ಬೆಂಗಳೂರು : ಭಾರತೀಯ ಮಾರುಕಟ್ಟೆಯಲ್ಲಿ ಹ್ಯಾಚ್ಬ್ಯಾಕ್ ಕಾರುಗಳ ಮಾರಾಟವು 2026ರ ಜೂನ್ ತಿಂಗಳಲ್ಲಿ ಗಮನಾರ್ಹ ಚೇತರಿಕೆ ಕಂಡಿದ್ದು, ವಾರ್ಷಿಕ ಲೆಕ್ಕಾಚಾರದಲ್ಲಿ ಭಾರಿ ಏರಿಕೆ ದಾಖಲಿಸಿದೆ. ಪ್ರಮುಖ 16 ಹ್ಯಾಚ್ಬ್ಯಾಕ್ ಕಾರು ಆವೃತ್ತಿಗಳ ಒಟ್ಟು 79,419 ಯೂನಿಟ್ಗಳು ಈ ತಿಂಗಳಲ್ಲಿ ಮಾರಾಟವಾಗಿದ್ದು, 2025ರ ಜೂನ್ ತಿಂಗಳ 67,725 ಯೂನಿಟ್ಗಳ ಮಾರಾಟಕ್ಕೆ ಹೋಲಿಸಿದರೆ ಶೇಕಡಾ 17.27 ರಷ್ಟು ಪ್ರಗತಿ ಕಂಡುಬಂದಿದೆ. ಆದರೆ, ತಿಂಗಳಿನಿಂದ ತಿಂಗಳಿಗೆ (MoM) ಹೋಲಿಕೆ ಮಾಡಿದಾಗ, ಮೇ 2026 ರಲ್ಲಿ ಮಾರಾಟವಾಗಿದ್ದ 92,837 ಯೂನಿಟ್ಗಳಿಗೆ ಹೋಲಿಸಿದರೆ ಜೂನ್ ಮಾರಾಟದಲ್ಲಿ ಶೇಕಡಾ 14.45 ರಷ್ಟು ಕುಸಿತ ಕಂಡುಬಂದಿದೆ.
ವಾರ್ಷಿಕ ಮಾರಾಟದಲ್ಲಿ ಹ್ಯಾಚ್ಬ್ಯಾಕ್ ವಿಭಾಗವು ಉತ್ತಮ ಪ್ರಗತಿ ಸಾಧಿಸುತ್ತಿದ್ದರೂ, ಮಾಸಿಕ ಬೇಡಿಕೆಯಲ್ಲಿ ಏರಿಳಿತಗಳು ಮುಂದುವರಿದಿರುವುದು ವಾಹನ ಮಾರುಕಟ್ಟೆಯ ಸೂಕ್ಷ್ಮತೆಯನ್ನು ಬಿಂಬಿಸುತ್ತಿದೆ. ಇನ್ನು 2026ರ ಎರಡನೇ ತ್ರೈಮಾಸಿಕದ (Q2) ಒಟ್ಟು ಚಿತ್ರಣವನ್ನು ಗಮನಿಸಿದರೆ ಟ್ರೆಂಡ್ ಮತ್ತಷ್ಟು ಬಲವಾಗಿ ಗೋಚರಿಸಲಿದ್ದು, ಒಟ್ಟು 2,68,163 ಹ್ಯಾಚ್ಬ್ಯಾಕ್ ಕಾರುಗಳು ಮಾರಾಟವಾಗಿವೆ ಮತ್ತು 2025ರ ಇದೇ ಅವಧಿಗೆ (2,16,000 ಯೂನಿಟ್ಗಳು) ಹೋಲಿಸಿದರೆ ಶೇಕಡಾ 24.15 ರಷ್ಟು ಭಾರಿ ಏರಿಕೆ ದಾಖಲಾಗಿದೆ.
