ರಜೆಯಲ್ಲಿ ಮನೆಗೆ ಮರಳುತ್ತಿದ್ದ ಯೋಧ ರಸ್ತೆ ಜಗಳಕ್ಕೆ ಬಲಿ : ಮಿಜೋರಾಂನಲ್ಲಿ ಥಳಿಸಿ ಕೊಂದ ಗುಂಪು

ಐಜ್ವಾಲ್ : ಜಮ್ಮು-ಕಾಶ್ಮೀರದಲ್ಲಿ ದೇಶದ ಗಡಿ ಕಾಯುತ್ತಿದ್ದ ಯೋಧರೊಬ್ಬರು ರಜೆ ಪಡೆದು ಸ್ವಗ್ರಾಮಕ್ಕೆ ಮರಳುತ್ತಿದ್ದಾಗ ಮಾರ್ಗಮಧ್ಯೆ ನಡೆದ ಕ್ಷುಲ್ಲಕ ರಸ್ತೆ ಜಗಳದಲ್ಲಿ ದುರಂತ ಅಂತ್ಯ ಕಂಡಿದ್ದಾರೆ. ಮಿಜೋರಾಂನ ಕೋಲಾಸಿಬ್ ಜಿಲ್ಲೆಯ ರಾಷ್ಟ್ರೀಯ ಹೆದ್ದಾರಿ-306ರಲ್ಲಿ ನಡೆದ ಈ ಭೀಕರ ರೋಡ್ ರೇಜ್(ರಸ್ತೆ ಜಗಳ) ಘಟನೆಯಲ್ಲಿ 29 ವರ್ಷದ ಜಕಾರಿಯಾ ಲಾಲ್ಹರಿಯಾತ್ಲುಅಂಗಾ ಎಂಬ ಯೋಧನನ್ನು ಗುಂಪೊಂದು ಹೊಡೆದು ಕೊಂದಿದೆ. ಘಟನೆಗೆ ಸಂಬಂಧಿಸಿದಂತೆ ಇಬ್ಬರು ಅಪ್ರಾಪ್ತರು ಸೇರಿದಂತೆ ಎಂಟು ಜನರನ್ನು ಪೊಲೀಸರು ಈಗಾಗಲೇ ಬಂಧಿಸಿದ್ದಾರೆ.

ಟ್ರಾಫಿಕ್ ಕಿರಿಕಿರಿ ಬಳಿಕ ಭೀಕರ ಹಲ್ಲೆ

ಅಸ್ಸಾಂ ರೆಜಿಮೆಂಟ್‌ನಲ್ಲಿ ಸೇವೆ ಸಲ್ಲಿಸುತ್ತಿದ್ದ ಜಕಾರಿಯಾ, ಸೆಪ್ಟೆಂಬರ್ 20ರಂದು ಲೆಂಗ್ಪುಯಿ ವಿಮಾನ ನಿಲ್ದಾಣದಿಂದ ತಮ್ಮ ಸ್ನೇಹಿತ ಜಾನ್ ಲಾಲ್ತಾನ್‌ಪುಯಾ ಅವರೊಂದಿಗೆ ಟ್ರಕ್‌ನಲ್ಲಿ ನ್ಯೂ ಬುಯಿಲಮ್ ಗ್ರಾಮದಲ್ಲಿದ್ದ ಮನೆಗೆ ತೆರಳುತ್ತಿದ್ದರು. ಈ ವೇಳೆ ಬುವಾಲ್ಪಟಿಯ ಬಳಿ ಕೆಟ್ಟ ರಸ್ತೆಯಿಂದಾಗಿ ಎದುರಿನಿಂದ ತಪ್ಪಾದ ಹಾದಿಯಲ್ಲಿ ಬರುತ್ತಿದ್ದ ಮತ್ತೊಂದು ಟ್ರಕ್ ಚಾಲಕನೊಂದಿಗೆ ಜಾನ್ ಮಾತುಕತೆ ನಡೆಸುತ್ತಿದ್ದರು.

ಇದೇ ವೇಳೆ ಪಿಕ್ನಿಕ್ ಮುಗಿಸಿಕೊಂಡು ವಾಪಸಾಗುತ್ತಿದ್ದ ಹಾಕಿ ತಂಡದ ಯುವಕರ ಗುಂಪೊಂದು ಸ್ಥಳಕ್ಕೆ ಆಗಮಿಸಿ ಜಾನ್ ಮೇಲೆ ದಿಢೀರ್ ಹಲ್ಲೆ ನಡೆಸಿದೆ. ಸ್ನೇಹಿತನನ್ನು ರಕ್ಷಿಸಲು ಮಧ್ಯಪ್ರವೇಶಿಸಿದ ಯೋಧ ಜಕಾರಿಯಾ ಮೇಲೆಯೂ ಕುಡಿದ ಮತ್ತಿನಲ್ಲಿದ್ದ ಯುವಕರ ಪಡೆ ಅಮಾನವೀಯವಾಗಿ ದಾಳಿ ಮಾಡಿದೆ. ಪರಿಣಾಮವಾಗಿ ಜಕಾರಿಯಾ ಸ್ಥಳದಲ್ಲೇ ಪ್ರಾಣ ಬಿಟ್ಟಿದ್ದರೆ, ಅವರ ಸ್ನೇಹಿತ ಸಣ್ಣಪುಟ್ಟ ಗಾಯಗಳೊಂದಿಗೆ ಬದುಕಿಳಿದಿದ್ದಾರೆ.

