ಬೆಂಗಳೂರು : PF ವಿತ್ ಡ್ರಾ ಮಾಡಬೇಕು ಎಂದರೆ ಮೊದಲೆಲ್ಲ ಪಿಎಫ್ ಕಚೇರಿಗೆ ಅಲೆಯಬೇಕಿತ್ತು. ಅಧಿಕಾರಿಗಳಿಗೆ ಮನವಿ ಮಾಡಬೇಕಿತ್ತು. ಇದಕ್ಕೆ ತಿಂಗಳುಗಟ್ಟಲೆ ಸಮಯ ಬೇಕಾಗುತ್ತಿತ್ತು. ಆದರೀಗ ವ್ಯವಸ್ಥೆ ಬದಲಾಗಿದೆ. ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ (EPFO) ತನ್ನ ಆನ್ ಲೈನ್ ಪೋರ್ಟಲ್ಅನ್ನು ಸಂಪೂರ್ಣವಾಗಿ ನವೀಕರಿಸಿದ್ದು, ಉದ್ಯೋಗಿಗಳು ತಮ್ಮ ಪ್ರಾವಿಡೆಂಟ್ ಫಂಡ್ ಖಾತೆಗಳನ್ನು ನಿರ್ವಹಿಸುವುದನ್ನು ಸುಲಭಗೊಳಿಸಿದೆ.
ಹೊಸ ಪೋರ್ಟಲ್ ಆರಂಭವಾಗಿರುವುದರಿಂದ, ಉದ್ಯೋಗಿಗಳು ಸಣ್ಣಪುಟ್ಟ ಕೆಲಸಗಳಿಗೂ ಇನ್ನು ಮುಂದೆ ಇಪಿಎಫ್ಒ ಕಚೇರಿಗಳಿಗೆ ಅಲೆಯುವುದು ಅಥವಾ ನೇರವಾಗಿ ಉದ್ಯೋಗದಾತರನ್ನು ಅವಲಂಬಿಸುವುದು ತಪ್ಪಲಿದೆ. ಸುಮಾರು 8 ಪ್ರಮುಖ ಸೇವೆಗಳು ಆನ್ ಲೈನ್ ನಲ್ಲಿ ಲಭ್ಯ ಇವೆ. ಅವುಗಳ ಮಾಹಿತಿ ಇಲ್ಲಿದೆ.
ಯುಎಎನ್ ಸಕ್ರಿಯಗೊಳಿಸುವಿಕೆ
ಸದಸ್ಯರು ಈಗ ಡಿಜಿಟಲ್ ಮೂಲಕ ತಮ್ಮ ಯುನಿವರ್ಸಲ್ ಅಕೌಂಟ್ ನಂಬರ್ (UAN) ಅನ್ನು ಸುಲಭವಾಗಿ ಜನರೇಟ್ ಮಾಡಬಹುದು ಅಥವಾ ಸಕ್ರಿಯಗೊಳಿಸಬಹುದು. UMANG ಆ್ಯಪ್ ಮೂಲಕ ಆಧಾರ್ ಆಧಾರಿತ ಫೇಸ್ ಅಥೆಂಟಿಕೇಶನ್ ಬಳಸಿ ಹೊಸ ಯುಎಎನ್ ಸಕ್ರಿಯಗೊಳಿಸಬಹುದು.
ಪಿಎಫ್ ಹಿಂಪಡೆಯುವಿಕೆ
ಫೈನಲ್ ಪಿಎಫ್ ಸೆಟಲ್ಮೆಂಟ್ ಹಾಗೂ ಅನಾರೋಗ್ಯ, ಶಿಕ್ಷಣ, ಮದುವೆ ಮತ್ತು ವಸತಿಯಂತಹ ತುರ್ತು ಅವಶ್ಯಕತೆಗಳಿಗಾಗಿ ಭಾಗಶಃ ಹಣವನ್ನು ಪಡೆಯಲು ಸದಸ್ಯರು ಈಗ ಆನ್ ಲೈನ್ ನಲ್ಲೇ ಅರ್ಜಿ ಸಲ್ಲಿಸಬಹುದು.
ಪಾಸ್ ಬುಕ್ ಸೇವೆಗಳು
ಉದ್ಯೋಗಿಗಳು ತಮ್ಮ ಇಪಿಎಫ್ ಪಾಸ್ ಬುಕ್ ಅನ್ನು ವೀಕ್ಷಿಸಬಹುದು ಮತ್ತು ಡೌನ್ ಲೋಡ್ ಮಾಡಿಕೊಳ್ಳಬಹುದು. ಇದರಲ್ಲಿ ಉದ್ಯೋಗದಾತರು ಮತ್ತು ಉದ್ಯೋಗಿಗಳ ಕೊಡುಗೆಗಳು, ಜಮಾ ಆಗಿರುವ ಬಡ್ಡಿ ಹಾಗೂ ಲಿಂಕ್ ಮಾಡಲಾದ ಪಿಎಫ್ ಖಾತೆಗಳ ವಹಿವಾಟಿನ ಇತಿಹಾಸವನ್ನು ಸುಲಭವಾಗಿ ಟ್ರ್ಯಾಕ್ ಮಾಡಬಹುದು.