ಮಾರುತಿ ಸುಜುಕಿಯ ವ್ಯಾಗನ್ಆರ್ (WagonR) ಕಾರು ಒಟ್ಟು 16,952 ಯೂನಿಟ್ಗಳ ಮಾರಾಟದೊಂದಿಗೆ ಮಾಸಿಕ ಪಟ್ಟಿಯಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡಿದ್ದು, ಮೇ ತಿಂಗಳಿಗೆ ಹೋಲಿಸಿದರೆ ಶೇಕಡಾ 6.22 ರಷ್ಟು ಕುಸಿತ ಕಂಡಿದ್ದರೂ, ವಾರ್ಷಿಕ ಲೆಕ್ಕದಲ್ಲಿ ಶೇಕಡಾ 31.11 ರಷ್ಟು ಬಲವಾದ ಬೆಳವಣಿಗೆ ಸಾಧಿಸಿದೆ. ಅಂತೆಯೇ, ಮಾರುತಿ ಸ್ವಿಫ್ಟ್ (Swift) ಕಾರು 15,215 ಯೂನಿಟ್ಗಳೊಂದಿಗೆ ಎರಡನೇ ಸ್ಥಾನದಲ್ಲಿದ್ದು, ವಾರ್ಷಿಕವಾಗಿ 14.61% ಏರಿಕೆ ಮತ್ತು ಮಾಸಿಕವಾಗಿ 13.15% ಇಳಿಕೆ ಕಂಡಿದೆ. ಮಾರುತಿ ಬಲೆನೊ (Baleno) ಕಾರಿನ ಮಾರಾಟವು ವಾರ್ಷಿಕವಾಗಿ 39.28% ಹೆಚ್ಚಾಗಿ 12,488 ಯೂನಿಟ್ಗಳಿಗೆ ತಲುಪಿದ್ದರೂ, ಮೇ ತಿಂಗಳಿಗೆ ಹೋಲಿಸಿದರೆ ಶೇಕಡಾ 32.12 ರಷ್ಟು ಭಾರಿ ಕುಸಿತ ಅನುಭವಿಸಿದೆ.
ಮಾರುತಿ ಆಲ್ಟೊ ಕಾರಿನ ಭರ್ಜರಿ ಕಂಬ್ಯಾಕ್ ಮತ್ತು ಬೇಡಿಕೆಯಲ್ಲಿನ ಏರಿಕೆಹ್ಯಾಚ್ಬ್ಯಾಕ್ ವಿಭಾಗದಲ್ಲಿ ಅತಿ ಹೆಚ್ಚು ಅಚ್ಚರಿ ಮೂಡಿಸಿದ ಅಂಕಿ-ಅಂಶಗಳು ಮಾರುತಿ ಸುಜುಕಿಯ ಎಂಟ್ರಿ-ಲೆವೆಲ್ ಕಾರಾದ ಆಲ್ಟೊ (Alto) ಪಾಲಿಗೆ ಸೇರಿವೆ. ಈ ಕಾರು ಜೂನ್ ತಿಂಗಳಲ್ಲಿ ಒಟ್ಟು 10,388 ಯೂನಿಟ್ಗಳ ಮಾರಾಟವನ್ನು ದಾಖಲಿಸಿದ್ದು, ಕಳೆದ ವರ್ಷದ ಇದೇ ತಿಂಗಳಿಗೆ ಹೋಲಿಸಿದರೆ ಬರೋಬ್ಬರಿ 105.91% ರಷ್ಟು ಬೃಹತ್ ಜಿಗಿತ ಕಂಡಿದೆ. ಇದರ ಜೊತೆಗೆ, ಮಾಸಿಕ ಲೆಕ್ಕಾಚಾರದಲ್ಲಿಯೂ ಮೇ ತಿಂಗಳಿಗಿಂತ 