪ್ಪಿಸುವ ಸಾಧ್ಯತೆಗಳು ಹೆಚ್ಚಾಗುತ್ತವೆ. ಇದು ಇನಿಂಗ್ಸ್ ತ್ವರಿತವಾಗಿ ಪತನಗೊಂಡು ಪಂದ್ಯ ಬೇಗನೆ ಮುಗಿಯಲು ಕಾರಣವಾಗುತ್ತಿದೆ ಎಂದು ಅವರು ವಿಶ್ಲೇಷಿಸಿದ್ದಾರೆ.
ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಮತ್ತು ಪಿಚ್ಗಳ ಬದಲಾವಣೆ
ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಪರಿಚಯಿಸಿದ ಬಳಿಕ ಪಿಚ್ಗಳ ಸ್ವರೂಪದಲ್ಲಿ ಭಾರಿ ಬದಲಾವಣೆಯಾಗಿದೆ. ಪ್ರತಿಯೊಂದು ತಂಡವೂ ತಮ್ಮ ತವರಿನ ಲಾಭವನ್ನು ಗರಿಷ್ಠ ಮಟ್ಟದಲ್ಲಿ ಬಳಸಿಕೊಳ್ಳಲು ಪ್ರಯತ್ನಿಸುತ್ತಿವೆ. ಭಾರತದಲ್ಲಿ ಸ್ಪಿನ್ಗೆ ಹೆಚ್ಚು ನೆರವಾಗುವ ಟರ್ನಿಂಗ್ ಪಿಚ್ಗಳನ್ನು ಸಿದ್ಧಪಡಿಸಿದರೆ, ಇಂಗ್ಲೆಂಡ್ನಂತಹ ದೇಶಗಳಲ್ಲಿ ವೇಗಿಗಳಿಗೆ ನೆರವಾಗುವ ಸೀಮ್ ಪಿಚ್ಗಳನ್ನು ನಿರ್ಮಿಸಲಾಗುತ್ತಿದೆ. ಒಟ್ಟಾರೆಯಾಗಿ ಹೇಳುವುದಾದರೆ, ಟೆಸ್ಟ್ ಚಾಂಪಿಯನ್ಶಿಪ್ ಆರಂಭವಾದಾಗಿನಿಂದ ಬಹುತೇಕ ಪಿಚ್ಗಳು ಬೌಲರ್ಗಳಿಗೆ ಹೆಚ್ಚು ಅನುಕೂಲಕರವಾಗಿ ಬದಲಾಗಿವೆ. ಇದು ಬ್ಯಾಟರ್ಗಳ ಸವಾಲನ್ನು ಹೆಚ್ಚಿಸಿದೆ ಎಂದು ಅವರು ಹೇಳಿದ್ದಾರೆ.
ಡಿಆರ್ಎಸ್ ತಂತ್ರಜ್ಞಾನದ ಪ್ರಭಾವ
ತೀರ್ಪು ಮರುಪರಿಶೀಲನಾ ವ್ಯವಸ್ಥೆ (ಡಿಆರ್ಎಸ್) ಜಾರಿಗೆ ಬಂದಿರುವುದು ಕೂಡ ಪಂದ್ಯಗಳ ಅವಧಿ ಕಡಿಮೆಯಾಗಲು ಮತ್ತೊಂದು ಮುಖ್ಯ ಕಾರಣ. ಡಿಆರ್ಎಸ್ ತಂತ್ರಜ್ಞಾನವು ನಿಖರತೆಯನ್ನು ಹೆಚ್ಚಿಸಿರುವುದರಿಂದ, ಅಂಪೈರ್ಗಳು ಎಲ್ಬಿಡಬ್ಲ್ಯು ತೀರ್ಪುಗಳನ್ನು ನೀಡಲು ಹಿಂಜರಿಯುತ್ತಿಲ್ಲ. ಇದರಿಂದಾಗಿ ಬ್ಯಾಟರ್ಗಳು ಸುಲಭವಾಗಿ ವಿಕೆಟ್ ಕಳೆದುಕೊಳ್ಳುತ್ತಿದ್ದಾರೆ. ಇದರ ಜೊತೆಗೆ ಪ್ರಸ್ತುತ ಅಂತರರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಅತ್ಯುತ್ತಮ ಗುಣಮಟ್ಟದ ವೇಗದ ಬೌಲರ್ಗಳ ದಂಡೇ ಇರುವುದು ಕೂಡ ವಿಕೆಟ್ಗಳು ತ್ವರಿತವಾಗಿ ಪತನಗೊಳ್ಳಲು ನೆರವಾಗುತ್ತಿದೆ ಎಂದು ಅಥರ್ಟನ್ ವಿವರಿಸಿದ್ದಾರೆ.
ಇದನ್ನೂ ಓದಿ : ಚೆನ್ನೈ ಸೂಪರ್ ಕಿಂಗ್ಸ್ ಮುಖ್ಯ ಕೋಚ್ ಹುದ್ದೆ ನಿರಾಕರಿಸುವಂತೆ ದಿನೇಶ್ ಕಾರ್ತಿಕ್ಗೆ ಬದರಿನಾಥ್ ಸಲಹೆ