ಇ-ನಾಮಿನೇಷನ್ ಸೌಲಭ್ಯ
ಇಪಿಎಫ್ ಸೌಲಭ್ಯಗಳಿಗಾಗಿ ನಾಮಿನಿಗಳನ್ನು ಸೇರಿಸಲು, ನವೀಕರಿಸಲು ಅಥವಾ ಬದಲಾಯಿಸಲು ಈ ಪೋರ್ಟಲ್ ಅವಕಾಶ ನೀಡುತ್ತದೆ. ಇದು ಸದಸ್ಯರ ಅನಿರೀಕ್ಷಿತ ನಿಧನದ ಸಂದರ್ಭದಲ್ಲಿ ಅವರ ಕುಟುಂಬದ ಅರ್ಹ ಸದಸ್ಯರಿಗೆ ಹಣ ಹಾಗೂ ಸೌಲಭ್ಯಗಳು ಸುಲಭವಾಗಿ ತಲುಪಲು ನೆರವಾಗುತ್ತದೆ.
ಕೆವೈಸಿ ನವೀಕರಣ (KYC Update)
ಯುಎಎನ್ ಗೆ ಲಿಂಕ್ ಮಾಡಲಾದ ಆಧಾರ್, ಪ್ಯಾನ್ ಮತ್ತು ಬ್ಯಾಂಕ್ ಖಾತೆ ವಿವರಗಳನ್ನು ಆನ್ ಲೈನ್ ನಲ್ಲೇ ಸೇರಿಸಬಹುದು ಅಥವಾ ನವೀಕರಿಸಬಹುದು. ಇದು ಕ್ಲೇಮ್ ಗಳು ವಿಳಂಬವಾಗುವುದನ್ನು ತಡೆಯಲು ಸಹಾಯ ಮಾಡುತ್ತದೆ.
ಪಿಎಫ್ ವರ್ಗಾವಣೆ ಸೇವೆಗಳು
ಉದ್ಯೋಗ ಬದಲಾಯಿಸಿದಾಗ, ಹಳೆಯ ಕಂಪನಿಯಿಂದ ಹೊಸ ಪಿಎಫ್ ಖಾತೆಗೆ ಹಣ ಮತ್ತು ಸೇವಾ ದಾಖಲೆಗಳನ್ನು ವರ್ಗಾಯಿಸಲು ಆನ್ ಲೈನ್ ಮೂಲಕ ಅರ್ಜಿ ಸಲ್ಲಿಸಬಹುದು ಹಾಗೂ ಅದರ ಸ್ಥಿತಿಯನ್ನು ಟ್ರ್ಯಾಕ್ ಮಾಡಬಹುದು.
ಯುಎಎನ್ ವಿವರ ಹುಡುಕುವುದು
ಒಂದು ವೇಳೆ ನಿಮ್ಮ ಹಳೆಯ ಯುಎಎನ್ ಮರೆತುಹೋಗಿದ್ದರೆ, ಮೂಲ ಗುರುತಿನ ವಿವರಗಳು ಮತ್ತು ದೃಢೀಕರಣದ ಮೂಲಕ ನಿಮ್ಮ ಅಸ್ತಿತ್ವದಲ್ಲಿರುವ ಯುಎಎನ್ಅನ್ನು ಮತ್ತೆ ಪಡೆಯಬಹುದು.
ಮರಣದ ಬಳಿಕ ಕ್ಲೇಮ್ ಗಳು
ಸದಸ್ಯರ ದುರಂತ ನಿಧನದ ನಂತರ, ಅರ್ಹ ನಾಮಿನಿಗಳು ಅಥವಾ ಕುಟುಂಬದ ಸದಸ್ಯರು ಪಿಎಫ್, ಪಿಂಚಣಿ ಮತ್ತು ವಿಮಾ ಸಂಬಂಧಿತ ಸೌಲಭ್ಯಗಳಿಗಾಗಿ ಆನ್ ಲೈನ್ ಮೂಲಕವೇ ಕ್ಲೇಮ್ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ.
ಇದನ್ನೂ ಓದಿ : ಶ್ರೀಲಂಕಾ ಟೆಸ್ಟ್ ಸರಣಿ : ‘ಇಂಪ್ಯಾಕ್ಟ್ ಪ್ಲೇಯರ್ ಆಫ್ ದಿ ಸೀರೀಸ್’ ಪ್ರಶಸ್ತಿ ಮುಡಿಗೇರಿಸಿಕೊಂಡ ಪ್ರಸಿದ್ಧ್ ಕೃಷ್ಣ
