ಸತ್ಯ ನಡೆಲ್ಲಾ, ಸುಂದರ್ ಪಿಚೈ ಹಿಂದಿಕ್ಕಿದ ಜಯಶ್ರೀ ಉಲ್ಲಾಲ್ | ಇವರೇ ಈಗ ವಿಶ್ವದ ಅತ್ಯಂತ ಶ್ರೀಮಂತ ಭಾರತೀಯ ಸಿಇಒ!

ನವದೆಹಲಿ: ಜಾಗತಿಕ ತಂತ್ರಜ್ಞಾನ ಕ್ಷೇತ್ರದಲ್ಲಿನ ಭಾರತೀಯ ಮೂಲದ ಸಿಇಒಗಳೆಂದ ತಕ್ಷಣ ನಮ್ಮ ಮನಸ್ಸಿಗೆ ಸಾಮಾನ್ಯವಾಗಿ ಬರುವುದು ಮೈಕ್ರೋಸಾಫ್ಟ್‌ನ ಸತ್ಯ ನಡೆಲ್ಲಾ ಅಥವಾ ಗೂಗಲ್‌ನ ಸುಂದರ್ ಪಿಚೈ ಹೆಸರುಗಳು. ಆದರೆ, ಈ ಚಿತ್ರಣ ಈಗ ಬದಲಾಗಿದೆ. ಟೆಕ್ ದಿಗ್ಗಜರಾದ ಇವರಿಬ್ಬರನ್ನೂ ಹಿಂದಿಕ್ಕಿರುವ ಅರಿಸ್ಟಾ ನೆಟ್‌ವರ್ಕ್ಸ್ ಮುಖ್ಯಸ್ಥೆ ಜಯಶ್ರೀ ಉಲ್ಲಾಲ್ ಅವರು ವಿಶ್ವದ ಅತ್ಯಂತ ಶ್ರೀಮಂತ ಭಾರತೀಯ ಮೂಲದ ಸಿಇಒ ಆಗಿ ಹೊರಹೊಮ್ಮುವ ಮೂಲಕ ಹೊಸ ದಾಖಲೆ ಬರೆದಿದ್ದಾರೆ.

ಹುರುನ್ ಇಂಡಿಯಾ 2025ರ ಪಟ್ಟಿಯಲ್ಲಿ ಅಗ್ರಸ್ಥಾನ

ಹುರುನ್ ಇಂಡಿಯಾ ಬಿಡುಗಡೆ ಮಾಡಿರುವ ಇತ್ತೀಚಿನ 2025ರ ಶ್ರೀಮಂತರ ಪಟ್ಟಿಯ ಪ್ರಕಾರ, ಅರಿಸ್ಟಾ ನೆಟ್‌ವರ್ಕ್ಸ್‌ನ (Arista Networks) ಅಧ್ಯಕ್ಷೆ ಮತ್ತು ಸಿಇಒ ಆಗಿರುವ ಜಯಶ್ರೀ ಉಲ್ಲಾಲ್ ಅವರು ಸಂಪತ್ತಿನ ಗಳಿಕೆಯಲ್ಲಿ ಅಗ್ರಸ್ಥಾನಕ್ಕೇರಿದ್ದಾರೆ. ಫೋರ್ಬ್ಸ್ ದತ್ತಾಂಶದ ಪ್ರಕಾರ, ಜಯಶ್ರೀ ಅವರ ಒಟ್ಟು ಆಸ್ತಿ ಮೌಲ್ಯ ಬರೋಬ್ಬರಿ 5.7 ಬಿಲಿಯನ್ ಡಾಲರ್ ಆಗಿದೆ. ಇದಕ್ಕೆ ಹೋಲಿಸಿದರೆ, ಗೂಗಲ್ ಸಿಇಒ ಸುಂದರ್ ಪಿಚೈ ಅವರ ಆಸ್ತಿ ಮೌಲ್ಯ 1.5 ಬಿಲಿಯನ್ ಡಾಲರ್ ಮತ್ತು ಮೈಕ್ರೋಸಾಫ್ಟ್ ಸಿಇಒ ಸತ್ಯ ನಡೆಲ್ಲಾ ಅವರ ಆಸ್ತಿ ಮೌಲ್ಯ 1.1 ಬಿಲಿಯನ್ ಡಾಲರ್ ಆಗಿದೆ. ಗ್ರಾಹಕ ಸ್ನೇಹಿ ಟೆಕ್ ಕಂಪನಿಗಳ ಮುಖ್ಯಸ್ಥರೇ ಹೆಚ್ಚು ಸುದ್ದಿಯಲ್ಲಿರುತ್ತಿದ್ದರೂ, ತೆರೆಮರೆಯಲ್ಲಿ ಸಾಧನೆಗೈದ ಜಯಶ್ರೀ ಅವರು ಈಗ ಸಂಪತ್ತಿನಲ್ಲಿ ಎಲ್ಲರಿಗಿಂತ ಮುಂದಿದ್ದಾರೆ.

ಯಾರಿದು ಜಯಶ್ರೀ ಉಲ್ಲಾಲ್?