5.07% ರಷ್ಟು ಏರಿಕೆ ದಾಖಲಿಸುವ ಮೂಲಕ ಅಚ್ಚರಿ ಮೂಡಿಸಿದೆ. ಎರಡನೇ ತ್ರೈಮಾಸಿಕದ ಪೂರ್ಣ ಅವಧಿಯಲ್ಲಿ ಆಲ್ಟೊ ಕಾರಿನ ಬೆಳವಣಿಗೆ ಇನ್ನಷ್ಟು ತೀಕ್ಷ್ಣವಾಗಿದ್ದು, ಕಳೆದ ವರ್ಷ ಇದೇ ಅವಧಿಯಲ್ಲಿ 15,626 ಯೂನಿಟ್ಗಳು ಮಾರಾಟವಾಗಿದ್ದರೆ, ಈ ಬಾರಿ ಅದು 31,131 ಯೂನಿಟ್ಗಳಿಗೆ ಏರಿಕೆಯಾಗಿದೆ. ಕಾಂಪ್ಯಾಕ್ಟ್ ಎಸ್ಯುವಿಗಳು ಹಾಗೂ ಪ್ರೀಮಿಯಂ ಹ್ಯಾಚ್ಬ್ಯಾಕ್ಗಳ ಹಾವಳಿಯಿಂದಾಗಿ ಮಾರುಕಟ್ಟೆಯಲ್ಲಿ ಆಲ್ಟೊ ತನ್ನ ಬೇಡಿಕೆ ಕಳೆದುಕೊಂಡಿದೆ ಎಂದು ವಿಶ್ಲೇಷಿಸಲಾಗುತ್ತಿತ್ತು. ಆದರೆ, ವರ್ಷದ ಆರಂಭದಲ್ಲಿ ಸಣ್ಣ ಕಾರುಗಳ ಮೇಲಿನ ಜಿಎಸ್ಟಿ ಕಡಿತಗೊಂಡ ಕಾರಣ ಬೆಲೆಯಲ್ಲಿನ ಅನುಕೂಲವು ಗ್ರಾಹಕರನ್ನು ಮತ್ತೆ ಎಂಟ್ರಿ-ಲೆವೆಲ್ ಕಾರುಗಳತ್ತ ಸೆಳೆಯುತ್ತಿದೆ ಎಂಬುದನ್ನು ಈ ಸತತ ಬೆಳವಣಿಗೆ ಸಾಬೀತುಪಡಿಸುತ್ತಿದೆ.
ಟಾಟಾ ಟಿಯಾಗೊ ಮಿಂಚು ಆದರೆ ಪ್ರೀಮಿಯಂ ಹ್ಯಾಚ್ಬ್ಯಾಕ್ಗಳ ತೀವ್ರ ಕುಸಿತ
ಮಾರಾಟದ ಚೇತರಿಕೆಯ ಲಾಭ ಎಲ್ಲಾ ಹ್ಯಾಚ್ಬ್ಯಾಕ್ ಕಾರುಗಳಿಗೂ ಸಿಕ್ಕಿಲ್ಲ. ಕೆಲವು ಕಾರುಗಳು ಉತ್ತಮ ಸಾಧನೆ ತೋರಿದರೆ, ಪ್ರೀಮಿಯಂ ಕಾರುಗಳು ಭಾರೀ ಹಿನ್ನಡೆ ಅನುಭವಿಸಿವೆ. ಇವಿ (EV) ಆವೃತ್ತಿಯನ್ನು ಒಳಗೊಂಡಂತೆ ಟಾಟಾ ಮೋಟಾರ್ಸ್ನ ಟಿಯಾಗೊ (Tiago) ಕಾರು ಜೂನ್ ತಿಂಗಳಲ್ಲಿ 7,329 ಯೂನಿಟ್ಗಳ ಮಾರಾಟದೊಂದಿಗೆ ಅತ್ಯುತ್ತಮ ಪ್ರದರ್ಶನ ನೀಡಿದ್ದು, ವಾರ್ಷಿಕವಾಗಿ 21.50% ಹಾಗೂ ಮಾಸಿಕವಾಗಿ ಬರೋಬ್ಬರಿ 75.42% ರಷ್ಟು ಏರಿಕೆ ಕಂಡಿದೆ.
