ನಾನೂ ಕೋಟ್ಯಧೀಶ ಆಗಬೇಕು, ಬೇರೆಯವರಿಂದ ಕೋಟ್ಯಧೀಶ ಎನಿಸಿಕೊಳ್ಳಬೇಕು, ಕೋಟಿ ರೂ. ಬಳಿ ಇದ್ದರೆ ಎಂತಹ ಅನುಭವ ಇರುತ್ತದೆ ಎಂಬುದನ್ನು ನೋಡಬೇಕು ಎಂಬ ಆಸೆ ಬಹುತೇಕ ಜನರಿಗೆ ಇರುತ್ತೆ. ಆದ್ರೆ, ಎಲ್ಲರೂ ಕೋಟಿ ರೂ. ಕನಸನ್ನು ನನಸು ಮಾಡಿಕೊಳ್ಳಲು ಆಗೋದಿಲ್ಲ. ಇನ್ನೂ ಕೆಲವೊಂದಿಷ್ಟು ಜನ ಪ್ರಯತ್ನ ಮಾಡೋದಿಲ್ಲ. ಆದ್ರೆ, ನಿಯಮಿತ ಹೂಡಿಕೆ, ಸುದೀರ್ಘ ಅವಧಿಗೆ ಕಾಯುವ ತಾಳ್ಮೆ ಇದ್ದರೆ, ಯಾರು ಬೇಕಾದರೂ ಕೋಟ್ಯಧೀಶರಾಗಬಹುದು. ಹೇಗಂತೀರಾ? ಇಲ್ಲಿದೆ ನೋಡಿ ಪ್ಲಾನ್.
ಕೋಟ್ಯಧೀಶ ಎನಿಸಿಕೊಳ್ಳಲು ಲಕ್ಷ ಲಕ್ಷ ರೂಪಾಯಿ ಹೂಡಿಕೆ ಮಾಡಬೇಕಿಲ್ಲ. ಲಕ್ಷಾಂತರ ರೂಪಾಯಿ ಸಂಬಳವೂ ಬೇಕಿಲ್ಲ. ಬರುವ ಸಂಬಳದಲ್ಲೇ ಒಂದಷ್ಟು ಹಣವನ್ನು ಸಿಸ್ಟಮ್ಯಾಟಿಕ್ ಇನ್ವೆಸ್ಟ್ ಮೆಂಟ್ ಪ್ಲಾನ್ ಅಥವಾ ಎಸ್ಐಪಿಯಲ್ಲಿ ಹೂಡಿಕೆ ಮಾಡುವ ಮೂಲಕ ಕೋಟ್ಯಧೀಶರಾಗಬಹುದಾಗಿದೆ. ಆದ್ರೆ, ಸುದೀರ್ಘ ಅವಧಿಗೆ ಕಾಯುವ ಹಾಗೂ ಹೂಡಿಕೆ ಮಾಡುವ ತಾಳ್ಮೆ ಇದ್ದವರು ಮಾತ್ರ ಇದನ್ನು ಸಾಧಿಸಬಹುದಾಗಿದೆ. ಹಾಗಾದ್ರೆ, ಕೋಟ್ಯಧೀಶ ಎನಿಸಿಕೊಳ್ಳಲು ಎಷ್ಟು ವರ್ಷಗಳವರೆಗೆ ಹೂಡಿಕೆ ಮಾಡ್ಬಹುದನ್ನ ಮುಂದೆ ತಿಳ್ಕೊಳಿ.
ತಿಂಗಳಿಗೆ 2,500 ಉಳಿಸಿದರೆ ಎಷ್ಟು ವರ್ಷ ಬೇಕು?
ಹೌದು, ಎಸ್ಐಪಿಯಲ್ಲಿ ಕನಿಷ್ಠ ಶೇ.15ರಷ್ಟು ರಿಟರ್ನ್ಸ್ ಎಂದರೂ ತಿಂಗಳಿಗೆ 2,500 ರೂ. ಹೂಡಿಕೆ ಮಾಡಿದರೆ ಕೋಟಿ ರೂ. ಗಳಿಸಲು 23 ವರ್ಷ ಹೂಡಿಕೆ ಮಾಡಬೇಕಾಗುತ್ತದೆ. ಇನ್ನು, ಸ್ವಲ್ಪ ಹೆಚ್ಚಿನ ಆದಾಯ ಇದೆ, ಹೂಡಿಕೆ ಮಾಡಬಹುದು ಎಂದ್ರೆ, ತಿಂಗಳಿಗೆ 5 ಸಾವಿರ ರೂ. ಹೂಡಿಕೆ ಮಾಡಬೇಕು. ಹೀಗೆ ಮಾಡಿದ್ರೆ ನೀವು 19 ವರ್ಷದಲ್ಲಿ ಕೋಟ್ಯಧೀಶರಾಗುತ್ತೀರಿ. ಅದೇ ಒಂದು ವೇಳೆ, 10 ಸಾವಿರ ರೂ. ಇನ್ವೆಸ್ಟ್ ಮಾಡಿದರೆ, 15 ವರ್ಷದಲ್ಲೇ ಕೋಟಿ ರೂ. ಗಳಿಸಬಹುದಾಗಿದೆ.