ಬ್ರಿಟನ್‌ನಲ್ಲಿ ಜನಿಸಿದ ಭಾರತೀಯ ಮೂಲದ ಜಯಶ್ರೀ ಉಲ್ಲಾಲ್ ಅವರ ಬಾಲ್ಯ ಮತ್ತು ಶಾಲಾ ಶಿಕ್ಷಣ ಕಳೆದಿದ್ದು ಭಾರತದಲ್ಲೇ ಎಂಬುದು ವಿಶೇಷ. ಅವರು ನವದೆಹಲಿಯ ಕಾನ್ವೆಂಟ್ ಆಫ್ ಜೀಸಸ್ ಆ್ಯಂಡ್ ಮೇರಿ ಶಾಲೆಯಲ್ಲಿ ತಮ್ಮ ಪ್ರಾಥಮಿಕ ವಿದ್ಯಾಭ್ಯಾಸವನ್ನು ಪೂರೈಸಿದ್ದರು. ನಂತರ ಉನ್ನತ ಶಿಕ್ಷಣಕ್ಕಾಗಿ ಅಮೆರಿಕಕ್ಕೆ ತೆರಳಿದ ಅವರು, ಸ್ಯಾನ್ ಫ್ರಾನ್ಸಿಸ್ಕೋ ಸ್ಟೇಟ್ ಯೂನಿವರ್ಸಿಟಿಯಲ್ಲಿ ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್ ಪದವಿ ಮತ್ತು ಸಾಂಟಾ ಕ್ಲಾರಾ ವಿಶ್ವವಿದ್ಯಾಲಯದಿಂದ ಎಂಜಿನಿಯರಿಂಗ್ ಮ್ಯಾನೇಜ್‌ಮೆಂಟ್‌ನಲ್ಲಿ ಸ್ನಾತಕೋತ್ತರ ಪದವಿ ಪಡೆದರು. ಕಳೆದ 17 ವರ್ಷಗಳಿಂದ ಅವರು ಅರಿಸ್ಟಾ ನೆಟ್‌ವರ್ಕ್ಸ್ ಕಂಪನಿಯನ್ನು ಯಶಸ್ವಿಯಾಗಿ ಮುನ್ನಡೆಸುತ್ತಿದ್ದಾರೆ.

ಸಂಪತ್ತಿನ ಏರಿಕೆಗೆ ಕಾರಣವೇನು?

ಜಯಶ್ರೀ ಅವರ ಸಂಪತ್ತಿನ ಹಠಾತ್ ಏರಿಕೆಗೆ ಪ್ರಮುಖ ಕಾರಣ ಅರಿಸ್ಟಾ ನೆಟ್‌ವರ್ಕ್ಸ್‌ನಲ್ಲಿ ಅವರು ಹೊಂದಿರುವ ಸುಮಾರು ಶೇ. 3 ರಷ್ಟು ಷೇರು ಪಾಲು. ಪ್ರಸ್ತುತ ತಂತ್ರಜ್ಞಾನ ಜಗತ್ತಿನಲ್ಲಿ ಕೃತಕ ಬುದ್ಧಿಮತ್ತೆ (AI) ಮತ್ತು ಕ್ಲೌಡ್ ಕಂಪ್ಯೂಟಿಂಗ್ ಕ್ಷೇತ್ರಕ್ಕೆ ಭಾರಿ ಬೇಡಿಕೆ ಬಂದಿದೆ. ಅರಿಸ್ಟಾ ಕಂಪನಿಯು ಕ್ಲೌಡ್ ನೆಟ್‌ವರ್ಕಿಂಗ್ ಮತ್ತು ಡೇಟಾ ಸೆಂಟರ್‌ಗಳಿಗೆ ಅಗತ್ಯವಾದ ಉಪಕರಣಗಳನ್ನು ಒದಗಿಸುವುದರಿಂದ, ಕಂಪನಿಯ ಷೇರು ಮೌಲ್ಯ ಗಣನೀಯವಾಗಿ ಏರಿಕೆಯಾಗಿದೆ. 2008ರಲ್ಲಿ ಅರಿಸ್ಟಾ ಸೇರುವ ಮುನ್ನ ಅವರು ಸಿಸ್ಕೋ ಸಿಸ್ಟಮ್ಸ್ ಸೇರಿದಂತೆ ಪ್ರಮುಖ ಟೆಕ್ ಕಂಪನಿಗಳಲ್ಲಿ ಉನ್ನತ ಹುದ್ದೆಗಳನ್ನು ನಿಭಾಯಿಸಿದ್ದರು. ಇದೀಗ ಎಐ ಕ್ರಾಂತಿಯ ಪರಿಣಾಮವಾಗಿ ಅವರು ವಿಶ್ವದ ಗಮನ ಸೆಳೆದಿದ್ದಾರೆ.

ಇದನ್ನೂ ಓದಿ: ಭಾರತದ ಶಿಸ್ತಿಗೆ ಪಾಕ್ ಹತಾಶೆ ; ಹಸ್ತಲಾಘವ ನಿರಾಕರಣೆಗೆ ಪಿಸಿಬಿ ಬಾಸ್ ನಖ್ವಿ ಉಡಾಫೆಯ ತಿರುಗೇಟು