ಹುಂಡೈ ಗ್ರ್ಯಾಂಡ್ ಐ10 ನಿಯೋಸ್ (Grand i10 NIOS) 4,865 ಯೂನಿಟ್ಗಳೊಂದಿಗೆ ಉಭಯ ಲೆಕ್ಕಾಚಾರದಲ್ಲೂ (ವಾರ್ಷಿಕ 14.82% ಮತ್ತು ಮಾಸಿಕ 66.61%) ಏರಿಕೆ ಕಂಡಿದೆ ಹಾಗೂ ಟೊಯೋಟಾ ಗ್ಲಾಂಜಾ (Glanza) 3,512 ಯೂನಿಟ್ಗಳ ಮಾರಾಟ ದಾಖಲಿಸಿದೆ. ಆದರೆ, ಪ್ರೀಮಿಯಂ ಹ್ಯಾಚ್ಬ್ಯಾಕ್ ವಿಭಾಗದಲ್ಲಿ ಟಾಟಾ ಆಲ್ಟ್ರೋಜ್ (Altroz) ಕಾರಿನ ಮಾರಾಟ 38.95% ವಾರ್ಷಿಕ ಕುಸಿತ ಕಂಡು ಕೇವಲ 2,426 ಯೂನಿಟ್ಗಳಿಗೆ ಸೀಮಿತವಾಗಿದೆ. ಮಾರುಕಟ್ಟೆಯಲ್ಲಿ ತೀವ್ರ ಆಘಾತ ಅನುಭವಿಸಿರುವುದು ಹುಂಡೈ ಐ20 (Hyundai i20) ಕಾರು. ಈ ಕಾರಿನ ಮಾರಾಟ ವಾರ್ಷಿಕವಾಗಿ 51.70% ಮತ್ತು ಮಾಸಿಕವಾಗಿ 61.51% ನಷ್ಟು ಪ್ರಪಾತಕ್ಕೆ ಕುಸಿದಿದ್ದು ಕೇವಲ 1,828 ಯೂನಿಟ್ಗಳಷ್ಟೇ ಸೇಲ್ ಆಗಿವೆ. ಇದರಿಂದಾಗಿ ಈ ಕಾರು ವಿಭಾಗದ ಅತ್ಯಂತ ಕಳಪೆ ಪ್ರದರ್ಶನ ನೀಡಿದ ಕಾರುಗಳ ಪಟ್ಟಿಗೆ ಸೇರ್ಪಡೆಯಾಗಿದೆ. ಜೊತೆಗೆ ಮಾರುತಿಯ ಸೆಲೆರಿಯೊ ಹಾಗೂ ಎಸ್-ಪ್ರೆಸ್ಸೋ ಕಾರುಗಳ ಮಾರಾಟವೂ ಇಳಿಮುಖವಾಗಿದೆ.
