ಬೆಂಗಳೂರು: ದಕ್ಷಿಣ ಕೊರಿಯಾದ ಪ್ರಮುಖ ತಂತ್ರಜ್ಞಾನ ಸಂಸ್ಥೆ ಸ್ಯಾಮ್ಸಂಗ್, ಭಾರತೀಯ ಮಾರುಕಟ್ಟೆಯಲ್ಲಿ ತನ್ನ ನೂತನ ಗ್ಯಾಲಕ್ಸಿ M17e 5G (Samsung Galaxy M17e 5G) ಸ್ಮಾರ್ಟ್ಫೋನ್ ಅನ್ನು ಮಾರ್ಚ್ 17 ರಂದು ಅಧಿಕೃತವಾಗಿ ಬಿಡುಗಡೆ ಮಾಡಲಿದೆ. ಬಿಡುಗಡೆಗೂ ಮುನ್ನವೇ ಈ ಫೋನ್ನ ಬೆಲೆ ಮತ್ತು ಪ್ರಮುಖ ವೈಶಿಷ್ಟ್ಯಗಳು ಸೋರಿಕೆಯಾಗಿದ್ದು, ಬಜೆಟ್ ಬೆಲೆಯಲ್ಲಿ ಅತ್ಯುತ್ತಮ ಫೀಚರ್ ಬಯಸುವ ಗ್ರಾಹಕರಲ್ಲಿ ಕುತೂಹಲ ಮೂಡಿಸಿದೆ.
ಪ್ರಸಿದ್ಧ ಟಿಪ್ಸ್ಟರ್ ಸಂಜು ಚೌಧರಿ ಅವರ ಮಾಹಿತಿಯ ಪ್ರಕಾರ, ಸ್ಯಾಮ್ಸಂಗ್ ಗ್ಯಾಲಕ್ಸಿ M17e 5G ಭಾರತದಲ್ಲಿ ಕೇವಲ 13,999 ರೂಪಾಯಿಗಳ ಆರಂಭಿಕ ಬೆಲೆಗೆ ದೊರೆಯುವ ಸಾಧ್ಯತೆಯಿದೆ. ಈ ಫೋನ್ ಬ್ಲಿಟ್ಜ್ ಬ್ಲೂ (Blitz Blue) ಮತ್ತು ವೈಬ್ ವೈಲೆಟ್ (Vibe Violet) ಎಂಬ ಎರಡು ಆಕರ್ಷಕ ಬಣ್ಣಗಳಲ್ಲಿ ಲಭ್ಯವಿರಲಿದ್ದು, ಅಮೆಜಾನ್ (Amazon) ಮೂಲಕ ಗ್ರಾಹಕರು ಇದನ್ನು ಖರೀದಿಸಬಹುದಾಗಿದೆ.
ದೀರ್ಘಕಾಲದ ಸಾಫ್ಟ್ವೇರ್ ಅಪ್ಡೇಟ್ ಮತ್ತು AI ತಂತ್ರಜ್ಞಾನ
ಈ ಸ್ಮಾರ್ಟ್ಫೋನ್ನ ಅತ್ಯಂತ ಗಮನಾರ್ಹ ಅಂಶವೆಂದರೆ ಅದರ ಸಾಫ್ಟ್ವೇರ್ ಬೆಂಬಲ. ಸ್ಯಾಮ್ಸಂಗ್ ಈ ಫೋನ್ಗೆ 6 ವರ್ಷಗಳ ಆಂಡ್ರಾಯ್ಡ್ ಓಎಸ್ ಅಪ್ಗ್ರೇಡ್ ಮತ್ತು 6 ವರ್ಷಗಳ ಭದ್ರತಾ ಅಪ್ಡೇಟ್ಗಳನ್ನು ನೀಡುವುದಾಗಿ ಘೋಷಿಸಿದೆ. ಅಂದರೆ, ಆಂಡ್ರಾಯ್ಡ್ 16 ಆಧಾರಿತ One UI 8 ನೊಂದಿಗೆ ಬರುವ ಈ ಫೋನ್ ಭವಿಷ್ಯದಲ್ಲಿ ಆಂಡ್ರಾಯ್ಡ್ 22 ವರೆಗೆ ಅಪ್ಡೇಟ್ ಪಡೆಯಲಿದೆ. ಇದರೊಂದಿಗೆ ಗೂಗಲ್ ಜೆಮಿನಿ (Google Gemini AI) ಮತ್ತು ‘ಸರ್ಕಲ್ ಟು ಸರ್ಚ್’ ನಂತಹ ಸುಧಾರಿತ AI ಫೀಚರ್ಗಳನ್ನು ಇದು ಹೊಂದಿರಲಿದೆ.
