ಬೆಂಗಳೂರು : ಹೆಚ್ಚಿನ ಜನರ ಕೈಯಲ್ಲಿ ಸಂಬಳವೇ ಉಳಿಯೋದಿಲ್ಲ. ಸಂಬಳ ಕ್ರೆಡಿಟ್ ಆದ ಮೂರ್ನಾಲ್ಕು ದಿನಗಳಲ್ಲಿಯೇ ಖಾತೆ ಖಾಲಿಯಾಗುತ್ತದೆ. ಮನೆ ಬಾಡಿಗೆ, ಜೀವನ ನಿರ್ವಹಣೆ ವೆಚ್ಚ, ಲೈಫ್ ಸ್ಟೈಲ್, ಅಗತ್ಯ ವಸ್ತುಗಳ ಬೆಲೆಯೇರಿಕೆಗಳು ಇದಕ್ಕೆ ಒಂದು ಕಾರಣವಾದರೆ, ಸಾಲದ ಸುಳಿ, ಇಎಂಐ ಹೊರೆಯು ಇನ್ನೊಂದು ಕಾರಣವಾಗಿದೆ. ಹಾಗಾಗಿ, ಹಣಕಾಸು ತಜ್ಞರು ಹಣ ಹಾಗೂ ಸಾಲದ ನಿರ್ವಹಣೆಗೆ ಒಂದಷ್ಟು ಟಿಪ್ಸ್ ನೀಡಿದ್ದಾರೆ. ಅವು ಹೀಗಿವೆ ನೋಡಿ.
“ಹೆಚ್ಚಿನ ಜನರ ಸಂಬಳವು ಇಎಂಐ ಪಾವತಿಸುವುದಕ್ಕೇ ಹೋಗುತ್ತದೆ. ಇವರು ಮಾಡಿಕೊಂಡ ಸಾಲಗಳು ಇಎಂಐ ಹೊರೆಯನ್ನು ಹೆಚ್ಚಿಸಿವೆ. ಆದರೆ, ಹಣಕಾಸು ನಿರ್ವಹಣೆಯ ಮೂಲಕ ಸಾಲದ ಹೊರೆ ತಗ್ಗಿಸಿ, ನಿರುಮ್ಮಳವಾಗಿ ಜೀವನ ಸಾಗಿಸಬಹುದಾಗಿದೆ. ಇದಕ್ಕಾಗಿ ಜನರು ಒಂದಷ್ಟು ಶಿಸ್ತು ಅಳವಡಿಸಿಕೊಳ್ಳುವುದು ಅವಶ್ಯಕ” ಎಂದು ಎಚ್ ಬಿಡಿ ಫೈನಾನ್ಶಿಯಲ್ ಸರ್ವಿಸಸ್ ಚೀಫ್ ಕ್ರೆಡಿಟ್ ಆಫೀಸರ್ ರೋಹಿತ್ ಪಟವರ್ಧನ್ ಅವರು ಲೈವ್ ಮಿಂಟ್ ಸುದ್ದಿಸಂಸ್ಥೆಗೆ ತಿಳಿಸಿದ್ದಾರೆ.
ಮೊದಲು ಬಜೆಟ್ ಮಾಡಿ
ನಿಮ್ಮ ಪ್ರತಿ ತಿಂಗಳ ಖರ್ಚು ಹಾಗೂ ನಿಮ್ಮ ಸಂಬಳದ ಕುರಿತು ಪಕ್ಕಾ ಲೆಕ್ಕಾಚಾರ ಇರಬೇಕು. ಕೈಗೆ ಸಂಬಳ ಸಿಗುತ್ತಲೇ ಖರ್ಚು ಮಾಡುವ ಬದಲು, ಈ ತಿಂಗಳು ಎಷ್ಟು ಹಣ ಬೇಕಾಗುತ್ತದೆ? ನಾವು ಎಷ್ಟು ನಿಯಮಿತವಾಗಿ ಖರ್ಚು ಮಾಡಬೇಕು? ಎಲ್ಲಿ ಹಣ ಪೋಲಾಗುತ್ತಿದೆ ಎಂಬುದನ್ನು ಸ್ಪಷ್ಟವಾಗಿ ಲೆಕ್ಕಾಚಾರ ಹಾಕಬೇಕು. ಅದರಂತೆಯೇ ಬಜೆಟ್ ಮಾಡಬೇಕು. ಬಜೆಟ್ ಮೀರಿ ಹಣವನ್ನು ಖರ್ಚು ಮಾಡಬಾರದು. ಆಗ ಇಎಂಐ ಕಟ್ಟಿದರೂ ತಿಂಗಳ ಕೊನೆಯಲ್ಲಿ ಹಣ ಉಳಿಯುತ್ತದೆ ಎಂದು ಅವರು ಸಲಹೆ ನೀಡಿದ್ದಾರೆ.
ಇಎಂಐ ಹೊರೆಯನ್ನು ಕಡಿಮೆ ಮಾಡಲು, ಮೊದಲು ಸಾಲದ ಮಾಹಿತಿಯನ್ನು ಅವಲೋಕನ ಮಾಡಬೇಕು. ಅತಿ ಹೆಚ್ಚು ಬಡ್ಡಿ ಇರುವ ಸಾಲದ ಮೇಲಿನ ಇಎಂಐಗಳನ್ನು ಪಾವತಿಸಿ, ಇಡೀ ಸಾಲವನ್ನು ತೀರಿಸಬೇಕು. ಈ ಸಾಲಗಳು ತೀರುವವರೆಗೆ ಮತ್ತೆ ಸಾಲ ಮಾಡಬಾರದು. ಅನವಶ್ಯಕ ಹಾಗೂ ದುಬಾರಿ ವಸ್ತುಗಳನ್ನು ಇಎಂಐ ಆಧಾರದ ಮೇಲೆ ಖರೀದಿಸಬಹುದು. ಹೀಗೆ ಖರ್ಚು, ಸಾಲದ ಮೇಲೆ ನಿಯಂತ್ರಣ ಸಾಧಿಸಿದರೆ ಖಂಡಿತವಾಗಿಯೂ ಹಣವನ್ನು ಉಳಿಸಬಹುದು ಎಂಬುದು ರೋಹಿತ್ ಪಟವರ್ಧನ್ ಅವರ ಅಭಿಪ್ರಾಯವಾಗಿದೆ.
ಇದನ್ನೂ ಓದಿ : ಹೊಸ ಅವತಾರದಲ್ಲಿ ಸ್ಕೋಡಾ ಕುಶಾಕ್ ಫೇಸ್ಲಿಫ್ಟ್ ಲಾಂಚ್.. ಬೆಲೆ ಎಷ್ಟು?