ಬ್ರ್ಯಾಂಡ್ ವಿಚಾರಕ್ಕೆ ಬಂದರೆ, ಹ್ಯಾಚ್ಬ್ಯಾಕ್ ವಿಭಾಗದಲ್ಲಿ ಮಾರುತಿ ಸುಜುಕಿ ಒಂಟಿ ಸಲಗದಂತೆ ಮೆರೆಯುತ್ತಿದೆ. ಕೇವಲ ಮಾರುತಿ ಸುಜುಕಿ ಕಂಪನಿಯೊಂದೇ ಜೂನ್ ತಿಂಗಳಲ್ಲಿ 57,332 ಕಾರುಗಳನ್ನು ಮಾರಾಟ ಮಾಡಿದ್ದು, ವಾರ್ಷಿಕವಾಗಿ 27.10% ರಷ್ಟು ಪ್ರಗತಿ ಸಾಧಿಸಿದೆ. ಇದು ಇಡೀ ಹ್ಯಾಚ್ಬ್ಯಾಕ್ ವಿಭಾಗದಲ್ಲಿ ಮಾರುತಿಗೆ 72.19% ರಷ್ಟು ಬೃಹತ್ ಮಾರುಕಟ್ಟೆ ಪಾಲನ್ನು ತಂದುಕೊಟ್ಟಿದೆ. ಟಾಟಾ ಮೋಟಾರ್ಸ್ 9,755 ಯೂನಿಟ್ಗಳೊಂದಿಗೆ ಎರಡನೇ ಸ್ಥಾನದಲ್ಲಿದ್ದರೂ ಮಾರುತಿಗಿಂತ ಬಹಳ ಹಿಂದೆಯೆ ಇದ್ದು ಕೇವಲ 12.28% ಮಾರುಕಟ್ಟೆ ಪಾಲು ಹೊಂದಿದೆ ಮತ್ತು ವಾರ್ಷಿಕವಾಗಿ 2.51% ಕುಸಿತ ದಾಖಲಿಸಿದೆ. ಇನ್ನು ಹುಂಡೈ ಕಂಪನಿಯ ಮಾರಾಟವು 16.57% ಕುಸಿತದೊಂದಿಗೆ 6,693 ಯೂನಿಟ್ಗಳಿಗೆ ಸೀಮಿತವಾಗಿದೆ. ಪೂರ್ಣ ತ್ರೈಮಾಸಿಕದ ಲೆಕ್ಕಾಚಾರದಲ್ಲಿ ಮಾರುತಿಯ ಪಾರುಪತ್ಯ ಇನ್ನಷ್ಟು ಸ್ಪಷ್ಟವಾಗಿದ್ದು, 2,03,761 ಯೂನಿಟ್ಗಳು (39.34% ಏರಿಕೆ) ಮಾರಾಟಗೊಂಡು 75.98% ರಷ್ಟು ಸಿಂಹಪಾಲು ಹೊಂದಿದೆ. ಟಾಟಾ ಮತ್ತು ಹುಂಡೈ ಎರಡೂ ಸೇರಿ ತ್ರೈಮಾಸಿಕ ಮಾರಾಟದಲ್ಲಿ ಕೇವಲ ಕಾಲು ಭಾಗದಷ್ಟು ಪಾಲು ಹೊಂದಿದ್ದು, ಸಣ್ಣ ಕಾರುಗಳ ಮಾರುಕಟ್ಟೆಯು ಸಂಪೂರ್ಣವಾಗಿ ಕೇವಲ ಒಂದೇ ತಯಾರಕನ ಹಿಡಿತದಲ್ಲಿ ಕೇಂದ್ರೀಕೃತವಾಗಿರುವುದನ್ನು ಇದು ಎತ್ತಿ ತೋರಿಸುತ್ತದೆ. ವೊಲ್ಯೂಮ್ ಕಡಿಮೆ ಇರುವ ಕಾರುಗಳ ಪೈಕಿ ಸಿಟ್ರನ್ ಸಿ3 (Citroen C3) 185.08% ರಷ್ಟು ದಾಖಲೆಯ ವಾರ್ಷಿಕ ಏರಿಕೆ ಕಂಡು 707 ಯೂನಿಟ್ಗಳು ಹಾಗೂ ರೆನಾಲ್ಟ್ ಕ್ವಿಡ್ (Renault Kwid) ವಾರ್ಷಿಕ 9.58% ಹೆಚ್ಚಳದೊಂದಿಗೆ 492 ಯೂನಿಟ್ಗಳ ಮಾರಾಟ ದಾಖಲಿಸಿವೆ.
ಇದನ್ನೂ ಓದಿ : ಭಾರತದಲ್ಲಿ ವಿವೋ T5e ಸ್ಮಾರ್ಟ್ಫೋನ್ ಬಿಡುಗಡೆ.. ಆಕರ್ಷಕ ಫೀಚರ್ಸ್, ಬೆಲೆ ಎಷ್ಟು?