‘ಮನೆ ತಲುಪುವ ಮುನ್ನವೇ ದುರಂತ’: ತಾಯಿಯ ಕಣ್ಣೀರು

ಘಟನೆ ನಡೆಯುವ ಕೆಲವೇ ಕ್ಷಣಗಳ ಮೊದಲು ತಾಯಿಗೆ ಕರೆ ಮಾಡಿದ್ದ ಜಕಾರಿಯಾ, ಸಂಜೆ 6.30ರ ವೇಳೆಗೆ ಮನೆ ತಲುಪುವುದಾಗಿ ತಿಳಿಸಿದ್ದರು. ಆದರೆ ತಡವಾದಾಗ ಮತ್ತೆ ಕರೆ ಮಾಡಿದಾಗ ರಸ್ತೆ ಸರಿಯಿಲ್ಲ ಎಂದು ಹೇಳಿದ್ದರು. ಆ ಬಳಿಕ ಬಂದಿದ್ದು ಮಗನ ಸಾವಿನ ಸುದ್ದಿ. “ದೇಶವನ್ನು ಕಾಯಲು ಎಲ್ಲೋ ದೂರದಲ್ಲಿದ್ದು, ಕುಟುಂಬದೊಂದಿಗೆ ಸಮಯ ಕಳೆಯಲು ಮನೆಗೆ ಬರುತ್ತಿದ್ದ ಮಗನಿಗೆ ಇಂತಹ ಗತಿ ಬರುತ್ತದೆ ಎಂದು ನಾವು ಎಂದೂ ಊಹಿಸಿರಲಿಲ್ಲ. ತಪ್ಪಿತಸ್ಥರಿಗೆ ಕಠಿಣ ಶಿಕ್ಷೆಯಾಗಬೇಕು” ಎಂದು ಯೋಧನ ತಾಯಿ ಲಾಲ್ಥಾಜೋವಿ ಕಣ್ಣೀರಿಡುತ್ತಾ ನ್ಯಾಯಕ್ಕಾಗಿ ಆಗ್ರಹಿಸಿದ್ದಾರೆ.

ಕುಟುಂಬಕ್ಕಿದ್ದ ಏಕೈಕ ಆಸರೆ ಇಲ್ಲವಾಯಿತು

2017ರಲ್ಲಿ ಸೇನೆಗೆ ಸೇರಿದ ಜಕಾರಿಯಾ, ಕುಟುಂಬದ ಜವಾಬ್ದಾರಿಯನ್ನು ಸಂಪೂರ್ಣವಾಗಿ ತಮ್ಮ ಹೆಗಲ ಮೇಲೆ ಹೊತ್ತಿದ್ದರು. ಅವರ ತಂದೆಗೆ 80 ವರ್ಷ. 60 ವರ್ಷದ ತಾಯಿಗೆ ದುಡಿಯುವ ಶಕ್ತಿ ಇರಲಿಲ್ಲ. ಮನೆಯನ್ನು ಕಟ್ಟಿಸಲು ಸಾಲ ಮಾಡಿಕೊಂಡಿದ್ದ ಜಕಾರಿಯಾ, ಕುಟುಂಬಕ್ಕೆ ಏಕೈಕ ಆರ್ಥಿಕ ಆಸರೆಯಾಗಿದ್ದರು. ದೇಶದ ಗಡಿಯಲ್ಲಿ ಜೀವ ಪಣಕ್ಕಿಟ್ಟು ಸೇವೆ ಸಲ್ಲಿಸಿ ಬಂದ ಯೋಧ, ಸ್ವಂತ ರಾಜ್ಯದಲ್ಲೇ ಪುಂಡರ ಹಲ್ಲೆಗೆ ಬಲಿಯಾಗಿರುವುದು ಇಡೀ ಊರನ್ನು ಶೋಕ ಸಾಗರದಲ್ಲಿ ಮುಳುಗಿಸಿದೆ.

ಇದನ್ನೂ ಓದಿ : ಉದ್ಯೋಗಾಕಾಂಕ್ಷಿಗಳಿಗೆ ಗುಡ್ ನ್ಯೂಸ್ : 869 ಜೈಲರ್, ವಾರ್ಡರ್ ಹುದ್ದೆಗಳ ನೇಮಕಾತಿಗೆ ಅಧಿಸೂಚನೆ