ಪ್ರತಿ ತಿಂಗಳು ಹೂಡಿಕೆ ಮಾಡುವ ಮೊತ್ತವನ್ನು ಹೆಚ್ಚು ಮಾಡಿದಂತೆಲ್ಲ, ಹೂಡಿಕೆಯ ಅವಧಿ ಅಂದ್ರೆ, ಕೋಟಿ ರೂ. ಗುರಿ ಸಾಧನೆಯ ಅವಧಿ ಕಡಿಮೆಯಾಗುತ್ತ ಹೋಗುತ್ತದೆ. ಉದಾಹರಣೆಗೆ, ತಿಂಗಳಿಗೆ 20 ಸಾವಿರ ರೂ. ಉಳಿಕೆ ಮಾಡಿದರೆ, ಕೇವಲ 11 ವರ್ಷದಲ್ಲಿಯೇ ಕೋಟಿ ರೂಪಾಯಿ ಗುರಿ ಮುಟ್ಟಬಹುದಾಗಿದೆ. ಅದೇ ರೀತಿ, ತಿಂಗಳಿಗೆ 30 ಸಾವಿರ ರೂ. ಹೂಡಿಕೆ ಮಾಡಿದ್ರೆ, 10 ವರ್ಷದಲ್ಲೇ ಕೋಟಿ ರೂ. ಗಳಿಸಬಹುದಾಗಿದೆ.
ಇದಕ್ಕೂ ಮೊದಲೇ ಹೇಳಿದಂತೆ, ಎಸ್ಐಪಿಯ ಮೊತ್ತ ಹೆಚ್ಚಾದಂತೆಲ್ಲ ಕಡಿಮೆ ಅವಧಿಯಲ್ಲೇ ಕೋಟಿ ರೂ. ಗುರಿ ಮುಟ್ಟಬಹುದಾಗಿದೆ. ಮಾಸಿಕ 50 ಸಾವಿರ ರೂ. ಉಳಿಸಿದರೆ 7 ವರ್ಷಗಳಲ್ಲಿ ಕೋಟಿ ರೂಪಾಯಿಗೆ ಒಡೆಯನಾಗಬಹುದಾಗಿದೆ. ಇನ್ನು, ಒಂದು ಲಕ್ಷ ರೂ. ಉಳಿಸಿದರೆ, ಕೇವಲ 5 ವರ್ಷದಲ್ಲಿ ಕೋಟ್ಯಧೀಶ ಎನಿಸಿಕೊಳ್ಳಬಹುದಾಗಿದೆ. ಹೀಗೆ ಮಾಡಲು ಪ್ರತಿ ವರ್ಷ, ಎಸ್ಐಪಿ ಮೊತ್ತವನ್ನು ಶೇ.10ರಷ್ಟು ಜಾಸ್ತಿ ಮಾಡಬೇಕಾಗುತ್ತದೆ. ಮತ್ತಿನ್ಯಾಕೆ ತಡ, ಬರುವ ಸೀಮಿತ ಸಂಬಳ ಅಥವಾ ಆದಾಯದಲ್ಲೇ ಒಂದಷ್ಟು ಮೊತ್ತವನ್ನು ಈಗಿನಿಂದಲೇ ಹೂಡಿಕೆ ಮಾಡಲು ಆರಂಭಿಸಿ. ನಿರ್ದಿಷ್ಟ ಅವಧಿಯ ನಂತರ ಕೋಟಿ ರೂ. ಗಳಿಸಿ.
ಗಮನಿಸಿ: ಎಸ್ಐಪಿಯ ಲಾಭವು ಷೇರು ಮಾರುಕಟ್ಟೆಯ ಏರಿಳಿತವನ್ನು ಆಧರಿಸಿದೆ. ಹಾಗಾಗಿ, ಇದು ರಿಸ್ಕ್ ಇರುವ ಇನ್ವೆಸ್ಟ್ ಮೆಂಟ್ ಆಗಿದೆ. ನಾವು ಮಾಹಿತಿ ದೃಷ್ಟಿಯಿಂದ ಮಾತ್ರ ಸ್ಟೋರಿಯನ್ನು ಪ್ರಸಾರ ಮಾಡಿದ್ದೇವೆ. ಯಾವುದೇ ರೀತಿಯ ಹೂಡಿಕೆ ಮೊದಲು ತಜ್ಞರನ್ನು ಸಂಪರ್ಕಿಸುವುದನ್ನು ಮರೆಯದಿರಿ.
