ಸೆವುಟಾ (ಸ್ಪೇನ್) : ಉತ್ತರ ಆಫ್ರಿಕಾದ ಸ್ಪೇನ್ನ ಸಣ್ಣ ಪ್ರಾಂತ್ಯ ‘ಸೆವುಟಾ’ ಗಡಿಯಲ್ಲಿ ವಲಸಿಗರ ಬಿಕ್ಕಟ್ಟು ತೀವ್ರಗೊಂಡಿದೆ. ಮೊರಾಕೊ ಕಡೆಯಿಂದ ಸಾವಿರಾರು ಜನರು ಒಂದೇ ಬಾರಿಗೆ ಗಡಿ ಬೇಲಿಯನ್ನು ಮುರಿದು ಸ್ಪೇನ್ ಪ್ರದೇಶಕ್ಕೆ ನುಗ್ಗಲು ಯತ್ನಿಸಿದ್ದು, ಈ ವೇಳೆ ಉಂಟಾದ ಗೊಂದಲ ಹಾಗೂ ದುರಂತದಲ್ಲಿ ಕನಿಷ್ಠ 9 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ.
ಸ್ಥಳೀಯ ಗಡಿ ಕಾವಲು ಪಡೆಗಳು ಸಂಪೂರ್ಣವಾಗಿ ಹಿಡಿತ ಕಳೆದುಕೊಂಡ ಬೆನ್ನಲ್ಲೇ, ಪರಿಸ್ಥಿತಿಯನ್ನು ಹತೋಟಿಗೆ ತರಲು ಸ್ಪೇನ್ ಸರ್ಕಾರ ತನ್ನ ಸಶಸ್ತ್ರ ಪಡೆಗಳನ್ನು ಗಡಿಗೆ ರವಾನಿಸಿದೆ. ಗಡಿಯಲ್ಲಿ ಭದ್ರತೆಯನ್ನು ಮರುಸ್ಥಾಪಿಸಲು ಮತ್ತು ನಾಗರಿಕರ ರಕ್ಷಣೆಗೆ ಸೇನೆ ನೆರವಾಗಲಿದೆ ಎಂದು ಸರ್ಕಾರ ಪ್ರಕಟಿಸಿದೆ. ಪರಿಸ್ಥಿತಿಯ ಗಂಭೀರತೆಯನ್ನು ಅರಿತು ಸ್ಪೇನ್ ಪ್ರಧಾನಿ ಪೆಡ್ರೊ ಸ್ಯಾಂಚೆಝ್ ಹಾಗೂ ಗೃಹ ಸಚಿವರು ಶೀಘ್ರವೇ ಸೆವುಟಾಗೆ ಭೇಟಿ ನೀಡಲಿದ್ದಾರೆ. ಗಡಿಯಲ್ಲಿ ಶವಗಳು ನೀರಿನಲ್ಲಿ ತೇಲುತ್ತಿದ್ದು, ಸಂಪೂರ್ಣ ಗೊಂದಲದ ಮತ್ತು ಆತಂಕದ ವಾತಾವರಣ ನಿರ್ಮಾಣವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕಡಲ ಹಾದಿಯ ಮೂಲಕ ನುಸುಳುವಿಕೆ
ಹೆಚ್ಚಿನ ಸಂಖ್ಯೆಯ ವಲಸಿಗರು ಮೊರಾಕೊದ ತರಫಲ್ ಕಡಲತೀರದ ಮೂಲಕ ಈಜುತ್ತಾ ಅಥವಾ ಗಡಿ ಗೋಡೆಗಳನ್ನು ದಾಟಿ ಸ್ಪೇನ್ ತಲುಪುತ್ತಿದ್ದಾರೆ. ಇದರಲ್ಲಿ ಯುವಕರಷ್ಟೇ ಅಲ್ಲದೆ, ಮಹಿಳೆಯರು ಹಾಗೂ ಸಣ್ಣ ಮಕ್ಕಳಿರುವ ಕುಟುಂಬಗಳೂ ಸೇರಿವೆ. ಹಠಾತ್ತಾಗಿ ಸಾವಿರಾರು ಜನರು ನುಗ್ಗಿ ಬಂದಿದ್ದರಿಂದ ಸ್ಥಳೀಯ ನಿರಾಶ್ರಿತರ ಕೇಂದ್ರಗಳು ಭರ್ತಿಯಾಗಿದ್ದು, ನೂರಾರು ಜನರು ರಸ್ತೆಗಳಲ್ಲೇ ದಿನ ಕಳೆಯುವಂತಾಗಿದೆ. ಅಕ್ರಮವಾಗಿ ನುಸುಳಿರುವ ಪ್ರತಿಯೊಬ್ಬರನ್ನೂ ಆದಷ್ಟು ಬೇಗ ವಾಪಸ್ ಕಳುಹಿಸಲು ಸ್ಪೇನ್ ಹಾಗೂ ಮೊರಾಕೊ ಸರ್ಕಾರಗಳು ಒಪ್ಪಂದ ಮಾಡಿಕೊಂಡಿವೆ.
ಜಾಗತಿಕ ರಾಜಕೀಯ ವಲಯದಲ್ಲಿ ಸಂಚಲನ
ಈ ಬಿಕ್ಕಟ್ಟು ಯುರೋಪ್ನ ಇತರ ದೇಶಗಳ ಮೇಲೂ ಪ್ರಭಾವ ಬೀರಿದೆ. ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ತಮ್ಮ ದೇಶದ ಗಡಿ ಭದ್ರತೆಯ ಹಿತದೃಷ್ಟಿಯಿಂದ ಸ್ಪೇನ್ ಜೊತೆಗಿನ ಮುಕ್ತ ಗಡಿ ‘ಶೆಂಗೆನ್’ ಒಪ್ಪಂದವನ್ನು ಅಮಾನತುಗೊಳಿಸುವುದಾಗಿ ಎಚ್ಚರಿಸಿದ್ದಾರೆ. ಉತ್ತಮ ಆರ್ಥಿಕ ಭವಿಷ್ಯ ಮತ್ತು ಹಿಂಸಾಚಾರದಿಂದ ತಪ್ಪಿಸಿಕೊಳ್ಳಲು ಆಫ್ರಿಕಾ ಖಂಡದ ವಿವಿಧ ಭಾಗಗಳಿಂದ ಬರುವ ವಲಸಿಗರಿಗೆ ಸ್ಪೇನ್ ಪ್ರಮುಖ ಪ್ರವೇಶ ದ್ವಾರವಾಗಿದ್ದು, 2021ರ ನಂತರ ಕಂಡುಬಂದ ಅತಿ ದೊಡ್ಡ ಗಡಿ ಬಿಕ್ಕಟ್ಟು ಇದಾಗಿದೆ.
ಇದನ್ನೂ ಓದಿ : ‘ರಕ್ತಸಿಕ್ತ ಸಮವಸ್ತ್ರ, ಒಡೆದ ಹೆಲ್ಮೆಟ್ಗಳು’ : ಜಂತರ್ ಮಂತರ್ ಹಿಂಸಾಚಾರದ ಬಗ್ಗೆ ದಿಲ್ಲಿ ಪೊಲೀಸ್ ಕುಟುಂಬಸ್ಥರ ಆಕ್ರೋಶ!