ತಾಂತ್ರಿಕ ವೈಶಿಷ್ಟ್ಯಗಳು
ಡಿಸ್ಪ್ಲೇ: 6.7 ಇಂಚಿನ HD+ ಸ್ಕ್ರೀನ್ ಜೊತೆಗೆ 120Hz ರಿಫ್ರೆಶ್ ರೇಟ್ ಹೊಂದಿದ್ದು, ಉತ್ತಮ ವೀಕ್ಷಣಾ ಅನುಭವ ನೀಡಲಿದೆ.
ಪ್ರೊಸೆಸರ್: ಮೀಡಿಯಾಟೆಕ್ ಡೈಮೆನ್ಸಿಟಿ 6300 (MediaTek Dimensity 6300) ಚಿಪ್ಸೆಟ್ ಅಳವಡಿಸಲಾಗಿದ್ದು, 5G ಕನೆಕ್ಟಿವಿಟಿಯನ್ನು ಬೆಂಬಲಿಸುತ್ತದೆ.
ಕ್ಯಾಮೆರಾ: ಹಿಂಭಾಗದಲ್ಲಿ 50 ಮೆಗಾಪಿಕ್ಸೆಲ್ ಪ್ರೈಮರಿ ಸೆನ್ಸಾರ್ ಮತ್ತು 2 ಮೆಗಾಪಿಕ್ಸೆಲ್ ಡೆಪ್ತ್ ಕ್ಯಾಮೆರಾ ಇದೆ. ಸೆಲ್ಫಿಗಾಗಿ 8 ಮೆಗಾಪಿಕ್ಸೆಲ್ ಫ್ರಂಟ್ ಕ್ಯಾಮೆರಾ ನೀಡಲಾಗಿದೆ.
ಬ್ಯಾಟರಿ: ಬರೋಬ್ಬರಿ 6,000mAh ಸಾಮರ್ಥ್ಯದ ಬ್ಯಾಟರಿ ಇದ್ದು, ಒಂದು ಬಾರಿ ಚಾರ್ಜ್ ಮಾಡಿದರೆ 26 ಗಂಟೆಗಳ ಕಾಲ ವಿಡಿಯೋ ಪ್ಲೇಬ್ಯಾಕ್ ನೀಡುತ್ತದೆ ಎಂದು ಕಂಪನಿ ಹೇಳಿಕೊಂಡಿದೆ. 14,000 ರೂ. ಒಳಗಿನ ಬೆಲೆಯಲ್ಲಿ ಈ ಫೋನ್ ಅತಿ ಹೆಚ್ಚು ಬ್ಯಾಟರಿ ಬ್ಯಾಕಪ್ ನೀಡುವ ಡಿವೈಸ್ ಆಗಿರಲಿದೆ.
ಕೇವಲ 8.2mm ದಪ್ಪವಿರುವ ಈ ಫೋನ್ ಗ್ಲಾಸ್ ಫೈಬರ್ ಬಲವರ್ಧಿತ ಪಾಲಿಮರ್ (GFRP) ಬ್ಯಾಕ್ ಪ್ಯಾನಲ್ ಮತ್ತು ಧೂಳು ಹಾಗೂ ನೀರಿನಿಂದ ರಕ್ಷಣೆ ಪಡೆಯಲು IP54 ರೇಟಿಂಗ್ ಹೊಂದಿದೆ. ಕಡಿಮೆ ಬೆಲೆಯಲ್ಲಿ ದೀರ್ಘಕಾಲ ಬಾಳಿಕೆ ಬರುವ ಮತ್ತು ಆಧುನಿಕ ತಂತ್ರಜ್ಞಾನವಿರುವ ಫೋನ್ ಹುಡುಕುತ್ತಿರುವವರಿಗೆ ಇದು ಉತ್ತಮ ಆಯ್ಕೆಯಾಗಲಿದೆ.
ಇದನ್ನೂ ಓದಿ : ಪೆಟ್ರೋಲ್-ಡೀಸೆಲ್ ಕಾರು ಬಿಟ್ಟು ಎಲೆಕ್ಟ್ರಿಕ್ಗೆ ಬದಲಾಗಿ.. ವಿನ್ಫಾಸ್ಟ್ನಿಂದ ವಿಶೇಷ 3% ರಿಯಾಯಿತಿ ಘೋಷಣೆ!
