ಬೆಂಗಳೂರು:ಜಿಬಿಎ ಲೆಕ್ಕದ ಪ್ರಕಾರ ಬೆಂಗಳೂರಿನಲ್ಲಿ ಸುಮಾರು 6,239 ಎಕರೆ ಪ್ರದೇಶದಲ್ಲಿ 183 ಕೆರೆಗಳು ಹರಡಿಕೊಂಡಿದ್ದು, ಇದೀಗ ಪೂರ್ವ ಹಾಗೂ ಉತ್ತರ ನಗರ ಪಾಲಿಕೆ ವ್ಯಾಪ್ತಿಯ ಹಲವು ಕೆರೆಗಳು ನೀರಿಲ್ಲದೆ ತಳ ಕಾಣುತ್ತಿವೆ. ಕೆರೆಗಳ ಅಭಿವೃದ್ಧಿ ನಿಧಾನಗತಿ, ಮಳೆ ನೀರು ಸಂಗ್ರಹದ ಕೊರತೆ ಮತ್ತು ವಿವಿಧ ಸರ್ಕಾರಿ ಇಲಾಖೆಗಳ ನಡುವಿನ ಸಮನ್ವಯದ ಕೊರತೆಯಿಂದಾಗಿ ಈ ಸಮಸ್ಯೆ ಎದುರಾಗಿದೆ.
ಕೆರೆಗಳಿಗೆ ಕೊಳಚೆ ನೀರು ಸೇರುತ್ತಿರುವ ಬಗ್ಗೆ ದೂರು ನೀಡಿದರೂ ಇಲಾಖೆಗಳು ಪರಸ್ಪರ ಹೊಣೆ ಹೊರಿಸುತ್ತಿವೆ ಎಂಬ ಆಕ್ಷೇಪಗಳಿದ್ದು, ಬಿಬಿಎಂಪಿ ಬದಲಾಗಿ ಜಿಬಿಎ ಬಂದರೂ ಕೆರೆಗಳ ಸಮಸ್ಯೆಗೆ ಶಾಶ್ವತ ಪರಿಹಾರ ಸಿಕ್ಕಿಲ್ಲ. ಕೆರೆಗಳ ಒತ್ತುವರಿ ತೆರವು, ಕೊಳಚೆ ನೀರು ತಡೆ ಮತ್ತು ಮಳೆ ನೀರು ಹರಿವಿನ ವ್ಯವಸ್ಥೆ ಸುಧಾರಣೆಗೆ ಅಧಿಕಾರಿಗಳು ತಕ್ಷಣ ಕ್ರಮ ಕೈಗೊಳ್ಳಬೇಕಿದೆ.
